Lukas 4 - Porjanjian Boharu Torjomahan Baso Dilakng Soari-ari

Rajo Sitatn moncubo'i oca' Yesus bodosa

¹ Yesus moninggalan sungai Yordan tompat Sio dibaptis. Roh Allah ado di dalapm diri Sio, moirikan Sio ko padakng pasir.

² Watu Yesus ado di santai, somanahan ompat puluh ari Rajo Sitatn moncubo'i oca' Yesus bodosa. Somanahan watu nantai, Yesus kinyo bopua' la'apo pan. Koponsuahannyo Sio mooso kotakng kolaparan.

³ Ongko Rajo Sitatn bopandir ko Yesus, “Aman Kolai bondar-bondar Ana' Allah, siuh am batu ni'in monjadi roti, oca' ado pomakatn pakai' Kolai.”

⁴ Apo Yesus bopandir ko Rajo Sitatn, “Pomandiran Allah inyo ditulis dalapm Buku Suci, ‘Urakng kinyo bayo momontikan pomakatn pakai' kohidupan inyo sobondarnyo.’”

⁵ Lopas nian Rajo Sitatn mombaba' Yesus botula' ko tompat inyo kotakng tinggi, huatan dalapm sopongirap mato Rajo Sitatn mononaian ko Yesus somuo koraja'an di dunia.

⁶ Kato Rajo Sitatn ko Yesus, “Somuo kokuasa'an huatan kodampuan ni'in paca'an ku sorahan ko kolai obai somuonyo ni'in dionju' ko aku, jadi aku ulih moonju' somuonyo ko sopo pan inyo ku pilih.

⁷ Aman Kolai monyombah aku, nononyo aku paca'an moonju' somuo ni'in ko Kolai.”

⁸ Apo Yesus bopandir ko Rajo Sitatn, “Pomandiran Allah inyo ditulis di dalapm Buku Suci, ‘Sombahcam Tuhatn Allah kolai ongko taat'i Sio aja'am.’ ”

⁹ Lopas nantai Rajo Sitatn mombaba' Yesus ko kota Yerusalem huatan monyiuh Sio bodiritn di pucu' bubukan Rumah Allah. Io bopandir, “Aman Kolai bondar-bondar Ana' Allah, molansakngcam!

¹⁰ Kolai co tajahan bodapat pomodih, obai ado pomandiran Allah inyo ditulis dalapm Buku Suci, ‘Allah tajahan monyiuh boko molekat-Nyo molinduki Kolai.’

¹¹ ‘Sia' paca'an monangkap Kolai agatn jarinyo oca' kaki Kolai pan kinyo luko kona' batu!’ ”

¹² Apo Yesus bopandir agi' ko Rajo Sitatn, “Pomandiran Allah inyo ditulis dalapm Buku Suci, ‘Jangan moncubo'i Tuhatn, Allah kolai!’ ”

¹³ Lopas Rajo Sitatn jadi moncubo'i oca' Yesus bodosa agatn bomacapm caro, io moninggalan Yesus huatan monantian watu inyo boi' pakai' moncubo'i Sio agi'.

Yesus hoyu' momula'i pogota'an-Nyo di doerah Galilea

¹⁴ Lopas nian, Yesus pulakng ko doerah Galilea, bisi agatn kuaso Roh Allah. Kabar mongonaꞌi Sio tosebar di doerah Galilea nantai.

¹⁵ Sio mongajar diboko rumah sombayakng di santai. Ongko somuo boko urakng momuji Sio.

Boko urakng di laman Yesus monula' Sio

¹⁶ Di doerah Galilea nantai, Yesus datakng ko Nazaret, tompat Sio dibosaran. Watu ari Sabat, Sio mansu' ko rumah sombayakng ubo biasonyo. Ongko, Sio bodiritn, maju ko muka' pakai' mombaco doi' Buku Suci.

¹⁷ Buku nabi Yesaya dionju' ko Sio. Sio mombuka'nyo, ongko monomuan boko ayat inyo honda' dibaco-Nyo. Ni'inan boko ayat inyo dibaco-Nyo,

¹⁸ “Roh Tuhatn Allah ado di Aku, obai Sio momilih Aku pakai' monyampaian kabar boi' ko boko urakng jaro; Sio moutus Aku pakai' mongabaran

¹⁹ boko urakng tahatan, tajahan dilopasan; boko urakng buto, tajahan moniant; Sio moutus Aku pakai' mombebasan boko urakng inyo didorako'i. Sio moutus Aku pakai' momboritoan, ninam watu Tuhatn moniant'an kasih-Nyo.”

²⁰ Yesus monutup huatan moonju' buku nantai ko potugas rumah sombayakng. Huatan Sio dudu' mongajar. Somuo urakng di dalapm rumah sombayakng nantai borotian Sio.

²¹ Huatan Sio mula'i mongajar sia'. Kato-Nyo, “Pas ari ni'in, watu kaitn mondingaꞌnyo, tulisan nabi Yesaya nantai udah digonapi.”

²² Somuo urakng inyo ado di santai bopandir, “Sio urakng boi'.” Sia' hiratn mondingaꞌ pomandiran Sio inyo kotakan corodi'. Kato sia', “Padohal Sio ni'in ana' Yusuf mo!”

