Markus 13 - Porjanjian Boharu Torjomahan Baso Dilakng Soari-ari

Rumah Allah tajahan diruntuhan

¹ Watu Yesus koluar doi' tongahlamanan Rumah Allah, siku' murid-Nyo bopandir ko Sio, “Guru, tiatbo! Rumah Allah nian di pulah doi' batu inyo kotakng bosar. Somuo boko bangunan di siatn kotakng boi'!”

² Kato Yesus, “Au, porotian cam somuo bangunan inyo hebat ni'in. Nononyo, somuonyo tajahan dihancuran. Somuo batu boko bangunan nantai tajahan diruntuhan.”

Boko murid Yesus tajahan di dorako'i

³ Lopas nian, Yesus botula' ko bukit Jaitun. Sio dudu' di santai botopakan agatn Rumah Allah. Timpu nantai, Petrus, Yakobus, Yohanes, huatan Andreas datakng ko Sio honda' bopandir sonsiku'an agatn Sio. Kato sia',

⁴ “Tulukng pandiran ko koi bo, sombilo somuonyo nantai tajahan tojadi. Boko tando la'apo inyo monunju'an obai udah watunyo?”

⁵ Timbas Yesus ko sia', “Boboi'cam! Jangan sampai kaitn monjumpati boko urakng inyo salah.

⁶ Obai banya' urakng tajahan datakng inyo mongaku' dirinyo Aku. Sia' tajahan bopandir, ‘Aku nam Rajo Inyo Dijanjian Allah!’ Sia' tajahan monipu urakng banya'.

⁷ Kaitn tajahan mondinga' lotup poparakan huatan borito mongona'i poparakan. Apo jangan gola'. Somuonyo nantai gola' tojadi. Apo nian kinyo boroti dunia tajahan boahir dalapm watu inyo dampikng.

⁸ Banso tajahan boparakng molawatn banso inyo bukai. Negara molawatn negara inyo bukai. Di mono-mono tajahan ado kolaparan huatan gompa bumi. Apo somuo hal nantai bayo pomula'an doi' somuo ajab sonsaro inyo tajahan tojadi. Samo sama'an indai inyo buntikan mooso podih watu mohidap-porut honda' boana'an.

⁹ Kaitn gola' boboi' obai kaitn tajahan ditangkap lalu dibaba' ko sidakng pomimpitn agama pakai' dipokaroan. Kaitn tajahan dipoduda'an diboko rumah sombayakng. Obai kaitn nantai murid-Ku, obai nianam kaitn tajahan dibaba' ko boko ponguaso huatan ko boko rajo pakai' dipokaroan jam. Apo, nianam watunyo pakai' kaitn bosasi mongona'i Aku.

¹⁰ Apo Kabar Boi' gola' diboritoan kosomuo banso holu'ai.

¹¹ Watu kaitn ditangkap lalu dibaba' ko pongadilan, jangan kuatir mongona'i pomandiran inyo tajahan kaitn pandiran pakai' mombela diri kaitn. Obai, watu nantai, Roh Allah tajahan moonji'i kaitn pomandiran. Jadi, watu nantai, bukainyo kaitn inyo bopandir, apo Roh Allah di dalapm kaitn inyo bopandir.

¹² Nononyo tajahan tojadi obai ado urakng monyorahan somadikan sia' pakai' dibunuh. Ubo nian jam, bopai tajahan monyorahan ana'nyo pakai' di bunuh. Boko bobia' tajahan molawatn huatan monyorahan bopai agatn indai sia' pakai' di bunuh.

¹³ Somuo monsio tajahan bonci' agatn kaitn obai kaitn nantai murid-Ku. Apo somuo urakng inyo totap botahatn, sotia koAku, sampai ahirnyo, sia' tajahan disolamant'an.”

Watu monsio kotakng ajab sonsaro

¹⁴ Yesus bopandir, “Ado totulis di dalapm Buku Suci mongona'i siku' urakng jahat inyo mombonasoan. Urakng nantai tajahan bodiritn di tompat inyo kinyo cucu' pakai' inyo.” (Catatan pakai' urakng inyo mombaco ni'in: Porotian cam oca' ulih momahami rotinyo). Yesus molajuan pandir-Nyo, “Aman kaitn moniant hal nantai bondaram, soboi'nyo boko urakng di doerah Yudea gola' morarian diri ko boko bukit.

¹⁵ Urakng inyo tongahan ado di pucu' hatap rumah, jangan turutn pakai' monguti' sosuatu inyo ado di dalapm rumahnyo.

¹⁶ Sama'an nian jam urakng inyo tongahan di lakau, jangan bobali' pakai' monguti' jubahnyo.

