Matius 19 - Porjanjian Boharu Torjomahan Baso Dilakng Soari-ari

Ajaran Yesus mongona'i urakng saya'

¹ Lopas Yesus udah momandiran somuo nantai, Sio moninggalan propinsi Galilea ongko botula' ko doerah Yudea di soborakng sungai Yordan.

² Banya' urakng inyo tuyut Sio. Sio monyamani boko urakng inyo boponyakit di antaro sia' di santai.

³ Lalu, ado boboropo pomimpitn agama Yahudi doi' kolompok Farisi, sia' datakng ko Yesus honda' bogoyap caro pakai' monyalahan Sio. Kato sia', “Ulih cado siku' urakng lolaki monyaya' bininyo agatn alasan la'apo pan?”

⁴ Timbas Yesus, “Pasti kaitn udah mombaco di Buku Suci. Doi' mulonyo, Allah bulah sopasakng monsio, ia'an lolaki ongko botina'.

⁵ Lalu Sio bopandir, ‘Obai Aku bulah sia' socaro bopasakan, ongko siku' urakng lolaki paca'an songkayo agatn indai-bopainyo ongko kopal-kumpul agatn bininyo. Ia'an koduonyo monjadi sama'an sobukakng-sotubuh.’

⁶ Jadi, sia' kinyo dianggap duo urakng agi', apo sia' sobukakng-sotubuh. Obai sia' udah dijadian Allah sobukakng-sotubuh, ongko sia' co ulih disaya' monsio.”

⁷ Apo boko urakng Farisi nantai monimbas. Kato sia', “Aman ubo nian, ma'apo timpu joman komai Musa moonji'i porintah ni'in: Sotiap laki monyaya' bininyo gola' moonji'i surat tando saya' ko io.”

⁸ Timbas Yesus ko sia', “Musa moijitan siku' urakng laki monyaya' bininyo obai sia' koras kopala' samo sama'an kaitn. Apo nantai bukainyo kohonda' Allah doi' mulonyo.

⁹ Jadi dinga'anbo ni'in: Siku' urakng lolaki inyo monyaya' bininyo aman bukai obai bininyo bomporajoan, ongko lolaki nantai kawitn agatn botina' bukai, rotinyo io nantai bomporajoan jam.”

¹⁰ Lopas nantai, boko murid Yesus bopandir ko Sio, “Aman laki-bini co ulih saya', rotinyo lobih boi' aman co kawitn.”

¹¹ Apo Yesus bopandir ko sia', “Kinyo somuo urakng ulih mongoroti pomandiran nantai. Bayo boko urakng inyo udah dionji'i pongorotian doi' Allah.

¹² Obai, ado urakng inyo dilahiran kinyo ulih kawitn. Ado jam urakng inyo kinyo ulih kawitn obai dipulah sama'an nantai ulih urakng bukai. Ado jam urakng inyo obai kohonda' siku' pakai' co kawitn oca' ulih molayati husus pakai' Koraja'an Sorugo. Boko urakng inyo ulih mongoroti pomandiran nantai, kuba'annyo sia' mongoroti.”

Yesus momborokati boko bobia' kocit

¹³ Ado boko urakng mombaba' boko bobia' kocit datakng ko Yesus oca' Sio moncama' sia', ongko mondoa'an sia'. Apo, boko murid-Nyo monggodi'i boko urakng inyo mombaba' boko bobia' kocit nantai.

¹⁴ Apo Yesus bopandir, “Biaran ja'am boko bobia' kocit nantai datakng ko Aku! Jangan morarakng sia'. Obai boko urakng inyo monjadi samo sama'an boko bobia' kocit ni'in ia'an anggota koluarga Koraja'an Sorugo”

¹⁵ Yesus molota'an jari-Nyo ko kopala' sia' ongko mondoa'an sia'. Lopas nantai, Sio botula' doi' santai.

Urakng dampu huatan kohidupan inyo somanah-manahnyo di Sorugo

¹⁶ Ado siku' urakng inyo datakng ko Yesus. Katonyo, “Guru, porbuatan boi' la'apo inyo gola' aku labuhan oca' bodapat hidup somanah-manahnyo?”

¹⁷ Kato Yesus, “Pikiran holu'ai masud kolai sobolupm kolai botakutn ko Aku mongona'i la'apo inyo boi'. Obai, bayo Allah inyo boi'. Aman kolai honda' bodapat hidup somanah-manahnyo, ongko kolai gola' monaati boko porintah Allah.”

¹⁸ Urakng nantai bopandir, “Boko porintah Allah inyo mono?” Timbas Yesus, “Jangan mombunuh, jangan bomporajoan, jangan mongolit, jangan bulah tuduhan palsu,

¹⁹ hormaticam indai-bopai kolai, kasihicam sosamo kolai samo sama'an kolai mongasihi diri kolai siku'.”

²⁰ Kato urakng muda' nantai ko Sio, “Aku udah monaati somuo porintah nantai. La'apo agi' inyo gola' aku labuhan?”

²¹ Kato Yesus ko io, “Aman kolai honda' monaati Allah agatn boi', pulakngcam, jual somuo umputn kolai. Lalu pombagi-bagian duitnyo ko boko urakng jaro. Agatn ubo nian, kolai paca'an bodapat kodampuan di sorugo. Lopas kolai molabuhan somuonyo nantai, datakngcam agi' ko si'itn, lalu tuyut Aku cam”

²² Mondinga' pomandiran Yesus nantai, io monjadi kotakng salu' ongko moninggalan Yesus, obai io kotakng dampu.

²³ Yesus bopandir ko boko murid-Nyo, “Dinga'anbo ni'in: Uyuh bondar urakng dampu monjadi anggota koluarga koraja'an Sorugo.

²⁴ Sokali agi' dinga'anbo. Mansi mudah aman siku' unta moncubo mansu' molalu'i lubakng jayupm, daripado urakng dampu moncubo monjadi anggota koluarga koraja'an Allah.”

²⁵ Timpu boko murid-Nyo mondinga' nantai, sia' kotakng hiratn. Kato sia', “Uah, aman ubo nian, sopo inyo ulih disolamant'an?”

²⁶ Yesus borotian sia' ongko bopandir, “Co mungkitn monsio ulih molabuhan nantai. Apo, Allah ulih molabuhan la'apo pan.”

²⁷ Lalu Petrus botakutn ko Yesus, “Koi udah moninggalan somuo umputn koi oca' tuyut Duatn. Jadi la'apo inyo paca'an monjadi pongulihan koi?”

²⁸ Kato Yesus ko sia', “Dinga'anbo ni'in: Timpu Allah bulah somuo hal monjadi boharu, Ana' Monsio paca'an dudu' di pucu' krosi-Nyo inyo tohormat pakai' momorintah di dunia boharu ni'in. Kaitn boko murid-Ku pan paca'an dudu' di pucu' duo bolas krosi ponguaso. Kaitn paca'an mohakipi koduo bolas suku banso Israel.

²⁹ Ado urakng udah moninggalan rumahnyo, somadikan lolaki ongko botina', bopainyo, indainyo, poana'annyo, ongko lakaunyo. Somuo urakng inyo udah moninggalan somuo nantai obai pocayo ko Aku, sia' paca'an mondapat'an agi' doi' Allah soratus kali lipat. Sia' pan paca'an mondapat'an hidup somanah-manahnyo.

³⁰ Ado urakng inyo dianggap pontikng ni'in, apo nononyo Allah paca'an bulah sia' co pontikng. Ado jam urakng inyo dianggap co pontikng ni'in, apo nononyo Allah paca'an bulah sia' pontikng.”