Markus 8 - Porjanjian Boharu Torjomahan Baso Dilakng Soari-ari

Yesus mombulah mujisat moonji'i pomakatn pakai' urakng ompat ribu

¹ Timpu nantai, ado agi' kotakan banya' boko urakng datakng bokumpul. Obai sia' conyiant pomakatn, Yesus moningkau boko murid-Nyo.

² Kato Sio ko sia', “Aku kotakng salu' agatn boko urakng banya' ni'in. Udah tigo ari sia' bosamo agatn Aku. Watu ni'in sia' conyiant pomakatn.

³ Aku co kompakng monyiuh sia' pulakng tongahan sia' kolaparan, gola' sia' pinsatn di pojalatan, obai ado inyo datakng doi' jouh.”

⁴ Timbas boko murid Sio, “Tompat ni'in jouh doi' laman. Co mungkitn urakng ulih bogoyap pomakatn pakai' urakng pombanya'an ni'in!”

⁵ Yesus botakutn ko sia', “Ado boropo roti inyo ado di kaitn?” Timbas sia', “Ado tujuh pingkai'.”

⁶ Lalu, Yesus monyiuh urakng banya' nantai dudu' di tanah. Yesus monguti' tujuh pingkai' roti nantai ongko moucap torima' kasih ko Allah. Sio momingkai'-mingkai' roti nantai, ongko moonju'nyo ko boko murid-Nyo oca' dipombagi-bagian ko boko urakng banya' nantai. Ongko sia' molabuhannyo.

⁷ Sia' pan ado boboropo iku' ikatn kocit. Yesus pan moucap'an torima' kasih ko Allah pakai' ikatn nantai, lalu monyiuh boko murid-Nyo mombagi-bagiannyo jam.

⁸ Somuo sia' makatn sampai konyang. Lopas nantai, boko murid-Nyo mongumpulan kolobihannyo ko kobudu'. Ado tujuh kobudu' inyo bisi!

⁹ Inyo jumpat makatn ado kiro-kiro ompat ribu urakng. Lopas nantai, Yesus monyiuh urakng banya' nantai pulakng.

¹⁰ Sio lansukng jumpat porohu bosamo agatn boko murid-Nyo, huatan botula' ko doerah Dalmanuta.

Boko pomimpitn agama Yahudi minto Yesus mombulah mujisat

¹¹ Lopasnyo boko pomimpitn agama Yahudi doi' kolompok Farisi datakng ko Yesus. Sia' bosoal jawab agatn Sio, ongko honda' mouji Sio. Huatan, sia' minto oca' Yesus mombulah mujisat pakai' mombutian ko sia' obai kuaso-Nyo nantai doi' Allah.

¹² Sio mongoluh dalapm hati-Nyo. Lalu kato-Nyo, “Mapo boko urakng joman ni'in mominto Aku mombulah mujisat? Dinga'anbo! Aku co paca'an mombulah mujisat sama'an di kohonda'i kaitn!”

¹³ Lalu, Yesus moninggalan sia' huatan botula' jumpat porohu ko soborakng danau.

Jagocam diri doi' urakng Farisi huatan Herodes oca' kinyo tuyut bulah kojahatan

¹⁴ Timpu sia' monyomborakng danau, boko murid Yesus kolupatn mombaba' roti. Sia' bayo ado sopingka'i rotimo.

¹⁵ Yesus moonju' porintah ni'in ko sia'. Kato-Nyo, “Jagocam diri kaitn doi' ragi boko pomimpitn agama Yahudi huatan doi' kolompok Farisi ongko tohadap ragi rajo Herodes.”

¹⁶ Sia' bopikir Yesus bopandir sama'an nantai obai sia' co mombaba' roti. Ongko, sia' bongkisahan mongona'i hal nantai.

¹⁷ Apo Yesus mongotohu'i la'apo inyo sia' pandiran. Jadi Sio bopandir, “Mapo kaitn botikakng mongona'i conyiant roti? Kaitn kotakng uyuh mongoroti! Soharusnyo kaitn udah mongoroti!

¹⁸ Kaitn ado mato huatan kolindakan. Apo kaitn co mongoroti la'apo inyo ditiat huatan didinga' kaitn. Kata'an udah tongkolupatn kaitn am mujisat inyo udah Ku pulah?

¹⁹ Aku moonji'i pomakatn pakai' urakng lima' ribu bayo agatn lima' pingkai' rotimo. Timpu kaitn mongumpulan kolobihannyo, boropo kobudu' inyo bisi?” Timbas sia', “Duo bolas kobudu'.”

²⁰ “Aku pan moonji'i pomakatn pakai' urakng ompat ribu doi' tujuh pingkai' roti. Timpu kaitn mongumpulan kolobihannyo, boropo kobudu' inyo bisi?” Timbas sia', “Tujuh kobudu'.”

