Matius 23 - Porjanjian Boharu Torjomahan Baso Dilakng Soari-ari

Yesus momporingant'i oca' jangan pompadah boi' sama'an boko pomimpitn agama Yahudi

¹ Lalu Yesus bopandir ko boko urakng banya' huatan ko boko murid-Nyo.

² Kato-Nyo, “Boko guru agama Yahudi huatan boko urakng Farisi ado hak pakai' moajaran porintah huatan poraturan Allah inyo ditulis Musa.

³ Obai nantaiam, turuti huatan taat'icam somuo inyo sia' ajaran ko kaitn. Apo, sia' siku' co monjalatan la'apo pan inyo sia' ajaran. Obai nantaiam, jangan moniru boko porbuatan sia'.

⁴ Sia' mongomborati boko urakng agatn banya' poraturan agama inyo uyuh dilabuhan. Apo sia' co honda' monulukng monsio sodikit pan oca' poraturan nantai ulih dilabuhan!

⁵ Somuo inyo sia' labuhan bayo oca' urakng bukai mohormati sia'. Contohnyo: Kotak sombayakng inyo dikobat'an di koning huatan di longan, sia' mombosarannyo. Boko rumbai jubah, sia' pulah panjakng oca' kotiat'annyo lobih taat doi' urakng bukai.

⁶ Di rumah sombayakng ongko diboko tompat pogai sia' gala' dudu' di tompat inyo tohormat.

⁷ Di pasar, sia' gala' urakng bukai monyalapi agatn hormat ko sia'. Sia' jam gala' urakng mohormati agatn moningkau sia' ‘Guru’.

⁸ Apo jangan kaitn gala' disobut ‘Guru’. Obai, kaitn bayo ado siku' mo ‘Guru’, ia'an Aku. Huatan kaitn somuo somadikan.

⁹ Jangan kaitn moningkau siku' pan di dunia ni'in ‘Bopai’. Obai, kaitn bayo ado siku' mo Bopai, ia'an Allah Bopai inyo di sorugo.

¹⁰ Jangan jam kaitn honda' ditingkau ‘Pomimpitn’. Obai, kaitn bayo ado siku' Pomimpitn mo, ia'an Rajo Inyo Dijanjian Allah.

¹¹ Sobali'nyo, urakng inyo kotakan pontikng di antaro kaitn gola' monjadi polayatn kaitn.

¹² Allah paca'an morendahan somuo urakng inyo moninggian diri. Apo, Allah paca'an moninggian somuo urakng inyo morendahan diri.”

¹³ “Allah paca'an mohukupm kaitn boko guru agama Yahudi huatan boko urakng Farisi. Kaitn pompadah boi' apo hati kaitn jahat. Kaitn mohalaki urakng pakai' mansu' monjadi anggota koluarga Koraja'an Sorugo. Kaitn siku' co honda' mansu'. Apo, kaitn mohalaki boko urakng inyo bousaha mansu'. [

¹⁴ Allah paca'an mohukupm kaitn boko guru agama Yahudi huatan boko urakng Farisi. Kaitn pompadah boi' ja'. Kaitn monipu boko botina'-balu pakai' mondapat'an kodampuan sia'. Sampai rumah sia' pan kaitn kuti'. Kaitn moucap'an doa inyo panjakng-panjakng, apo nantai bayo pompadah ja'am. Obai nantaiam, Allah pasti paca'an mohukupm kaitn lobih borat doi' urakng bukai.]

¹⁵ Allah paca'an mohukupm kaitn boko guru agama Yahudi huatan boko urakng Farisi. Kaitn pompadah boi'. Kaitn bojalatn jouh-jouh bogoyap siku' urakng inyo ulih dipongaruhi oca' io pocayo mansu' agama kaitn. Lopas jadi io mansu' agama kaitn, lalu kaitn bulah io monjadi urakng inyo paca'an mansu' noraka, io urakng inyo duo kali lipat lobih jahat doi' kaitn.

¹⁶ Allah paca'an mohukupm kaitn boko pomimpitn inyo buto. Kaitn co moniant jalatn inyo bondar huatan monyosat'an urakng bukai. Kaitn mongajaran ubo ni'in: ‘Aman ado urakng inyo monguat'an janjinyo agatn bosumpah atas damo Rumah Allah, lalu io co gola' momonuhi sumpahnyo. Apo aman ado urakng inyo monguat'an janjinyo agatn sumpah atas kodampuan omas inyo ado di dalapm Rumah Allah, lalu io gola' momonuhi sumpahnyo.’

¹⁷ Kaitn boko urakng budu huatan buto! Kodampuan omas nantai monjadi husus pakai' Allah obai dipakai dalapm Rumah Allah. Jadi, pasti Rumah Allah nantai lobih pontikng doi' kodampuan omas nantai.

¹⁸ Kaitn pan mongajaran ubo ni'in jam, ‘Aman ado urakng inyo monguat'an janjinyo agatn bosumpah atas damo mesbah, lalu io co gola' momonuhi sumpahnyo. Apo aman ado urakng inyo monguat'an janjinyo agatn sumpah atas damo posombahan di pucu' mesbah nantai, jadi io gola' momonuhi sumpahnyo.’

¹⁹ Kaitn boko urakng buto! Posombahan nantai monjadi husus pakai' Allah obai diposombahan di pucu' mesbah nantai. Jadi, pasti mesbah nantai lobih pontikng daripado posombahan nantai.

