Lukas 7 - Porjanjian Boharu Torjomahan Baso Dilakng Soari-ari

Yesus monyamani siku' hulutn powira tontara Romawi

¹ Lopas jadi Yesus bopandir ko boko urakng banyaꞌ, ongko Yesus botula' ko Kapernaum sosamo agatn boko murid-Nyo.

² Di santai ado siku' powira tontara Romawi, ongko hulutnnyo sakit kuat, honda' matiam. Powira tontara nantai kotakan kidahnyo agatn hulutnnyo nantai.

³ Jadi kali mondingaꞌ kisah mongonaꞌi Yesus, lalu io mongumpulan boko tokoh urakng Yahudi, ongko minto tulukng ko sia' pakai' monomu'i Yesus. Io monyiuh sia' minto Yesus datakng ko rumahnyo, oca' monyamani hulutnnyo nantai.

⁴ Sia' pan botula' monomu'i Yesus. Pas botomu agatn Yesus, sia' muhun oca' Yesus datakng ko rumah powira tontara nantai ongko monyamani hulutnnyo. Kato sia', “Powira tontara nantai patut ditulukng ulih Duatn,

⁵ powira tontara ni'in kotakan mongasihi banso kito, urakng Yahudi. Io nantai sampai bulahan koi rumah pakai' koi sombayakng.”

⁶ Yesus botula' sosamo agatn sia' ko rumah powira tontara nantai. Apo kali sia' hampikng am ko rumah powira tontara nantai, powira tontara nantai monyiuh boko pokawalannyo monomu'i Yesus pakai' monyampaian posatn agi' ko Sio, “Duatn pompadohan nam datakam ko rumahku, obai aku kinyo patut Duatn dataki.

⁷ Ia'an pan aku co datakng monomu'i Duatn tontai, obai aku moanggap diriku kinyo cucu' mohadap Duatn. Jadi porintahan doi' si'itn ja'am pasti hulutnku nyamanam,

⁸ Aku mongoroti agatn kuaso, obai aku siku' gola' monaati porintah pimpitanku. Aku pan ado ana' buahku, sia' gola' tundu' agatn porintahku. Aman aku monyiuh sia' botula', sia' pasti botula' aman aku monyiuh inyo bukainyo datakng, sia' pasti datakng. Sama'an nian jam aman aku monyiuh inyo bukainyo bokorojo, la'apo pan pasti dikorojoannyo.”

⁹ Yesus topocongo mondingaꞌ posatn powira tontara inyo dipadahan sia' nantai ko Sio. Ongko Yesus mongilikng boko urakng banyaꞌ inyo tuyut sosamo agatn Sio. Ongko bopandir, “Pondinga'anbo, Aku bolupm kalo monomu'i iman sobosar ni'in. Doi' bansoku siku', urakng Yahudi pan, bolupm ado inyo bondar-bondar pocayo ko Aku agatn soponuh hati samaꞌan powira tontara urakng Roma ni'in.”

¹⁰ Lopas nian boko sonsiuhan powira tontara nantai pulakng. Kali datakng ko rumah, sia' moniant hulutn powira tontara nantai udah sehat samaꞌan biasonyo.

Yesus monulukng siku' botina' balu ongko bulah ana'nyo hidup agi'

¹¹ Kinyo manah lopas nantai, Yesus botula' ko kota Nain. Boko murid-Nyo ongko banyaꞌ jam urakng bukai inyo tuyut Yesus ko santai.

¹² Watu Yesus hampikng ko pintu gerbakng kota Nain, sia' botomu agatn boko urakng inyo tongahan momikul bangkai siku' bobia' muda' ko luar kota. Bobia' muda' nantai ana' tunggal botina' balu. Banyaꞌ boko urakng kota Nain tuyut momasar ana' botina' balu nantai.

¹³ Watu Yesus moniant botina' balu nantai, Sio mooso kotakan kasih. Yesus bopandir ko botina' balu nantai, “Jadi am monangis indai.”

¹⁴ Lalu Yesus mohampiki pompikulan lancakng bobia' muda' inyo mati nantai, ongko moncama'nyo. Boko urakng inyo momikul lancakng nantai botongga'. Kali sia' udah botongga' Yesus bopandir ko bobia' muda' inyo mati nantai, “Oi bujakng, huas cam!”

¹⁵ Samo-jatu' bobia' muda' nantai huas ongko mula'i bopandir. Lalu Yesus monyorahan bobia' muda' nantai ko indainyo.

