Markus 2 - Porjanjian Boharu Torjomahan Baso Dilakng Soari-ari

Agatn monyamani urakng lumpuh, Yesus mombutian diri-Nyo bokuaso moamputi dosa

¹ Boboropo ari lopas nantai, Yesus bobali' ko kota Kapernaum. Banya' urakng mondinga' obai Sio ado di rumah nantai

² Jadi, kotakan banya' urakng datakng bokumpul di santai. Rumah nantai bisi agatn urakng kotakan pohadapan lawakng pan conyiant ado tompat. Tongahan Yesus momboritoan Pomandiran Allah ko sia',

³ ado ompat urakng datakng mombaba' siku' urakng lumpuh. Sia' honda' mombaba' urakng nantai ko Yesus pakai' dinyamani.

⁴ Apo sia' culih mansu' ko dalapm rumah obai banya' bondar urakng. Ongko sia' mongaro hatap pas di pucu' tompat Yesus mongajar. Sia' mouluran urakng lumpuh nantai inyo diulit'an di tikarnyo.

⁵ Pas Yesus moniant iman sia', Yesus bopandir ko urakng lumpuh nantai, “Oi ana'-Ku, dosa kolai udah diamputi.”

⁶ Apo, boboropo guru agama Yahudi inyo tongahan dudu' di santai bopikir dalapm hati sia',

⁷ “Hibo urakng ni'in bopandir ubo nian? Sio mohayam Allah! Ongkah Allah inyo ulih moamputi dosa!”

⁸ Kato-Nyo ko sia', “Mapo kaitn bopikir sama'an nian di dalapm hati kaitn?

⁹ Mono inyo lobih mudah, bopandir ko urakng lumpuh ni'in ‘Dosa kolai udah diamputi’ kata'an bopandir ‘Bodiritncam, angkat tikar kolai nantai ongko bojalatncam’?

¹⁰ Apo watu ni'in, Aku paca'an monunju'an ko kaitn obai Ana' Monsio bokuaso moamputi dosa di dunia ni'in.” Jadi Yesus bopandir ko urakng lumpuh nantai,

¹¹ “Bodiritn cam huatan angkatcam tikar kolai, ongko pulakngcam!”

¹² Lansukng urakng nantai bodiritn di pohadapan sia' somuo, moangkat tikarnyo lalu botula' ko luar. Somuo urakng di santai hiratn, lalu momuji Allah. Kato sia', “Kito bolupm kalo moniant kojadian ubo ni'in!”

Yesus bokawal agatn boko urakng inyo dianggap bodosa

¹³ Lopas nantai, Yesus botula' agi' ko pinggir danau Galilea. Banya' urakng datakng ko Sio, lalu Sio mongajar sia'.

¹⁴ Tongahan Yesus bojalatn di santai, Sio moniant ado urakng Yahudi inyo monagih pajak pakai' pomorintahan Romawi. Damonyo Lewi, ana' Alfeus. Lewi tongahan dudu' di rumah tompat pongumpulan pajak. Yesus bopandir ko io, “Tuyut Aku!” Lewi lansukng bodiritn, tuyut Yesus.

¹⁵ Timpu Yesus tongahan makatn di rumah Lewi, ado banya' ponagih pajak ongko boko urakng bukai inyo dianggap ulih masrakat bodosa, datakng tuyut makatn bosamo-samo agatn Yesus ongko boko murid-Nyo. Obai, banya' di antaro sia' tuyut Yesus.

¹⁶ Apo watu boko pomimpitn agama Yahudi doi' kolompok Farisi ongko boko guru agama Yahudi moniant Yesus makatn agatn ponagih pajak ongko boko urakng bodosa. Sia' bopandir ko boko murid Yesus, “Mapo Sio makatn bosamo agatn ponagih pajak ongko boko urakng bodosa?”

¹⁷ Apo Yesus mondinga' pomandiran sia' nantai. Jadi Sio bopandir, “Urakng inyo sehat kinyo momontikan dokter. Apo urakng boponyakit pasti pontikng dokter. Aku datakng bukainyo pakai' moningkau urakng bondar. Apo Aku datakng pakai' moningkau boko urakng inyo bodosa oca' sia' moninggalan boko dosa sia'.”

Yesus monjolasan alasan hibo boko murid-Nyo kinyo bopuaso

¹⁸ Boko murid Yohanes Pombaptis ongko boko urakng Farisi bopuaso. Jadi, watu nantai, ado boko urakng inyo datakng ko Yesus lalu botakutn, “Boko murid Yohanes ongko boko pongikut urakng Farisi bopuaso. Hibo boko murid kolai cado?”

¹⁹ Timbas Yesus ko sia', “Watu pongantitn lolaki ija' bosamo agatn pokawalannyo di pogai pokawitan, pasti pokawalannyo kinyo bopuaso.

²⁰ Apo watunyo tajahan datakng, pongantitn lolaki dikuti' doi' sia'. Watu nantai, sia' tajahan bopuaso.

²¹ Aman baju inyo manah birat, conyiant urakng inyo monumpal baju nantai agatn momakai solamba'i koitn inyo ija' boharu. Obai, koitn inyo ija' boharu tajahan ngorisut lalu birat di baju nantai monjadi lobih bosar.

²² Sama'an nian jam conyiant urakng inyo monyimpatn anggur boharu dalapm kantong kulit inyo manah. Urakng co molabuhan nantai obai watu anggur boharu mongombakng, kantongnyo pocah. Jadi kantongnyo rusa' lalu anggurnyo tumpah. Koduonyo tobuakng. Anggur inyo boharu gola' disimpatn dalapm kantong inyo boharu jam.”

Pongajaran Yesus mongona'i ari Sabat

²³ Timpu ari Sabat, Yesus ongko boko murid-Nyo bojalatn molalu'i lakau gandupm. Boko murid-Nyo momokis boko tangka'i gandupm.

²⁴ Jadi, boko urakng Farisi bopandir ko Sio, “Tiat! Porbuatan boko murid Kolai nantai salah! Obai, ado porintah Allah dalapm Hukupm Torat inyo morarakng urakng bokorojo watu ari Sabat.”

^25-26 Timbas Yesus ko sia', “Pasti kaitn kalo mombaco Buku Suci mongona'i porbuatan Rajo Daud watu Abyatar monjadi Imam Agukng. Daud ongko boko urakng inyo tuyutnyo kolaparan. Jadi, Daud mansu' ko dalapm Rumah Allah, monguti' roti inyo udah diposombahan ko Allah. Monurut Hukupm Torat bayo boko imam ulih bopua' roti nantai. Apo watu nantai, Daud momua'inyo. Io moonju' ko boko urakng inyo tuyutnyo pakai' bopua' jam.”

²⁷ Lalu kato Yesus ko sia', “Allah bulah ari Sabat pakai' kopontikan monsio. Sio co bulah monsio pakai' kopontikan ari Sabat.

²⁸ Jadi, Ana' Monsio ia'an Tuhatn inyo bokuaso doi' ari Sabat.”