Markus 12 - Porjanjian Boharu Torjomahan Baso Dilakng Soari-ari

Yesus monyamoan boko pomimpitn urakng Yahudi agatn boko potani inyo jahat

¹ Lopasnyo Yesus bopandir ko sia' momakai poumpamoan. KatoNyo, “Ado urakng inyo mombulah kobutn anggur. Io mombulah pagar sokolilikngnyo, mongali lubakng tompat momoyah buah anggur nantai, ongko moninjakan monara jam oca' kobutn nantai dapat dijago'i. Lopasnyo, io monyewaan kobutn nantai ko boko potani, lalu borangkat ko nogori bukai.

² Watu musipmnyo am momotik buah anggur, puku' kobutn nantai monyiuh hulutnnyo ko boko potani ponyewa nantai pakai' monguti' hasil kobutn inyo monjadi bagian io.

³ Apo sia' monangkap hulutn nantai, boduda'annyo, lalu monyiuhnyo pulakng kinyo dionji'i la'apo pan.

⁴ Puku' kobutn nantai monyiuh hulutn inyo bukainyo ko sia'. Apo, sia' boduda'an hulutn nantai jam, sampai luko kopala'nyo. Sia' pan momisuh-maki io jam.

⁵ Puku' kobutn nantai monyiuh hulutn inyo bukainyo agi' datakng ko sia'. Apo, sia' mombunuh hulutn nantai. Sama'an nian jam sotorusnyo agatn banya' hulutn agi'. Ado inyo dipantu' sia'. Ado jam inyo dibunuh sia'.

⁶ Apo, puku' kobutn nantai ija' ado siku' urakng agi', ia'an ana'nyo siku' inyo kotakan kokidahnyo. Io bopandir dalapm hatinyo, ‘Pasti am boko potani nantai tajahan morogo'i ana'ku.’ Jadi, koponsuahannyo, io monyiuh ana'nyo ko sia'.

⁷ Apo, boko potani ponyewa nantai bopandir di antaro sosamo sia', ‘Io nantai nononyo inyo monjadi puku' kobutn ni'in aman bopainyo udah mati. Mara am, kito mombunuh io oca' kobutn ni'in monjadi umputn kito!’

⁸ Jadi, sia' monangkapnyo, mombunuhnyo, lalu mombuakan io ko luar kobutn anggur nantai.”

⁹ Lopasnyo Yesus botakutn ko sia', “Watu ni'in, la'apo inyo tajahan dilabuhan puku' kobutn nantai? Pasti io tajahan datakng lalu mombonasoan boko potani ponyewa nantai. Lopas nantai io tajahan mompocayoan kobutn anggur nantai ko boko urakng bukai.

¹⁰ Pasti kaitn kalo mombaco di Buku Suci mongona'i ni'in: ‘Batu inyo ditula' boko tukakng bangunan udah monjadi batu inyo kotakng pontikng pakai' bangunannyo.

¹¹ Tuhatn inyo molabuhan nantai! Pakai' kito, porbuatanNyo nantai nontu bondar.’ ”

¹² Boko pomimpitn agama udah mongoroti masud doi' poumpamoan Yesus nantai. Poumpamoan nantai monyalahan sia'. Jadi sia' honda' monangkap Sio. Apo watu nantai sia' kinyo ulih obai sia' gola' agatn urakng banya'. Jadi, sia' botula' moninggalan Sio.

Boko pomimpitn urakng Yahudi balakng mouru'an Yesus Potakutan mongona'i pombayaran pajak ko pomorintahan Romawi (12:13-17)

¹³ Lopas nian, boboropo pomimpitn agama Yahudi doi' kolompok Farisi agatn boko urakng inyo mondukukng Rajo Herodes disiuh botula' ko Yesus. Tujuan sia' pakai' mouru'an Yesus agatn sobuah potakutan.

¹⁴ Jadi, boko urakng nantai datakng ko Yesus huatan bopandir, “Guru, koi tohu Duatn urakng inyo jujur. Duatn mongajar agatn jujur mongona'i caro hidup sosuai agatn porintah Allah. Duatn kinyo momihak boko urakng totontu. Obai nantai, Duatn kinyo gola' agatn sosopo pan. Monurut Duatn, poraturan Allah dalapm Hukupm Torat moulihan kito mombayar pajak ko Rajo Roma kata'an cado ai? Gola' kito bayar pajak kata'an cado ai?”