¹⁶ Boko urakng moniant kojadian nantai, topocongo ongko kotakan hormat kapikng momuji Allah. Kapikng bopandir ko siku'-monyiku', “Siku' nabi bosar Allah udah hidup am di tongah-tongah kito, Allah udah monulukng kito umant-Nyo.”

¹⁷ Borito mongonaꞌi la'apo inyo dipulah Yesus nantai todinga' di soluruh doerah Yudea ongko sokolitarnyo.

Yesus ongko Yohanes Pombaptis

¹⁸ Boko murid Yohanes Pombaptis monyampaian borito mongonaꞌi porbuatan Yesus ko Yohanes.

¹⁹ Ongko Yohanes moningkau duo urakng muridnyo, huatan monyiuh sia' botula' monomu'i Tuhatn Yesus pakai' botakutn ko Sio, “Apobai Duatn ninam kila'an Rajo Inyo Dijanjian Allah, kata'an koi gola' ija' monanti kodatakan urakng bukai?”

²⁰ Lalu koduo murid Yohanes nantai botula' monomu'i Yesus. Kalinyo udah botomu sia' bopandir, “Koi disiuh Yohanes pombaptis botakutn ko Duatn, ‘Apobai Duatn ninam kila'an Rajo Inyo Dijanjian Allah, kata'an koi gola' ija' monanti kodatakan urakng bukai?’ ”

²¹ Timpu nantai, Yesus banyaꞌ monyamani boko urakng inyo boponyakit, huatan monundukng boko roh jahat doi' dalapm boko urakng inyo korasu'an, roh jahat nantai koluar tangga'i boko urakng inyo dirasu'inyo, huatan urakng buto moncolakng agi'.

²² Ongko Yesus monimbas ko boko murid Yohanes nantai, “Kaitn bobali' pulakng cam! Padahan ko Yohanes, somuo la'apo pan inyo Ku labuhan udah kaitn tiat, huatan somuo pandir-Ku udah kaitn dinga'. Aku bulah urakng buto bobali' moncolakng, urakng lumpuh bobali' ulih bojalatn, urakng boponyakit kulit inyo bogola'i nyamanam samaꞌan biaso, urakng tingal ulih mondingaꞌ, urakng mati bobali' hidup agi'. Aku pan momandiran borito boi' doi' Allah ko boko urakng jaro.

²³ Diborokati boko urakng inyo co gangga'-gua'an ongko monorima' Aku.”

²⁴ Kali udah koduo murid Yohanes nantai pulakng, Yesus mula'i momandiran ko boko urakng banyaꞌ mongonaꞌi sopo sobondarnyo Yohanes nantai. Kato Yesus, “Timpu Yohanes di padakng pasir kaitn ko su'utan moniant la'apo. Pasti kaitn kinyo bayo moniant solamba'i doutn rumput inyo boguyakng dipuput angin.

²⁵ Jadi, kaitn botula' ko su'utn pakai' moniant la'apo? Pasti co pakai' moniant urakng inyo bopakaian boi'. Urakng dampu inyo hidupnyo bokocukupan pasti bodiapm dalapm istana kinyo di padakng pasir.

²⁶ Jadi, kaitn botula' ko su'utn pakai' moniant la'apo? Pasti pakai' moniant siku' nabi pan? Apo, dinga'an bo ni'in. Io lobih pontikng doi' siku' urakng nabi biaso.

²⁷ Joman komai ado nabi inyo monulis mongonaꞌi Yohanes ni'in. Tulisan nantai momandiran: ‘Dinga'an bo! Aku tajahan monyiuh utusan-Ku mondoholu'i Duatn. Utusan-Ku nian tajahan momposiapan boko urakng pakai' kodatakan Duatn.’

²⁸ Jadi poniant'an, di dunia ni'in conyiant siku' pan inyo lobih pontikng daripado Yohanes. Apo, urakng inyo palikng babah kodudu'annyo dalapm koraja'an Allah lobih pontikng daripado Yohanes.”

²⁹ (Somuo urakng, tomansu' boko ponagih pajak inyo mondingaꞌ pomandiran Yesus, mongaku'i caro Allah bondar. Sia' nantai boko urakng inyo udah dibaptis Yohanes.

³⁰ Apo boko pomimpitn agama doi' kolompok Farisi ongko boko guru agama Yahudi monula' kohonda' Allah pakai' monyolamant'an sia'. Sia' nantai boko urakng inyo co honda' dibaptis Yohanes.)

^31-32 Kato Yesus, “Boko urakng joman ni'in ulih disamoan agatn boko bobia' inyo monggaso di pasar. Boko bobia' samaꞌan nantai dudu' kapikng mondorah ko kawalnyo, ‘Koi moniup sulikng apo kaitn co bonari. Koi bonyanyi salu' apo kaitn co monangis.’

