Matius 13 - Porjanjian Boharu Torjomahan Baso Dilakng Soari-ari

Yesus moajaran caro urakng monorima' Pomandiran Allah

¹ Watu ari nantai jam Yesus moninggalan rumah nantai lalu botula' ko pinggir danau. Watu io dudu' di santai,

² banya' boko urakng datakng. Sia' bososongka'an mongorumuni Sio. Obai nantai, Sio noi' ko porohu lalu dudu' di santai. Sodakan urakng banya' nantai bodiritn di pantai.

³ Lalu Yesus mongajar banya' hal ko sia' agatn momakai poumpamoan. Kato-Nyo, “Ado siku' potani botula' pakai' moabur bonih.

⁴ Timpu io tongahan moabur, ado bonih inyo jatu' di jalatn. Boko burukng datakng lalu momua'inyo sampai habis.

⁵ Ado jam bonih inyo jatu' di tanah inyo rado batu, inyo kurakng tanahnyo. Bonih nantai copat tumbuh obai tanahnyo lipis.

⁶ Apo boko tontanaman nantai kinyo bourat. Obai nantaiam, watu matoari momancar, boko tontanaman nantai monjadi layu, lalu mati obai rangkai.

⁷ Ado bonih bukai inyo jatu' di tongah rado momant. Rado momant nantai mongkitn bosar lalu mohambat bonih nantai sampai mati.

⁸ Apo ado jam bonih inyo jatu' di tanah inyo subur. Boko tontanaman doi' bonih nantai mohasilan banya' buah. Ado inyo mohasilan tigo puluh kali lipat. Ado inyo bukai onam puluh kali lipat. Ado jam inyo mohasilan sampai soratus kali lipat.”

⁹ Aman bokolindakan, “Dinga'an pomandiran-Ku agatn boi'!”

¹⁰ Lopas nian boko murid Yesus datakng lalu botakutn ko Sio, “Mapo Duatn momakai poumpamoan aman mongajar boko urakng banya' nantai?”

¹¹ Timbas Yesus, “Kaitn udah dionji'i pongorotian mongona'i Koraja'an Sorugo inyo bolupm dikotohu'i urakng bukai. Apo urakng banya' ni'in bolupm dionji'i pongorotian nantai.

¹² Obai, urakng inyo udah ado, paca'an dionji'i lobih banya' agi'. Apo urakng inyo conyiant, la'apo inyo ado di io paca'an dikuti'an doi'nyo.

¹³ Nantaiam sobabnyo Aku mongajar sia' agatn momakai poumpamoan. Obai biar pan sia' moniant porbuatan-Ku, apo sia' kinyo bobondar borotian masudnyo. Sia' mondinga' pomandiran-Ku apo sia' kinyo bobondar borotian huatan kinyo mongoroti agatn rotinyo.

¹⁴ Jadi pomandiran Allah digonapi. Watu joman Nabi Yesaya monulis pomandiran Allah nantai sama'an ni'in bunyinyo: ‘Kaitn paca'an mondinga' pomandiran Allah, apo co mongoroti. Kaitn paca'an moniant pogota'an Allah apo co mongoroti.

¹⁵ Obai hati banso ni'in udah co honda' mongoroti. Kolindakan sia' udah tingal. Mato sia' udah buto. Nantai tojadi oca' sia' co moniant agatn mato sia', sia' co mondinga' agatn kolindakan sia', sia' co mongoroti agatn hati sia'. Jadi sia' co paca'an moninggalan dosa sia' huatan Aku co paca'an monyamani sia'.’ ”

¹⁶ “Apo kaitn boko murid-ku diborokati. Obai kaitn bobondar moniant huatan bobondar mondinga'.

¹⁷ Pondinga'ancam! Joman komai banya' nabi ongko urakng bukai inyo hidup bondar di hadapan Allah, honda' moniant somuo inyo kaitn tiat, apo co kalo moniantnyo. Sia' honda' mondinga' somuo inyo kaitn dinga', apo co kalo mondinga'nyo.”

¹⁸ “Obai nantai, dinga'an roti doi' poumpamoan mongona'i potani inyo moabur bonih nantai.

¹⁹ Bonih nantai samo agatn pomandiran Allah mongona'i Koraja'an Sorugo. Tanah jalatn nantai tontai monggambaran boko urakng inyo monorima' Pomandiran Allah ongkah mondinga'an ja'am apo kinyo honda' mongoroti. Lopas nian datakng Rajo Sitatn, mombulah sia' tongkolupatn agatn pomandiran Allah, sampai hati sia' kinyo pocayo.

²⁰ Tanah inyo rado batu nantai monggambaran boko urakng inyo mondinga' pomandiran Allah, monorima'nyo agatn sonang.

²¹ Apo sia' bayo pocayo sobontar mo obai co bourat. Aman sia' mohadapi pondorita'an huatan didorako'i obai sia' pocayo pomandiran Allah, lalu sia' co honda' pocayo Pomandiran Allah agi'.

