Matius 14 - Porjanjian Boharu Torjomahan Baso Dilakng Soari-ari

Yohanes Pombaptis dibunuh

¹ Timpu nantai, Herodes ia'an rajo di doerah Galilea. Io mondinga' boko borito mongona'i Yesus.

² Jadi, io bopandir ko boko pojabatnyo, “Pasti ni'in Yohanes Pombaptis inyo udah hidup agi'! Nantai sobabnyo io ado kuaso pakai' bulah mujisat.”

^3-4 Cukup manah sobolupm nantai, Herodes bobini agatn Herodias, apo komainyo Herodias nantaiam bini somadikan Herodes, damonyo Filipus. Jadi, Yohanes opat monogur Herodes. Katonyo, “Kulo culih bobini agatn Herodias!” Obai nantai, Herodes monyiuh oca' Yohanes ditangkap, dikobat agatn rantai lalu dimansu'an ko dalapm ponjara.

⁵ Sobondarnya Herodes honda' mombunuh Yohanes, apo io gola' agatn boko urakng. Obai, sia' moanggap Yohanes ia'an siku' nabi.

⁶ Apo watu ari ulakng tohutn Herodes, ana' botina' Herodias bonari di hadapan boko urakng inyo hadir di pogai nantai. Tariannyo nantai kotakan monyonangan hati Herodes,

⁷ ia'an pan Herodes bojanji ko bobia' nantai, io paca'an moonji'i lapo ja' inyo io pinto.

⁸ Bobia' nantai dipongaruhi ulih indainyo, Herodias. Jadi bobia' nantai bopandir, “Aku minto oca' kopala' Yohanes Pombaptis diponggal, dilota'an ko pucu' pinggatn ongko dibaba' kosi'itn!”

⁹ Mondinga' nantai, Herodes monyosal. Apo io udah bulah janji nantai dipohadapan somuo tamu'nyo. Obai nantai, io monyiuh oca' porminta'an bobia' botina' nantai ditopati.

¹⁰ Io monyiuh oca' kopala' Yohanes diponggal di ponjara.

¹¹ Lalu kopala'nyo dibaba' di dalapm pinggatn lalu dionju' kobobia' botina' nantai. Bobia' botina' nantai mombaba'nyo ko indainyo.

¹² Lopas nantai, boko murid Yohanes Pombaptis momocaki bangkai Yohanes doi' ponjara lalu momasarnyo. Lopas nian, sia' botula' ko Yesus lalu momadahan la'apo inyo udah tojadi.

Yesus bulah mujisat moonji'i pomakatn ko lima' ribu urakng

¹³ Lopas Yesus mondinga' borito nantai, Sio goyap tompat oca' Sio ulih sonsiku'an. Jadi, Sio noi' porohu ko tompat inyo langunt. Apo boko urakng banya' mondinga' mongona'i ko mono Sio botula'. Jadi sia' moninggalan boko kota sia' lalu botula' tuyut Yesus molalu'i jalatn darat.

¹⁴ Watu Yesus mondarat, Sio moniant kotakan banya' urakng di santai. Jadi, Sio mooso salu' agatn sia' lalu monyamani boko urakng inyo boponyakit di antaro sia'.

¹⁵ Watu ari mula'i malapm, boko murid Yesus mondataki Sio. Kato sia', “Ari mula'i malapm ongko tompat ni'in langunt. Jadi, siuh boko urakng ni'in botula' oca' sia' ulih momboli pomakatn di boko laman inyo dampikng si'itn.”

¹⁶ Apo Yesus bopandir ko sia', “Boko urakng ni'in culih botula'. Kaitn ja'am moonji'i sia' pomakatn!”

¹⁷ Timbas sia', “Koi bayo ado lima' pingkai' roti huatan duo iku' ikatn.”

¹⁸ “Baba' nantai ko si'itan,” kato Yesus.

¹⁹ Lalu Sio monyiuh boko urakng nantai dudu' di pucu' rumput. Lopas nian, Yesus monguti' lima' pingkai' roti agatn duo iku' ikatn nantai, monongadah ko langit, moucap torima' kasih ko Allah. Lalu Sio momingkai'-mingkai' roti nantai, dionju'nyo ko boko murid-Nyo oca' di pombagian ko boko urakng banya' nantai.

²⁰ Sia' somuonyo makatn sampai konyang. Lopas nantai, sia' mongumpulan sisa'nyo ko kobudu'. Ado duo bolas kobudu' inyo bisi!

²¹ Inyo jumpat makatn ado kiro-kiro lima' ribu urakng, bolupm tomansu' botina' agatn boko bobia'.

Yesus bojalatn di pucu' ara'i

²² Lopas nantai, Yesus monyiuh boko murid-Nyo noi' porohu lalu mondoholu'i Sio ko soborakng danau. Somontaro nantai, Sio monyiuh boko urakng banya' nantai pulakng.

²³ Lopas boko urakng banya' nantai botula', Yesus noi' ko pucu' bukit honda' bodoa sonsiku'an-Nyo. Pas ari mula'i malapm, Yesus ija' sonsiku'an-Nyo di bukit.

²⁴ Apo porohu inyo dikojumpati boko murid-Nyo udah jouh doi' pantai. Ado angin bonakau inyo bolawatan arah agatn porohu nantai. Jadi, boko golumbakng mohontapm porohu nantai.

²⁵ Kiro-kiro japm tigo malapm, datakam Yesus ko sia', bojalatn di pucu' ara'i.

²⁶ Watu boko murid-Nyo moniant Sio bojalatn di pucu' ara'i, sia' gola' bondar. “Nian sah hantu kiro!” kato sia'. Sia' mondongkakng-mondorah obai gola'.

²⁷ Apo Yesus lansukng bopandir ko sia', “Bacap ni'in Aku. Jangan gola'!”

²⁸ Lalu Petrus bopandir ko Sio, “Tuhatn, aman nian bondaram Duatn, siuh bo aku mondataki Duatn agatn caro bojalatn di pucu' ara'i jam.”

²⁹ Kato Yesus, “Kosi'itn cam!” Jadi Petrus turutn doi' porohu, bojalatn di pucu' ara'i mondataki Yesus.

³⁰ Apo pas Petrus moniant golumbakng bosar inyo dipuput bonakau nantai, lalu io monjadi gola' lalu mula'i tonggolapm. Io mondorah, “Tuhatn, tulukngku!”

³¹ Yesus lansukng mouluran longan-Nyo, moncanggapm Petrus. Kato Yesus, “Kolai kurakng pocayo! Kuba'annyo kolai jangan gangga'-gua'an!”

³² Watu Yesus ongko Petrus noi' ko dalapm porohu, angin bonakau nantai pan botongga'am.

³³ Somuo urakng inyo ado di porohu nantai monyombah Sio. Kato sia', “Duatn bondar-bondar Ana' Allah!”

Yesus monyamani boko urakng sakit di Genesaret

³⁴ Kali udah datakng di soborakng danau, sia' turutn doi' porohu di Genesaret.

³⁵ Pas boko urakng di tompat nantai mongonal obai Sio nantai Yesus, sia' momadahannyo ko soluruh doerah nantai. Boko urakng inyo boponyakit dibaba' ko Sio.

³⁶ Sia' muhun ko Sio oca' ulih moncama' jubah-Nyo, biar aja' bayo rumbai jubahnyo pan, somuo inyo moncama'-Nyo monjadi nyamanam.