Markus 11 - Porjanjian Boharu Torjomahan Baso Dilakng Soari-ari

Ramai bondar mohimpa'i Yesus di kota Yerusalem

¹ Yesus agatn boko murid-Nyo hampir datakng am ko Yerusalem. Sia' datakng di sobuah tompat dampikng laman Betfage ongko Betania, dikoririkan bukit Jaitun. Watu nantai, Yesus monyiuh duo urakng murid-Nyo botula' lobih doholu.

² Kato-Nyo, “Botula'cam ko laman di polaju nu'un. Watu kaitn duo mansu' ko laman nantai, kaitn tajahan holu moniant siku' koledai muda' dikobat'an. Koledai nantai bolupm kalo dikojumpati urakng. Lopasan koledai nantai lopasnyo baba' ko si'itn.

³ Aman ado urakng inyo botakutn, ‘Mapo kaitn molopasan koledai nantai?’ Pandiran ko urakng nantai, ‘Tuhatn momontikannyo. Apo Sio tajahan oca' mo momulakannyo.’ ”

⁴ Koduo urakng murid nantai botula'. Sia' monomuan siku' koledai muda' dikobat'an di lawakng rumah di pinggir jalatn. Ongko, sia' molopasannyo.

⁵ Boboropo urakng inyo bodiritn di santai bopandir ko sia', “La'apo inyo kaitn labuhan? Mapo kaitn molopasan koledai nian?”

⁶ Sia' monimbas samo sama'an inyo udah dipandiran Yesus nantai. Lopasnyo, boko urakng nantai mombiaran sia' mombaba' koledai nantai.

⁷ Sia' mombaba' koledai muda' nantai ko Yesus. Sia' molota'an jubah sia' di pucu' koledai nantai pakai' lapi'nyo, lalu Yesus jumpat ko pucu'nyo.

⁸ Watu sia' monuju ko kota Yerusalem, ado banya' bondar urakng moincar boko jubah sia' di tongah jalatn pakai' mohormati Sio. Banya' boko urakng jam inyo moacir boko ranggau kayu di tongah jalatn, ia'an nantai boko ranggau hijau inyo sia' goyap doi' lakau.

⁹ Kotakng banya' urakng bojalatn di pohadapan huatan di bolikat Yesus. Sia' mondongkakng-mondorah, “Hosana! Pujicam Sio inyo datakng dalapm damo Tuhatn Allah!

¹⁰ Diborokati cam Koraja'an inyo tajahan datakng, ko koraja'an Daud angki-bayatn kito. Pujian ongkah pakai' Sio di tompat inyo kotakng tinggi!”

¹¹ Lopas sia' datakng ko Yerusalem, Yesus mansu' ko tongahlamanan Rumah Allah. Sio borotian somuo inyo tojadi di santai. Apo obai ari udah hampir malapm, Sio bobali' ko Betania bosamo agatn koduo bolas murid-Nyo.

Yesus monyumpah batakng ara inyo kinyo bobuah

¹² Kohobu'annyo, Yesus agatn koduo bolas murid-Nyo moninggalan Betania ongko bobali' ko Yerusalem. Dalapm pojalatan, Sio mooso kolaparan.

¹³ Doi' jouh, Sio moniant batakng ara inyo udah bodoutn. Ongko Sio, mondataki batakng kayu ara nantai pakai' borotian gola' ado buahnyo. Apo watu Sio datakng ko batakng kayu ara nantai, Sio moniant kinyo bobuah sobigi' pan. Ongkah ado doutnnyo am. Obai Watu nantai memang bolupm musipmnyo bobuah.

¹⁴ Kato Sio ko batakng kayu ara nantai, “Mula'i ni'in nyiant ado agi' am urakng inyo momua'i buah kolai somanah-manahnyo!” Boko murid-Nyo mondinga' pomandiran Yesus nantai.

Yesus monundukng boko podagakng doi' tongahlamanan Rumah Allah

¹⁵ Lopas Yesus agatn boko murid-Nyo datakng di Yerusalem, Yesus mansu' agi' ko tongahlamanan Rumah Allah. Sio monundukng somuo urakng inyo bojual-boli di tompat nantai. Sio bobuakng-buakan boko meja inyo dipakai boko ponukar duit. Sio mombali'an boko bangku inyo dipakai boko ponjual posombahan burukng daro.

¹⁶ Sio morarakng urakng mombaba' barakng molalu'i tongahlamanan Rumah Allah.

