Matius 11 - Porjanjian Boharu Torjomahan Baso Dilakng Soari-ari

¹ Jadi, Yesus moonji'i boko potunju' nantai ko koduo bolas murid-Nyo. Lopas nantai, Sio botula' doi' su'utn mongajar huatan momboritoan Kabar Boi' di boko kota sia'.

Yesus ongko Yohanes Pombaptis

² Yohanes Pombaptis tongahan ado dalapm ponjara. Io mondinga' mongona'i pogota'an Yesus Kristus.

³ Ongko Yohanes monyiuh boko murid-nyo ko Yesus pakai' botakutn, “Duatn ninam Rajo Inyo Dijanjian Allah? Kata'an Sio urakng bukai? Kata'an koi gola' ija' monanti kodatakan-Nyo?”

⁴ Yesus monimbas sia', “Bobali' kaitn ko Yohanes. Padahan ko io mongona'i somuo inyo udah kaitn tiat huatan dinga'.

⁵ Urakng buto moniant. Urakng lumpuh bojalatn. Urakng boponyakit kulit inyo bogola'i jadi nyamanam. Urakng tingal mondinga'. Urakng mati bobali' hidup agi'. Kabar Boi' diboritoan ko urakng jaro.

⁶ Diborokati urakng inyo co monula' Aku!”

⁷ Lopas koduo murid Yohanes nantai botula', Yesus mula'i monjolasan ko urakng banya' mongona'i sopo Yohanes sobondarnyo. Kato Yesus, “Timpu Yohanes bodiapm di padakng pasir, kaitn botula' ko su'utn pakai' moniant la'apo? Pasti kinyo bayo honda' moniant solamba'i rumput inyo boguyakng ditiup angin, pan? Obai rumput kinyo pontikng.

⁸ Jadi, kaitn botula' ko su'utn pakai' moniant la'apo? Pasti kinyo pakai' moniant urakng inyo bopakaian mahal. Urakng inyo bopakaian mahal bodiapm dalapm istana bukainyo di padakng pasir.

⁹ Jadi, kaitn botula' ko su'utn pakai' moniant la'apo? Pasti pakai' moniant siku' urakng nabi, bai? Apo, dinga'anbo ni'in. Io lobih pontikng doi' siku' urakng nabi biaso.

¹⁰ Obai timpu joman komai ado nabi inyo monulis pomandiran Allah mongona'i Yohanes ni'in: ‘Dinga'anbo! Aku paca'an monyiuh utusan-Ku mondoholu'i Duatn. Utusan-Ku nantai paca'an momposiapan boko urakng pakai' kodatakan Duatn.’

¹¹ Jadi poniant'an, obai Yohanes nantai pontikng daripado somuo urakng bukai di dunia ni'in sampai watu ni'in. Apo somuo anggota koluarga Koraja'an Sorugo, tomansu' inyo palikng kinyo pontikng, somuo sia' lobih pontikng daripado Yohanes nantai.

¹² Tangga'i Yohanes Pombaptis momboritoan Kabar Boi' sampai watu ni'in, ado boko urakng inyo monontakng Koraja'an Sorugo. Agatn kokorasan, sia' bousaha mongalahan Koraja'an Sorugo.

¹³ Sampai kodatakan Yohanes, somuo nabi huatan Hukupm Torat monyampaian posatn doi' Allah mongona'i boko hal inyo paca'an tojadi.

¹⁴ Di dalapmnyo pan ditulis mongona'i urakng inyo samo sama'an nabi Elia inyo paca'an datakng. Aman kaitn honda' pocayo, Yohanes Pombaptis nantai urakng inyo samo sama'an nabi Elia.

¹⁵ Aman bokolindakan, dinga'an pomandiran-Ku agatn boi'.

¹⁶ Boko urakng joman ni'in samo sama'an boko bobia' kocit inyo monggaso di pasar. Boko bobia' nantai dudu' mondorah ko boko pokawalannyo,

¹⁷ ‘Koi moniup sulikng obai koporindakan apo kaitn kinyo bonari. Koi bonyanyi lagu bulikng-undu' apo kaitn kinyo monangis.’

