Lukas 22 - Porjanjian Boharu Torjomahan Baso Dilakng Soari-ari

Boko pomimpitn urakng Yahudi bohoupm pakai' mombunuh Yesus

¹ Urakng Yahudi morayaan ari rayo Roti Co Boragi, inyo disobut jam ari rayo Paskah. Ari rayo nantai udah dampikam.

² Boko imam kopala' huatan boko guru agama Yahudi tongahan bogoyap caro pakai' mombunuh Yesus socaro bototapu'. Sia' gola' tajahan tojadi sosuatu hal aman ado banyaꞌ urakng watu sia' monangkap Sio.

Rasul Yudas mohianati Yesus

³ Lopas nian Rajo Sitatn momansu'i hati Yudas inyo disobut Iskariot, ia'an siku' urakng doi' koduo bolas rasul Yesus.

⁴ Obai nantai, Yudas botula' ongko bohoupm agatn boko imam kopala' huatan boko kopala' ponjago Rumah Allah mongonaꞌi samaꞌan apo io ulih monyorahan Yesus ko sia'.

⁵ Sia' sonang bondar ongko bojanji pakai' moonji'i duit ko io.

⁶ Yudas pan sotuju. Io pan mula'i bogoyap kosompatan pakai' monyorahan Yesus ko sia' watu co gaho banya' urakng.

Rasul Petrus huatan rasul Yohanes momposiapan poraya'an Paskah

⁷ Sampaiam watunyo pakai' mula'i morayaan Ari Rayo Roti Co Boragi. Ari nantai, sotiap koluarga gola' monyombolih ana' domba pakai' pogai Paskah.

⁸ Jadi, Yesus monyiuh Petrus ongko Yohanes. Kato-Nyo, “Botula'cam momposiapan Poraya'an Paskah oca' kito makatn sosamo.”

⁹ Sia' duo botakutn, “Di mono Duatn honda' koi momposiapannyo?”

¹⁰ Yesus monimbas, “Mansu'am ko kota Yerusalem. Di santai, kaitn tajahan botomu siku' urakng lolaki mombaba' roga' bisi ara'i. Bodapan io ko rumah inyo dimansu'inyo.

¹¹ Pandiran ko urakng umputn rumah nantai: ‘Guru botakutn di mono ruakan inyo ulih Sio gunoan pakai' makatn Paskah bonsamoan agatn boko murid-Nyo?’

¹² Lalu, urakng umputn rumah nantai tajahan monunju'an ko kaitn duo sobuah ruakan inyo bosar di lantai pucu'. Somuo inyo kito pontikan pakai' morayaan Paskah ado di su'utn. Siap'ancam somuonyo di su'utn.”

¹³ Lalu, Petrus ongko Yohanes botula'am. Somuo hal tojadi topat samaꞌan inyo udah dipandiran Yesus ko sia' duo. Lalu, sia' momposiapan poraya'an Paskah.

Yesus monotap'an acara makatn pakai' monggonang Sio

¹⁴ Timpu udah watunyo acara makatn malapm morayaan Paskah nantai, Yesus dudu' bosamo boko rasul-Nyo di meja makatn.

¹⁵ Lalu Sio bopandir ko sia', “Aku honda' bondar makatn morayaan Paskah ni'in sosamo agatn kaitn sobolupm Aku ajab sonsaro.

¹⁶ Dinga'anbo! