Markus 15 - Porjanjian Boharu Torjomahan Baso Dilakng Soari-ari

Yesus di hadapan Gubernur Pilatus

¹ Kotakan sunsukng-pukau, somuo Mahkamah agama Yahudi bokumpul, tomansu' boko imam kopala', boko pomimpitn banso Yahudi huatan boko guru agama Yahudi. Sia' mombulah koputusan oca' Yesus dihukupm mati. Jadi, sia' mongobat jari Yesus momakai rantai lalu mombaba'-Nyo ko gubernur Pilatus. Timpu sia' monyorahan Yesus ko Pilatus,

² Pilatus botakutn ko Yesus, “Apo bai Kolai rajo urakng Yahudi?” Timbas Yesus, “Sama'an inyo kolai katoan nam.”

³ Boko imam kopala' moajuan banya' tuduhan molawatn Sio.

⁴ Pilatus botakutn agi' ko io, “Kolai mondinga' banya' tuduhan sia' molawatn Kolai. Mapo Kolai kinyo monimbas pakai' mombela diri Kolai?”

⁵ Apo, Sio kinyo monimbasi samo sokali, sampai Pilatus hiratn.

⁶ Nah, tiap watu ari rayo Paskah, gubernur Pilatus biasonyo molopasan siku' urakng doi' ponjara, sosuai agatn pilihan rayat.

⁷ Timpu nantai ado urakng di ponjara inyo bodamoan Barabas. (Barabas ditamoan ko dalapm ponjara bosamo agatn boboropo urakng inyo mombulah pomborontakan molawatn pomorintah Romawi. Sia' pan mombunuh dalapm pomborontakan nantai.)

⁸ Banya' urakng bokumpul lalu minto ko Pilatus oca' io molopasan siku' urakng doi' ponjara sama'an biasonyo.

⁹ Pilatus botakutn ko sia', “Apo bai kaitn honda' aku molopasan Rajo urakng Yahudi nantai?”

¹⁰ (Pilatus bopandir sama'an nantai obai io mongotohu'i alasan boko imam kopala' monyorahan Yesus ko io, ia'an obai sia' tungi agatn Yesus.)

¹¹ Apo boko imam kopala' mohadu urakng banya' nantai pakai' mominto oca' Barabas inyo dilopasan pakai' sia'.

¹² Jadi, Pilatus botakutn agi' ko urakng banya' nantai, “Aman sama'an nian, la'apo inyo kaitn kohonda'i oca' ku labuhan ko urakng inyo kaitn sobut Rajo urakng Yahudi nantai?”

¹³ Sia' somuo mondorah, “Hukupm mati Io di kayu salib!”

¹⁴ Kato Pilatus, “Apo kojahatan la'apo inyo udah dilabuhan-Nyo?” Apo sia' mongkitn borakng, “Hukupm mati Io di kayu salib!”

¹⁵ Obai Pilatus honda' monyonangan urakng banya' nantai, jadi io molopasan Barabas obai porminta'an sia'. Apo Yesus dicambuk. Lalu Pilatus monyorahan Yesus ko boko projuritnyo oca' dihukupm mati di kayu salib.

Boko projurit moulu'-ulu' Yesus

¹⁶ Lopasnyo boko projurit Pilatus nantai mombaba' Yesus ko istana gubernur. Sia' moningkau soluruh pasukan pakai' bokumpul di santai.

¹⁷ Lalu sia' mula'i mohanyam Sio sobagai rajo. Sia' mongona'an jubah ungu ko Sio. Sia' pan moanyam somacapm mahkota doi' boko ranggau boduri, lalu diangga'an dikopala'-Nyo.

¹⁸ Sia' pompadah mohormati Sio. Kato sia', “Pujicam Rajo Urakng Yahudi!”

¹⁹ Lopasnyo, sia' moigahi-Nyo ongko momantu kopala'-Nyo agatn batakng buluh. Sia' pan tundu' monyungkapan di hadapan-Nyo, pompadah monyombah-Nyo.

²⁰ Lopas sia' boulu'-ulu'an Sio, sia' molopasan jubah ungu nantai lalu bali' mongona'an pakai'an-Nyo siku'. Lopasnyo sia' mombaba' Sio ko luar pakai' dihukupm mati di kayu salib.

Yesus dipaku di kayu salib

²¹ Watu sia' tongahan bojalatn, sia' nantai botomu agatn urakng doi' kota Kirene. Damonyo Simon. (Io ia'an bopai Aleksander ongko Rufus.) Simon hoyu' datakng doi' luar kota. Boko projurit momoso io pakai' momikul kayu salib Yesus.

²² Sia' mombaba' Yesus ko tompat inyo bodamoan Golgota. Damo nantai rotinyo ‘Tompat Tongkorak’.

²³ Di santai, sia' moonji'i Yesus minum anggur inyo bocampur agatn mur. Apo Sio kinyo honda' mominumnyo.

²⁴ Lopasnyo, sia' momaku Sio di kayu salib. Boko projurit monguti' pakai'an Yesus lalu moundinyo pakai' mombagi-bagian pakai'an-Nyo.

²⁵ Sia' momaku Sio di kayu salib watu japm sombilatn sunsukng.

