Lukas 6 - Porjanjian Boharu Torjomahan Baso Dilakng Soari-ari

Pongajaran Yesus mongonaꞌi ari Sabat

¹ Timpu ari Sabat, Yesus ongko boko murid-Nyo bojalatn molalu'i lakau gandupm. Boko murid-Nyo momokis tangka'i gandupm ongko mongosa'nyo agatn jari sia' pakai' monyongkayoan johumannyo doi' bigi'nyo, ongko sia' pua'i bigi' gandupm nantai.

² Boboropo iku' urakng Farisi monogur, “Pogota'an kaitn nian monyalahi poraturan agama kito. Obai di dalapm buku poraturan morarakng urakng bokorojo pas ari Sabat.”

³ Timbas Yesus ko sia', “Pasti kaitn kalo mombaco Buku Suci mongonaꞌi kisah Rajo Daud ongko boko urakng inyo tuyutnyo. Timpu sia' kolaparan,

⁴ Daud mansu' ko dalapm Rumah Allah, ongko monguti' boko roti inyo udah diposombahan ko Allah. Monurut poraturan agama kito, ongkah boko imam inyo ulih momua'i roti nantai. Apo timpu nantai, Daud momua'inyo ongko mombagiannyo ko boko urakng inyo tuyut io pakai' bopua' sosamo agatn io, sia' pan bopua' jam. Sia' samo sokali kinyo disalahan.”

⁵ Yesus bopandir kotakan togas ko sia', “Ana' Monsio bokuaso monontuan mono inyo bondar mono inyo salah mongonaꞌi Ari Sabat.”

⁶ Timpu Ari Sabat bukainyo, Yesus mansu' ko rumah sombayakng, ongko mongajar. Di santai ado urakng, longan kanannyo mati.

⁷ Di santai ado boko guru agama Yahudi ongko boko urakng doi' golokan Farisi. Sia' borotian Yesus pakai' monggoyap kosalahan-Nyo, oca' ulih monuduhan kosalahan ko Yesus monurut poraturan Agama. Jadi sia' totap borotian apobai Sio monyamani urakng nantai watu ari sabat.

⁸ Apo Yesus tohu agatn pomikiran sia'. Ongko, Yesus moningkau urakng inyo longan kanannyo mati nantai, “Bodiritn dipohadapan-Ku ni'in bo!” Urakng nantai maju, ongko bodiritn dipohadapan Yesus.

⁹ Yesus bopandir agatn sia' nantai, “Aku honda' botakutn ko kaitn: La'apo inyo ulih kito korojoan timpu Ari Sabat? Bulah koboi'an ai kata'an bulah kojahatan. Monyolamant'an urakng kata'an mombonasoannyo?”

¹⁰ Yesus mocorona'i ko somuo sia'. Ongko bopandir ko urakng inyo longan kanannyo mati nantai, “Uluran longan kolai!” Kali io uluran longannyo nantai, longannyo nantai bobali' boi' samaꞌan biaso.

¹¹ Moniant kojadian nantai boko guru agama Yahudi ongko urakng Farisi kotakan godi. Ongko sia' bohoupm la'apo inyo gola' sia' labuhan ko Yesus.

Yesus momilih koduo bolas rasul-Nyo

¹² Timpu nantai, Yesus botula' ko bukit pakai' bodoa. Somalapm tumbas Sio bodoa ko Allah.

¹³ Sunsukng kohobu'annyo, watu matoari udah moncara', Sio moningkau boko murid-Nyo datakng, doi' somuo murid nantai Sio momilih duo bolas urakng, boko urakng ni'in dionji'i golar Rasul.

^14-16 Ni'inan boko damo Rasul Yesus: Simon (Dionji'i Yesus damo Petrus), ongko Andreas somadikan Simon, Yakobus ongko Yohanes, Filipus ongko Bartolomeus, Matius ongko Tomas, Yakobus ana' Alfeus, ongko Simon (urakng Zelot) Yudas ana' Yakobus, (Bukainyo doi' koduo Rasul inyo bodamo Yakobus) ongko Yudas Iskariot (inyo tajahan mohianati Sio).

Yesus mongajar huatan monyamani ponyakit urakng banyaꞌ

¹⁷ Lopas nantai, Yesus turutn doi' bukit sosamo agatn boko Rasul-Nyo. Datakng ko kontanjukan sia' botongga'. Di santai udah bokumpul boko murid-Nyo huatan banyaꞌ urakng bukainyo doi' soluruh doerah Yudea, tomansu' doi' Yerusalem, ongko doi' boko kota Tirus huatan Sidon di pantai lout.

