Markus 1 - Porjanjian Boharu Torjomahan Baso Dilakng Soari-ari

Polayatan Yohanes Pombaptis

¹ Ninam Kabar Boi' mongona'i Yesus Kristus, Ana' Allah.

² Kabar Boi' nantai mula'i sama'an inyo ditulis Nabi Yesaya, ninam pomandiran-Nyo: “Dinga'ancam! Aku tajahan monyiuh utusan-Ku mondoholu'i Duatn. Utusan-Ku nantai tajahan momposiapan jalatn pakai' kodatakan Duatn.

³ Ado urakng inyo mondongkakng-mondorah di padakng pasir, ‘Sodia'ancam jalatn pakai' Tuhatn. Bujurancam jalatn pakai' Sio.’ ”

⁴ Urakng inyo diutus Allah nantaiam Yohanes Pombaptis. “Io moncumul di padakng pasir ongko momboritoan mongona'i baptisan huatan monsio gola' moninggalan dosa oca' ulih diamputi.”

⁵ Jadi, banya' urakng doi' kota Yerusalem ongko doi' soluruh propinsi Yudea datakng. Sia' mongaku'i dosa sia' lalu io mombaptis sia' di sungai Yordan.

⁶ Yohanes momakai jubah inyo dipulah doi' bulu unta. Ikat pinggakngnyo dipulah doi' kulit lou'. Sio makatn bunta' ongko madu singat.

⁷ Sio momadahan kabar ni'in: “Ado urakng inyo tajahan datakng lopas aku. Sio lobih bokuaso doi' aku. Pakai' tundu' ongko ngompucut'i tali sopatunyo pan aku kinyo cucu'.

⁸ Aku bayo mombaptis kaitn agatn ara'i. Apo Sio tajahan mombaptis kaitn agatn Roh Allah.”

Yesus dibaptis

⁹ Timpu nantai, Yesus datakng doi' laman Nazaret di propinsi Galilea. Yohanes mombaptis Sio di sungai Yordan.

¹⁰ Lopas jadi dibaptis, Yesus hagar koluar doi' ara'i. Timpu nantai jam, langit tobuka'. Yesus moniant Roh Allah turutn ko pucu'-Nyo samo sama'an burukng daro.

¹¹ Lalu kodinga'an saro Allah doi' sorugo momadahan, “Kolainam Ana'-Ku inyo Ku kasihi. Kolainam monyonangan hati-Ku.”

Rajo Sitatn moncubo'i oca' Yesus bodosa

¹² Lopas nantai, Roh Allah moirikan Yesus ko padakng pasir.

¹³ Di santai, Sio bodiapm somanah ompat puluh ari, Rajo Sitatn moncubo'i Sio. Ado boko bonatakng liar bosamo agatn Sio jam ongko boko molekat molayati Sio.

Yesus mula'i polayatan-Nyo di propinsi Galilea

¹⁴ Lopas Yohanes ditangkap ongko dimansu'an ko ponjara, Yesus botula' ko propinsi Galilea, momadahan Kabar Boi' doi' Allah.

¹⁵ Kato-Nyo, “Watu inyo ditontuan Allah udah datakam. Koraja'an Allah udah dampikam. Jadi, tinggalancam boko dosa kaitn ongko pocayocam agatn Kabar Boi' ni'in!”

Yesus moningkau ompat urakng nolayatn monjadi boko murid-Nyo inyo potamo

¹⁶ Pas Yesus tongahan bojalatn di pinggir danau Galilea, Sio moniant duo urakng nolayatn, ia'an Simon ongko somadikannyo, Andreas. Sia' tongahan monjalo ikatn di danau.

¹⁷ Kato Yesus ko sia', “Hincapm, tuyut-Ku huatan kaitn paca'an Ku jadian ponjalo monsio.”

¹⁸ Timpu nantai jam, Simon ongko Andreas lansukng moninggalan jalo sia' lalu tuyut Yesus.

¹⁹ Yesus bojalatn torus, lalu moniant duo urakng somadikan inyo bukai, ia'an Yakobus ongko Yohanes, poana'an Zebedeus. Sia' di dalapm porohu, tongahan monambal jalo sia'.

²⁰ Yesus moningkau sia' duo pakai' monjadi murid-Nyo. Timpu nantai jam, sia' lansukng moninggalan bopai sia' di dalapm porohu bosamo-samo agatn boko urakng upahannyo. Lalu, sia' tuyut Yesus.

Yesus monundukng roh jahat

²¹ Yesus ongko boko murid-Nyo datakam di kota Kapernaum. Watu ari Sabat, Yesus mansu' ko dalapm rumah sombayakng lalu mongajar boko urakng di santai.