¹⁵ Apo Yesus mongotohu'i sia' inyo pompadah boi'. Ongko Sio bopandir ko sia', “Mapo kaitn moncubo monggogadati Aku? Cubo tiat'an ko Aku sopingka'i duit pira'.”

¹⁶ Ongko, sia' moonju' sopingka'i duit pira' ko Sio. Yesus botakutn ko sia', “Gambar ongko damo sopo tocetak di si'itn?” Timbas sia', “Gambar ongko damo Rajo Roma inyo disobut Kaisar.”

¹⁷ “Amannyo ubo nian,” kato Yesus, “Onju' cam ko Kaisar inyo monjadi umputnnyo. Ongko onju' jam ko Allah inyo monjadi umputn Allah!” Sia' kotakng hiratn mondinga' Yesus monimbasi dinga' nantai.

Potakutan mongona'i bobali' hidup doi' komatian (12:18-27)

¹⁸ Lopasnyo, boboropo pomimpitn agama Yahudi inyo bukainyo datakng ko Yesus. Sia' doi' kolompok Saduki inyo kinyo pocayo agatn urakng mati bobali' hidup. Jadi, sia' moncubo mouru'an Yesus agatn potakutan mongona'i nantai. Kato sia',

¹⁹ “Guru, Musa moajaran poraturan ubo ni'inan: Aman ado lolaki mati, kinyo boana', lalu somadikannyo gola' kawitn agatn iparnyo nantai oca' moonji'i koturutan pakai' somadikannyo inyo udah mati nantai.

²⁰ Nah, ado tujuh urakng somadikan. Somadikan inyo kojula'an kawitn agatn siku' botina', apo io mati sobolupm sia' boana'.

²¹ Lalu, somadikannyo inyo koduo mongawiti iparnyo nantai. Apo, io pan mati jam sobolupm boana'. Sama'an nian jam tojadi agatn somadikannyo kotigo.

²² Sama'an nian jam sotorusnyo sampai somadikannyo kotujuh. Ahirnyo, lopas somuo somadikan nantai mati, botina' nantai pan mati jam.

²³ Jadi, sia' tujuh somadikan somuonyo kawitn agatn botina' nantai jam. Nononyo watu urakng bobali' hidup agi' doi' komatian, botina' nantai tajahan monjadi bini inyo mono?”

²⁴ Timbas Yesus ko sia', “Kaitn koliru bondar obai kaitn kinyo mongoroti Buku Suci ongko kuaso Allah!

²⁵ Watu boko urakng hidup agi', conyiant am hubukan laki bini agi'. Sia' tajahan hidup samo sama'an molekat di sorugo.

²⁶ Hal mongona'i boko urakng hidup agi' doi' komatian ado di dalapm Buku Suci inyo ditulis Musa. Watu Allah bopandir agatn Musa doi' dalapm rado momant inyo sama'an api bonyalo, Allah bopandir, ‘Aku ninam Allah inyo disombah Abrahapm, Ishak, ongko Yakub.’

²⁷ Pasti sia' hidup agi' obai Allah kinyo disombah urakng mati. Allah disombah urakng inyo hidup! Kaitn koliru bondar!”

Potakutan mongona'i porintah Allah inyo kotakng pontikng (12:28-34)

²⁸ Ado guru agama Yahudi inyo mondinga' Yesus botikakng-pahapm agatn boko urakng Saduki nantai. Io tohu obai Yesus moonji'i jawaban inyo bondar ko sia'. Jadi, io datakng ko Yesus huatan botakutn, “Porintah Allah inyo mono inyo kotakng pontikng?”

²⁹ Timbas Yesus, “Porintah inyo kotakng pontikng ia'an ni'in: ‘Oi somuo urakng Israel, dinga'ancam! Tuhatn Allah kito siku'mo.

³⁰ Bondar-bondar kasihi cam Tuhatn Allah kolai agatn sogonap hati kolai, sogonap jiwa kolai, sogonap pikiran kolai, sogonap kokuatan kolai.’

