Markus 14 - Porjanjian Boharu Torjomahan Baso Dilakng Soari-ari

Boko pomimpitn urakng Yahudi bohajat pakai' mombunuh Yesus

¹ Boko imam kopala' ongko boko guru agama Yahudi honda' mombunuh Yesus. Sia' bogoyap caro pakai' monangkap Sio agatn caro kinyo dikotohu'i urakng. Apo, duo ari agi' ari Rayo Paskah huatan ari rayo Roti kinyo Boragi dampikng am.

² Kato sia', “Jangan kito sampai monangkap Yesus tongahan boko urakng morayaan ari rayo ni'in, obai nononyo paca'an ado korusuhan di antaro rayat.”

Botina' inyo monuyungan minya' harupm ko pucu' kopala' Yesus pakai' morogo'i Sio

³ Di laman Betania, Yesus ado di rumah Simon inyo komainyo boponyakit kulit inyo bogola'i. Timpu Sio tongahan dudu' makatn, ado botina' datakng ko Sio. Botina' nantai mombaba' botul pualam inyo boisi minya' harupm inyo kotakan mahal rogonyo. Io momatahan lihi' botul nantai, lopasnyo monuyung minya' nantai ko kopala' Yesus pakai' morogo'i Sio.

⁴ Apo ado boko urakng inyo godi obai hal nantai. Kato sia' ko siku'-monyiku', “Mapo minya' harupm diporugi'i sama'an nian?

⁵ Minya' harupm nian ulih dijual ongko rogonyo kotakan mahal huatan duitnyo hoyu' dionju' ko boko urakng jaro!” Lalu sia' monggodi'i botina' nantai.

⁶ Apo Yesus bopandir, “Biaran io ja'am. Jangan kaitn monyusahannyo! Io molabuhan inyo boi' ko aku.

⁷ Aman kaitn honda', kaitn hala ado mo kosompatan pakai' monulukng boko urakng jaro obai sia' hala bosamo agatn kaitn. Apo Aku kinyo paca'an hala bosamo agatn kaitn.

⁸ Botina' ni'in udah molabuhan la'apo inyo ulih io labuhan. Agatn caro monuyungan minya' harupm nantai ko Aku, sobondarnyo io udah monyiap'an bukakng-tubuh-Ku pakai' dipasar.

⁹ Dinga'an bo! Di soluruh dunia, di mono aja' Kabar Boi' diboritoan, la'apo inyo di pulah botina' ni'in paca'an dikisahan jam sampai kinyo kalo tongkolupatn mongona'i io.”

Rasul Yudas bohajat pakai' monyorahan Yesus ko boko urakng inyo molawatn-Nyo

¹⁰ Lopas nantai, Yudas Iskariot, ia'an salah siku' doi' koduo bolas rasul Yesus, io botula' ko boko imam kopala' tujuannyo pakai' monyorahan Yesus ko sia'.

¹¹ Timpu sia' mondinga' nantai, sia' kotakan rindakng bondar lalu bojanji paca'an moonji'i duit ko io. Jadi, io mula'i bogoyap kosompatan inyo boi' pakai' monyorahan Yesus ko sia'.

Yesus morayaan ari rayo Paskah bosamo agatn boko murid-Nyo

¹² Udah tuntukng watunyo pakai' momula'i poraya'an ari rayo Roti Kinyo Boragi. Watu ari potamo dalapm poraya'an nantai, urakng monyombolih domba pakai' makatn poraya'an Paskah. Jadi, boko murid Yesus bopandir ko Sio, “Di mono am inyo Duatn kohonda'i koi monyiap'an pakai' Duatn oca' makatn morayaan Paskah?”

¹³ Jadi, Yesus monyiuh duo urakng murid-Nyo. Kato-Nyo, “Botula' cam ko kota Yerusalem. Di su'utn, kaitn paca'an botomu urakng inyo mombaba' topaian boisi ara'i. Bodapan io ko rumah inyo dimansu'inyo.

¹⁴ Padahan ko puku' rumah nantai: ‘Koi disiuh Guru oca' botakutn, di mono ruakan inyo ulih dipakai Sio pakai' makatn Paskah bosamo agatn boko murid-Nyo?’

¹⁵ Lalu, puku' rumah nantai paca'an monunju'an ko kaitn sobuah ruakan inyo bosar di lantai pucu'. Somuo inyo kaitn pontikan pakai' morayaan Paskah ado di su'utn. Siap'an cam somuonyo di su'utn pakai' kito.”