¹⁷ Kotakng salu' boko botina' inyo tongahan buntikan ongko inyo ija' monyusu'i watu nantai.

¹⁸ Bodoa cam oca' hal nantai kinyo tojadi watu musipm dingin.

¹⁹ Obai, watu ari nantai tajahan tojadi siksaan inyo kotakng borat. Siksaan ubo nantai bolupm kalo tojadi doi' mulo Allah mombulah dunia ni'in sampai watu ni'in ongko co kalo tajahan tojadi agi'.

²⁰ Sokironyo, timpu nantai kinyo dipulah lobih panda' ulih Tuhatn, maho conyiant siku' urakng pan inyo botahatn hidup. Apo obai boko urakng inyo dipilih Tuhatn, watu nantai dipulah lobih panda'.

²¹ Timpu nantai, aman ado urakng inyo bopandir ko kaitn, ‘Tiat, Rajo Inyo Dijanjian Allah ado di si'itn.’ Kata'an ‘Io ado di su'utn,’ pasti kinyo bondar. Maho jangan kaitn pocayo.

²² Obai, tajahan ado boko urakng datakng inyo ngaku' dirinyo nantai Rajo Inyo Dijanjian Allah. Apo sia' kinyo bondar. Tajahan ado boko nabi palsu jam. Boko rajo palsu agatn boko nabi palsu nantai tajahan mombulah somuo macapm mujisat pakai' mombulah urakng monjadi sosat. Soumpamonyo mungkitn sia' pan honda' mombulah boko urakng inyo dipilih Allah monjadi sosat jam.

²³ Jadi boboi' cam! Aku udah momandirannyo ko kaitn mongona'i boko hal ni'in sobolupm tojadi.”

Boko tando inyo monunju'an Yesus tajahan bobali' ko dunia ni'in

²⁴ “Lopas jadi ajab sonsaro nantai, matoari tajahan monjadi potakng. Bulatn kinyo borandai agi'.

²⁵ Boko bintakng tajahan jatu' doi' langit. Boko ponguaso di langit tajahan boguyakng.

²⁶ Timpu nantai, boko urakng tajahan moniant Ana' Monsio datakng di pucu' awatn. Io tajahan monunju'an kuaso huatan komulia'an-Nyo.

²⁷ Io tajahan moutus boko molekat-Nyo pakai' mongumpulan boko urakng inyo Io pilih doi' somuo tompat di dunia.

²⁸ Bolajar cam doi' contoh ni'in mongona'i batakng kayu ara. Aman boko ranggaunyo monjadi gomunt ongko mula'i botunas, kaitn tohu obai musipm podi' dampikam.

²⁹ Sama'an nian jam, aman kaitn moniant boko tando di langit nantai, jadi kaitn tajahan tohu obai dampikam watunyo Ana' Monsio tajahan bobali' datakng.

³⁰ Sobondarnyo inyo Aku pandiran ni'in: Boko urakng doi' joman ni'in kinyo tajahan mati sobolupm somuonyo ni'in tojadi.

³¹ Pocayo cam agatn pomandiran-Ku, obai biar pan langit ongko bumi tajahan boahir, pomandiran-Ku pasti kinyo tajahan hilakng.

³² Apo conyiant ado urakng inyo mongotohu'i ari huatan japmnyo. Boko molekat di sorugo kinyo tohu agatn Ana' pan kinyo tohu jam. Ongkah Bopai di sorugo am inyo tohu.”

Boko murid Yesus gola' hala siap pakai' kodatakan-Nyo agi'

³³ “Kaitn gola' bojago-jago! Obai, kaitn kinyo tohu sombilo watunyo.

³⁴ Koadaannyo samo sama'an kisah ni'in: Ado siku' habakng inyo moninggalan rumahnyo lalu botula' ko doerah inyo jouh. Io moonji'i tugas ko siku'-monyiku' hulutnnyo pakai' monyiuh sia' mourus rumahnyo. Io moonju' porintah ko urakng inyo monjago lawakng, oca' bojago boboi'.

^35-36 Jadi, sia' gola' bojago-jago obai sia' kinyo tohu sombilo habakng rumah nantai tajahan bobali', mungkitn watu babahari, mungkitn watu tongah malapm, mungkitn watu dinihari, kata'an mungkitn watu matoari moncara'. Aman io ntobukan datakng, jangan sampai io monomu'i sia' tongahan tidu'. Sama'an nian jam agatn kaitn.

³⁷ La'apo inyo Ku pandiran ko kaitn, Ku pandiran jam ko somuo urakng: Bojago-jagocam!”