Markus 6 - Porjanjian Boharu Torjomahan Baso Dilakng Soari-ari

Yesus ditula' di laman-Nyo siku'

¹ Lopas nian, Yesus botula' doi' santai ongko pulakng ko laman tompat asal-Nyo. Boko murid-Nyo tuyut jam.

^2-3 Watu ari Sabat, Yesus mongajar di rumah sombayakng. Timpu boko urakng mondinga' ajaran-Nyo, sia' hiratn bondar. Kato sia', “Doi' mono Urakng ni'in mondapat'an pongotohuan pakai' mongajar sama'an nian? Doi' mono Sio mondapat'an kuaso pakai' mombulah boko mujisat? Padohal, Sio bayo urakng biaso mo. Sio ni'in ana' doi' tukakng kayu. Indai-Nyo bodamo Maria. Boko somadikan-Nyo Yakobus, Yoses, Yudas ongko Simon. Boko somadikan-Nyo inyo botina' ado bosamo kito jam. Jadi, doi' mono Io mondapat somuo pongotohuan ongko kuaso nantai?” Jadi, sia' monula' Sio.

⁴ Lalu, Yesus bopandir ko sia', “Siku' nabi dihormati di mono-mono, apo kinyo di laman tompat asalnyo siku', di antaro dongan somadikannyo ongko suku-pomilinyo siku'.”

⁵ Yesus kinyo ulih bulah mujisat di santai, ongkah monyamani boboropo urakng boponyakit agatn molota'an jari-Nyo ko sia'.

⁶ Sio mooso hiratn obai boko urakng di laman-Nyo kinyo pocayo ko Sio. Lalu, Sio bojalatn bokolilikng doi' laman ko laman, mongajar boko urakng di santai.

Yesus moutus koduo bolas murid

⁷ Yesus moningkau koduo bolas murid-Nyo lalu moutus sia' duo-duo urakng. Sio moonju' kuaso ko sia' pakai' monundukng boko roh jahat.

⁸ Sio moyiuh sia' oca' jangan mombaba' la'apo pan di pojalatan, bayo tungkah ja'am. Sia' culih mombaba' roti, tompat sodokah, duit di dalapm ikat pinggakng.

⁹ Sia' ulih momakai sandal, apo culih mombaba' baju posalitan.

¹⁰ Sio pan bopandir ko sia', “Timpu kaitn mansu' ko rumah urakng, noluntukng ja'am di siatan sampai kaitn moninggalan kota nantai.

¹¹ Apo aman kaitn kinyo ditorima' boko urakng di sobuah laman, aman sia' co honda' mondinga'an kaitn, koluar ja'am doi' laman nantai. Tata'an dobu doi' kaki kaitn pakai' momporingant'i sia'.”

¹² Jadi, koduo bolas murid Yesus botula' momboritoan obai urakng gola' moninggalan dosa sia' ongko monyonangan hati Allah.

¹³ Sia' monundukng banya' roh jahat. Sia' pan momurusan banya' urakng sakit agatn minya' ongko monyamani sia'.

Yohanes Pombaptis dibunuh

¹⁴ Timpu nantai, Rajo Herodes momorintah di propinsi Galilea. Sio mondinga' boko borito mongona'i Yesus obai damo Yesus monjadi tokonal di soluruh doerah nantai. Ado urakng inyo bopandir, “Yesus nam Yohanes Pombaptis inyo udah hidup agi'. Nantai am sobabnyo Sio ado kuaso pakai' mombulah mujisat.”

¹⁵ Ado jam urakng inyo bopandir, “Yesus nam nabi Eliainyo datakng agi'!” Urakng bukai bopandir, “Sio nam nabi samo sama'an boko nabi doi' joman komai!”

¹⁶ Apo timpu Rajo Herodes mondinga' nantai, io bopandir, “Pasti Sio nam Yohanes Pombaptis inyo udah ku siuh oca' kopala'nyo diponggal komai. Watu ni'in, io udah hidup agi'!”

^17-18 Cukup manah sobolupm nantai, Herodes kawitn agatn Herodias, apo komainyo Herodias nantai bini somadikan Herodes, damonyo Filipus. Jadi, Yohanes kalo monogur Herodes. Katonyo, “Kolai culih kawitn agatn Herodias!” Obai nantai, Herodes moyiuh urakng oca' Yohanes ditangkap, lalu dikobat agatn rantai di dalapm ponjara.

