Matius 24 - Porjanjian Boharu Torjomahan Baso Dilakng Soari-ari

Rumah Allah paca'an dihancuran

¹ Lopas nantai, Yesus koluar doi' tongahlamanan Rumah Allah. Boko murid-Nyo datakng ko Sio, monunju'an kopoboi'an boko bangunan Rumah Allah nantai.

² Yesus bopandir ko sia', “Porotian somuonyo nantai! Dinga'anbo, nononyo, somuo inyo kaitn tiat nantai paca'an dihancuran. Somuo boko batu nian paca'an ditumpuran.”

Boko murid Yesus paca'an didorako'i

³ Lopas nantai Yesus botula' ko bukit Jaitun. Boko murid-Nyo datakng honda' bopandir agatn Sio. Kato sia', “Tulukng padahan ko koi, sombilo somuonyo nantai paca'an tojadi. Boko tando la'apo inyo monunju'an watu Duatn datakng agi' ko dunia ni'in? Boko tando la'apo inyo monunju'an ahir joman?”

⁴ Yesus monimbas sia', “Boboi'cam! Jangan sampai kaitn dikotumbuki.

⁵ Obai banya' urakng paca'an datakng inyo mongaku' dirinyo sama'an ubo Aku. Sia' paca'an bopandir, ‘Aku ninam Rajo Inyo Dijanjian Allah!’ Sia' paca'an mongontumbuki urakng banya'.

⁶ Kaitn paca'an mondinga' boko bunyi poparakan huatan borito poparakan. Apo jangan gola' somuonyo nian memang gola' tojadi. Apo nantai kinyo boroti dunia paca'an boahir dalapm watu inyo dampikng.

⁷ Banso paca'an boparakng molawatn banso bukai. Negara molawatn negara bukai. Di mono-mono paca'an ado kolaparan ongko gompa bumi.

⁸ Apo somuo hal nantai bayo pomula'an. Samo sama'an botina' inyo buntikan mooso kompodihan watu mohidap-porut.

⁹ Lopas nantai boko urakng paca'an mondorako'i ongko mombunuh kaitn. Soluruh dunia paca'an bonci' agatn kaitn obai kaitn murid-Ku.

¹⁰ Banya' urakng paca'an kinyo pocayo agi' ko Tuhatn. Sia' paca'an hala bonci' huatan hala mohianati.

¹¹ Banya' nabi palsu paca'an datakng huatan monyosat'an urakng banya'.

¹² Obai kojahatan mongkitn botambah, lalu banya' urakng co paca'an mongasihi agi'.

¹³ Apo boko urakng inyo totap botahatn sotia ko Aku sampai ahir, sia' paca'an disolamant'an.

¹⁴ Kabar Boi' mongona'i Koraja'an Allah paca'an diboritoan di soluruh dunia oca' somuo urakng mondinga'nyo. Lopas nian, hoyu' datakng ahir joman.”

Watu ajab sonsaro inyo kotakng borat

¹⁵ “Timpu joman komai Nabi Daniel bopandir mongona'i ‘ado siku' urakng jahat inyo mombonasoan.’ Urakng nantai paca'an bodiritn di tompat inyo suci. (Porotiancam oca' urakng inyo mombaco ni'in mongotohu'i rotinyo.) Yesus molajuan pandir-Nyo, Aman kaitn moniant pomandiran nabi Daniel nianan monjadi nyata,

¹⁶ lalu boko urakng di doerah Yudea gola' morarian diri ko boko bukit.

¹⁷ Urakng inyo tongahan di pucu' bubukan rumah, jangan turutn pakai' monguti' babatn borono inyo ado di dalapm rumahnyo.

¹⁸ Ubo nian jam urakng inyo tongahan di lakau, jangan bobali' pakai' monguti' jubahnyo.

¹⁹ Kasih bondar boko botina' inyo tongahan buntikan damo ija' monyusu'i bobia' watu nantai.

²⁰ Bodoacam oca' watu kaitn morarian diri, nantai kinyo kona' watu musipm dingin damo ari Sabat.

²¹ Obai watu boko ari nantai paca'an tojadi ajab sonsaro inyo kotakng borat. Ajab sonsaro ubo nantai bolupm kalo tojadi tangga'i asal mulo dunia sampai ni'in huatan co kalo paca'an tojadi agi'.

²² Soandainyo, watu nantai co dipulah lobih copat, lalu co nyiant siku' urakng pan inyo botahatn hidup. Apo obai boko urakng inyo dipilih Allah, watu nantai dipulah lobih copat.

²³ Watu nantai, aman ado urakng inyo bopandir ko kaitn, ‘Tiat, Rajo Inyo Dijanjian Allah ado di si'itan’ damo ‘Sio ado di su'utn,’ pasti kinyo bondar. Jadi jangan kaitn pocayo.

²⁴ Obai paca'an ado boko urakng datakng inyo mongaku' obai dirinyo nianam Rajo Inyo Dijanjian Allah. Apo sia' co bondar. Paca'an ado boko nabi palsu jam. Boko rajo palsu huatan boko nabi palsu nantai paca'an bulah bomacapm mujisat jam. Tujuan sia' oca' monyosat'an somuo urakng, huatan soandainyo mungkitn tomansu' boko urakng inyo dipilih Allah jam.

²⁵ Porotiancam! Aku udah momadahannyo ko kaitn mongona'i boko hal ni'in sobolupm tojadi.

²⁶ Jadi, aman urakng bopandir ko kaitn, ‘Tiat, Rajo Inyo Dijanjian Allah ado di padakng pasir,’ jangan kaitn botula' ko su'utn. Damo aman sia' bopandir, ‘Tiat, Sio botapu' dalapm kamar di su'utn,’ jangan pocayo.

