Lukas 8 - Porjanjian Boharu Torjomahan Baso Dilakng Soari-ari

Boko botina' inyo molayati Yesus

¹ Lopas nantai, Yesus botula' doi' kota ko kota, doi' laman ko laman, momboritoan Kabar Boi' mongonaꞌi Koraja'an Allah. Koduo bolas murid-Nyo tuyut jam.

^2-3 Ado banyaꞌ jam boko botina' inyo tuyut. Sia' udah dinyamani doi' bomacapm ponyakit huatan boko roh jahat. Di antaronyo ado Maria, Yohana, ongko Susana. (Maria nantai disobut Magdalena. Tujuh roh jahat udah ditundukng doi' io. Yohana bini Khuza. Khuza nantai ia'an kopala' pogawai istana Rajo Herodes.) Somuo boko botina' inyo tuyut Yesus moonju' duit sia' siku' pakai' monulukng polayatan sia'.

Yesus mongisahan mongonaꞌi boko caro sotiap urakng inyo monorima' pomandiran Allah

⁴ Boko urakng hala datakng ko Yesus doi' boko kota. Watu boko urakng udah bokumpul, Yesus mongajar sia' agatn poumpamoan ni'in,

⁵ “Ado siku' urakng potani botula' pakai' moabur bonih. Watu io tongahan moabur, ado bonih inyo jatu' di jalatn. Bonih nantai ditonja' urakng huatan dipua'i burukng sampai habis.

⁶ Ado jam bonih inyo jatu' di tanah inyo bobatu-batu. Kali tumbuh lansukng sora' obai tanahnyo rangkai co bodapat ara'i.

⁷ Ado jam bonih bukai inyo jatu' di tongah rado duri. Rado duri tumbuh bonsamo agatn bonih nantai, mongopihnyo sampai mati.

⁸ Apo ado jam bonih inyo jatu' di tanah inyo boi', tumbuh boi', mohasilan soratus kali lipat.” Lopas jadi bokisah, Yesus bopandir agatn saro borakng, “Aman honda' mongoroti, pondinga'an boboi'!”

⁹ Boko murid-Nyo botakutn ko Sio la'apo rotinyo poumpamoan nantai.

¹⁰ Timbas Yesus, “Ko kaitn udah dionji'i komampuan pakai' mongoroti mongonaꞌi Koraja'an Allah inyo bolupm dikotohu'i urakng bukai. Apo ko boko urakng bukai, Aku mongajar agatn poumpamoan, oca' biar pan sia' borotian apo co bondar-bondar moniant, sia' mondingaꞌ apo sia' co mongoroti.

¹¹ Ni'innam roti poumpamoan nantai: Bonih nantai samo agatn pomandiran Allah.

¹² Bonih inyo jatu' di jalatn nantai ubo boko urakng inyo monorima' pomandiran Allah. Apo lopas nian datakng Iblis, bulah sia' tongkolupatn agatn pomandiran Allah. Sampai hati sia' kinyo pocayo. Jadi sia' kinyo disolamant'an.

¹³ Bonih inyo jatu' di tanah rado batu nantai samo sama'an boko urakng inyo mondingaꞌ pomandiran Allah, monorima'nyo kotakng rindakng. Apo bayo pocayo sobontar mo obai hati sia' kinyo borubah. Samo ubo tontanaman di tanah inyo bobatu bayo tumbuh sobontar obai kinyo boakar. Aman boko urakng ubo nantai mohadapi pouyuh-ponjorih, sia' kinyo pocayo agatn pomandiran Allah agi'.

¹⁴ Bonih inyo jatu' di tongah rado duri samo sama'an boko urakng inyo mondingaꞌ pomandiran Allah, apo manah komanahannyo, sia' mula'i hala momikiran bogoyap kodampuan huatan kosonangan di dunia ni'in. Somuo hal nantai mongopih sia' sampai kinyo hidup sosuai agatn pomandiran Allah. Samo sama'an tontanaman dikopihan rado duri sampai kinyo mohasilan buah inyo mansa'.

¹⁵ Apo ado boko urakng inyo monorima' pomandiran Allah sia' samo sama'an bonih inyo jatu' di tanah inyo boi'. Sia' mondinga'annyo, huatan monyimpatnnyo dalapm hati inyo boi' ongko jujur. Sia' botahatn, ongko hala molabuhan porbuatan inyo monyonangan Allah. Samo ubo tontanaman di tanah inyo boi' mohasilan buah inyo boi' jam.”

Sotiap urakng gola' mondingaꞌan boboi' boko pomandiran Yesus

¹⁶ “Co nyiant urakng inyo monokil pompolitoan lalu monungkau'inyo agatn roga', damo molota'annyo di babah kotidu'an. Apo io moangga'an di pucu' meja oca' somuo urakng inyo mansu' ko dalapm rumah ulih moniant cohayonyo.