¹⁸ Obai Yohanes Pombaptis datakng, kinyo makatn, kinyo minum, apo sia' bopandir, ‘Io korasu'an sitatn!’

¹⁹ Lopas nian Ana' Monsio datakng. Sio makatn, Sio minum, apo sia' bopandir Sio urakng kaha', pomabu', ‘Kawal ponagih pajak huatan urakng bukai inyo bodosa.’ Apo sia' salah obai porbuatan urakng mombutian aman urakng nantai bondar-bondar bisi kopintar-corodi'an doi' Allah kata'an cado.”

Yesus monogur boko urakng diboboropo kota inyo kinyo pocayo ko Sio

²⁰ Yesus bulah kotakng banya' mujisat di boboropo kota di doerah Galilea. Apo boko urakng di boko kota nantai totap kinyo botongga' bulah dosa ongko kinyo monyonangan hati Allah. Jadi Yesus monogur sia' agatn koras. Kato-Nyo,

²¹ “Allah paca'an mohukupm kaitn urakng kota Khorazim ongko urakng kota Betsaida. Aku udah molabuhan banya' mujisat di tongah-tongah kaitn. Soumpamonyo, Aku bulah boko mujisat nantai di kota Tirus ongko Sidon, pasti boko urakng di su'utn udah botongga' bulah dosa. Pasti sia' udah momakai pakai'an bulikng-undu' ongko mongguguran habu di pucu' kopala' sia' pakai' monunju'an sia' bulikng obai dosanyo.

²² Dinga'anbo! Timpu Ari Ponghakipan Allah nono, hukupan ko kaitn di Khorazim huatan Betsaida paca'an lobih borat daripado hukupan ko boko urakng jahat di Tirus ongko Sidon nantai.

²³ Huatan kaitn inyo di laman Kapernaum. Jangan bopikir kaitn paca'an dihormati huatan paca'an mansu' sorugo! Kaitn paca'an dibuakan ko noraka! Obai Aku udah bulah boko mujisat di tongah-tongah kaitn. Soumpamonyo, Aku molabuhan boko mujisat di kota Sodom, pasti boko urakng di su'utn botongga' bulah dosa. Ongko, kota nantai kinyo gola' dihancuran sama'an inyo udah tojadi timpu joman komai. Soumpamonyo ubo nian, kota nantai tontu ija' bodiritn sampai ari ni'in.

²⁴ Dinga'anbo! Timpu Ari Ponghakipan Allah nononyo, hukupan ko kaitn di Kapernaum paca'an lobih borat daripado hukupan ko boko urakng jahat di Sodom nantai.”

Yesus mombaba' urakng inyo bobobatn borat pakai' monjadi murid-Nyo

²⁵ Timpu nantai Yesus bodoa, “Bopai, Duatn umputn somuo dunia ni'in. Aku bosukur obai Duatn kinyo moombakan somuo nantai doi' urakng pintar-corodi', apo Duatn monyatoan somuonyo nantai ko masrakat kocit.

²⁶ Ihai, Bopai, caro nantai monyonangan hati Duatn!”

²⁷ Ongko Yesus bopandir ko boko urakng, “Bopai-Ku udah moonju' somuo hal ko Aku. Co nyiant siku' pan inyo mongonal Ana' solaitn Bopai, nyiant siku' pan inyo mongonal Bopai solaitn Ana', huatan boko urakng inyo dipokonalan Ana' agatn Bopai.

²⁸ Datakngcam ko Aku, somuo kaitn inyo uyuh jorih monanggukng boko kosusahan inyo borat. Aku paca'an moonji'i sonang-nyaman ko kaitn.

²⁹ Tuyut'i cam porintah-Ku. Bolajarcam doi' Aku, obai Aku lomah-lombut huatan rondah hati. Aman kaitn molabuhan nantai, ongko jiwa kaitn paca'an mooso sonang.

³⁰ Obai, ajaran-Ku kinyo mouyuhi dilabuhan huatan porintah-Ku mudah mo ditaati.”