¹⁹ Obai toguran Yohanes, Herodias mondondapannyo, honda' mombunuhnyo. Apo culihnyo molabuhan la'apoam

²⁰ obai Herodes molinduki Yohanes. Obai Herodes gola' agatn Yohanes obai io tohu Yohanes nam urakng inyo husus dipakai Allah ongko hidup bondar di hadapan Allah. Sotiap kali Herodes mondinga' Yohanes, hatinyo hala golisah, apo io mooso sonang mondinga'an io.

²¹ Ahirnyo, Herodias mondapat'an kosompatan pas ari ulakng tohutn Herodes. Herodes bulah pogai pakai' somuo pojabat tinggi, boko powira, ongko boko tokoh masrakat Galilea.

²² Timpu nantai, ana' botina' Herodias bonari di pogai nantai. Tariannyo nantai monyonangan hati Herodes ongko somuo tamu'nyo. Jadi, Rajo Herodes bopandir agatn bobia' daro nantai, “Mintocam lapo ja' inyo kolai kohonda'i, aku tajahan moonju' nantai ko kolai!”

²³ Ongko Herodes bosumpah. Katonyo, “Lapo ja' inyo kolai minto, nononyo ku onju' ko kolai, biar pan sotongah doi' koraja'anku!”

²⁴ Bobia' daro nantai botula' ongko botakutn ko indainyo, “Soboi'nyo, aku gola' minto lapo?” Timbasnyo, “Minto kopala' Yohanes Pombaptis!”

²⁵ Bobia' daro nantai hagar bobali' ko Rajo Herodes lalu bopandir, “Aku minto oca' watu ni'in jam kopala' Yohanes Pombaptis diponggal, lalu dilota'an di pucu' talapm ongko dionju' ko aku!”

²⁶ Mondinga' nantai, Rajo Herodes monjadi salu'. Apo io culih monula'nyo obai io udah bosumpah di hadapan somuo tamu'nyo.

²⁷ Io lansukng monyiuh projurit pakai' momonggal kopala' Yohanes. Lalu, projurit nantai momonggal kopala' Yohanes di ponjara,

²⁸ lalu mombaba' kopala'nyo di pucu' talapm ongko moonju'nyo ko botina' daro nantai. Botina' daro nantai moonju'nyo ko indainyo.

²⁹ Timpu boko murid Yohanes Pombaptis mondinga' hal nantai, sia' datakng monguti' bangkainyo lalu momasarnyo.

Yesus bulah mujisat moonji'i urakng lima' ribu pomakatn

³⁰ Lopasnyo boko rasul Yesus bobali' bokumpul agatn Sio. Sia' bokisah ko Sio somuo inyo udah sia' labuhan ongko ajaran watu bojalatn ko boko laman tontainyo.

³¹ Apo watu nantai, banya' urakng datakng ongko botula'. Yesus ongko boko rasul-Nyo conyiant watu pakai' botongga', malah sia' co sampat makatn! Obai nantai, Yesus bopandir ko sia', “Mara kito botula' ko tompat inyo langunt, bayo kito aja'am, oca' kito botongga' sotogal.”

³² Jadi, sia' botula' jumpat porohu monuju ko tompat inyo langunt.

³³ Apo, banya' urakng moniant sia' botula' ongko mongotohu'i tujuan sia'. Jadi, boko urakng doi' somuo kota di doerah nantai monggontas doi' jalatn darat kapikng bonggidi'an oca' sia' holu datakng di tompat nantai sobolupm Yesus ongko boko rasul-Nyo tuntukng ko tompat nantai.

³⁴ Watu Yesus turutn doi' porohu, Sio moniant ado banya' urakng di santai. Sio mooso kasih agatn sia' obai sia' conyiant urakng inyo moirikng sia'. Sia' samo sama'an boko domba inyo conyiant pongombolonyo. Jadi, Sio mongajaran banya' hal ko sia'.

³⁵ Pas potakng muho, boko murid Yesus mondataki Sio. Kato sia', “Ari mula'i malapam ongko tompat ni'in jouh doi' laman.

³⁶ Jadi, siuh urakng banya' ni'in botula' ko boko laman dampikng si'itan oca' sia' ulih momboli pomakatn pakai' sia'.”

