Lukas 23 - Porjanjian Boharu Torjomahan Baso Dilakng Soari-ari

Yesus dibaba' ko Gubernur Pilatus oca' diadili

¹ Somuo urakng dalapm potomuan nantai bodiritn, lalu mombaba' Yesus ko Pilatus, gubernur doerah Yudea.

² Di santai sia' monuduh Sio. Kato sia', “Urakng ni'in udah monyosat'an banso koi. Sio morarakng boko urakng pakai' mombayar pajak ko kaisar di Roma. Sio jam bopandir obai Sio nantai rajo, ia'an Rajo Inyo Dijanjian Allah, ia'an siku' rajo inyo koi sobut ‘Kristus’.”

³ Lalu Pilatus botakutn ko Yesus, “Bondaram Kolai rajo urakng Yahudi?” Timbas Yesus, “Ubo pandir kolai nam.”

⁴ Lalu Pilatus bopandir agatn boko imam kopala' huatan boko urakng bukai inyo udah bokumpul, “Aku co monomuan kosalahan Urakng ni'in. Conyiant alasan sampai Io gola' dihukupm.”

⁵ Apo boko pomimpitn urakng Yahudi hala nyosahan. Kato sia', “Sio mohasut boko urakng pakai' momborontak. Niannam pongajaran-Nyo di soluruh tanah urakng Yahudi. Sio mula'i doi' doerah Galilea, sampai ko kota Yerusalem ni'in!”

⁶ Mondingaꞌ nantai, Pilatus botakutn, “Apobai Yesus ni'in boasal doi' doerah Galilea?”

⁷ Lopas jadi dipadahan obai Yesus memang boasal doi' su'utn, Pilatus monyiuh boko projurit mombaba' Yesus ko Herodes, rajo doerah Galilea. Mumpukan io ado di kota Yerusalem jam.

Yesus dibaba' ko Herodes oca' diadili

⁸ Herodes udah opat mondinga' borito mongona'i Yesus. Udah manaham honda' botomu Sio. Jadi watu moniant Yesus, mulonyo Herodes rindakng bondar obai boharap ulih moniant Yesus bulah mujisat.

⁹ Ongko, Herodes banyaꞌ botakutn ko Yesus, apo Yesus co monimbasi samo sokali.

¹⁰ Boko imam kopala' huatan boko guru agama Yahudi bodiritn di santai. Ongko tomaho godi, sia' monuduhan tuduhan inyo borat mongonaꞌi Yesus.

¹¹ Lalu Herodes ongko boko projuritnyo mohayam Yesus. Sia' boulu'an Yesus agatn mongona'an jubah rajo ko Sio. Lalu, Herodes monyiuh boko projurit mombaba' Yesus bobali' ko Pilatus.

¹² Komai Herodes agatn Pilatus hala bomusuhan, apo pas ari nantai sia' duo udah bokawalam.

Gubernur Pilatus momutusan oca' Yesus dihukupm mati

¹³ Pilatus mongumpulan boko imam kopala', boko pomimpitn, ongko boko rayat,

¹⁴ lalu bopandir ko sia', “Kaitn mombaba' Urakng ni'in ko aku ongko monuduh obai Io monyosat'an boko urakng. Dinga'anbo, aku udah boriso'i Io di hadapan kaitn, apo aku samo sokali co bodapat sobuti' pan kojahatan inyo kaitn tuduhan ko Io.

¹⁵ Herodes pan udah momutusan samaꞌan nian jam. Lalu, io monyiuh boko projurit mombaba' Yesus bobali' ko si'itn. Sobondarnyo Urakng ni'in kinyo molabuhan kojahatan la'apo pan sampai ulih mondapat hukupan mati.

¹⁶ Jadi, aku paca'an monyiuh Io dipodularan ja'am, lalu molopasan-Nyo.” [

¹⁷ Pilatus bopandir ubo nantai obai pas sotiap Ari Rayo Paskah io wajib molopasan siku' urakng tahatan pakai' urakng Yahudi.]

¹⁸ Apo somuo urakng inyo bokumpul di santai mondorah, “Bunuh ja'am Io! Lopasan Barabas pakai' koi!”

¹⁹ (Nah, Barabas ditamoan ko dalapm ponjara obai di kota Yerusalem io bulah korusuhan molawatn pomorintah Romawi. Io pan mombunuh urakng jam.)

