Markus 10 - Porjanjian Boharu Torjomahan Baso Dilakng Soari-ari

Ajaran Yesus mongona'i laki bini

¹ Yesus moninggalan tompat nantai, lalu botula' ko doerah Yudea ongko ko doerah di soborakng sungai Yordan. Banya' urakng datakng agi'. Sia' bokumpul di sokolilikng Sio, lalu sama'an biaso Sio mongajar sia' agi'.

² Ado boko pomimpitn agama Yahudi doi' kolompok Farisi, sia' datakng ko Yesus pakai' bogoyap alasan oca' monyalahan Sio. Sia' botakutn, “Monurut Hukupm Torat, ulih cado laki monyaya' bininyo?”

³ Apo Sio monimbas sia', “Porintah lapo inyo dionju' Musa ko kaitn dalapm Hukupm Torat nantai?”

⁴ Timbas sia', “Musa moijitan urakng monyaya' bininyo, asal monulis surat saya' holu ai.”

⁵ Kato Yesus ko sia', “Musa moonju' porintah nantai obai kokorasan hati kaitn.

⁶ Padohal, doi' mulonyo, Allah mombulah monsio, ia'an lolaki ongko botina'.

⁷ Obai nantai am, lolaki paca'an moninggalan indai bopainyo lalu bokopal agatn bininyo.

⁸ Lopasnyo sia' duo nantai monjadi sobukakng-sotubuh mo. Jadi, sia' kinyo duo cam, apo sia' siku' mo.

⁹ Obai Allah udah mombulah sia' sobukakng-sotubuh mo, obai nantai sia' culih disaya' ulih monsio.”

¹⁰ Lopas sia' mansu' ko dalapm rumah, boko murid-Nyo botakutn agi' ko Yesus mongona'i hal nantai.

¹¹ Kato Yesus ko sia', “Aman ado lolaki inyo monyaya' bininyo lopasnyo kawitn agatn botina' bukai, lolaki nantai bomporajoan doi' bininyo komai nantai.

¹² Sama'an nian jam, aman ado botina' inyo monyaya' lakinyo lopas nantai kawitn agatn lolaki bukai, botina' nantai pan bomporajoan jam.”

Yesus momborokati boko bobia'

¹³ Ado boko urakng mombaba'i boko bobia' kocit datakng ko Yesus oca' Sio moncama' sia'. Apo boko, murid-Nyo monggodi'i boko urakng inyo mombaba' boko bobia' nantai.

¹⁴ Yesus godi moniant boko murid-Nyo molabuhan nantai. Kato-Nyo ko sia', “Biaran nam boko bobia' datakng ko aku! Jangan morarakng sia'. Obai, boko urakng sama'an nianam inyo monjadi anggota koluarga Koraja'an Allah.

¹⁵ Dinga'anbo! Aman urakng kinyo monyambut Koraja'an Allah sama'an bobia' kocit, io co paca'an mansu' ko dalapm Koraja'an Allah.”

¹⁶ Yesus mongolu'i boko bobia' nantai, molota'an jari-Nyo ko pucu' sia', huatan momborokati sia'.

Urakng dampu jorih mondapat'an kohidupan inyo kokal di sorugo

¹⁷ Timpu Yesus molajuan pojalatan-Nyo agi', ado urakng bonggidi'an monuju ko Sio. Urakng nantai tundu' monyungkapan di pohadapan Yesus ongko botakutn, “Guru inyo boi', la'apo inyo gola' ku labuhan oca' bodapat hidup kokal?”

¹⁸ Kato Yesus, “Ongkah Allah inyo boi'. Jadi, hibo kulo mongatoan Aku boi'?

¹⁹ Pasti kulo udah mongotohu'i somuo porintah Allah ni'in: Jangan mombunuh, jangan bomporajoan, jangan mongolit, jangan bulah tuduhan palsu, jangan monipu mongolakari urakng ongko rogo'i cam indai bopai kaitn.”

²⁰ Kato urakng nantai, “Guru, aku udah momatuhi somuo porintah nantai tangga'i ku ija' muda'.”

