Lukas 3 - Porjanjian Boharu Torjomahan Baso Dilakng Soari-ari

Polayatan Yohanes Pombaptis

¹ Ado Kaisar inyo bodamoan Tiberius, rajo inyo kotakan bokuaso di Roma. Di tohutn ko lima' bolas watu io momorintah, ado boko pojabat di babahnyo inyo momorintah di boko doerah di nogori Israel. Pontius Pilatus monjadi gubernur di doerah Yudea; Herodes momorintah di doerah Galilea, somadikan Herodes damonyo Filipus momorintah di doerah Iturea huatan Trakhonitis. Lisanias momorintah di doerah Abilene.

² Watu nantai pomimpitn boko imam agama urakng Yahudi inyo bokodudu'an kotakng tinggi bodamo Hanas digonti agatn Kayafas. Timpu nantai Allah bopandir ko Yohanes, ana' Zakharia. Allah bopandir ko io, watu io tongahan di padakng pasir.

³ Huatan Yohanes botula' ko mono-mono di soluruh doerah sungai Yordan ongko monyampaian borito doi' Allah. Yohanes mondongkakng-mondorah, “Botongga'cam bulah dosa oca' monyonangan hati Allah ongko onju'cam diri kaitn dibaptis oca' Allah moamputi dosa kaitn.”

⁴ Kodatakan Yohanes udah manah ditulis dalapm buku nabi Yesaya. Nabi Yesaya monulis mongonaꞌi io inyo tajahan monyiuh urakng mongomboi'i caro hidup sia'. Dinga' ni'in katonyo dalapm buku nantai: “Ado urakng mondongkakng-mondorah di padakng pasir, ‘Siap'an cam jalatn pakai' Tuhatn. Bujurancam jalatn pakai' Sio.

⁵ Somuo lombakng gola' dilungku, sotiap gunung ongko bukit gola' diratoan. Bujurancam jalatn inyo pingkakng-pingku'. Ratoancam jalatn inyo lombakng-lokupan.

⁶ Ongko boko urakng tajahan moniant kosolamant'an inyo datakng doi' Allah.’ ”

⁷ Banyaꞌ urakng Yahudi datakng pakai' dibaptis. Ongko Yohanes bopandir, “Uai kaitn inyo jahat huatan licik samaꞌan Rajo Sitatn, jangan bopikir kaitn ulih morarian diri doi' hukupan Allah nononyo.

⁸ Jangan jam bopikir dalapm hati: Koi doi' koturutan Abrahapm. Pasti Allah kinyo paca'an mohukupm koi. Ingant: Doi' boko batu ni'in pan Allah ulih bulah koturutan pakai' Abrahapm! Kaitn gola' molabuhan porbuatan inyo bondar pakai' monunju'an obai kaitn bondar-bondar bobali' doi' dosa samaꞌan tontanaman inyo bobuah huatan monunju'an obai nian tontanaman inyo boi'.

⁹ Allah tajahan mohukupm urakng inyo co botongga' bulah dosa huatan co hidup monyonangan Allah. Sio samo ubo urakng inyo udah monjujut kapak pakai' monobakng tontanaman sampai ko akarnyo. Sotiap tontanaman inyo kinyo mohasilan buah inyo boi', paca'an ditobakng ongko dibuakan ko api.”

¹⁰ Ongko urakng banya' nantai botakutn ko Yohanes, “La'apo inyo gola' koi labuhan pakai' monunju'an obai koi udah botongga' bulah dosa?”

¹¹ Yohanes monimbas, “Urakng inyo ado duo lambai' baju, gola' moonji'i solamba'i ko urakng inyo conyiant ado bajunyo. Huatan urakng inyo ado pomakatn, gola' bobagi ko urakng inyo conyiant pomakatnnyo.”

¹² Boko potugas ponagih pajak pomorintahan Romawi pan datakng ko Yohanes oca' sia' dibaptis. Sia' botakutn, “Guru, la'apo inyo gola' koi labuhan?”

¹³ Yohanes monimbas, “Jangan monagih pajak lobih banyaꞌ doi' apo inyo udah ditontuan pomorintah.”

¹⁴ Ado jam projurit inyo botakutn, “Niant apo agatn koi? La'apo inyo gola' koi labuhan?” Yohanes monimbas, “Jangan momoso minto duit ko urakng bukai. Jangan bulah boko tuduhan inyo kinyo bondar, oca' mondapat kountukan diri siku'. Jadi cukupancam diri kaitn agatn upah kaitn.”

¹⁵ Timpu nantai boko urakng monanti kodatakan Rajo Inyo Dijanjian Allah. Jadi sia' somuo mula'i botakutn dalapm hati, Yohanes ninam bai Rajo Inyo Dijanjian Allah nantai.

