Markus 3 - Porjanjian Boharu Torjomahan Baso Dilakng Soari-ari

Yesus monyamani urakng boponyakit watu ari Sabat

¹ Watu ari Sabat inyo bukai, Yesus mansu' ko dalapm rumah sombayakng. Di santai ado urakng inyo longannyo mati sopia'.

² Boko urakng Farisi kotakan borotian Yesus, honda' moniant aman Sio tajahan monyamani urakng nantai. Monurut sia', nantai tomansu' pokoroja'an inyo culih dilabuhan watu ari Sabat. Jadi, nononyo sia' ulih monyalahan Sio.

³ Yesus bopandir ko urakng inyo longannyo mati sopia' nantai, “Mara, bodiritncam ko tongah!”

⁴ Lalu, Yesus bopandir ko sia', “Lapo inyo ulih kito labuhan watu ari Sabat, bulah koboi'an kata'an bulah kojahatan; monyolamant'an urakng kata'an mombunuhnyo?” Apo sia' langunt mo.

⁵ Yesus salu' obai sia' korikng hati. Agatn godi, Sio borotian ko sokolilikng boko urakng di santai. Lalu, kato-Nyo ko urakng inyo longannyo mati sopia'an, “Codakan longan kolai!” Pas urakng nantai monyodakan longannyo, longannyo nyamanam.

⁶ Jadi, boko urakng Farisi koluar, copat bohoupm agatn boko urakng inyo mondukukng Rajo Herodes. Bosamo-samo sia' bohajat pakai' mombunuh Yesus.

Banya' urakng doi' tompat inyo jouh pan datakng ko Yesus

⁷ Yesus ongko boko murid-Nyo moninggalan tompat nantai ongko botula' ko danau Galilea. Banya' urakng doi' propinsi Galilea tuyut sia'. Ado jam urakng doi' propinsi Yudea,

⁸ doi' kota Yerusalem, doi' doerah Idumea, doi' sopia' timur sungai Yordan, doi' doerah sokitar kota Tirus ongko Sidon. Somuo sia' datakng ko Yesus obai sia' mondinga' mongona'i somuo inyo udah Sio labuhan.

⁹ Sio monyiuh boko murid-Nyo monyiap'an porohu pakai'-Nyo oca' Sio kinyo disosahan urakng banya' nantai.

¹⁰ Obai Sio udah banya' am monyamani urakng, lalu somuo urakng boponyakit bosonsongka'an bousaha mohampiki Sio oca' ulih moncama' Sio.

¹¹ Sotiap kali boko roh jahat moniant Yesus, sia' lansukng mongorobahan di hadapan-Nyo. Boko roh jahat nantai mondongkakng-mondorah, “Duatam Ana' Allah!”

¹² Apo Yesus morarakng koras sia' oca' kinyo momadahan sopo Sio.

Yesus momilih koduo bolas rasul-Nyo

¹³ Yesus noi' ko pucu' bukit lalu moningkau boko urakng inyo kohonda' Sio. Jadi, sia' datakng ko Sio.

¹⁴ Sio momilih duo bolas urakng pakai' hala tuyut Sio. Koduo bolas urakng ni'in Sio sobut ‘rasul’. Sio moutus sia' pakai' momboritoan Kabar Boi'

¹⁵ ongko moonju' kuaso ko sia' pakai' monundukng boko roh jahat.

¹⁶ Koduo bolas urakng inyo Sio pilih ia'an: Simon (inyo Yesus damo'i Petrus),

¹⁷ Yakobus (ana' Zebedeus) ongko Yohanes somadikannyo. (Sia' duo somadikan ni'in Yesus mondamo'inyo Boanerges, rotinyo poana'an guntur.)

¹⁸ Lopasnyo ado Andreas, Filipus, Bartolomeus, Matius, Tomas, Yakobus (ana' Alfeus), Tadeus, Simon (urakng Zelot),

¹⁹ ongko Yudas Iskariot (inyo nononyo monyorahan Yesus ko boko urakng inyo molawatn-Nyo).

Yesus dituduh momakai kuaso Rajo Sitatn

²⁰ Yesus pulakng ko rumah. Apo banya' urakng datakng agi' bokumpul di santai. Jadi, Yesus ongko boko murid-Nyo co sampat makatn.

²¹ Boko urakng bopandir, “Sio gogilo am!” Pas koluarga-Nyo mondinga' nantai, sia' botula' pakai' momocaki Sio.

²² Boko guru agama Yahudi inyo datakng doi' Yerusalem bopandir, “Sio dikuaso'i Rajo Sitatn! Rajo Sitatn inyo moonji'i kuaso ko Sio pakai' monundukng boko roh jahat.”

²³ Apo Yesus moningkau sia', lalu bopandir ko sia' agatn momakai boboropo poumpamoan. Kato-Nyo, “Co mungkitn rajo sitatn monundukng rajo sitatn inyo bukai!

²⁴ Aman sobuah koraja'an topocah dalapm boko kolompok inyo hala bomusuhan, pasti koraja'an nantai tajahan bonaso.

²⁵ Huatan aman sobuah koluarga hala bomusuhan ongko topocah-pocah, pasti koluarga nantai tajahan rusa'.

²⁶ Ubo nian jam di dalapm koraja'an Sitatn. Aman Sitatn molawatn dirinyo siku', boroti korajaan-nyo tobagi-bagi. Pasti io culih botahatn. Sio tajahan hancur.

²⁷ Aman ado urakng honda' momansu'i rumah urakng inyo toning oca' morampas kodampuannyo, pasti io gola' mongobat urakng inyo toning nantai holu'ai. Hoyu' io ulih morampok rumah nantai.

²⁸ Dinga'ancam! Sotiap urakng inyo bodosa damo mohanyam, urakng nantai ulih diamputi.

²⁹ Apo urakng inyo mohanyam tohadap Roh Allah, urakng nantai tajahan co kalo diamputi. Dosa nantai bulah urakng bosalah somanah-manahnyo.”

³⁰ Yesus bopandir ubo nantai obai sia' mohanyam Sio agatn bopandir obai Sio dikuaso'i roh jahat.

Koluarga Yesus inyo sobondarnyo

³¹ Lopas nantai, indai ongko boko somadikan Yesus datakng. Sia' bodiritn di luar, monyiuh urakng pakai' moningkau Sio.

³² Timpu nantai, ado banya' urakng dudu' mongoliliki-Nyo. Sia' bopandir ko Sio, “Indai Duatn ongko boko somadikan Duatn ado di luar, honda' botomu Duatn.”

³³ Apo Yesus bopandir ko sia', “Sopo Indaiku? Sopo boko somadikan-Ku?”

³⁴ Yesus moniant boko urakng inyo dudu' mongoliliki-Nyo. Kato-Nyo, “Boko urakng ninam indaiku ongko boko somadikan-Ku!

³⁵ Somuo urakng inyo molabuhan lapo inyo dikohonda'i Allah, sia' nanam somadikan lolaki-Ku, somadikan botina'-Ku ongko indaiku.”