²¹ Yesus mongilikng urakng nantai ongko mooso kasih. Kato Yesus ko io, “Tinggal sobuti' agi' cam inyo kurakng huatan inyo gola' kulo labuhan. Pulakngcam, huatan jualcam somuo kodampuan kulo. Lopasnyo pombagian cam duitnyo ko boko urakng jaro. Agatn sama'an nantai, kulo paca'an bodapat kodampuan di sorugo. Lopas kulo molabuhan somuonyo nantai, datakng agi' cam ko si'itn lalu tuyut Ku.”

²² Mondinga' porintah Yesus nantai, io kotakng kocewa. Io moninggalan tompat nantai agatn hati inyo kotakng salu', obai io kotakng dampu.

²³ Lalu Yesus mongilikng boko murid-Nyo. Kato-Nyo ko sia', “Kotakng uyuh urakng dampu monjadi anggota koluarga Koraja'an Allah.”

²⁴ Timpu boko murid-Nyo mondinga' nantai, Sia' kotakng hiratn. Apo Yesus bopandir agi', “Poana'an-Ku, memang kotakng uyuh tamo monjadi koluarga Koraja'an Allah.

²⁵ Lobih mudah siku' unta tamo molalu'i lubakng jayupm dibandikan urakng dampu mansu' ko dalapm Koraja'an Allah.”

²⁶ Boko murid-Nyo mongkitn hiratn. Kato sia' siku'-monyiku', “Wah, amannyo sama'an nian, sopo am inyo disolamant'an?”

²⁷ Yesus mongilikng sia' huatan bopandir, “Bagi monsio hal nantai kinyo mungkitn, apo bukainyo ubo nian bagi Allah. Obai bagi Allah somuo hal mungkitn.”

²⁸ Ongko Petrus bopandir ko Yesus, “Koi ni'in udah moninggalan somuo umputn koi oca' monjadi boko murid Duatn. Jadi la'apo tajahan koi dapatan?”

²⁹ Timbas Yesus, “Dinga'an cam! Boko urakng inyo udah moninggalan rumahnyo, boko somadikannyo, urakng tuhonyo, boko poana'annyo, damo lakaunyo obai sia' pocayo koAku ongko obai momboritoan Kabar Boi',

³⁰ timpu ni'in jam, somuo urakng nantai paca'an bobali' mondapat'annyo soratus kali lipat: rumah, somadikan, indai, ana', huatan lakau. Sia' pan paca'an didorako'i. Apo, nononyo, sia' paca'an mondapat'an hidup kokal di sorugo.

³¹ Ado urakng inyo potamo watu ni'in, apo nononyo sia' paca'an monjadi inyo toahir, ado jam urakng inyo toahir watu ni'in, apo nononyo sia' paca'an monjadi ‘potamo.’ ”

Kotigo kalinyo, Yesus momandiran mongona'i ajab sonsaro inyo paca'an dialapi-Nyo

³² Yesus ongko boko murid-Nyo tongahan dipojalatan ko kota Yerusalem. Yesus bojalatn doholu. Boko murid-Nyo kuatir ongko boko urakng inyo tuyut Yesus doi' bolikat mooso kuatir jam. Di tongah jalatn Yesus moningkau koduo bolas murid-Nyo oca' bokumpul di tompat topisah agatn Sio. Sokali agi', Sio momandiran ko sia' mongona'i ajab sonsaro inyo paca'an tojadi ko Sio nononyo.

³³ Kato-Nyo, “Kito botula' ko Yerusalem watu ninam. Di su'utan, Ana' Monsio paca'an disorahan ko boko imam kopala' huatan ko boko guru agama Yahudi. Sia' paca'an mombulah koputusan obai Io gola' dihukupm mati. Lopasnyo sia' paca'an monyorahan Io ko boko urakng inyo bukainyo urakng Yahudi.

³⁴ Io paca'an dipoulu'-ulu'an, diigahi, dicambuk lopasnyo dibunuh. Apo watu ari kotigo, Io tajahan hidup agi'.”

Boko murid Yesus gola' morendahan diri

³⁵ Lopasnyo, Yakobus ongko Yohanes, ia'an poana'an Zebedeus, mondokati Yesus. Kato sia' ko Sio, “Guru, koi honda' minto ado jam doi' Duatn. Koi boharap Duatn paca'an molabuhan nantai.”

