Markus 9 - Porjanjian Boharu Torjomahan Baso Dilakng Soari-ari

¹ Yesus pan bopandir, “Dinga'anbo! Ado urakng di antaro kaitn somuo di si'itn inyo kinyo paca'an mati sobolupm moniant Koraja'an Allah datakng agatn kuasonyo.”

Boboropo rasul Yesus moniant komulia'an-Nyo

² Onam ari lopas nantai, Yesus mombaba' Petrus, Yakobus ongko Yohanes huatan bosamo-samo agatn sia', Sio noi' ko sobuah bukit inyo tinggi. Di santai, sonsiku'an sia' mo. Lalu Yesus borubah rupo dipohadapan mato-muho sia'.

³ Jubah-Nyo monjadi putih bokilau-kilauan. Conyiant ado urakng di dunia ni'in inyo ulih monopasi pakai'an sampai monjadi kotakng putih sama'an nantai.

⁴ Kotigo murid-Nyo nantai moniant sopongirap nabi Musa ongko nabi Elia ado di santai, tongahan bopandir agatn Yesus.

⁵ Kato Petrus ko Yesus, “Guru, kotakng boi' bondar kito di si'itn. Aman Duatn honda', biaram koi moninjakan tigo buah ntirukng di si'itn, sobuah pakai' Duatn, sobuah pakai' nabi Musa, sobuah pakai' nabi Elia.”

⁶ (Apo, sobondarnyo Petrus kinyo tohu la'apo inyo gola' io pandiran obai io huatan duo urakng kawalnyo kotakng gola'.)

⁷ Lopas nantai, ado awatn datakng monungkau'i sia'. Ongko Allah bopandir doi' dalapm awatn nantai, “Ninam Ana'-Ku inyo kotakng kokidah Ku. Pondinga'ancam Io!”

⁸ Watu boko murid Yesus moniant ko sokolilikng sia', sopongirap sia' kinyo moniant agi' Musa ongko Elia ongkah siku' Yesus am.

⁹ Timpu sia' turutn doi' bukit nantai, Yesus morarakng sia' oca' jangan bokisah ko sosopo pan mongona'i la'apo inyo hoyu' sia' tiat. Yesus morarakng sia' mongisahannyo nantai sobolupm Ana' Monsio bobali' hidup doi' komatian.

¹⁰ Sia' monyimpatn porintah nantai di antaro sia' siku'. Sia' botakutn ko siku'-monyiku' lapo inyo di masud Yesus agatn “Bobali' hidup doi' komatian”.

¹¹ Lalu, sia' botakutn ko Yesus, “Hibo boko guru agama Yahudi momandiran obai nabi Elia gola' holu datakng sobolupm Rajo inyo Dijanjian Allah nantai datakng?”

^12-13 Timbas Yesus, “Bondaram hal nantai udah ditulis dalapm Buku Suci. Nabi Elia tajahan holu datakng pakai' monyiap'an somuo hal pakai' kodatakan Rajo Inyo Dijanjian Allah. Apo pondinga'anbo ni'in: Nabi Elia inyo dimasud nantai udah datakam. Boko urakng bulah inyo jahat ko io sokohonda' hati sia'. Apo, somuo nantai tojadi sosuai agatn pomandiran inyo totulis mongona'i Io dalapm buku Suci. Jadi, porotian jam pomandiran inyo totulis mongona'i Ana' Monsio. Buku Suci mongatoan obai Ana' Monsio paca'an dihanyam huatan banya' moalapi ajab sonsaro. Pikiran cam mongona'i masud pomandiran nantai.”

Yesus monundukng roh jahat doi' siku' bobia'

¹⁴ Lopas nantai, Yesus, Petrus, Yakobus, ongko Yohanes bobali' ko boko murid-Nyo inyo bukai. Sia' moniant banya' urakng tongahan mongoliliki boko murid nantai. Di santai ado jam boko guru agama Yahudi inyo tongahan bosoal jawab agatn boko murid nantai.

¹⁵ Apo watu urakng banya' nantai moniant Yesus, sia' tokonyant huatan bonggidi'an mohimpa'i Sio.