³³ Yohanes Pombaptis datakng, kinyo bopua' roti, kinyo minum anggur, ongko sia' bopandir io korasu'an sitatn.

³⁴ Lopas nian Ana' Monsio datakng. Io makatn, minum, ongko sia' bopandir Io kaha', pomabu', kawal ponagih pajak ongko urakng bukai inyo bodosa.

³⁵ Apo hikmat Allah dibondaran ulih somuo urakng inyo monorima'nyo.”

Botina' bodosa mombasu'i kaki Yesus agatn minya' pakai' mohormati-Nyo

³⁶ Ado siku' urakng Farisi bodamo Simon, mohundakng Yesus datakng ko rumahnyo pakai' makatn sosamo. Jadi, Yesus datakng ko rumah urakng Farisi nantai, huatan dudu' makatn.

³⁷ Ado siku' urakng botina' inyo tokonal di kota nantai obai hala hidup dalapm dosa. Watu io mondingaꞌ Yesus tongahan makatn di rumah urakng Farisi nantai, datakam io mombaba' sobotul minya' harupm.

³⁸ Kapikng monangis, io bodiritn di bolikat Yesus, ongko tundu' di kaki Yesus. Io mombansahi kaki Yesus agatn ara'i matonyo huatan molapnyo agatn rambutnyo siku'. Lopas nian io monciupm kaki Yesus, monuyung minya' harupm nantai ko kaki Yesus.

³⁹ Urakng Farisi inyo mohundakng Yesus moniant porbuatan botina' nantai. Ongko, bopandir dalapm hatinyo, “Aman Sio bondar-bondar nabi, soharusnyo Sio tohu mongonaꞌi kohidupan botina' ni'in. Botina' inyo hidup dalapm dosa!”

⁴⁰ Jadi Yesus bopandir ko io, “Simon, ado lou' inyo honda' Ku pandiran ko kolai.” Timbas Simon, “Pandiran cam, Guru.”

⁴¹ Lalu Yesus mongajarnyo agatn poumpamoan ni'in, “Ado duo urakng inyo bohutakng ko siku' urakng inyo mominjapan duit. Siku' urakng bohutakng lima' ratus dinar, ongko inyo siku' bohutakng bayo lima' puluh dinar mo.

⁴² Sia' duo co ulih mombayar hutakngnyo ko urakng inyo moonji'i pinjapan nantai. Jadi agatn koboi'an hati io mohapusan hutakng sia'. Nah, sopo di antaro koduo urakng nantai paca'an lobih mongasihi io?”

⁴³ Timbas Simon, “Aku kiro io inyo palikng banyaꞌ dihapus hutakngnyo.” Kato Yesus, “Bondar pondapat kolai nian.”

⁴⁴ Ongko, Yesus moniant ko arah botina' nantai. Kato Yesus ko Simon agi', “Tiat porbuatan botina' ni'in. Aku datakng ko rumah kolai. Kolai co monyodia'an ara'i pakai' momborosihi kaki-Ku doi' dobu jalatn; apo botina' ni'in udah momborosihi kaki-Ku agatn ara'i matonyo, dilapnyo agatn rambutnyo siku'.

⁴⁵ Kolai kinyo monyambut Aku agatn ciupan, apo doi' Aku datakng, botina' ni'in kinyo botongga' monciupm kaki-Ku.

⁴⁶ Kolai kinyo mohormati Aku agatn monuyung minya' di kopala'-Ku, apo botina' ni'in udah monuyung minya' harupm di kaki-Ku.

⁴⁷ Botina' ni'in samo samaꞌan urakng dalapm poumpamoan tontai inyo ado hutakng banyaꞌ ongko dihapus. Dosanyo inyo banyaꞌ nantai udah diamputi. Jadi, io monunju'an kasih ko Aku agatn banyaꞌ caro jam. Apo urakng inyo bopikir dosanyo bayo sodikit, ongko diamputi, jadi io bayo sodikit jam monunju'an kasihnyo.”

⁴⁸ Ongko Yesus bopandir ko botina' nantai, “Boko dosa kolai udah diamputi.”

⁴⁹ Mondingaꞌ nantai, sia' inyo dudu' makatn bosamo Yesus bopandir dalapm hati, “Urakng ni'in kinyo bohak pakai' moamputi dosa! Ongkah Allah inyo ulih ubo nian!”

⁵⁰ Apo Yesus totap bopandir ko botina' nantai, “Kolai disolamant'an doi' boko dosa kolai obai pocayo ko Aku. Botula'cam agatn sonang-asau.”