²² Tanah inyo bisi rado momant nantai monggambaran boko urakng mondinga'an Pomandiran Allah, apo manah komanahannyo, sia' kuatir mongona'i kohidupan di dunia ni'in. Sia' ditipu obai kodampuan lobih pontikng. Somuo hal nantai mohambat sia' sampai co hidup sosuai agatn Pomandiran Allah.

²³ Apo ado boko urakng monorima' Pomandiran Allah samo sama'an tanah inyo subur. Sia' mondinga'mo, lalu mongorotimo. Obai nantaiam, ado hasil inyo boi'. Ado inyo mohasilan tigo puluh kali lipat. Ado inyo bukai onam puluh kali lipat. Ado jam inyo mohasilan sampai soratus kali lipat.”

Yesus bokisah mongona'i poumpamoan solalakng inyo tumbuh samo agatn gandupm

²⁴ Yesus monyampaian poumpamoan inyo bukai agi' ko sia'. Kato-Nyo, “Koraja'an Sorugo diumpamoan samo sama'an kisah ni'in. Ado siku' potani inyo moabur bonih gandupm inyo boi' di lakaunyo.

²⁵ Apo watu boko urakng tidu', datakng musuh potani nantai. Musuhnyo moabur bonih solalakng di antaro bonih gandupm nantai. Lalu io botula'.

²⁶ Watu gandupm nantai tumbuh, mula'i bobigi', kotiat'an jam solalakng nantai.

²⁷ Jadi, boko hulutn datakng ko potani nantai. Kato sia', ‘Pasti Duatn moabur bonih inyo boi' di lakau duatn. Jadi, solalakng nantai doi' mono?’

²⁸ Timbas potani nantai, ‘Pasti musuh ku inyo molabuhannyo.’ Lalu boko hulutn nantai bopandir ko io, ‘Kata'an duatn honda' oca' koi botula' moncabut boko solalakng nantai?’

²⁹ Apo io bopandir, ‘Jangan moncabut solalakng nantai watu ni'in. Aman kaitn molabuhan nantai, pasti ado gandupm inyo tuyut tocabut.

³⁰ Biaram gandupm ongko solalakng nantai tumbuh sosamo sampai watu mohanyi. Timpu nantaiam, aku paca'an bopandir ko boko urakng inyo bohanyi: Kumpulan ja'am somuo solalakng nantai. Lalu dikobat solalakng nantai pakai' dicucul. Lopas nian hoyu' mongumpulan somuo gandupm nantai ko dalapm jurukngku.’ ”

Koraja'an Sorugo soumpamo bigi' kocit ongko bopongaruh sama'an bahatn pongombakng roti

³¹ Yesus, monyampaian suatu poumpamoan bukai agi' ko sia'. Kato-Nyo, “Koraja'an Sorugo soumpamo bigi' sonsabi inyo ditanam di lakaunyo.

³² Memang bigi' nantai inyo kotakng kocit doi' somuo jonis bonih. Apo kali udahnyo tumbuh ongkah sonsabi nam inyo kotakng bosar doi' tontanaman bukai di lakau nantai. Sonsabi nantai monjadi kayu inyo cukup bosar ia'an pan boko burukng datakng bosayakng di boko dahatn kayu nantai.”

³³ Sio mongisahan poumpamoan ni'in jam ko sia'. Kato-Nyo, “Koraja'an Sorugo pan samo sama'an ragi roti. Siku' botina' mongurapmnyo ko dalapm kotakan banya' topukng. Ponjadi'nyo bulah somuo topukng inyo udah dikurapm nantai mongombakng.”

³⁴ Yesus mongajar somuonyo nantai, ko boko urakng agatn caro momakai poumpamoan. Sio hala momakai poumpamoan pakai' mongajar sia'. Sio co kalo monyampaian la'apo pan ko sia' aman co momakai poumpamoan.

³⁵ Yesus molabuhan nantai oca' pomandiran Allah monjadi nyata. Watu joman komai ado siku' nabi inyo monyampaian pomandiran Allah nantai bunyi ni'in: “Aku paca'an bopandir agatn caro momakai poumpamoan. Aku paca'an momboritoan boko hal inyo bolupm kalo dikotohu'i monsio soja' dunia dicipta'an.”

Yesus monjolasan poumpamoan mongona'i solalakng inyo tumbuh bosamo agatn gandupm

³⁶ Lopas nantai, Yesus moninggalan boko urakng banya' nantai, lalu mansu' ko dalapm rumah nantai. Boko murid-Nyo datakng lalu bopandir ko Sio, “Tulukng jolasan ko koi roti poumpamoan nantai tontai mongona'i solalakng di lakau.”

³⁷ Timbas Yesus, “Potani inyo moabur monggambaran Ana' Monsio.

³⁸ Lakau nantai monggambaran dunia ni'in. Bonih gandupm inyo boi' nantai monggambaran boko urakng anggota Koraja'an Sorugo. Apo solalakng nantai monggambaran boko urakng inyo pongikut rajo Sitatn.

³⁹ Musuh inyo moabur bonih solalakng nantai monggambaran Rajo Sitatn. Watu bohanyi nantai monggambaran ahir joman. Ongko boko urakng bohanyi nantai monggambaran boko molekat.

⁴⁰ Boko urakng inyo bohanyi nantai paca'an mongumpulan boko solalakng lalu moncuculnyo ko dalapm api. Sama'an nantai jam paca'an tojadi watu ahir joman.

⁴¹ Ana' Monsio paca'an monyiuh boko molekat-Nyo. Sia' paca'an mongumpulan somuo hal inyo monyobab'an monsio bulah dosa ongko boko urakng inyo molabuhan kojahatan. Boko molekat nantai paca'an mongoluaran somuo inyo jahat nantai doi' Koraja'an-Nyo,

⁴² lalu mombuakan sia' ko dalapm api noraka. Di santai sia' paca'an monangis ongko bokorit gigi obai kotakan mondorita'.

⁴³ Lalu boko urakng inyo hidup bujur bondar di hadapan Allah paca'an bosinar sama'an matoari di dalapm Koraja'an Allah Bopai sia'. Aman ado kolindakan, pondinga'ancam pomandiran-Ku agatn boi'.”

Koraja'an Sorugo kotakan borogo ongko monyonangan

⁴⁴ “Koraja'an Sorugo samo sama'an kodampuan inyo kotakan mahal inyo topondapm di lakau. Ado urakng inyo monomuan kodampuan nantai. Sio kotakng sonang-asau. Obai nantai, io momondapmnyo agi', lalu botula' monjual somuo umputnnyo oca' io ulih momboli lakau nantai.

⁴⁵ Koraja'an Sorugo jam sama'an kisah ni'in. Siku' podagakng bogoyap mutiara inyo boi'.

⁴⁶ Lopas io monomuan mutiara inyo kotakan borogo, io botula' monjual somuo umputnnyo oca' io ulih momboli mutiara nantai.”

Urakng jahat paca'an disongkayoan doi' urakng inyo hidup bondar di pohadapan Allah

⁴⁷ “Koraja'an Sorugo jam samo sama'an kisah ni'in. Boko nolayatn monyingkapan jalo bosar di danau. Jalo nantai bulih bomacapm jonis ikatn.

⁴⁸ Lopas jalo bisi agatn ikatn, boko nolayatn monari' jalo nantai ko darat. Sia' dudu' mongopili boko ikatn inyo boi' ko dalapm roga'. Apo ikatn inyo jahat sia' dibuakan.

⁴⁹ Sama'an nantaiam inyo paca'an tojadi watu ahir joman. Boko molekat paca'an datakng monyongkayoan urakng inyo jahat doi' urakng inyo hidup bondar di hadapan Allah.

⁵⁰ Boko molekat paca'an mombuakan urakng inyo jahat ko dalapm api noraka. Di santai sia' paca'an monangis ongko bokorit gigi obai kotakan mondorita'.”

⁵¹ Lalu Yesus botakutn ko boko murid-Nyo, “Kata'an kaitn mongoroti somuonyo nantai?” Sia' monimbas, “Au, koi mongoroti.”

⁵² Lalu Yesus bopandir ko sia', “Obai nantai sotiap guru agama Yahudi inyo monorima' polajaran mongona'i koraja'an sorugo nantai, samo sama'an siku' puku' rumah agatn boko bando barakngnyo. Doi' santai, io mongoluaran kodampuan inyo boharu ongko kodampuan inyo manah.”

Boko urakng di laman Yesus nantai monula' Sio

⁵³ Lopas Yesus jadi mongisahan boko poumpamoan nantai, Sio moninggalan tompat nantai.

⁵⁴ Sio bobali' ko laman-tompu' tompat asal-Nyo lalu mongajar boko urakng di santai, di rumah sombayakng sia'. Lalu sia' hiratn. Kato sia', “Doi' mono Urakng ni'in bodapat kopintar-corodi'an sama'an nantai. Doi' mono Sio bodapat kuaso ongko mombulah mujisat ubo nantai?

⁵⁵ Padohal, Sio ongkah urakng biaso mo. Sio ninam ana' doi' urakng tukakng kayu. Indai-Nyo bodamoan Maria. Boko somadikan-Nyo ia'an Yakobus, Yusuf, Simon ongko Yudas.

⁵⁶ Boko somadikan-Nyo inyo botina', somuonyo ado bosamo agatn kito. Jadi, doi' mono io bodapat kopintar-corodi'an huatan kuaso nantai?”

⁵⁷ Jadi, sia' monula' Sio. Lalu, Yesus bopandir ko sia', “Sikuꞌ nabi dihormati di mono-mono, apo kinyo di tompat asalnyo siku'.”

⁵⁸ Ia'an Yesus kinyo molabuhan banya' mujisat di santai obai sia' kinyo pocayo agatn-Nyo.