²⁰ Pilatus honda' molopasan Yesus. Jadi, io bopandir agi' agatn saro borakng ko urakng banyaꞌ nantai obai Yesus kinyo bosalah.

²¹ Apo sia' hala mondorah, “Bunuh Io di kayu salib! Bunuh Io di kayu salib!”

²² Lalu pongontigo kalinyo Pilatus bopandir ko sia', “Urakng ni'in kinyo bosalah! Io kinyo molabuhan kojahatan la'apo pan sampai ulih mondapat hukupan mati. Aku paca'an monyiuh Io dipodularan ja'am, lalu molopasan-Nyo.”

²³ Apo sia' hala mondorah monuntut agatn togas oca' Yesus gola' dibunuh di kayu salib. Koponsuahannyo sia' bohasil.

²⁴ Pilatus molabuhan somuonyo sosuai agatn kohonda' sia'.

²⁵ Biar pan Barabas ditamoan ko dalapm ponjara obai bulah korusuhan huatan pombunuhan, Pilatus totap molopasan Barabas, lalu monyiuh boko projuritnyo pakai' mohukupm mati Yesus di kayu salib obai nantai kohonda' boko urakng banyaꞌ.

Yesus dibaba' pakai' dihukupm mati di kayu salib

²⁶ Lalu, boko projurit mombaba' Yesus ko luar kota pakai' mohukupm-Nyo sampai mati. Watu sia' tongahan bojalatn, ado siku' urakng lolaki honda' mansu' kota Yerusalem nantai. Damonyo Simon, doi' kota Kirene. Boko projurit nantai monangkap io, momoso io momikul kayu salib, ongko bojalatn di bolikat Yesus.

²⁷ Kotakan banyaꞌ bondar urakng tuyut Yesus, tomansu' boko botina' monangis, salu' moniant koadaan Sio.

²⁸ Apo Yesus mongilikng ko arah sia' ongko bopandir, “Boko botina' doi' Yerusalem, jangan monangis obai la'apo inyo tojadi ko Aku. Apo sobali'nyo monangiscam obai la'apo inyo paca'an tojadi ko kaitn huatan poana'an kaitn.

²⁹ Obai tajahan hagar datakng watunyo urakng tajahan ajab sonsaro kotakng banyaꞌ sampai bopandir, ‘Lobih boi' pakai' boko botina' inyo co boana', kinyo kalo molahiran, kinyo kalo monyusu'i ana'!’

³⁰ Timpu ajab sonsaro nantai urakng paca'an bopandir ko boko gunung, ‘Tinggakngcam koi.’ Lalu ko boko bukit, ‘Lungkucam koi!’

³¹ Obai aman urakng molabuhan ni'in ko kayu inyo bansah, la'apo inyo tajahan tojadi ko kayu inyo rangkai?”

³² Ado duo urakng bukai inyo dibaba' pakai' dihukupm mati bonsamo agatn Yesus. Koduo urakng nantai ponjahat.

Yesus dipaku di kayu salib

³³ Timpu datakng ko tompat inyo disobut “Tongkorak”, boko projurit Romawi momakuan Yesus di kayu salib bonsamo agatn koduo ponjahat nantai jam – siku' urakng di sopia' kanan huatan siku' urakng agi' di sopia' kiba' Yesus.

³⁴ Lalu Yesus bodoa, “Bopai, amputi sia' inyo monyobab'an Aku sampai dihukupm mati di kayu salib! Sia' co tohu la'apo inyo sia' pulah.” Lalu, boko projurit monguti' pakai'an Yesus. Sia' boundi pakai' monontuan sopo inyo tajahan mondapat'an pakai'an-Nyo.

³⁵ Urakng banyaꞌ bodiritn di santai moniant la'apo inyo tojadi. Boko pomimpitn urakng Yahudi boulu'an Yesus. Kato sia', “Aman Urakng ni'in bondar-bondar Rajo Inyo Dijanjian Allah, Urakng Inyo Dipilih Allah sampai Sio ulih monyolamant'an urakng bukai, biaram Sio ni'in monyolamant'an diri-Nyo siku' jam.”

³⁶ Boko projurit boulu'an Sio. Sia' mohampiki Sio monawaran anggur mansapm.

³⁷ Kato sia', “Aman Duatn bondar-bondar Rajo urakng Yahudi, solamant'ancam diri Duatn!”