¹⁷ Samo sama'an nantaiam, somuo inyo dibumbutn paca'an kotiat'an; somuo rahasia paca'an dikotohu'i ongko ditorakan.

¹⁸ Jadi porotian boboi' caro kaitn monorima' somuo pomandiran-Ku. Obai urakng inyo udah ado, paca'an dionji'i lobih banyaꞌ agi'; apo urakng inyo conyiant, la'apo pan inyo dianggap umputnnyo tajahan dikuti'.”

Koluarga Yesus inyo sobondarnyo

¹⁹ Indai ongko boko somadikan Yesus datakng honda' monomu'i Sio. Apo culih obai kotakng banyaꞌ boko urakng mongoliliki-Nyo pakai' mondingaꞌan Sio mongajar.

²⁰ Jadi, ado urakng momadahan ko Sio, “Indai ongko boko somadikan Duatn ado di luar, honda' botomu Duatn.”

²¹ Apo kato Yesus, “Somuo urakng inyo mondingaꞌan pomandiran Allah huatan molabuhannyo, sia' ia'an indai ongko boko somadikan-Ku.”

Yesus monongga'an angin bonakau

²² Pas ari nantai, Yesus agatn boko murid-Nyo ado di Danau Galilea. Yesus bopandir ko sia', “Mara kito botula' ko soborakng danau.” Jadi, sia' jumpat ko porohu, ongko botula'am.

²³ Watu sia' tongahan bolayar, Yesus toidu'. Lalu, datakam angin bonakau mohontapm danau nantai ongko bogolumbakng kotakng bosar. Ara'i mula'i mansu' ko dalapm porohu huatan kotakng mombohayoan bondar.

²⁴ Ongko boko murid monggagaian Yesus. Kato sia', “Guru, Guru! Kito tajahan bonaso!” Yesus pan huas, mohakap angin bonakau ongko golumbakng bosar nantai oca'nyo botongga'. Ongko, samo-jatu' botongga'am.

²⁵ Yesus monogur sia'. Kato-Nyo, “Kaitn gola' boiman inyo lobih kuat!” Sia' gola' huatan topocongo jam. Ongko bopandir ko siku'-monyiku', “Urakng ni'in kotakan luar biaso. Pas Sio mohakap, angin bonakau ongko golumbakng bosarpan botongga'.”

Yesus monundukng banyaꞌ roh jahat doi' siku' urakng di laman Gerasa

²⁶ Sia' datakam di doerah Gerasa di soborakng Danau Galilea.

^27-29 Di santai ado siku' urakng lolaki inyo dirasu'i boko roh jahat. Udah manaham kinyo bobanggi-bopakaian. Roh jahat hala monyorakng io. Jadi, urakng nantai dijago, longan ongko kakinyo dikobat agatn rantai. Apo io totap ulih momutusan rantai nantai. Roh jahat momoso io botula' ko tompat inyo langunt. Jadi, udah manah kinyo bodiapm di rumah, apo bodiapm di boko gua dipasaran. Io moniant Yesus turutn doi' porohu noi' ko darat. Io mondataki Yesus, mondorah, huatan tundu' monyungkapan di kaki-Nyo. Ongko, Yesus mohakap roh jahat koluar doi' urakng nantai. Jadi roh jahat nantai mondorah, “Ui, Ana' Allah Inyo Maho Tinggi! Duatn honda' bulah la'apo ko aku? Aku muhun jangan mondorako'i aku.”

³⁰ Yesus botakutn ko urakng nantai, “Sopo damo kolai?” “Damoku, Legion,” timbasnyo, obai io dirasu'i boko roh jahat.

³¹ Boko roh jahat nantai momuhun ko Yesus oca' co monundukng sia' ko dalapm Noraka.

³² Hampikng santai, ado banyaꞌ kabatan babi bogoyap pomakatn di koririkan bukit. Jadi, boko roh jahat nantai minto ijitn tamo boko babi nantai. Ongko, Yesus moijitan sia'.

³³ Jadi, boko roh jahat nantai koluar doi' urakng nantai, tamo boko babi nantai. Lalu, boko babi nantai rari torojutn doi' koririkan bukit ko dalapm danau, ongko mati lomas.

³⁴ Boko ponjago babi nantai moniant kojadian nantai. Jadi, sia' rari, mongisahan kojadian nantai ko kota Gerasa ongko doerah sokitarnyo.

³⁵ Datakam boko urakng pakai' bontiatannyo. Watu sia' datakng di santai, bontomu agatn urakng inyo udah dibebasan doi' boko roh jahat. Io dudu' totai kaki Yesus, udah bobanggi-bopakaian huatan udah warasam. Sia' jadi sadar Yesus kotakng bokuaso. Sia' pan topogola'.