²⁶ Di bagian pucu' kayu salib, sia' momasakng tulisan inyo monjolasan alasan Sio dihukupm. Bunyi ni'in tulisan nantai, “Rajo Urakng Yahudi.”

²⁷ Bosamo agatn Yesus, sia' pan monyaliban duo urakng ponyamun, inyo siku' di sopia' kanan-Nyo ongko inyo siku' agi' di sopia' kiba'-Nyo. [

²⁸ Agatn sama'an nantai, pomandiran ni'in dalapm Buku Suci monjadi nyata: “Io dianggap siku' doi' boko urakng inyo jahat.”]

²⁹ Boko urakng inyo lalu di santai mohanyam Sio kapikng monggala'-monggili'an kopala'. Kato sia', “Ui Duatn inyo honda' morobahan Rumah Allah lalu moninjakannyo agi' dalapm watu tigo ari!

³⁰ Turutn cam doi' kayu salib nian! Solamant'an cam diri Duatn!”

³¹ Ubo nian jam boko imam kopala' ongko boko guru agama Yahudi. Sia' mohanyam Yesus. Kato sia' ko siku'-monyiku', “Io monyolamant'an urakng bukai, apo culih-Nyo monyolamant'an diri siku'!

³² Aman Sio bondar-bondar Rajo Urakng Israel, Rajo Inyo Dijanjian Allah, biaram Sio turutn doi' salib nian! Aman koi ulih moniant Sio mampu molabuhan nantai, koi paca'an pocayo ko Sio.” Koduo urakng ponyamun inyo disaliban di sopia' Yesus, sia' pan mohanyam Sio jam.

Yesus mati

³³ Pas japm duo bolas tongah ari, soluruh doerah nantai monjadi kotakng potakng sampai japm tigo babahari.

³⁴ Pas japm tigo babahari, Yesus mondorah kotakng borakng, “Eloi, Eloi, lama sabakhtani?” Rotinyo, “Allah-Ku, Allah-Ku, mapo Duatn moninggalan Aku?”

³⁵ Boboropo urakng inyo mondinga' nantai kinyo mongoroti. Kato sia', “Tiat, Sio moningkau nabi Elia.”

³⁶ Siku' urakng doi' sia' hagar botula' monguti' lou' inyo ulih monyorap ara'i. Io bolit'an ko hujukng sokayu' buluh lalu dicolupannyo ko dalapm anggur mansapm. Io julukan ko nyao Yesus oca' diminum-Nyo. Urakng nantai bopandir, “Huncapm soboi'nyo kito tantian, ongko moniant aman Elia datakng pakai' monurutan Sio doi' salib.”

³⁷ Yesus mondorah agi' agatn saro borakng, huatan monyorahan kosih-Nyo.

³⁸ Watu nantai jam, tidikng di dalapm Rumah Allah birat monjadi duo, doi' pucu' ko babah.

³⁹ Ado kopala' pasukan inyo bodiritn di pohadapan salib Yesus. Io moniant somuo inyo tojadi watu Yesus mati. Jadi, io bopandir, “Urakng ni'in maho bondar-bondar Ana' Allah!”

⁴⁰ Di santai ado jam boko botina' inyo moniant doi' jouh. Di antaro sia' ia'an Salome, Maria Magdalena, ongko Maria (indai doi' Yakobus inyo muda' ongko Yoses.)

⁴¹ Sia' ia'an botina' inyo tuyut Yesus huatan molayati Sio timpu Sio di propinsi Galilea. Ado banya' botina' inyo bukainyo jam di santai inyo datakng ko Yerusalem bosamo Yesus.

Yesus dipasar di dalapm gua

⁴² Ari nantai ia'an ari Jumat, ari urakng Yahudi monyodia'an posiapan sobolupm mula'i ari Sabat. Ari udah hampikng malapam, ari Sabat pan hampikam.

⁴³ Jadi, ado urakng inyo bodamoan Yusuf, bokotohuan ko gubernur Pilatus honda' moijitn aman io ulih momasar bangkai Yesus. (Yusuf ni'in asalnyo doi' kota Arimatea. Io anggota Mahkamah agama Yahudi huatan io dirogo'i urakng. Io pan ia'an urakng inyo monanti Koraja'an Allah datakng.) Io kinyo gola' monomu'i Pilatus.

⁴⁴ Pilatus hiratn mondinga' obai Yesus udah mati. Jadi, io moningkau kopala' pasukan ongko botakutn aman Yesus bondar udah mati am.

⁴⁵ Lopas mondinga' laporan doi' kopala' pasukan nantai, lalu Pilatus moijitan Yusuf oca' momocaki bangkai Yesus.

⁴⁶ Yusuf momboli koitn inyo bowarna putih huatan borosih lalu botula' monurutan bangkai Yesus doi' salib. Io momutut bangkai Yesus momakai koitn nantai lalu moulit'an-Nyo di dalapm gua pasaran inyo dipulah di dalapm bukit batu. Io mombarikan batu bosar di sambakng gua tompat pasaran nantai pakai' ponutupnyo.

⁴⁷ (Maria Magdalena ongko Maria indai Yoses moniant di mono Yesus diulit'an.)