Matius 1 - Porjanjian Boharu Torjomahan Baso Dilakng Soari-ari

Daptar angki-bayatn Yesus, Rajo Inyo Dijanjian Allah

¹ Ni'innam koturutan angki-bayatn Yesus, Rajo Inyo Dijanjian Allah, Rajo inyo kito sobut ‘Kristus’. Yesus nantai koturutan Rajo Daud, huatan koturutan Abrahapm jam. Koturutannyo ia'an:

² Abrahapm boana'an Ishak; Ishak boana'an Yakub; Yakub boana'an Yehuda huatan boko somadikannyo;

³ Yehuda boana'an Peres ongko Zerah. (Indai sia' duo ni'in ia'an Tamar). Peres boana'an Hezron; Hezron boana'an Ram;

⁴ Ram boana'an Aminadab; Aminadab boana'an Nahason; Nahason boana'an Salmon;

⁵ Salmon boana'an Boas. (Indai Boas ia'an Rahab.) Boas boana'an Obed. (Indai Obed ia'an Rut.) Obed boana'an Isai;

⁶ Isai boana'an Rajo Daud. Daud boana'an Salomo. (Indai Salomo ia'an Batsyeba, botina' inyo jadian agatn Uria sobolupm jadian agatn Daud.)

⁷ Salomo boana'an Rehabeam; Rehabeam boana'an Abia; Abia boana'an Asa;

⁸ Asa boana'an Yosafat; Yosafat boana'an Yoram; Yoram boana'an Uzia;

⁹ Uzia boana'an Yotam; Yotam boana'an Ahas; Ahas boana'an Hizkia;

¹⁰ Hizkia boana'an Manasye; Manasye boana'an Amon; Amon boana'an Yosia;

¹¹ Yosia boana'an Yekhonya ongko boko somadikannyo. Timpu nantai banya' urakng Yahudi monjadi tawatan boparakng ongko dibaba' ko negara Babel.

¹² Lopas jadi urakng Yahudi dibaba' ko Babel, Yekhonya boana'an Sealtiel; Sealtiel boana'an Zerubabel;

¹³ Zerubabel boana'an Abihud; Abihud boana'an Elyakim; Elyakim boana'an Azor;

¹⁴ Azor boana'an Zadok; Zadok boana'an Akhim; Akhim boana'an Eliud;

¹⁵ Eliud boana'an Eleazar; Eleazar boana'an Matan; Matan boana'an Yakub;

¹⁶ Yakub boana'an Yusuf. Yusuf nantai laki Maria inyo boana'an Yesus, Rajo Inyo Dijanjian Allah, Rajo inyo disobut ‘Kristus’.

¹⁷ Jadi, ado ompat bolas koturutan doi' Abrahapm sampai Daud. Ado ompat bolas koturutan jam doi' Daud sampai watu urakng Yahudi monjadi tawatan boparakng di nogori Babel. Huatan ado ompat bolas koturutan agi' doi' joman boko tawatan nantai sampai kodatakan Kristus, ia'an Rajo Inyo Dijanjian Allah.

Kolahiran Yesus, Rajo Inyo Dijanjian Allah

¹⁸ Kolahiran Yesus Kristus, Rajo Inyo Dijanjian Allah nantai, tojadi dinga' ni'in: Maria nantaiam indai Yesus. Sobolupm nantai, io botunangan agatn Yusuf. Apo sobolupm sia' kawitn, ruponyo Maria udah buntikan. Nantai tojadi obai kuaso Roh Allah.

¹⁹ Apo Yusuf nantai ia'an urakng inyo boi' hati. Io pan co honda' momaluan Maria di hadapan urakng banya'. Obai nantai, io bopikir honda' mombalakan potunangannyo agatn Maria socaro bototapu'.

²⁰ Apo timpu Yusuf tongahan momikiran hal nantai, datakam molekat Tuhatn Allah ko io dalapm mimpi. Molekat nantai bopandir, “Yusuf, koturutan Rajo Daud, jangan gola' monguti' Maria pakai' monjadi bini kolai. Obai, kuaso Roh Allah inyo bulah Maria buntikan.

²¹ Maria paca'an boana'an siku' bobia' lolaki. Kolai gola' mondamo'i-Nyo, Yesus, obai Io monyolamant'an umant-Nyo doi' boko dosa sia'.”

²² Somuo hal nantai tojadi oca' pomandiran Tuhatn Allah ditopati. Timpu joman komai ado nabi inyo monulis pomandiran Allah nantai:

²³ “Dinga'anbo! Siku' urakng botina' daro paca'an buntikan, lalu boana'an siku' bobia' lolaki. Sia' paca'an mondamo'i Sio, Imanuel.” (Damo Imanuel nantai boroti “Allah monyoroto'i kito.”)

²⁴ Pas, Yusuf huas tidu' lalu molabuhan la'apo inyo disiuh molekat Tuhatn nantai ko io. Io monguti' Maria monjadi bininyo.

²⁵ Apo Yusuf kinyo kopal-kumpul agatn Maria sampai Maria boana'an Bobia' nantai. Lopas Bobia' nantai lahir, Yusuf mondamo'i-Nyo, Yesus.