³⁶ Boko urakng inyo udah moniant kojadian nantai momadahan ko boko urakng inyo datakng doi' kota Gerasa ubo apo urakng nantai dinyamani.

³⁷ Lalu boko pondudu' doerah Gerasa mominto Yesus moninggalan sia', obai sia' kotakng gola'. Ongko, jumpat am Yesus ko dalapm porohu sosamo boko murid-Nyo pakai' botula' bobali' ko soborakng danau.

³⁸ Urakng inyo udah dinyamani doi' boko roh jahat nantai mominto oca' io ulih tuyut. Apo, Yesus monyiuh io pulakng. Kato-Nyo,

³⁹ “Pulakng cam ko rumah kolai. Kisahan boko inyo udah Allah labuhan ko kolai.” Jadi, urakng nantai hingkasam mongoliliki kota nantai, momadahan boko inyo udah Yesus labuhan ko io.

Yesus bulah ana' Yairus bobali' hidup ongko monyamani siku' botina'

⁴⁰ Di soborakng danau, ado banyaꞌ boko urakng monantian Yesus pulakng. Jadi, watu Yesus datakng, sia' somuo mohimpa'i Sio.

^41-42 Di antaronyo ado kopala' rumah sombayakng bodamo Yairus. Sio ongkah ado siku' ana', bobia' nantai botina', boumur kiro-kiro duo bolas tohutn, io tongahan sakit honda' matiam. Jadi, Yairus tundu' di kaki Yesus, momuhun oca' Yesus datakng ko rumahnyo pakai' monyamani ana'nyo nantai. Dalapm pojalatan ko rumah nantai, boko urakng banyaꞌ mongorumuni Yesus doi' somuo arah.

⁴³ Di antaronyo ado botina' inyo sakit pondarahan. Udah duo bolas tohutn manahnyo io bomosalah agatn lampat-tapih. Io udah mohabisan somuo umputnnyo pakai' boubat apo kinyo tonyamani ulih sopo pan.

⁴⁴ Io mohampiki Yesus doi' bolikat, ongko moncama' hujukng jubah-Nyo, lalu samo-jatu' botongga' pondarahannyo.

⁴⁵ Yesus botakutn, “Sopo inyo moncama' Aku?” Nyiant siku' pan inyo moaku'inyo. Ongko Petrus bopandir, “Guru, ado kotakan banyaꞌ boko urakng inyo mongorumuni Duatn. Sopo pan ulih moncama' Duatn.”

⁴⁶ Kato Yesus, “Apo ado urakng inyo moncama' Aku agatn songajo, Aku mooso ado kuaso inyo koluar tangga'i-Ku.”

⁴⁷ Botina' nantai sadar porbuatannyo udah kotohuan. Jadi, io datakng, tundu' dihadapan Yesus, bogogora' obai gola' io mongisahan dihadapan somuo urakng mapo io moncama' Yesus, ongko ponyakitnyo nyamanam pas nantai jam.

⁴⁸ Kato Yesus ko io, “Ana'-Ku, kolai nyamanam obai udah pocayo agatn Aku. Pulakng cam agatn sonang-asau.”

⁴⁹ Tongahan Yesus ija' bopandir, datakng siku' polayatn doi' rumah Yairus, kopala' rumah sombayakng nantai. Katonyo ko Yairus, “Ana' duatn matiam. Padohan monyusahan Guru agi'.”

⁵⁰ Apo Yesus mondingaꞌnyo ongko bopandir ko Yairus, “Jangan gola'! Totap pocayo aja' agatn Aku, ana' kolai tajahan nyamanam mo.”

⁵¹ Pas udah datakng di rumah Yairus, Yesus co moijitan siku' pan tuyut Sio mansu' ko dalapm kamar, kocuali Petrus, Yohanes, Yakobus, ongko indai-bopai bobia' nantai.

⁵² Somuo urakng monangis, monggonang komatian bobia' nantai. Apo Yesus bopandir ko sia', “Jangan monangis. Bobia' nantai kinyo mati, bayo tidu' mo.”

⁵³ Sia' monontao'i Sio obai udah tohu bobia' nantai udah matiam.

⁵⁴ Ongko, Yesus moncanggapm longan bobia' nantai. Kato-Nyo, “Uai bobia', huascam!”

⁵⁵ Lansukng bobia' nantai bobali' hidup lalu bodiritn. Yesus monyiuh sia' moonji'inyo pomakatn.

⁵⁶ Indai bopai bobia' nantai kotakng hiratn. Apo Yesus morarakng sia' momadahan kojadian nantai ko sopo pan.