³⁸ Ado jam tulisan dipasakng dibuai pucu' kayu salib. Tulisan nantai bobunyi, “Ninam Rajo Urakng Yahudi.”

³⁹ Apotolagi', salah siku' ponjahat inyo disaliban di santai mohayam Yesus jam. Io bopandir, “Aman Duatn bondar-bondar Rajo Inyo Dijanjian Allah, inyo disobut ‘Kristus’, solamant'ancam diri Duatn huatan koi jam!”

⁴⁰ Apo ponjahat inyo siku' agi' monogur kawalnyo nantai, kato io, “Kolai soharusnyo gola' huatan tundu' agatn Allah, obai co manah agi' kolai tajahan mati. Kolai sosamo dihukupm mati samaꞌan Sio.

⁴¹ Sobondarnyo hukupan kito duo memang sosuai agatn porbuatan kito. Apo Sio samo sokali kinyo bosalah!”

⁴² Lalu io bopandir agatn Yesus, “Ingantcam aku, watu Duatn monguaso'i somuo la'apo pan sobagai Rajo!”

⁴³ “Pocayocam,” kato Yesus ko io, “Ari ni'in kolai tajahan sosamo agatn Aku di sorugo.”

Yesus mati

⁴⁴ Kiro-kiro japm duo bolas tongah ari, matoari kinyo moncara'. Somuo doerah santai monjadi potakng-hiru' bondar sampai japm tigo babahari.

⁴⁵ Tidikng inyo monyongkayoan Tompat Kotakng Suci doi' tompat bukai di Rumah Allah, birat monjadi duo.

⁴⁶ Lalu Yesus mondorah agatn saro kotakng borakng, “Bopai! Ko dalapm kuaso Duatn Ku sorahan kosih-Ku!” Lopas jadi bopandir ubo nantai, Io pan matiam.

⁴⁷ Timpu kopala' pasukan moniant la'apo inyo udah tojadi, io momuji Allah. Lalu io bopandir, “Bondaram, Sio kinyo bosalah!”

⁴⁸ Urakng banyaꞌ inyo bokumpul di santai pan udah moniant Yesus dihukupm mati ongko moniant somuo nantai sia' kotakng salu' bondar huatan pulakng agatn kotakan monyosal bondar.

⁴⁹ Di santai jam, ado banyaꞌ kawal Yesus inyo kotakng jamo, tomansu' boko botina' inyo tuyut Sio doi' doerah Galilea. Sia' moniant somuo kojadian nantai jam apo bodiritn jojouh.

Bangkai Yesus dipasar dalapm gua

^50-51 Ado siku' urakng bodamo Yusuf, inyo boasal doi' kota Arimatea di doerah Yudea. Io urakng onsi' inyo dihormati urakng. Io tongahan monanti kodatakan Rajo Inyo Dijanjian Allah. Biar pan io anggota kolompok pomimpitn urakng Yahudi inyo kotakng pontikng, io co sotuju agatn koputusan huatan kolaku'an sia' nantai.

⁵² Yusuf ni'in botula' ko Gubernur Pilatus ongko minto ijitn oca' io ulih momasar bangkai Yesus.

⁵³ Kali udah dapat ijitn, io monurutan bangkai Yesus doi' kayu salib, lalu momutut-Nyo agatn koitn inyo bowarna putih ongko boi'. Io moulit'an-Nyo di dalapm pasaran inyo dipulah di dalapm bukit batu. Pasaran nantai bolupm kalo dipakai.

⁵⁴ Sia' hagar momasar-Nyo sobolupm matoari tonggolapm obai ari nantai ari Jumat. Urakng Yahudi bososiap sobolupm Ari Sabat mula'i obai culih bokorojo watu ari nantai.

⁵⁵ Boko botina' inyo datakng agatn Yesus doi' doerah Galilea tuyut Yusuf lalu moniant pasaran nantai. Sia' moniant jam ubo apo bangkai Yesus diulit'an di dalapm pasaran.

⁵⁶ Lopas nian sia' pulakng ko kota Yerusalem lalu monyiap'an boko rorompahan huatan minya' harupm pakai' mominya'i bangkai Yesus. Apo timpu Ari Sabat, sia' torahat bokorojo pakai' monaati Porintah Allah inyo ditulis Musa dalapm Hukupm Torat.