¹⁶ Jadi, koduo murid nantai botula'. Somuo hal tojadi pas sama'an inyo udah dipadahan Yesus ko sia'. Lalu, sia' monyiap'annyo pakai' morayaan Paskah.

¹⁷ Pas malapm ari, Yesus datakng bosamo agatn koduo bolas murid-Nyo ko tompat nantai.

¹⁸ Tongahan sia' dudu' makatn di santai, Yesus bopandir, “Dinga'an bo! Siku' doi' antaro kaitn inyo makatn bosamo agatn Aku paca'an monyorahan Ku ko boko urakng inyo molawatn Aku.”

¹⁹ Hal nantai mombulah hati sia' kotakng salu'. Sia' siku'-monyiku' bopandir ko Sio, “Pasti bukainyo aku, pan Tuhatn?”

²⁰ Timbas Sio, “Urakng nantai ia'an salah siku' doi' kaitn duo bolas ninam. Io ia'an urakng inyo moncolupan rotinyo ko dalapm mangku' samo agatn Aku.

²¹ Udah totulis dalapm buku Suci obai Ana' Monsio paca'an disorahan ko boko urakng inyo molawatn-Nyo. Sosuai agatn tulisan nantai, hal nantai paca'an tojadi ko Io. Apo Allah paca'an mohukupm urakng inyo molabuhan nantai. Lobih boi' pakai' urakng nantai aman io kinyo kalo dilahiran samo sokali!”

Acara makatn pakai' monggonang Yesus

²² Watu Yesus ongko boko murid-Nyo tongahan makatn, Yesus monguti' roti lalu moucap'an doa sukur. Sio momingkai'-mingkai' roti nantai ongko moonju' ko boko murid-Nyo. Kato Sio, “Kuti', pua'icam, ninam bukakng-tubuh-Ku.”

²³ Lopas nantai, Yesus monguti' socangkir anggur. Sio moucap doa sukur agi' lalu moonju' cangkir nantai ko sia'. Sia' somuo minum doi' cangkir nantai.

²⁴ Kato-Nyo ko sia', “Ninam darah-Ku inyo paca'an ditumpahan pakai' banya' urakng watu Aku mati. Darah-Ku monsahan Pojanjian Boharu inyo Allah pulah agatn monsio.

²⁵ Apo porotian cam ni'in: Aku kinyo paca'an minum anggur agi' sampai Aku minum anggur inyo boharu dalapm Koraja'an Allah.”

Yesus momandiran obai rasul Petrus paca'an monyangkal-Nyo

²⁶ Lalu, Yesus ongko boko murid-Nyo monyanyian nyanyian pujian ko Allah. Lopas nantai, sia' botula' ko bukit Jaitun.

²⁷ Di santai, Yesus bopandir ko sia', “Malapm ni'in, kaitn somuo paca'an moninggalan Aku. Obai gola' tojadi sosuai agatn pomandiran Allah ni'in inyo totulis dalapm Buku Suci: ‘Aku paca'an mombunuh gombala nantai, lalu kabatn dombanyo paca'an botomboburan.’

²⁸ Apo lopas Allah mombulah Aku bobali' hidup, Aku paca'an botula' mondoholu'i kaitn ko propinsi Galilea.”

²⁹ Kato Petrus ko Yesus, “Mungkitn somuo sia' paca'an moninggalan Duatn, apo aku cado!”

³⁰ Apo Yesus bopandir ko io, “Dinga'an nam! Timpu malapm ni'in jam kulo paca'an monyangkal Aku sampai tigo kali sobolupm manu' bokuku' duo kali.”

³¹ Apo Petrus lobih togas bopandir, “Biar pan aku sampai mati bosamo Duatn, aku kinyo paca'an monyangkal Duatn.” Somuo murid inyo bukai bopandir sama'an nantai jam.

Yesus bodoa di kobutn Getsemani

³² Lopas Yesus ongko boko murid-Nyo datakam ko tompat inyo bodamo Getsemani. Di santai, Sio bopandir ko sia', “Kaitn dudu' di sinam, nantian Aku ko su'utn pakai' bodoa.”

³³ Sio mombaba' Petrus, Yakobus ongko Yohanes. Sia' botula' samoan Sio. Watu nantai, Yesus mula'i mooso kotakan salu' huatan golisah.

³⁴ Kato Sio ko sia', “Hati-Ku kotakan salu', osonyo sama'an honda' mati. Kaitn tanti di si'itn huatan bojojago.”

³⁵ Lopasnyo, Yesus bojalatn sodikit lobih jouh. Sio tundu' monyungkapan lalu bodoa. Dalapm doa-Nyo, Sio minto aman ulih Sio jangan moalapi watu ajab sonsaro inyo paca'an tojadi.