¹⁶ Yesus botakutn, “La'apo inyo kaitn potikakan?”

¹⁷ Ado di antaro urakng banya' nantai inyo monimbas. Katonyo, “Guru, aku mombaba' ana' ku ko Duatn. Io dirasui'i roh jahat sampai mombulah io bisu.

¹⁸ Sotiap kali roh jahat nantai morasu'i io, roh nantai monyipatannyo ko tanah, nyaonyo boapukng, giginyo bogorit, huatan somuo bukakng-tubuhnyo korikng-kotat. Aku udah minto ko boko murid Duatn oca' monundukng roh jahat nantai apo culih sia' molabuhannyo.”

¹⁹ Ongko, Yesus bopandir ko sia', “Oi boko urakng inyo kinyo pocayo. Apo ija' manahnyo Aku gola' bosamo agatn kaitn agi'? Boropo manah agi' Aku gola' sabar agatn kaitn! Baba' bobia' nian ko si'itn.”

²⁰ Lalu sia' mombaba' bobia' nantai ko Yesus. Watu moniant Yesus, roh jahat nantai mohompasan bobia' nantai ko tanah, bogogora' bukakngnyo. Bobia' nantai bogulikng-gulikng huatan nyaonyo boapukng.

²¹ Yesus botakutn ko bopai bobia' nantai, “Udah boropo manahnyo ana' kulo sama'an ni'in?” Timbas io, “Doi' io ija' kocit!

²² Kotakng opatam roh jahat nantai honda' mombunuh io mombulah io jatu' ko dalapm api damo ko dalapm ara'i. Apo aman Duatn ulih bulah la'apo pan, kasihibo koi. Tulukng koi!”

²³ Apo Yesus monogur io, “Kulo bopandir, Aman Duatn ulih? Somuo ulih dilabuhan tiap urakng inyo pocayo.”

²⁴ Lansukng bopai bobia' nantai mondorah, “Aku pocayo. Tulukngcam oca' aku lobih pocayo agi'!”

²⁵ Timpu Yesus moniant mongkitn banya' urakng mula'i datakng bokumpul di santai, Sio momorintah roh jahat nantai agatn koras. Kato-Nyo, “Roh jahat inyo mombulah urakng bisu huatan tingal, Aku monyiuh kolai, koluarcam doi' bobia' ni'in. Jangan tamo ko dalapm io agi'!”

²⁶ Roh jahat nantai mondorah, mombulah bukakng bobia' nantai bogogora', lalu koluar doi' io. Bobia' nantai kotiat'an sama'an urakng mati. Somuo urakng bopandir, “Io udah mati am!”

²⁷ Apo Yesus moncanggapm longannyo, monulukng io angkat. Lopasnyo, bobia' nantai bodiritn.

²⁸ Lopas nantai, Yesus mansu' ko rumah. Di santai ongkah ado Yesus agatn boko murid-Nyo mo. Watu nantai, sia' botakutn ko Sio, “Hibo koi culih monundukng roh jahat nantai?”

²⁹ Timbas Yesus ko sia', “Roh jahat inyo sama'an nantai culih ditundukng kocuali agatn doa.”

Koduo kalinyo Yesus momadahan mongona'i ajab sonsaro inyo paca'an dialapi-Nyo

³⁰ Yesus ongko boko murid-Nyo botula' doi' santai lalu molalu'i doerah Galilea. Sio co honda' ado urakng bukai tohu nantai.

³¹ Obai Sio tongahan mongajar boko muridnyo. Kato-Nyo ko sia', “Ana' monsio paca'an ditangkap lalu disorahan ko urakng inyo molawatn Io. Sia' paca'an mombunuh-Nyo, apo Io paca'an bobali' hidup di ari ko tigo.”

³² Sia' kinyo mongoroti pomandiran nantai. Apo sia' pan gola' botakutn ko Yesus mongona'i la'apo masud Sio mongona'i hal nantai.

Monurut Allah, sopo inyo palikng tohormat

³³ Lopas nantai, Yesus ongko boko murid-Nyo hoyu' monjukah am di kota Kapernaum. Pas sia' udah di rumah, Yesus botakutn ko sia', “Hal la'apo inyo kaitn pongkisahan di tongah jalatn nantai?”