²² Sia' hiratn mondinga'an Sio mongajar. Obai, Sio mongajar agatn kuaso doi' Allah, kinyo samo sama'an boko guru agama Yahudi.

²³ Timpu nantai, di rumah sombayakng sia' ado urakng inyo korasu'an roh jahat. Kali labuh, io mondorah,

²⁴ “Ih! Yesus, urakng doi' laman Nazaret, Duatn honda' bulah lapo agatn koi? Aku tohu Duatn Inyo Suci doi' Allah! Kata'an Duatn datakng pakai' mombonasoan koi ni'in bai?”

²⁵ Yesus mohakap roh jahat nantai, “Lolangunt! Koluarcam doi' urakng ni'in!”

²⁶ Lalu, roh jahat nantai monggora'-gora'an urakng nantai kotakng kuat, lalu koluar doi' urakng nantai kapikng mondorah agatn saro borakng.

²⁷ Somuo urakng kotakan hiratn, jadi sia' bopandir agatn siku'-monyiku', “Hebat bondar ajaran boharu ni'in inyo Sio ajaran agatn kuaso. Sio monyiuh boko roh jahat, lalu sia' monuruti sio!”

²⁸ Jadi kabar mongona'i Yesus copat toborito di soluruh doerah Galilea nantai.

Yesus monyamani ponyakit montuho botina' Simon Petrus ongko boko urakng bukai

²⁹ Lopas koluar doi' rumah sombayakng nantai, Yesus, Yakobus, ongko Yohanes botula' ko rumah Simon ongko Andreas.

³⁰ Montuho botina' Simon mangkakan di kotidu'annyo lobai gorikng. Jadi, sia' lansukng momadahannyo ko Yesus mongona'i nantai.

³¹ Yesus mohampikinyo, lalu moncama' longannyo, monulukngnyo angkat. Lansukng watu nantai, indai nantai nyamanam, lalu io mula'i molayati sia'.

³² Watu kobabahariannyo, lopas matoari tonggolapm, banya' urakng boponyakit dibaba' ko Yesus, tomansu' inyo korasu'an boko roh jahat.

³³ Hampir somuo pondudu' kota nantai bokumpul di muka' lawakng rumah nantai.

³⁴ Yesus monyamani banya' urakng inyo mondorita' kona' bomacapm ponyakit. Sio pan monundukng banya' roh jahat. Yesus morarakng boko roh jahat nantai bopandir, obai sia' mongotohu'i sopo Sio.

Yesus mongajar di boko kota di propinsi Galilea

³⁵ Sunsukng pukau, watu ari ija' potakng, Yesus huas lalu botula' ko doerah inyo langunt ongko bodoa di santai.

³⁶ Apo Simon ongko pokawalannyo mombodapan Sio.

³⁷ Ahirnyo, sia' monomuan-Nyo. Kato sia', “Somuo urakng tongahan monggoyapi Duatn.”

³⁸ Timbas Yesus, “Hincapm kito botula'am ko boko laman bukai di sokitar si'itan oca' Aku ulih monyampaian Kabar Boi' di siatan jam. Nianam alasan Ku datakng ko dunia ni'inan.”

³⁹ Jadi, Sio botula' ko somuo tompat di soluruh propinsi Galilea. Sio monyampaian Kabar Boi' di boko rumah sombayakng sia' ongko monundukng boko roh jahat.

Yesus monyamani urakng inyo hontapm ponyakit kulit inyo bogola'i

⁴⁰ Ado urakng inyo boponyakit kulit inyo bogola'i datakng ko Yesus. Sio tundu' monyungkapan di pohadapan Yesus lalu muhun. Katonyo, “Tulukng nyamaniku. Aman Duatn honda', Duatn ulih mo monyamaniku.”

⁴¹ Yesus mooso kasihan agatnnyo. Sio mouluran longan-Nyo, moncama' urakng nantai, lalu bopandir, “Aku honda'mo. Nyamancam!”

⁴² Lansukng io nyamanam doi' ponyakit kulit nantai.

⁴³ Lalu, Yesus monyiuh urakng nantai botula' apo agatn poringant'an ni'in.

⁴⁴ Kato-Nyo, “Jangan mongisahan hal ni'in ko sopo pan. Apo, botula'cam ko imam holu'ai. Minto io moriso'i kolai udah nyamanam. Lopas nantai, onju' posombahan sosuai agatn porintah Musa pakai' monjadi buti ko urakng bukai, kolai bondar-bondar udah nyamanam.”

⁴⁵ Apo, urakng nantai botula' kinyo botongga' momboritoan kojadian nantai di mono-mono. Obai nantai, Yesus culih mansu' ko dalapm kota agi' socaro torakng-torakan. Sio gola' diapm di luar di tompat inyo langunt. Apo, urakng torus bodatakan ko Sio doi' mono-mono.