Markus 5 - Porjanjian Boharu Torjomahan Baso Dilakng Soari-ari

Yesus monundukng banya' roh jahat doi' urakng di kota Gerasa

¹ Lalu datakam sia' di doerah Gerasa di soborakng danau Galilea.

² Yesus turutn doi' porohu, lalu ado urakng doi' pasaran datakng ko Sio. Urakng nantai dikuaso'i boko roh jahat.

^3-4 Io bodiapm di pasaran nantai. Udah opat am urakng nantai di tahatn, longan ongko kakinyo dikobat agatn rantai. Apo io ulih momutusan rantai nantai. Jadi, co nyiant urakng inyo ulih mongobatnyo agi'. Co nyiant urakng inyo toning pakai' monahannyo.

⁵ Siakng-malapm io bokoliaran di boko bukit ongko di pasaran nantai, kapikng mondongkakng-mondorah ongko boduda'an bukakng-tubuhnyo siku' agatn batu.

⁶ Pas doi' jouh io moniant Yesus, io bonggidi'an lalu tokosungkapm di kaki Yesus.

^7-8 Yesus bopandir, “Oi, roh jahat! Koluar doi' urakng ni'in!” Jadi, roh jahat nantai mondorah kotakan borakng, “Oi Yesus, Ana' Allah Inyo Maho Tinggi! Duatn honda' bulah lapo agatn aku? Aku muhun jangan monyisa aku!”

⁹ Yesus botakutn ko urakng nantai, “Sopo damo kolai?” Timbasnyo, “Damoku Legion obai koi kotakan banya' bondar!”

¹⁰ Roh jahat nantai momuhun ko Yesus oca' jangan monundukng sia' doi' doerah nantai.

¹¹ Di dampikng santai, ado banya' bondar babi bogoyap pomakatn di kaki bukit.

¹² Jadi, boko roh jahat minto ko Yesus, “Siuh cam koi mansu' ko boko babi nian!”

¹³ Yesus moijitan sia'. Jadi, boko roh jahat koluar doi' urakng nantai, mansu' ko boko babi nantai. Ongko boko babi nantai rari doi' kaki bukit torojutn ko danau, lalu mati lomas. Jumlah babi nantai kiro-kiro duo ribu iku'!

¹⁴ Boko ponjago babi nantai rari, mongisahan kojadian nantai ko kota Gerasa ongko doerah sokitarnyo. Jadi, boko urakng koluar pakai' moniant lapo inyo tojadi.

¹⁵ Sia' datakng ko Yesus lalu moniant urakng inyo tontainyo dikuaso'i boko roh jahat, inyo disobut Legion nantai. Io udah bopakaian, udah sadaram. Lalu, sia' mooso gola'.

¹⁶ Boko urakng inyo udah moniant kojadian nantai momadahannyo ko boko urakng inyo datakng lapo inyo tojadi ko urakng nantai inyo tontainyo dikuaso'i roh jahat ongko mongona'i boko babi nantai.

¹⁷ Jadi, somuo urakng doi' doerah nantai monyosahan Yesus oca' Sio moninggalan doerah sia'.

¹⁸ Jadi, Yesus jumpat ko dalapm porohu bosamo agatn boko murid-Nyo honda' botula' agi'. Timpu nantai, urakng inyo udah dilopasan doi' boko roh jahat nantai mominto oca' io ulih tuyut.

¹⁹ Apo, Yesus co moijitannyo. Kato-Nyo, “Pulakngcam ko rumah kolai ongko boko urakng di laman kolai. Kabaran ko somuo sia' lapopan inyo udah Tuhatn labuhan ko kolai. Kabaran caronyo Tuhatn monunju'an kasih-Nyo ko kolai!”

²⁰ Jadi, urakng nantai botula' mongoliliki doerah Dekapolis nantai. Io momboritoan la'apo pan inyo Yesus labuhan ko inyo. Somuo urakng monjadi hiratn.

Yesus mohidupan ana' Yairus ongko monyamani siku' botina'

²¹ Yesus ongko boko murid-Nyo bobali' agi' ko soborakng danau. Di pinggir danau nantai, banya' urakng datakng bokorumun di sokolilikng Yesus.