²⁷ Obai watu Ana' Monsio bobali' ko dunia ni'in, somuo urakng ulih moniant kodatakan nantai agatn jolas. Samo sama'an kilat momanjah doi' timur huatan bosinar sampai ko barat. Ubo nianam kodatakan ‘Ana' Monsio.’

²⁸ Watu nantai tojadi, pasti somuo urakng paca'an tohu.”

Boko tando inyo monunju'an Yesus paca'an bobali' ko dunia ni'in

²⁹ “Kinyo manah lopas watu ajab sonsaro nantai, matoari paca'an monjadi golap. Bulatn kinyo paca'an borandai agi'. Boko bintakng paca'an jatu' doi' langit. Huatan boko ponguaso di langit paca'an boguyakng.

³⁰ Watu nantai, boko urakng paca'an moniant tando Ana' Monsio di langit. Somuo banso paca'an kotakng bulikng. Pas Ana' Monsio datakng di pucu' awatn, sia' paca'an moniant kuaso huatan komulia'an-Nyo.

³¹ Sio paca'an moutus boko molekat-Nyo agatn bunyi trompet inyo kotakng borakng. Boko molekat nantai paca'an mongumpulan boko urakng inyo dipilih Allah doi' hujukng timur sampai ko hujukng barat, huatan doi' hujukng utara sampai ko hujukng solatatn.”

³² “Bolajarcam doi' contoh ni'in mongona'i kayu ara. Aman boko ranggaunyo monjadi gomunt huatan mula'i botunas, kaitn tohu obai musipm komarau udah dampikam.

³³ Ubo nian jam, aman kaitn moniant boko tando nantai, lalu kaitn paca'an tohu obai watunyo udah dampikam.

³⁴ Kotakan bondar inyo Ku pandiran ni'in: Kinyo somuo urakng doi' joman ni'in paca'an mati sobolupm somuonyo ni'in tojadi.

³⁵ Pocayocam agatn pomandiran-Ku, obai biar pan langit huatan bumi paca'an boahir, pomandiran-Ku totap kinyo tohu boahir.

³⁶ Apo co nyiant urakng inyo mongotohu'i ari damo japmAku datakng agi'. Boko molekat di sorugo kinyo tohu huatan Ana' Allah, pan kinyo tohu jam. Ongkah Allah Bopai mo inyo tohu.”

Boko murid Yesus gola' hala siap pakai' kodatakan-Nyo agi'

³⁷ “Ubo ni'innam koadaan dunia mondampiki kodatakan Ana' Monsio. Koadaan dunia paca'an samo sama'an watu joman Nuh.

³⁸ Sobolupm pasakng bosar datakng, boko urakng makatn, minum, kawitn-nikah sama'an biaso. Sia' molabuhan sama'an nantai sampai watu arinyo Nuh mansu' ko dalapm porohunyo inyo bosar nantai.

³⁹ Sia' co kalo bopikir obai ado sosuatu inyo paca'an tojadi. Sia' co sadar sampai pasakng bosar nantai datakng lalu mombonasoan sia'. Ubo nian jam koadaan dunia sobolupm Ana' Monsio datakng agi' ko dunia ni'in.

⁴⁰ Watu nantai, urakng inyo pocayo ko Aku paca'an disolamant'an, apo urakng inyo kinyo pocayo paca'an dihukupm. Aman ado duo urakng di lakau, siku' urakng paca'an dibaba', apo siku' urakng inyo bukai paca'an ditinggalan.

⁴¹ Aman ado duo urakng botina' tongahan monutu gandupm bosamo, siku' urakng paca'an dibaba', apo siku' urakng inyo bukai paca'an ditinggalan.

⁴² Obai nantaiam, bojojagocam! Kaitn co tohu sombilo Tuhatn kolai datakng.

⁴³ Porhatiancam ni'in: siku' urakng pongolit datakng watu malapm co dikotohu'i. Aman puku' rumah udah tohu sombilo pongolit nantai datakng, pasti io bojojago oca' pongolit kinyo mansu'.

⁴⁴ Samo sama'an nantai jam, Ana' Monsio paca'an datakng co kotohuan. Jadi, kaitn gola' hala bososiap pakai' kodatakan-Nyo.”

Poumpamoan mongona'i hulutn inyo sotia huatan hulutn inyo kinyo sotia

⁴⁵ “Sopo kironyo urakng inyo pintar-corodi' huatan sotia ko Aku? Sio samo sama'an siku' hulutn inyo sotia huatan pintar-corodi'. Habakngnyo moangkat io monjadi kopala' boko hulutn inyo bukai. Habakngnyo moonji'i tanggukng-jawab ko io pakai' bobagian pomakatn ko boko hulutn inyo bukai pado watunyo.

⁴⁶ Aman io molabuhan tugasnyo nantai agatn sotia, watu habakngnyo datakng, hulutn nantai paca'an sonang.

⁴⁷ Pasti, habakngnyo paca'an moangkat io agi' monjadi pongurus somuo inyo umputn habakngnyo.

⁴⁸ Apo, soumpamonyo hulutn tontai jahat, io paca'an bopandir di dalapm hatinyo,

⁴⁹ ‘Ih Habakngku udah manaham kinyo datakng,’ lalu io mula'i boduda'an hulutn inyo bukai. Io makatn-minum bosamo agatn boko urakng pomabu'.

⁵⁰ Nah, habakngnyo paca'an bobali' pado ari io kinyo monyangko, pado watu kinyo dikotohu'inyo.

⁵¹ Pasti habakngnyo nantai paca'an mombunuh hulutn nantai, lalu ditikapannyo ko tompat hukupan pakai' somuo urakng inyo pompadah boi' nantai. Di siatan sia' paca'an monangis ongko bokorit gigi obai kotakan ajab sonsaro.”