Matius 17 - Porjanjian Boharu Torjomahan Baso Dilakng Soari-ari

Boboropo rasul Yesus moniant komulia'an Sio

¹ Onam ari lopas nantai, Yesus noi' ko sobuah bukit inyo tinggi. Sio bayo mombaba' Petrus, Yakobus ongko Yohanes somadikan Yakobus oca' sia' sonsiku'an bosamo agatn Sio di su'utn.

² Lalu sia' tigo moniant bukakng-tubuh huatan pakai'an Yesus borubah. Mato-muhonyo bocohayo sama'an matoari. Pakai'an-Nyo monjadi putih momanjah.

³ Colanant kotigo murid-Nyo nantai moniant Nabi Musa ongko Nabi Elia tongahan bopandir agatn Yesus.

⁴ Kato Petrus ko Yesus, “Tuhatn, kotakng boi' kito di si'itn. Aman Duatn honda', oca' koi pulahan tigo potungguan, sobuah pakai' Duatn, sobuah pakai' Nabi Musa, sobuah agi' pakai' Nabi Elia.”

⁵ Pontongahan io bopandir nantai, sopongirap ado awatn inyo torakng turutn monungkau'i sia' somuo. Allah bopandir doi' awatn nantai, “Ni'innam Ana'-Ku inyo Ku kasihi. Io monyonangan hati-Ku. Pondinga'ancam pomandiran-Nyo!”

⁶ Mondinga' saro nantai, boko murid-Nyo monjadi kotakng gola'. Sia' tundu' monyungkapan agatn mato-muho ko tanah.

⁷ Apo Yesus datakng lalu moncama' sia'. Kato Sio, “Bodiritncam! Jangan gola'!”

⁸ Timpu sia' huas, sia' kinyo moniant sopo pan agi'. Bayo Yesus siku' mo.

⁹ Watu sia' turutn doi' pucu' bukit nantai, Yesus bopandir ko sia'. Kato Sio, “Sobolupm Ana' Monsio bobali' hidup doi' komatian, jangan momadahan ko sopo pan mongona'i la'apo inyo hoyu' kaitn tiat.”

¹⁰ Lopas nian boko murid-Nyo botakutn ko Sio, “Ma'apo boko guru agama Yahudi mongatoan obai Nabi Elia gola' datakng sobolupm Rajo Inyo Dijanjian Allah?

¹¹ Timbas Yesus, Memang Nabi Elia paca'an datakng doholu momposiapan somuo hal pakai' kodatakan Rajo Inyo Dijanjian Allah.

¹² Apo dinga'anbo pandir-Ku ni'in: Nabi Elia inyo dimasud nantai udah datakng. Apo boko urakng kinyo konal agatn io. Sia' bulah kojahatan agatn io sosuai agatn kohonda' sia'. Ubo nian jam sia' paca'an bulah Ana' Monsio ajab sonsaro.”

¹³ Lalu boko murid-Nyo nantai mongoroti obai Yesus bopandir mongona'i Yohanes Pombaptis, urakng inyo samo sama'an nabi Elia nantai.

Yesus monundukng roh jahat doi' siku' urakng bobia' kocit

¹⁴ Lopas nian, Yesus ongko boko murid-Nyo bobali' ko urakng banya' nantai. Timpu nantai, siku' urakng lolaki datakng, tundu' monyungkapan di hadapan Yesus.

¹⁵ Kato io, “Tuhatn, aku momuhun kasihicam ana'ku. Io kompodihan obai ado ponyakit inyo opat bulah io gogilo babi. Io opat jatu' ko dalapm api huatan opat jatu' ko dalapm ara'i.

¹⁶ Aku udah mombaba'nyo ko boko murid Duatn, apo culih sia' monyamaninyo.”

¹⁷ Lalu, Yesus bopandir, “Urakng timpu joman ni'in jahat huatan kinyo pocayo! Ija' apo manah agi', Aku gola' bosamo agatn kaitn! Ija' apo manah agi', Aku gola' bosabar agatn kaitn!” Lalu Yesus bopandir ko Bopai bobia' nantai, “Baba' ana' kolai nantai ko si'itn.”

¹⁸ Yesus monundukng roh jahat inyo bulah bobia' nantai boponyakit oca' koluar doi' bobia' nantai. Jadi, koluaram roh jahat nantai. Lansukng nyamanam bobia' nantai.

¹⁹ Lopas nian, watu boko murid Yesus sonsiku'an agatn Sio, sia' datakng lalu botakutn, “Ma'apo koi kinyo ulih monundukng roh jahat nantai?”

²⁰ Yesus monimbasi sia', “Kaitn kinyo ulih monundukng roh jahat nantai obai kaitn kurakng pocayo. Dinga'anbo ni'in: Aman kaitn pocayo sodikit ja', soumpamo kaitn monyiuh bukit ni'in, ‘Pindahcam ko su'utn!’ Ongko bukit ni'in paca'an pindah. Aman kaitn pocayo sama'an nantai, kinyo paca'an ado sosuatu inyo kinyo ulih kaitn pulah. [

²¹ Apo roh jahat inyo ubo tontai ulih ditundukng agatn bodoa huatan bopuaso.]”

Pongonduo kalinyo, Yesus momadahan ajab sonsaro inyo paca'an dialapi-Nyo

²² Timpu Yesus ongko boko murid-Nyo bokumpul di doerah Galilea, Yesus bopandir ko sia', “Ana' Monsio paca'an ditangkap lalu disorahan ko boko urakng inyo molawatn Sio.

²³ Sia' paca'an mombunuh Sio, apo Allah paca'an bulah Sio bobali' hidup timpu ari kotigo.” Ongko, hati boko murid-Nyo kotakng salu' bondar.

Yesus mombayar pajak pakai' Rumah Allah

²⁴ Yesus ongko boko murid-Nyo botula' ko kota Kapernaum. Di siatn, ado boko ponagih pajak inyo mongumpulan duo pingkai' duit pira' pakai' Rumah Allah. Sia' datakng ko Petrus lalu bopandir, “Guru kaitn jumpat poraturan pakai' mombayar pajak Rumah Allah cado?”

²⁵ Timbas Petrus, “Au, Sio memang jumpat poraturan nantai mo.” Lalu, Petrus mansu' ko dalapm rumah. Sobolupm io sampat bopandir mongona'i nantai ko Yesus, Yesus botakutn ko io doholu. Kato Sio, “Simon Petrus, monurut kolai, boko rajo dunia ni'in mongumpulan pajak doi' sopo? Doi' rayatnyo siku' kata'an doi' urakng bukai?”

²⁶ Timbas Petrus, “Pasti doi' urakng bukai!” Jadi Yesus bopandir ko io, “Nantai boroti rayat kinyo wajib mombayar pajak nantai.

²⁷ Apo jangannam kito monyinggukng boko ponagih pajak nantai. Jadi, botula'cam ko danau ongko mongoil. Watu kolai bulih ikatn inyo potamo, buka'cam nyao ikatn nantai. Kolai paca'an monomuan ompat pingkai' duit pira' inyo cukup pakai' duo urakng mombayar pajak nantai. Onju' cam duit nantai ko sia' pakai' mombayar pajak kito duo.”