²¹ Kato Yesus ko sia', “Kata'an kaitn watu ni'in pan totap bolupm mongoroti?”

Yesus monyamani urakng buto di Betsaida

²² Lopas nantai, Yesus agatn boko murid-Nyo datakam di kota Betsaida. Di santai, ado urakng inyo buto. Boko urakng mombaba' io ko Yesus ongko momuhun oca' Yesus moncama'nyo pakai' monyamani io.

²³ Yesus moncanggapm longan urakng buto nantai ongko moirikannyo ko luar kota. Yesus moigahi mato urakng nantai, lalu molota'an jari-Nyo ko mato urakng nantai. Yesus botakutn ko io, “Apo bai watu ni'in ado inyo kulo tiat?”

²⁴ Urakng nantai moniant ko pohadapan, ongko bopandir, “Au. Aku moniant urakng bojalatn-jalatn, apo sia' kotiat'an sama'an boko kayu.”

²⁵ Yesus molota'an agi' jari-Nyo ko mato urakng nantai. Lalu, urakng nantai bondar-bondar moniant ongko udah nyamanam bondaram. Io pan ulih moniant somuonyo agatn jolas.

²⁶ Yesus bopandir ko io, “Pulakngcam! Apo jangan mansu' ko dalapm kota nantai.”

Rasul Petrus momandiran Yesus nantai Rajo Inyo Dijanjian Allah

²⁷ Lopasnyo Yesus borangkat bosamo agatn boko murid-Nyo ko boko laman dampikng kota Kaisarea Filipi. Di tongah jalatn Yesus botakutn ko sia', “Monurut kato urakng, sopo am Aku ni'in?”

²⁸ Timbas sia', “Ado inyo bopandir Duatn nantai Yohanes Pombaptis. Ado jam inyo bopandir Duatn ia'an nabi Elia. Kondua'annyo bopandir Duatn nantai salah siku' nabi doi' joman komai.”

²⁹ Lalu, Yesus botakutn ko sia', “Apo, monurut kaitn siku', sopo Aku ni'in?” Timbas Petrus, “Duatn ia'an Rajo inyo Dijanjian Allah, inyo disobut ‘Kristus’.”

³⁰ Lalu Yesus kotakng morarakng sia' momandiran hal nantai ko sosopo pan.

Yesus momboritoan mongona'i ajab sonsaro inyo paca'an dialapi-Nyo

³¹ Lopasnyo, Yesus moajaran ko sia' obai Ana' Monsio gola' kotakng banya' moalapi ajab sonsaro. Io gola' ditula' boko pomimpitn banso, boko imam kopala', boko guru agama Yahudi. Io paca'an dibunuh. Apo watu ari kotigo, Io bobali' hidup agi'.

³² Yesus momandiran ko boko murid-Nyo mongona'i hal nantai agatn torus torakng. Apo Petrus mondudus Yesus ko sopia' ongko monogur Sio agatn koras.

³³ Yesus lansukng mongilikng ko arah boko murid-Nyo, lalu mohohakap Petrus. Kato-Nyo, “Jangan kulo monjadi sama'an Rajo Sitatn inyo mohalak-halaki Aku monuntukan kohonda' Allah. Kulo ongkah monuruti pikiran monsio, bukainyo pikiran doi' Allah!”

Somuo murid Yesus gola' siap mondorita' apo tajahan bodapat hidup di sorugo jam

³⁴ Lopas nantai, Yesus moningkau urakng banya' inyo ado di santai bosamo agatn boko murid-Nyo. Kato-Nyo ko sia', “Aman urakng bondar-bondar honda' monjadi murid-Ku, io gola' moninggalan boko kohonda' dirinyo siku'. Io gola' momikul salibnyo. Boko murid-Ku gola' sama'an nian huatan totap tuyut Ku.

³⁵ Obai, sopo aja' inyo bousaha koras mompotahatan kosihnyo paca'an kohilakan kosihnyo. Apo sopo aja' inyo kohilakan kosihnyo obai monjadi pongikut-Ku ongko obai momboritoan Kabar Boi', io paca'an monyalamant'annyo.

³⁶ Soandainyo ado urakng inyo ulih mondapat'an somuo la'apo pan di dunia ni'in, apo kosihnyo siku' hilakng. Sobondarnyo kinyo ado gunonyo.

³⁷ Io co ulih monyambian la'apo pan pakai' mondapat'an kosihnyo.

³⁸ Biar pan kaitn hidup di joman boko urakng inyo bodosa huatan kinyo sotia ni'in, jangan am kaitn malu tuyut Ku ongko pomandiran-Ku. Sotiap urakng inyo malu tuyut Ku, nononyo Ana' Monsio paca'an monula' io jam watu Io datakng bobali' agi' doi' sorugo. Timpu nantai, Io paca'an datakng agatn somuo kuaso Bopai-Nyo bosamo agatn boko molekat Allah.”