¹⁷ Lalu, Sio mongajar sia'. Kato-Nyo, “Pomandiran Allah totulis dalapm Buku Suci: ‘Rumah-Ku ia'an rumah pakai' bodoa pakai' somuo banso.’ Apo kaitn monjadiannyo sama'an sayakng ponyamun!”

¹⁸ Boko imam kopala' agatn boko guru agama Yahudi mondinga' mongona'i hal nantai. Sia' gola' agatn Sio obai somuo urakng hiratn agatn ajaran-Nyo. Jadi, sia' bogoyap caro pakai' mombunuh Sio.

¹⁹ Watu ari hampir malapam, Yesus agatn boko murid-Nyo koluar agi' doi' kota nantai.

Polajaran doi' kayu ara nantai

²⁰ Kosunsuknghobu'annyo, Yesus agatn boko murid-Nyo bojalatn molalu'i batakng kayu ara nantai. Sia' moniant batakng kayu ara nantai udah sora', malah boko akarnyo pan udah mati.

²¹ Petrus toingant lapo inyo tojadi somaman. Obai nantaiam, io bopandir ko Yesus, “Guru, tiatbo! Batakng kayu ara inyo Duatn sumpah nantai udah mati!”

²² Timbas Yesus ko sia', “Pocayocam ko Allah!

²³ Dinga'anbo! Kaitn gola' pocayo obai la'apo pan inyo kaitn katoan pasti tajahan tojadi. Sotiap urakng inyo pocayo, kinyo gangga'-gua'an, soandainyo io monyiuh bukit ni'in, ‘Tocabut lopasnyo tonggolapm ko dalapm lout!’ Hal nantai tajahan tojadi.

²⁴ Obai nantai am, Aku bopandir ni'in ko kaitn: La'apo aja' inyo kaitn pinto dalapm doa, pocayo cam obai Allah udah moonju'nyo ko kaitn. Lopasnyo, kaitn tajahan monorima'nyo.

²⁵ Aman ado urakng inyo bosalah agatn kaitn, amputicam io sobolupm kaitn bodiritn pakai' bodoa. Kaitn gola' molabuhan nantai oca' Allah Bopai kaitn di sorugo pan tajahan moamputi boko dosa kaitn. [

²⁶ Aman kaitn kinyo moamputi, sama'an nian jam Allah Bopai kaitn di sorugo kinyo tajahan moamputi boko dosa kaitn.]”

Boko pomimpitn urakng Yahudi botakutn ongko godian mongona'i kuaso Yesus

²⁷ Yesus agatn boko murid-Nyo botula' agi' ko Yerusalem. Tongahan Yesus bojalatn di tongahlamanan Rumah Allah, boko imam kopala', boko guru agama Yahudi huatan boko pomimpitn banso Yahudi datakng ko Sio.

²⁸ Sia' botakutn, “La'apo hak Kulo molabuhan somuo nantai? Sopo inyo moonji'i kuaso nantai ko Kulo?”

²⁹ Timbas Yesus ko sia', “Aku pan botakutn ko kaitn jam. Aman kaitn monimbasi Ku, Aku pan tajahan momandirannyo ko kaitn mongona'i sopo inyo moonji'i kuaso ko Aku pakai' molabuhan somuonyo ni'in.

³⁰ Ni'in potakutan Ku: Sopo inyo moonji'i kuaso ko Yohanes pakai' mombaptis? Allah kata'an monsio?”

³¹ Ongko sia' bohoupm bogoyap jawaban di antaro sia'. Kato sia', “Aman kito bopandir, ‘Allah inyo moonji'i kuaso nantai ko Yohanes.’ Yesus tajahan bopandir aman sama'an nian mapo kaitn kinyo pocayo agatn Yohanes?

³² Apo kito pan culih bopandir, ‘Bayo monsio inyo moonji'i kuaso nantai ko Io.’ ” (Boko pomimpitn nantai gola' agatn urakng banya', obai urakng banya' nantai pocayo Yohanes nantai nabi Allah.)

³³ Ongko sia' bopandir ko Yesus, “Koi co tohu sopo inyo moonji'i kuaso nantai ko Yohanes.” Yesus bopandir, “Amannyo ubo nian, Aku pan cuku momandirannyo ko kaitn sopo inyo moonji'i kuaso ko Aku pakai' molabuhan somuonyo ni'in.”