²⁰ Obai nantaiam, aman ado urakng inyo bosumpah atas damo mesbah, lalu io bosumpah atas damo mesbah nantai huatan boko posombahan inyo ado di pucu'nyo jam.

²¹ Aman ado urakng inyo bosumpah atas damo Rumah Allah, lalu io bosumpah atas damo Rumah Allah huatan atas damo Allah jam inyo diapm di siatn nantai.

²² Aman ado urakng inyo bosumpah atas damo sorugo, lalu io bosumpah atas damo tahta Allah huatan atas damo Allah jam inyo dudu' di pucu'nyo.

²³ Allah paca'an mohukupm kaitn boko guru agama Yahudi huatan boko urakng Farisi. Kaitn pompadah boi' ja'. Kaitn moonju' ko Allah populuhan doi' hasil somuo tontanaman sampai inyo tokocit pan sama'an boko rorompahan solasih, adas manis, ongko jintatn. Apo kaitn co monaati boko porintah Allah dalapm Hukupm Torat inyo lobih pontikng. Ia'an nantai, koadilan, bolas kasihan huatan kosotiaan. Kaitn pontikng moonju' populuhan. Apo jangan sampai tongkolupatn monaati boko porintah inyo pontikng nantai jam!

²⁴ Uai kaitn boko pomimpitn inyo buto. Kaitn borotian hal inyo kocit apo co borotian hal inyo pontikng. Samo sama'an urakng inyo monyarikng lalat doi' minumannyo, apo io monolatn unta inyo ija' ado di dalapmnyo!

²⁵ Allah paca'an mohukupm kaitn boko guru agama Yahudi huatan boko urakng Farisi. Kaitn pompadah boi' samo sama'an cangkir ongko pirikng inyo kaitn borosihi bayo dibuai luarnyo mo. Apo di dalapm hati kaitn tama' huatan jahat.

²⁶ Uai urakng Farisi inyo buto! Borosihicam, di luar huatan di dalapm hati kaitn.

²⁷ Allah paca'an mohukupm kaitn boko guru agama Yahudi huatan boko urakng Farisi. Kaitn pompadah boi'. Kaitn samo sama'an pasaran inyo di cat putih. Di luarnyo kotiat'annyo boi' apo di dalapmnyo bisi agatn boko tulakng urakng mati huatan somuonyo buru'.

²⁸ Ubo nian jam kaitn. Aman urakng bukai moniant kaitn doi' luar, kaitn kotiat'an sama'an urakng inyo boi'. Apo sobondarnyo hati kaitn pompadah boi' huatan co honda' monuruti boko porintah Allah.

²⁹ Allah paca'an mohukupm kaitn boko guru agama Yahudi huatan boko urakng Farisi. Kaitn pompadah boi'. Kaitn bulah pasaran pakai' boko nabi huatan mohiasi boko tugu poringant'an boko urakng inyo hidup bondar di hadapan Allah.

³⁰ Kaitn bopandir, ‘Soumpamonyo koi hidup di joman angki-bayatn koi komai, pasti koi co jumpat agatn sia' mombunuh boko nabi nantai.’

³¹ Apo rotinyo kaitn siku' moaku'i obai kaitn niannam koturutan boko urakng inyo mombunuh boko nabi!

³² Jadi, lajuan ja' pokoroja'an jahat inyo udah dilabuhan ulih angki-bayatn kaitn nantai, sampai tuntunkng!

³³ Uai kaitn inyo jahat, kaitn koturutan urakng jahat samo sama'an todukng! Jangan bopikir kaitn ulih morarian diri doi' hukupan di noraka!

³⁴ Pondinga'anbo! Aku moutus ko kaitn boko nabi, boko urakng pintar-corodi', huatan boko guru inyo moajaran Pomandiran Allah. Ado doi' sia' inyo paca'an kaitn bunuh. Sobagi'an doi' sia' paca'an kaitn hukupm mati di kayu salib. Inyo bukai paca'an kaitn sipat di boko rumah sombayakng kaitn. Inyo bukai agi' paca'an kaitn dorako'i doi' kota ko kota.

³⁵ Obai nantaiam, kaitn paca'an monanggukng hukupan obai pombunuhan somuo urakng inyo co nyiant kosalahannyo, mula'i doi' pombunuhan Habel sampai ko pombunuhan nabi Zakharia, ana' Berekhya. Obai kaitn siku' udah mombunuh nabi Zakharia di antaro mesbah huatan Rumah Allah.

³⁶ Dinga'ancam! Somuo urakng joman ni'in paca'an monanggukng hukupan doi' somuonyo nantai.”

Yesus salu' obai urakng Israel inyo monula' Sio

³⁷ Lalu Yesus bopandir agatn salu', “Oi, boko urakng Yerusalem. Kaitn mombunuh boko nabi. Allah moutus boko urakng ko kaitn, apo kaitn monikapm sia' agatn batu sampai mati. Aku honda' hala molinduki kaitn, samo sama'an indai manu' inyo molinduki poana'annyo di babah sayapnyo. Apo, bolai' kaitn.

³⁸ Porotiancam! Allah co paca'an molinduki agi' Rumah-Nyo inyo ado di kota Yerusalem ni'in.

³⁹ Kaitn co paca'an moniant Aku agi' sampai kaitn sadar lalu bopandir mongona'i Aku, ‘Sio ni'in datakng mowakili Tuhatn Allah. Huncapm kito momuji Sio!’ ”