³¹ Porintah koduo ia'an ni'in, ‘Kasihi cam sosamo kolai samo sama'an kolai mongasihi diri kolai siku'.’ Conyiant ado porintah bukai inyo lobih pontikng doi' koduo porintah ni'in.”

³² Guru agama Yahudi nantai bopandir ko Yesus, “Kotakng bondaram, Guru! Jawaban Duatn kona'! Tuhatn Allah kito siku'mo. Conyiant ado Tuhatn inyo bukai solaitn Sio.

³³ Memang monsio gola' mongasihi Sio agatn sogonap hatinyo, sogonap pikirannyo, sogonap kokuatannyo. Monsio pan gola' mongasihi sosamonyo samo sama'an io mongasihi dirinyo siku'. Koduo porintah nantai lobih pontikng doi' bonatakng posombahan inyo dicucul ongko somuo posombahan inyo bukainyo.”

³⁴ Yesus moniant obai guru nantai monimbas agatn bijaksana. Jadi, Yesus bopandir ko io, “Kolai kinyo jouh doi' Koraja'an Allah!” Lopas nantai, conyiant urakng inyo borani agi' moncubo mouru'an Sio agatn potakutan.

Yesus, Rajo inyo Dijanjian Allah, kinyo aja' doi' koturutan Rajo Daud, apo lobih bokuaso doi' nantai

³⁵ Timpu Yesus mongajar di tongahlamanan Rumah Allah, Sio bopandir, “Pikirancam mongona'i Rajo inyo Dijanjian Allah inyo disobut ‘Kristus’. Boko guru agama Yahudi mongatoan obai Kristus ia'an koturutan doi' Rajo Daud.

³⁶ Memang bondaram nantai. Apo Roh Allah mombulah Daud monulis pomandiran ni'in: ‘Tuhatn Allah bopandir ko Tuhatnku: Dudu'cam di tompat inyo tohormat di sopia' kanan-Ku, sampai Aku mongalahan boko musuh Kolai, mombulah sia' monjadi samo sama'an kontonja'an kaki Kolai, mombulah sia' tundu' agatn kuaso Kolai.’

³⁷ Dalapm tulisan nantai, Daud moningkau Kristus sobagai ‘Tuhatn’. Obai nantai, Io bukainyo bayo koturutan Daud aja'.” Apo Io lobih bokuaso doi' nantai. Urakng banya' inyo ado di santai sonang mondinga' Yesus mongajar.

Yesus momadahi boko murid-Nyo jangan boporangai sama'an boko guru agama Yahudi

³⁸ Timpu Yesus mongajar, Sio pan bopandir, “Boboi' cam agatn boko guru agama Yahudi. Sia' gala' bojalatn-jalatn agatn jubah inyo panjakng oca' sia' di tiat pontikng. Sia' gala' dihormati di pasar.

³⁹ Di rumah sombayakng huatan di boko pogai, sia' gala' dudu' di tompat inyo kotakng tohormat.

⁴⁰ Sia' monipu boko botina' balu ongko morampas rumah sia'. Sia' moucap'an doa inyo kotakng panjakng, apo nantai bayo pompadah mo. Obai somuo porbuatan sia' inyo jahat nantai, Allah pasti tajahan mohukupm sia' lobih borat!”

Posombahan botina' balu inyo jaro

⁴¹ Yesus dudu' mohadapi kotak posombahan huatan moniant boko urakng momansu'an duit posombahan ko dalapmnyo. Banya' urakng dampu momansu'an duit inyo bosar nilainyo.

⁴² Lalu, ado jam botina' balu inyo jaro datakng. Io momansu'an duo pingkai' duit pira' inyo kocit nilainyo.

⁴³ Yesus moningkau boko murid-Nyo huatan bopandir ko sia', “Dinga'an bo! Sobondarnyo botina' balu inyo jaro ni'in moonji'i lobih doi' somuo urakng bukai inyo momansu'an duit ko dalapm kotak posombahan nantai.

⁴⁴ Obai, somuo sia' moonji'i doi' kolobihan duit inyo ado disia'. Apo botina' balu jaro ni'in moonji'i doi' kokurakan duit inyo ado di io. Io moonji'i doi' somuo inyo ado di io pakai' kopontikannyo.”