²² Siku' urakng kopala' rumah sombayakng datakng ko santai, io bodamoan Yairus. Pas io moniant Yesus, io tundu' monyungkapan di kaki Yesus.

²³ Io muhun bondar ko Yesus. Katonyo, “Bopai, ana' botina'ku boponyakit, hampir matiam. Tulukng dataki, cama'nyo oca' io nyamanam ongko kinyo mati.”

²⁴ Lalu, Yesus botula' bosamo agatn Yairus, banya' urakng tuyut Sio. Sia' bosonsongka'an di sokolilikng Yesus.

²⁵ Di antaronyo ado botina' inyo sakit pondarahan. Udah duo bolas tohutn manahnyo ponyakit io nantai.

²⁶ Io udah mohabisan boko kodampuannyo pakai' mombayar boko dokter. Apo io kinyo nyamanam jam, malahan ponyakitnyo mongkitn parah.

^27-28 Io udah mondinga' mongona'i Yesus. Jadi, io bopandir dalapm hatinyo, “Asal ku moncama' jubah Yesus, pasti aku nyamanam!” Jadi, di antaro urakng banya' nantai, io mondampiki Yesus doi' bolikat lalu moncama' hujukng jubah-Nyo.

²⁹ Lansukng botongga' pondarahannyo. Io mooso bukakng-tubuhnyo udah nyamanam doi' ponyakitnyo.

³⁰ Timpu nantai jam, Yesus mooso ado kuaso inyo koluar doi' diri-Nyo. Sio mongilikng ko urakng banya' lalu botakutn, “Sopo inyo moncama' jubah-Ku?”

³¹ Timbas boko murid-Nyo, “Duatn tiat am ado banya' bondar urakng inyo dampikng bosonsongka'an agatn Duatn. Mapo Duatn ija' botakutn, ‘Sopo inyo moncama' Aku?’ ”

³² Apo Yesus torus ja' moniant ko sokolilikng-Nyo pakai' monggoyapi urakng inyo udah molabuhan nantai.

³³ Botina' nantai mongotohu'i lapo inyo tojadi agatn dirinyo. Io datakng, lalu tundu' monyungkapan di pohadapan Yesus, bogogora' obai gola'. Io moaku'i somuonyo ko Yesus.

³⁴ Kato Yesus ko io, “Ana'-Ku, obai kolai udah pocayo ko aku, kolai nyamanam! Hingkascam agatn sonang-nyaman. Kolai udah nyamanam am doi' ponyakit kolai!”

³⁵ Tongahan Yesus ija' bopandir, datakam urakng inyo disiuh doi' rumah Yairus, kopala' rumah sombayakng nantai tontai. Katonyo ko Yairus, “Ana' kolai udah mati. Jangan monggogiru Guru agi'.”

³⁶ Yesus mondinga' pomandiran nantai, apo kinyo mohirauannyo. Kato-Nyo ko Yairus, “Jangan gola'. Totap pocayo ja'.”

³⁷ Lalu Yesus kinyo moijitan ko sopo pan tuyut-Nyo, kocuali Petrus, Yakobus ongko somadikannyo, Yohanes.

³⁸ Lopas sia' datakng di rumah Yairus, Yesus moniant boko urakng ranja', botangisan agatn saro borakng.

³⁹ Lopas Sio mansu' ko rumah, Sio bopandir ko sia', “Hibo kaitn ranja' ongko monangis? Bobia' nantai kinyo mati. Io bayo tidu'!”

⁴⁰ Sia' rindakan Sio, apo Sio monyiuh somuo urakng nantai koluar. Lalu, Sio mombaba' bopai ongko indai bobia' nantai bosamo agatn kotigo murid-Nyo mansu' ko dalapm kamar bobia' nantai.

⁴¹ Yesus moncanggapm longan bobia' nantai. Kato-Nyo, “Talita kum!” (Rotinyo, “Oi bobia' botina', Aku bopandir ko kolai, ‘Huascam!’ ”)

⁴² Lansukng bobia' nantai bodiritn ongko bojalatn. (Umurnyo duo bolas tohutn.) Somuo urakng di santai kotakan hiratn,

⁴³ apo Yesus morarakng koras sia' momadahan kojadian nantai ko sopo pan. Lalu, Yesus monyiuh sia' moonji'i bobia' nantai pomakatn.