Matius 16 - Porjanjian Boharu Torjomahan Baso Dilakng Soari-ari

Boko pomimpitn agama Yahudi minto Yesus bulah mujisat

¹ Lopas nantai, ado boboropo pomimpitn agama Yahudi doi' kolompok Farisi ongko kolompok Saduki, sia' datakng ko Yesus. Sia' honda' moncubo'i Sio. Jadi, sia' minto oca' Yesus bulah boko mujisat pakai' mombutian ko sia' obai kuaso-Nyo doi' Allah.

² Apo Yesus monimbas, “Aman langit mirah timpu matoari honda' tonggolapm, ongko kaitn bopandir, ‘Pasti cohayonyo borosih.’

³ Apo aman ado lotupm huatan potakng-hiru' watu sunsukng, ongko kaitn bopandir, ‘Pasti ari honda' hujatn.’ Jadi, aman kaitn moniant langit, kaitn ulih mongotohu'i cuacanyo agatn bondar. Apo biar pan kaitn moniant boko kojadian inyo tojadi joman ni'in, kaitn totap kinyo dapat mongotohu'i kohonda' Allah.”

⁴ “Boko urakng di joman ni'in kotakan jahat ongko kinyo sotia ko Allah. Sia' monuntut suatu tando. Apo bayo sobuti' inyo paca'an dionju' ko sia', bayo mujisat sama'an inyo tojadi ko Nabi Yunus timpu joman komai.” Lopas nantai, Yesus botula'am moninggalan sia'.

Jagocam diri oca' co sonjumpat'an ajaran urakng Farisi ongko Saduki

⁵ Timpu sia' monyomborakng danau, boko murid Yesus tongkolupatn mombaba' roti.

⁶ Yesus bopandir ko sia', “Jagocam diri kaitn tohadap ragi doi' boko pomimpitn agama Yahudi, doi' kolompok Farisi huatan doi' kolompok Saduki.”

⁷ Jadi, sia' bopikir mongona'i pomandiran Yesus nantai. Sia' bopandir ko siku'-monyiku', “Yesus momandiran nantai obai kito co mombaba' roti.”

⁸ Apo Yesus mongotohu'i la'apo inyo sia' kisahan. Jadi Sio bopandir, “Kuba'annyo kaitn jangan botikakan mongona'i co nyiant roti! Kaitn kurakng pocayo ko Aku!

⁹ Kaitn ija' bolupm mongoroti jam! Tongkolupatn kaitam kojadian lima' roti dionju' ko lima' ribu urakng? Lalu ado banya' sisa'nyo inyo kaitn kumpulan.

¹⁰ Kata'an tongkolupatn kaitam mongona'i tujuh pingkai' roti inyo dimakatn ompat ribu urakng. Lalu ado tujuh kobudu' sisa'nyo inyo kaitn kumpulan.

¹¹ Kuba'annyo kaitn udah mongorotiam! Aku co bopandir ko kaitn mongona'i roti. Apo jagocam diri kaitn tohadap ragi doi' boko urakng Farisi huatan boko urakng Saduki.”

¹² Obai nantai, hoyu' sia' mongoroti. Yesus kinyo bomasud oca' sia' monjago diri tohadap ragi roti. Sio bomasud oca' sia' monjago diri tohadap ajaran urakng Farisi ongko urakng Saduki.

Rasul Petrus mongatoan Yesus nantai Kristus, Rajo Inyo Dijanjian Allah

¹³ Lopas nantai Yesus botula' ko doerah dampikng kota Kaisarea Filipi. Di santai Sio botakutn ko boko murid-Nyo, “Kuji boko urakng, sopo Ana' Monsio?”

¹⁴ Timbas sia', “Ado inyo bopandir Duatn ni'in Yohanes Pombaptis. Ado jam inyo bopandir Duatn ni'in Nabi Elia. Ado urakng bukai inyo bopandir Duatn ni'in Nabi Yeremia damo salah siku' urakng nabi bukai.”

¹⁵ Lalu, Yesus botakutn ko sia', “Apo, monurut kaitn siku', sopo Aku ni'in?”

¹⁶ Simon Petrus monimbas, “Duatn ni'in Rajo Inyo Dijanjian Allah. Duatn ni'in Ana' Allah inyo hala hidup.”

¹⁷ Kato Yesus ko io, “Simon ana' Yunus, kolai udah diborokati Allah Bopai-Ku inyo di sorugo. Obai kolai mondapat pongorotian mongona'i hal nantai doi' Sio, bukainyo doi' monsio.

¹⁸ Dinga'anbo! Kolai ia'an Petrus, inyo rotinyo ‘Bukit Batu’. Di pucu' bukit batu ni'in Aku paca'an mombangun jomaat-Ku huatan kuaso komatian kinyo mampu mongalahan sia'.

¹⁹ Aku paca'an moonju' ko kolai kunci Koraja'an Sorugo. Aman kolai mongobat sosuatu di dunia ni'in, hal nantai paca'an dikobat di sorugo jam. Aman kolai molopasan sosuatu di dunia ni'in, hal nantai paca'an dilopasan di sorugo jam.”

²⁰ Lopas nantai, Yesus morarakng boko murid-Nyo oca' jangan momadahan ko sopo pan obai Sio nantai Rajo Inyo Dijanjian Allah.

Yesus momadahan mongona'i ajab sonsaro inyo paca'an dialapi-Nyo

²¹ Mula'i doi' watu nantai, Yesus monjolasan ko boko murid-Nyo obai Sio gola' botula' ko Yerusalem. Boko pomimpitn banso Yahudi, boko imam kopala', huatan boko guru agama Yahudi paca'an bulah Sio ajab sonsaro. Sio paca'an dibunuh apo Allah paca'an bulah Sio bobali' hidup timpu ari kotigo.

²² Apo Petrus monari' Yesus ko sopia' lalu monikaki Sio. Kato Petrus, “Jangan, Tuhatn! Co mungkitn Allah mombiaran Duatn ajab sonsaro sama'an nantai!”

²³ Yesus mongilikng ko Petrus. Kato-Nyo, “Jangan kolai monjadi sama'an Rajo Sitatn mohalak-halaki Aku momonuhi roncana Allah. Kolai sonjumpat'an pikiran monsio, bukainyo pikiran Allah!”

Somuo murid Yesus gola' siap ajab sonsaro apo paca'an bodapat jam hidup di sorugo

²⁴ Lopas nian Yesus bopandir ko boko murid-Nyo, “Aman siku' urakng bondar-bondar honda' monjadi murid-Ku, io gola' moninggalan kosonangan dirinyo siku'. Io gola' momikul kayu salibnyo huatan hala tuyut Aku.

²⁵ Aku mongatoan nantai obai urakng inyo moutamoan kohidupannyo sikuꞌ, sobondarnyo kinyo paca'an mondapat'annyo. Apo urakng inyo monyorahan kohidupannyo siku' obai Aku, pasti paca'an mondapat'annyo.

²⁶ Soumpamonyo ado siku' urakng inyo ulih mondapat'an somuo hal di dunia ni'in, apo io kohilakan nyaonyo sobondarnyo io co borojoki. Io culihnyo momboli nyaonyo.

²⁷ Obai Ana' Monsio paca'an datakng agi' agatn kuaso Allah Bopai-Nyo huatan diiriki boko molekat-Nyo. Timpu nantai, Sio paca'an mombalas sotiap urakng sosuai agatn porbuatannyo.

²⁸ Dinga'anbo, ado urakng di antaro kaitn somuo di si'itn inyo kinyo paca'an mati sobolupm moniant Ana' Monsio datakng agatn Korajaan-Nyo.”