³⁴ Apo sia' langunt obai di tongah pojalatan sia' botikakng-pahapm mongona'i sopo inyo kotakng pontikng di antaro sia'.

³⁵ Yesus dudu' lalu moningkau koduo bolas murid-Nyo nantai, ongko mongajar sia'. Kato-Nyo, “Urakng inyo honda' monjadi kotakng pontikng di antaro kaitn, io gola' monjadi urakng inyo kotakan kinyo pontikng, urakng nantai gola' monjadi sama'an polayatn pakai' kaitn somuo huatan urakng bukai.”

³⁶ Lalu, Yesus moningkau siku' bobia' kocit, ongko monyiuh bobia' nantai bodiritn di tongah-tongah sia'. Kapikng mongolu'i bobia' nantai, Sio bopandir ko sia',

³⁷ “Urakng inyo monorima' siku' bobia' sama'an ni'in obai Aku, rotinyo io monorima' Aku. Urakng inyo monorima' Aku, io bukainyo aja' monorima' Aku, apo monorima' Allah inyo moutus Aku.”

Murid Yesus inyo bukainyo ulih monundukng roh jahat

³⁸ Lalu Yohanes bopandir, “Guru, koi moniant ado urakng inyo monundukng roh jahat momakai damo Duatn. Apo io koi rarakng, obai io bukainyo doi' kolompok kito.”

³⁹ Apo Yesus bopandir, “Jangan kaitn morarakng urakng sama'an io. Obai, doi' somuo urakng inyo mombulah mujisat momakai damo-Ku, conyiant siku' pan inyo ulih lansukng bobali' mohanyam Aku.

⁴⁰ Somuo urakng inyo co molawatn kito, boroti sia' ado dipihak kito.

⁴¹ Sotiap urakng inyo monulukng kaitn obai kaitn nantai murid Kristus, pasti am urakng nantai paca'an monorima' upahnyo. Biar pan urakng nantai bayo moonji'i kaitn socangkir ara'i pakai' diminum. Dinga'anbo! Urakng nantai kinyo paca'an kohilakan upahnyo.”

Boko murid Yesus gola' molawatn dosa

⁴² Yesus pan bopandir, “Aman ado urakng inyo mombulah siku' doi' boko bobia' kocit inyo pocayo ko aku oca' bulah dosa, jadi lobih boi' pakai' io aman ado batu bosar dikobat'an di lihi'nyo ongko ditonggolapan ko dalapm lout.

⁴³ Aman jari kulo mombulah kulo bodosa, tota' ja'am. Obai, lobih boi' aman kulo mondapat'an hidup kokal di sorugo agatn jari sopia' daripado agatn kododuo jari kulo lalu nononyo dibuakan ko dalapm api noraka inyo kinyo kalo buta'. [

⁴⁴ Di su'utn api kinyo tohu-buta', huatan hulat kinyo tohu mati.]

⁴⁵ Aman kaki kulo mombulah kulo bodosa, tota' ja'am. Obai, lobih boi' aman kulo mondapat'an hidup kokal di sorugo bokaki sopia' daripado nononyo kulo agatn kododuo kaki kulo di buakan ko dalapm noraka. [

⁴⁶ Di su'utn api kinyo tohu-buta', huatan hulat kinyo tohu mati.]

⁴⁷ Aman mato kulo mombulah kulo bodosa, cungkil ja'am. Obai, lobih boi' aman kulo mansu' ko dalapm Koraja'an Allah agatn sobigi' mato, daripado kulo agatn kododuo mato kulo nononyo dibuakan ko dalapm noraka.

⁴⁸ Di su'utn api kinyo tohu buta', huatan hulat kinyo tohu mati.

⁴⁹ Aku momporingant'i sama'an nantai, obai sotiap urakng paca'an dimurnian agatn api samo sama'an kurbatn inyo disucian agatn garapm.

⁵⁰ Garapm nantai boi'. Jadi, kaitn gola' monjadi samo sama'an garapm. Kaitn gola' hidup damai agatn urakng inyo bukai. Apo aman garapm monjadi taba'i, co mungkitn dipulah mancitn agi'.”