³⁷ Apo Yesus bopandir, “Kaitn aja'am moonji'i sia' pomakatn!” Timbas sia', “Kata'an Duatn honda' koi inyo botula' momboli roti pakai' moonji'i pomakatn ko somuo urakng ni'in? Inyo rogonyo kiro-kiro duo ratus pingkai' pira'!”

³⁸ Apo Yesus bopandir ko sia', “Ado boropo roti inyo ado di kaitn? Porisoi'nam!” Lopas sia' momoriso'inyo sia' momadahannyo ko Sio, “Ado lima' pingkai' roti ongko duo iku' ikatn.”

³⁹ Lalu, Yesus monyiuh urakng banya' nantai dudu' bokolompok-kolompok di rumput hijau.

⁴⁰ Boko urakng nantai pan dudu' bokolompok-kolompok. Ado kolompok agatn lima' puluh urakng. Ado jam soratus urakng.

⁴¹ Yesus monguti' lima' pingkai' roti ongko duo iku' ikatn nantai, monongadah ko langit, moucap torima' kasih ko Allah. Lalu Sio momingkai'-mingkai' roti nantai, moonju'nyo ko boko murid-Nyo oca' dipombagian ko urakng banya' nantai. Agatn caro inyo samo, Sio mombagian koduo iku' ikatn nantai ko somuo sia'.

⁴² Somuo sia' makatn sampai konyang.

⁴³ Lopas nantai, boko murid-Nyo mongumpulan kolobihan roti ongko ikatn nantai momakai kobudu'. Ado duo bolas kobudu' bisi!

⁴⁴ Inyo jumpat makatn roti nantai ado lima' ribu lolaki dewasa.

Yesus bojalatn di pucu' ara'i

⁴⁵ Lopas nantai, Yesus copat monyiuh boko murid-Nyo jumpat porohu ongko mondoholu'i Sio ko kota Betsaida di soborakng danau. Tongahan nantai, Sio monyiuh urakng banya' nantai pulakng.

⁴⁶ Lopas urakng banya' nantai botula', Yesus mondaki ko bukit pakai' bodoa.

⁴⁷ Watu malapm am, porohu inyo dikojumpati boko murid-Nyo udah di tongah danau, apo Yesus ija' di darat sonsiku'an.

⁴⁸ Sio moniant sia' uyuh bondar bokayuh obai ado bonakau bosar inyo bolawatan arah agatn porohu nantai. Jadi, pas nantai kiro-kiro japm tigo dinihari, Sio datakng ko sia', bojalatn di pucu' ara'i. Sio bojalatn torus ubonyo tajahan molalu'i sia'.

^49-50 Pas somuo sia' moniant Sio bojalatn di pucu' ara'i, sia' bopikir Sio hantu. Jadi, Sia' tokonyant ongko mondongkakng-mondorah. Apo Yesus lansukng bopandir ko sia', “Langunt cam! Ni'in Aku. Jangan gola'!”

⁵¹ Sio jumpat ko porohu bosamo agatn sia' ongko angin nantai botongga'am. Boko murid Yesus kotakng hiratn

⁵² obai sia' bolupm mongoroti sopo Sio sobondarnyo. Biar pan sia' udah moniant Sio mombulah mujisat agatn roti nantai tontainyo, hati sia' ija' manah mongoroti.

Yesus monyamani boko urakng sakit di Genesaret

⁵³ Lopas Yesus ongko boko murid-Nyo monyomborakng danau, sia' datakng di Genesaret. Sia' botongga' di santai.

⁵⁴ Pas sia' turutn doi' porohu, boko urakng di tompat nantai copat mongonal Yesus.

⁵⁵ Sia' bonggidi'an ko soluruh doerah nantai, lalu mombaba' boko urakng sakit di tikarnyo ko Yesus. Di mono ja' sia' mondinga' ado Yesus, sia' mombaba' boko urakng sakit ko Sio.

⁵⁶ Aman Sio botula' ko kota, desa damo laman kocit, boko urakng sakit dibaba' ko tompat umum di santai. Sia' muhun ko Yesus oca' boko urakng sakit nantai ulih moncama' jubah-Nyo, biar bayo hujukngnyo pan. Somuo inyo moncama'nyo monjadi nyamanam doi' ponyakitnyo.