³⁶ Kato-Nyo, “Oi Bopai-Ku, lopasan bo Aku doi' ajab sonsaro inyo paca'an Ku alapi ni'in. Apo jangan monuruti kohonda'-Ku, apo ongkah monuruti kohonda' Duatn ja'am bopai inyo tojadi.”

³⁷ Lopas nantai, Sio bobali' ko boko murid-Nyo nantai. Sio moniant sia' tongahan tidu'. Kato-Nyo ko Petrus, “Simon, mapo kulo tidu'? Tonyato sojapm pan kulo culih bojojago?”

³⁸ Kulo gola' bojojago ongko bodoa oca' kulo co jatu' ko dalapm poncoba'an. Memang hati monsio honda' molabuhan inyo boi', apo udah baba'annyo am monsio lomah.

³⁹ Yesus botula' agi' lalu bodoa agatn momadahan pandir inyo samo sama'an tontai.

⁴⁰ Lopas Sio bobali', Sio moniant sia' tongahan tidu' agi' am obai sia' kotakan ngantu'. Jadi, sia' co tohu la'apo inyo gola' sia' pandiran ko Yesus.

⁴¹ Lopas nian, Yesus botula' kotigo kalinyo. Watu Sio bobali', Sio bopandir ko sia', “Kaitn pagutn tidu' ongko torahat bai?! Jadiam! Watunyo udah tuntukam pakai' Ana' Monsio disorahan ko boko urakng inyo bodosa.

⁴² Huascam! Hincapm! Udah datakam io inyo monyorahan Aku ko boko urakng inyo molawatn Ku.”

Yesus ditangkap

⁴³ Somontaro Yesus ija' bopandir, Yudas datakng. Io ia'an siku' doi' koduo bolas rasul. Bosamo-samo agatn io, sorombokan urakng datakng jam mombaba' podakng ongko pompangkukng. Sia' di siuh boko imam kopala', boko guru agama Yahudi huatan boko pomimpitn banso Yahudi.

⁴⁴ (Nah, sobolupmnyo, Yudas nantai udah bohajat pakai' monyorahan Yesus ko rombokan inyo molawatn Yesus nantai. Io moonji'i tando ni'in ko sia'. Katonyo, “Urakng inyo ku ciupm, nanam urakngnyo. Tangkap cam Io! Baba'cam Io ko boko pomimpitn agama. Somanah nantai, jago'i cam Io bobondar.”)

⁴⁵ Jadi, watu Yudas ongko rombokan datakng di santai, Yudas lansukng mohampiki Yesus. Katonyo, “Salapm, Guru!” Lalu, Yudas monciupm Sio.

⁴⁶ Lansukng rombokan nantai maju, monangkap Yesus.

⁴⁷ Siku' urakng inyo monambahi Yesus moncabut podakng, lansukng monyorakng siku' hulutn Imam Agukng. Io momopat kolindakan hulutn nantai sampai putus.

⁴⁸ Yesus bopandir ko rombokan nantai, “Ponjahat bai Aku ni'in, sampai kaitn datakng gola' agatn podakng huatan pompangkukng pakai' monangkap Ku?

⁴⁹ Padohal, sotiap ari Aku di tongah-tongah kaitn mongajar di tongahlamanan Rumah Allah. Apo watu nantai kaitn co monangkap Ku. Apo, somuonyo ni'in tojadi oca' pomandiran mongona'i Aku inyo ditulis dalapm Buku Suci monjadi nyata.”

⁵⁰ Lalu somuo murid Yesus morarian diri moninggalan Sio.

⁵¹ Watu nantai, ado bujakng inyo tuyut Yesus. Io ongkah momakai koitn pakai' momutut bukakngnyo. Rombokan nantai honda' monangkap io jam.

⁵² Apo pas sia' monjujuti io, io molopasan koitn nantai huatan rari bokolanjakng.

Yesus di hadapan Mahkamah agama Yahudi

⁵³ Boko urakng inyo monangkap Yesus mombaba'-Nyo ko Imam Agukng. Timpu nantai, somuo imam kopala', boko pomimpitn banso Yahudi ongko boko guru agama Yahudi bokumpul di santai.

⁵⁴ Petrus bontuyutan Yesus doi' jouh sampai ko tongahlamanan rumah Imam Agukng nantai. Di santai, Petrus dudu' dampikng api kapikng botindu agatn boko ponjago.