¹⁶ Yohanes monimbas, “Aku bukainyo Rajo Inyo Dijanjian Allah. Apo kinyo manah agi' Sio tajahan datakng. Sio lobih bokuaso tangga'i Aku. Monjadi hulutn-Nyo inyo kotakng babah pan, aku co cucu'. Aku ongkah mombaptis urakng agatn ara'i. Apo Sio tajahan mombaptis urakng agatn Roh Allah huatan agatn api.

¹⁷ Sio tajahan monyongkayoan urakng inyo bondar doi' urakng inyo jahat, samo agatn urakng di tompat poiri'an monyongkayoan gandupm agatn johuman pakai' capatn. Gandupm tajahan dikumpulan-Nyo di dalapm jurukng, apo somuo johuman tajahan dicucul-Nyo ko api inyo co tohu buta'.”

¹⁸ Sama'an niannam Yohanes monosihat'i boko urakng agatn bomacapm caro, pas io momboritoan Kabar Boi'.

¹⁹ Yohanes pan monogur Herodes, Rajo doerah Galilea, obai Herodes kawitn agatn Herodias, bini somadikannyo. Yohanes monogur io obai somuo kojahatannyo inyo bukai jam.

²⁰ Apo Herodes malah monambah kojahatannyo. Io monamoan Yohanes ko dalapm ponjara.

Yesus Dibaptis ongko Roh Allah turutn di pucu'-Nyo

²¹ Apo sobolupm Yohanes ditamoan ko dalapm ponjara, banyaꞌ urakng inyo datakng dibaptis. Sama'an nian jam Yesus datakng pakai' dibaptis. Watu Sio tongahan bodoa, langit tobuka',

²² huatan Roh Allah turutn kopucu'-Nyo monyorupo'i burukng daro. Ongko kodinga'an saro Allah doi' sorugo momandiran, “Kolai nam Ana'-Ku inyo Ku kasihi. Kolai monyonangan hati-Ku.”

Angki-bayatn Yesus

²³ Watu Yesus mula'i pogota'an-Nyo, Sio boumur kiro-kiro tigo puluh tohutn. Yesus dikonal boko urakng sobagai ana' Yusuf: Yusuf ana' Eli;

²⁴ Eli ana' Matat, Matat ana' Lewi, Lewi ana' Malkhi, Malkhi ana' Yanai, Yanai ana' Yusuf;

²⁵ Yusuf ana' Matica, Matica ana' Amos, Amos ana' Nahum, Nahum ana' Hesli, Hesli ana' Nagai;

²⁶ Nagai ana' Maat, Maat ana' Matica, Matica ana' Simei, Simei ana' Yosekh, Yosekh ana' Yoda;

²⁷ Yoda ana' Yohanan, Yohanan ana' Resa, Resa ana' Zerubabel, Zerubabel ana' Sealtiel, Sealtiel ana' Neri;

²⁸ Neri ana' Malkhi, Malkhi ana' Adi, Adi ana' Kosam, Kosam ana' Elmadam, Elmadam ana' Er;

²⁹ Er ana' Yesua; Yesua ana' Eliezer, Eliezer ana' Yorim; Yorim ana' Matat, Matat ana' Lewi;

³⁰ Lewi ana' Simeon, Simeon ana' Yehuda, Yehuda ana' Yusuf, Yusuf ana' Yonam, Yonam ana' Elyakim;

³¹ Elyakim ana' Melea, Melea ana' Mina, Mina ana' Matata, Matata ana' Natan, Natan ana' Daud;

³² Daud ana' Isai, Isai ana' Obed, Obed ana' Boas, Boas ana' Salmon, Salmon ana' Nahason;

³³ Nahason ana' Aminadab, Aminadab ana' Admin, Admin ana' Arni, Arni ana' Hezron, Hezron ana' Peres, Peres ana' Yehuda;

³⁴ Yehuda ana' Yakub, Yakub ana' Ishak, Ishak ana' Abrahapm, Abrahapm ana' Terah, Terah ana' Nahor;

³⁵ Nahor ana' Serug, Serug ana' Rehu, Rehu ana' Peleg, Peleg ana' Eber, Eber ana' Salmon;

³⁶ Salmon ana' Kenan, Kenan ana' Arpakhsad, Arpakhsad ana' Sem, Sem ana' Nuh, Nuh ana' Lamekh;

³⁷ Lamekh ana' Metusalah, Metusalah ana' Henokh, Henokh ana' Yared, Yared ana' Mahalaleel, Mahalaleel ana' Kenan;

³⁸ Kenan ana' Enos, Enos ana' Set, Set ana' Adapm inyo dipulah Allah.