¹⁸ Sia' datakng honda' mondingaꞌ pongajaran Yesus. Huatan minto nyamani doi' bomacapm ponyakit sia'. Tomansu' boko urakng inyo korasu'an roh jahat.

¹⁹ Somuo urakng bousaha moncama' Yesus, obai ado kuaso inyo koluar doi'-Nyo inyo monyamani somuo urakng nantai.

Yesus momandiran Borokat ongko Poringant'an

²⁰ Lopas nantai, Yesus mongilikng boko murid-Nyo ongko bopandir, “Diborokati bayakan kaitn inyo jaro, obai kaitn ninam inyo anggota koraja'an Allah,

²¹ Diborokati kaitn bayakan kolaparan watu ni'in, obai kaitn paca'an dikonyangan nononyo! Diborokati kaitn inyo monangis watu ni'in, obai kaitn tajahan rindakng totao nononyo!

²² Diborokati kaitn inyo dibonci', ditula', dihanyam, ditunju' jahat obai Ana' Monsio.

²³ Torima' sonang hati aman kaitn dipulah samaꞌan nian. Bonari kotakng rindakng, obai sobondarnyo upah kaitn bosar di sorugo! Obai boko nabi joman komai dipulah angki-bayatn kaitn sama'an nian jam.

²⁴ Apo Allah tajahan mohukupm kaitn bayakan inyo dampu watu ni'in, obai kaitn udah mooso'i sonang-nyamanam di dunia ni'in.

²⁵ Allah tajahan mohukupm kaitn bayakan inyo konyang watu ni'in, obai kaitn nononyo paca'an kolaparan. Allah tajahan mohukupm kaitn inyo rindakng totao watu ni'in, obai kaitn nononyo paca'an monangis ongko bulikng undu'.

²⁶ Allah tajahan mohukupm kaitn inyo dipuji watu ni'in, obai sama'an nian jam angki-bayatn kaitn momuji boko nabi palsu.”

Yesus mongajar mongonaꞌi caro ubo apo mongasihi musuh

²⁷ Yesus monorusan pongajaran-Nyo, “Pondinga'an pandir-Ku ni'in: Kasihi bo musuh kaitn. Pulah cam koboi'an agatn urakng inyo bonci'an kaitn.

²⁸ Borokati urakng inyo monyumpah kaitn. Huatan doa'an urakng inyo hala bulah kojahatan ko kaitn.

²⁹ Aman urakng monompilikng pipi kiba' kaitn biaran io monompilikng pipi kanan kaitn jam. Huatan aman urakng monguti' jubah kaitn onju' jam baju kaitn.

³⁰ Aman urakng minto barakng la'apo pan ko kaitn, onji'i ja'am! Aman ado barakng kaitn dirampas jangan minto pulakan.

³¹ Pulah koboi'an ko urakng bukai, samo ubo kaitn mongohonda'i urakng bukai molabuhannyo ko kaitn.

³² Aman kaitn bayo mongasihi urakng inyo mongasihi kaitn, nian kinyo pogota'an istimewa apotolagi' sampai patut dihormati. Urakng bodosa pan mongasihi samaꞌan nian jam, jadi urakng nian kinyo patut di hormati, huatan co nyiant jasanyo sampai ulih dihormati.

³³ Aman kaitn bayo bulah koboi'an agatn urakng inyo boi' agatn kaitn, nian kinyo pogota'an boi' apotolagi' sampai cucu' dihormati, obai urakng bodosa pan bulah samaꞌan nian jam.

³⁴ Aman kaitn mominjapan la'apo pan ko urakng inyo ulih momulakannyo nian kinyo pogota'an istimewa, apotolagi' sampai patut dihormati. Urakng bodosa pan mominjapan ko sosamo sia', ongko minto pulakan agi'.

³⁵ Jadi kaitn sobondarnyo gola' mongasihi musuh. Huatan bulah koboi'an agatn sia'. Jadi pinjapan ko sia' apo co momikiran pomulakannyo. Aman kaitn udah molabuhan ubo nian, kaitn tajahan mondapat upah, inyo bosar ongko monjadi Ana' Allah Inyo Maho Tinggi. Obai Sio totap mongasihi urakng inyo kinyo tohu agatn botorima' kasih, samaꞌan nian jam agatn urakng jahat.