⁵⁵ Boko imam kopala' ongko somuo Mahkamah agama Yahudi bousaha bogoyap buti oca' Yesus dapat dihukupm mati. Jadi, sia' bogoyap boko urakng inyo paca'an monjadi sasi pakai' molawatn Yesus. Apo, sia' kinyo bohasil mondapat'an buti la'apo pan.

⁵⁶ Banya' urakng maju pakai' bosasi palsu molawatn Yesus, apo pandir siku' urakng kinyo samo agatn pandir urakng bukainyo.

⁵⁷ Lalu, boboropo urakng maju pakai' monjadi sasi palsu molawatn Yesus.

⁵⁸ Kato sia', “Urakng ni'in kalo bopandir Io paca'an morobahan Rumah Allah inyo di pulah agatn jari monsio. Lalu, dalapm watu tigo ari, Io paca'an moninjakan inyo bukainyo, inyo kinyo di pulah agatn jari monsio.”

⁵⁹ Apo pandir boko urakng nantai pan kinyo samo agatn inyo bukainyo.

⁶⁰ Lalu Imam Agukng nantai bodiritn di tongah sidakng nantai. Katonyo ko Yesus, “Apo bai Kolai kinyo monimbas tuduhan nantai inyo ditujuan ko Kolai?”

⁶¹ Apo Yesus kinyo bobunyi. Sio kinyo monimbas samo sokali. Imam Agukng nantai botakutn agi', “Apo bai Kolai Rajo Inyo Dijanjian Allah inyo kito sobut ‘Mesias’? Apo bai Kolai Ana' doi' Allah inyo Topuji?”

⁶² Timbas Yesus, “Aku nam io nantai. Kaitn paca'an moniant ana' Monsio dudu' di tompat inyo tohormat di sopia' kanan Allah Inyo kotakan bokuaso. Nononyo, kaitn pan paca'an moniant Io datakng di pucu' boko awatn di langit.”

⁶³ Mondinga' nantai, Imam Agukng mombirat-birat pakai'annyo. Katonyo ko boko pomimpitn inyo bukainyo di santai, “Pompadohan bogoyap sasi pakai' momandiran kosalahan-Nyo!

⁶⁴ Io udah mohanyam Allah! Kaitn pan udah mondinga' pandir-Nyo siku' monyamoan diri-Nyo agatn Allah! Jadi, la'apo koputusan kaitn?” Sia' somuo mombulah koputusan inyo samo, ia'an nantai Sio gola' dihukupm mati.

⁶⁵ Lalu boboropo urakng moigahi Yesus. Sia' monutup mato-Nyo huatan bodularan Sio. Sia' mohanyam Sio agatn bopandir, “Aman Duatn bondar-bondar nabi, butianbo, sopo inyo bodularan Duatn?” Boko ponjago nantai pan jumpat monompilikng Yesus.

Rasul Petrus monyangkal Yesus

⁶⁶ Timpu nantai, Petrus ija' ada'an di tongahlamanan rumah nantai. Siku' botina' mohampiki io. Botina' nantai ia'an urakng inyo monjadi hulutn di rumah Imam Agukng nantai.

⁶⁷ Watu io moniant Petrus tongahan botindu, io borotian mato-muho Petrus. Katonyo, “Pasti kolai ni'in pan urakng inyo hala bosamo-samo agatn Yesus, urakng doi' laman Nazaret nantai.”

⁶⁸ Apo Petrus monyangkal. Katonyo, “Aku cuku tohu la'apo inyo kolai pandiran! Aku co mongoroti la'apo inyo kolai pandiran!” Lalu, Petrus botula' ko pohadapan, pintu gerbakng tongahlamanan nantai. [Watu nantai, manu' bokuku'.]

⁶⁹ Botina' hulutn nantai moniant Petrus agi'. Jadi, io bopandir jam ko boko urakng di santai, “Urakng ni'in ia'an murid Urakng inyo ditangkap tontai.”

⁷⁰ Apo sokali agi' Petrus monyangkal Yesus. Kinyo manah lopas nantai, boko urakng di santai bopandir agi' ko Petrus, “Pasti kolai ni'in salah siku' urakng doi' sia' boko murid Urakng nantai obai kolai pan doi' doerah Galilea jam!”

⁷¹ Apo Petrus monyangkal agi' sampai bosumpah. Katonyo, “Aku maho bondar-bondar cuku mongonal Urakng inyo kaitn pandiran nian!”

⁷² Watu nantai jam, manu' bokuku' pas koduo kalinyo. Petrus toingant pomandiran Yesus ko io, “Sobolupm manu' bokuku' duo kali, kolai paca'an monyangkal-Ku tigo kali.” Jadi, Petrus monangis obai kotakng monyosal.