²³ Ongko kato Yesus ko sia', “Pasti kaitn paca'an momadahan pobaso ni'in ko Aku, ‘Uai dokter, nyamani bo diri kolai siku'.’ Kohonda'nyo kolai mombutian kuaso Kolai di tompat asal kolai ni'in agatn mujisat, samo samaꞌan mujisat inyo koi dinga' inyo udah kolai labuhan di Kapernaum.”

²⁴ Ongko Yesus bopandir agi', “Dinga'an bo sobondarnyo conyiant nabi inyo dirogo'i di tompat asalnyo siku'.

²⁵ Buti nyata doi' joman nabi Elia komai. Ado musipm lapar-barau di somuo nogori obai conyiant hujatn somanahan tigo tohutn sotongah. Watu nantai ado banyaꞌ boko botina' balu di tanah Israel.

²⁶ Apo Allah monyiuh Elia botula' ko botina' balu inyo bukainyo urakng Israel di laman Sarfat, dampikng kota Sidon.

²⁷ Butinyo agi' doi' joman nabi Elisa komai. Ado banyaꞌ boko urakng Israel tokona' ponyakit kulit inyo bogola'i, apo conyiant siku' pan doi' sia' inyo dinyamani. Ongkah Naaman am urakng doi' nogori Siria, io kinyo urakng Israel. Ongkah io am inyo dinyamani.”

²⁸ Mondingaꞌ pandir Yesus nantai somuo urakng dalapm rumah sombayakng nantai kotakng godi.

²⁹ Sia' bodiritn molulukng Sio koluar doi' kota nantai, huatan mombaba' Sio ko konambikng bukit tompat kota sia' di bangun. Tujuan sia' honda' mombuakan Sio doi' pucu' konambikng nantai.

³⁰ Apo Yesus bojalatn morongko urakng banyaꞌ nantai huatan moninggalan sia'.

Yesus monundukng roh Jahat

³¹ Lopas nantai Yesus botula' ko kota Kapernaum di Galilea di santai Sio mongajar boko urakng pas Ari Sabat.

³² Sio bopandir agatn bisi kuaso. Jadi, sia' hiratn moniant caro Sio mongajar.

³³ Di santai, di rumah sombayakng ado siku' urakng inyo dirasu'i roh jahat. Roh jahat nantai, bulah urakng nantai mondorah kotakng borakng,

³⁴ “Ih! Yesus urakng Nazaret, jangan Duatn mongoncaci' koi. Koi tohu Duatn inyo Suci doi' Allah! Duatn datakng pakai' mombonasoan koi?”

³⁵ Yesus mohakap roh jahat nantai, “Bobacap! Koluar cam tangga'i urakng ni'in!” Ongko roh jahat nantai mohompasan urakng nantai jatu' dipohadapan boko urakng banya', lopasnyo koluar doi' urakng nantai apo co ngompodihinyo.

³⁶ Boko urakng kotakan hiratn, ongko sia' bopandir ko siku'-monyiku', “Wah! Kotakng nontu bondar pomandiran Sio ni'in. Sio monyiuh boko roh jahat koluar agatn kuaso, huatan sia' tuyut pomandiran-Nyo!”

³⁷ Ongko borito mongonaꞌi Yesus todinga' di soluruh doerah nantai.

Yesus monyamani montuho botina' Simon huatan boko urakng bukai jam

³⁸ Lopas nantai, Yesus koluar doi' rumah sombayakng huatan botula' ko rumah Simon. Montuho botina' Simon tongahan gorikng bosar. Ongko sia' minto Yesus pakai' monyamaninyo.

³⁹ Jadi Yesus mohampiki kotidu'annyo lalu mohakap ponyakit nantai. Timpu nantai jam botina' nantai nyamanam am huatan molayati sia'.

⁴⁰ Watu matoari honda' tonggolapam, boko urakng mombaba' somuo boko urakng boponyakit ko Yesus. Sia' mondorita' obai bomacapm ponyakit. Yesus molota'an jari-Nyo ko bukakng sia' huatan monyamani sia'.

⁴¹ Yesus pan monyiuh boko roh jahat koluar doi' boko urakng. Ongko boko roh jahat nantai koluar kapikng mondongkakng-mondorah, “Duatn nam Ana' Allah!” Obai boko roh jahat tohu Sio memang Rajo Inyo Dijanjian Allah. Apo Yesus monogur boko roh jahat nantai morarakng koras bopandir obai bolupm watunyo urakng mongotohu'inyo.

Yesus mongajar diboko kota di doerah Yudea

⁴² Kohobu'annyo watu matoari moncara', Yesus moninggalan kota Kapernaum nantai, botula' ko tompat inyo langunt. Apo banyaꞌ boko urakng monggoyapi Sio. Koponsuahannyo, sia' pan monomuan-Nyo, huatan bousaha oca' Sio jangan moninggalan sia'.

⁴³ Sio bopandir ko sia', “Nantai pontikng Aku gola' momboritoan Kabar Boi' mongona'i Koraja'an Allah diboko tompat bukainyo jam. Obai nianam, Aku, diutus Allah ko dunia ni'in.”

⁴⁴ Jadi Sio botula' momboritoan Kabar Boi' nantai di dalapm boko rumah sombayakng di doerah Yudea.