³⁶ Timbas Yesus, “La'apo inyo kaitn kohonda'i oca' Aku pulah pakai' kaitn?”

³⁷ Kato sia', “Koi honda' oca' Duatn moonji'i kodudu'an tinggi ko koi watu Duatn bobali' datakng monunju'an komulia'an Duatn. Siku' doi' koi dudu' di sopia' kanan Duatn, huatan inyo siku' agi' di sopia' kiba'-Duatn.”

³⁸ Apo Yesus monimbas sia'. Kato-Nyo, “Kaitn co tohu la'apo inyo kaitn pinto. Sobontar agi', Aku paca'an moalapi ajab sonsaro. Sanggup bai kaitn moalapi ajab sonsaro sama'an inyo paca'an Ku alapi?”

³⁹ Kato sia' ko Sio, “Au, koi duo sanggup mo.” Kato Yesus ko sia', “Memang bondaram. Kaitn duo paca'an moalapi ajab sonsaro sama'an Aku.

⁴⁰ Apo Aku kinyo bohak monontuan sopo inyo paca'an dudu' di sopia' kanan-Ku damo di sopia' kiba'-Ku. Kodudu'an tinggi nantai disodiaan pakai' boko urakng inyo udah ditontuan Bopai-Ku.”

⁴¹ Kosopuluh murid inyo bukainyo mondinga' porminta'an Yakobus ongko Yohanes nantai. Sia' monjadi godi agatn koduo somadikan nantai.

⁴² Apo Yesus moningkau somuo sia'. Kato-Nyo, “Ado boko pomimpitn banso di dunia ni'in inyo co mongonal Allah. Kaitn tohu obai sia' gala' mondorako'i rayat. Boko urakng inyo bokuaso momoso rayat oca' tundu' agatn kuaso sia'.

⁴³ Apo, kaitn culih samo sama'an nian! Malah, urakng inyo honda' monjadi kotakng pontikng di antaro kaitn, io gola' monjadi hulutn pakai' kaitn inyo bukainyo.

⁴⁴ Urakng inyo honda' monjadi pomimpitn di antaro kaitn, io gola' monjadi sama'an hulutn pakai' kaitn inyo bukainyo.

⁴⁵ Kaitn gola' moniru toladatn Ana' Monsio inyo datakng ko dunia ni'in bukainyo pakai' dilayati boko urakng bukai, apo pakai' molayati boko urakng bukai. Io paca'an monyorahan dirinyo sampai mati pakai' mombayar hukupan dosa boko urakng.”

Yesus monyamani urakng inyo buto bodamoan Bartimeus

⁴⁶ Lalu tuntukam Yesus ongko boko murid-Nyo di kota Yerikho. Watu Yesus ongko boko murid-Nyo huatan urakng banya' koluar doi' kota nantai, ado urakng buto di sisi jalatn tongahan mominto-minto. Damonyo Bartimeus, ana' Timeus.

⁴⁷ Bartimeus mondinga' obai urakng inyo tongahan lalu ia'an Yesus, doi' laman Nazaret. Jadi, io mondorah, “Yesus, koturutan Daud! Kasihibo aku!”

⁴⁸ Banya' urakng monogur io oca' lolangunt ja'am. Apo io mondorah kotakng borakng agi', “Yesus koturutan Daud! Kasihibo aku!”

⁴⁹ Yesus botongga' huatan bopandir, “Tingkau am io!” Ongko, sia' moningkau urakng buto nantai. Kato sia' ko io, “Lolangunt! Bodiritn cam, Yesus moningkau kulo!”

⁵⁰ Urakng buto nantai hagar bodiritn, moninggalan jubahnyo, ongko botula' ko Yesus.

⁵¹ Yesus botakutn ko io, “La'apo inyo kulo kohonda'i Aku labuhan pakai' kulo?” Timbas io, “Guru, aku honda' moniant!”

⁵² Yesus bopandir, “Amannyo sama'an nian, botula' cam! Kulo nyamanam obai kulo pocayo agatn Aku.” Watu nantai jam urakng buto nantai ulih moniant am, lopasnyo tuyut Yesus dalapm pojalatan-Nyo.