³⁶ Kaitn gola' hala onsi', samo sama'an Bopai kaitn di Sorugo pan onsi'.”

Yesus mongajar pakai' urakng co mohakipi urakng bukai

³⁷ “Jangan mohakipi urakng bukai, nononyo kaitn co dihakipi Allah. Jangan monyalahan urakng bukai, nononyo kaitn kinyo disalahan Allah. Amputi kosalahan urakng bukai, nononyo kaitn diamputi Allah.

³⁸ Onju' cam ko urakng bukai, nononyo kaitn hala dionji'i Allah kolimpahan; ia'an sobuah takaran inyo digora', dihonya'an, oca' inyo botambah rapat tajahan dionju' ko kaitn. Ingant'i cam: Ukuran inyo kaitn gunoan pakai' moukur porbuatan urakng bukai, Allah tajahan momakai ukuran inyo samo samaꞌan nian jam ko kaitn.”

³⁹ Yesus pan mongisahan poumpamoan ko sia'. Kato-Nyo, “Aman urakng buto moirikan urakng buto pasti koduonyo jatu' ko dalapm lubakng.

⁴⁰ Murid pasti kinyo lobih tinggi pongotohuannyo doi' gurunyo. Apo aman udah tamant doi' polajarannyo pasti samo agatn gurunyo.

^41-42 Jangan samaꞌan urakng inyo pompadah boi' apo sobondarnyo jahat. Sia' hala borotian kosalahan urakng bukai, apo kinyo kalo tohu agatn kosalahan dirinyo siku'. Urakng samaꞌan nian samo agatn urakng moniant kosimaian kayu di mato kawalnyo, apo balok di kolambir matonyo siku' co kotiat'an. Ongko io bopandir, ‘Ko si'itn somadikan, oca' aku mohilakan kosimaian kayu di mato kulo.’ Apo balok di kolambir matonyo co kotiat'annyo. Ui urakng inyo pompadah boi' apo sobondarnyo jahat, koluaran doholu balok di kolambir mato kaitn siku' hoyu' kaitn moniant jolas hoyu' ulih mongoluaran kosimaian kayu nantai doi' mato urakng bukai.”

Yesus mongajar obai kolaku'an urakng moncorominan hatinyo

⁴³ “Urakng samaꞌan sokayu' tontanaman. Tontanaman inyo boi' kinyo mungkitn bobuahan buah inyo kinyo boi', huatan tontanaman inyo kinyo boi' co mohasilan buah inyo boi'.

⁴⁴ Sotiap tontanaman ditiat doi' buahnyo. Co mungkitn kito monguti' buah ara doi' una' duri. Huatan co mungkitn kito mongopil buah anggur doi' rado momant.

⁴⁵ Sama'an nian jam urakng boi' pasti mongoluaran hal inyo boi' obai hatinyo boi'. Sama'an nian jam urakng jahat pasti mongoluaran hal inyo jahat obai hatinyo jahat. Obai la'apo inyo dipandirannyo koluar doi' isi hatinyo.”

Yesus mongajar oca' boko urakng gola' molabuhan pongajaran-Nyo kinyo bayo mondinga'annyo

⁴⁶ “Kaitn co bondar aman ongkah moningkau Aku ‘Tuhatn’, apo kaitn co molabuhan la'apo inyo Ku siuh.

⁴⁷ Ni'in Aku moonji'i poumpamoan ko kaitn mongonaꞌi boko urakng inyo datakng ko Aku, mondinga'an pandir-Ku huatan molabuhannyo.

⁴⁸ Sia' samo agatn urakng inyo bulah rumah di pucu' pondasi inyo boi', sia' mongali lubakng kotakan dalapm oca' pondasinyo di pucu' batu. Jadi aman datakng pasakng rayo mohontapm rumah nantai, rumah nantai kinyo robah lalu kinyo hanyunt obai pondasinyo dipulah kotakng kuat.

⁴⁹ Ado jam urakng bondinga'an pongajaran-Ku, apo kinyo molabuhannyo. Samo agatn urakng inyo moninjakan rumah apo pondasinyo kinyo kuat. Aman datakng pasakng rayo, ara'i sungai moluap ongko monumbu' rumah nantai, rumah nantai robah ongko kotakng ropu'-lolo.”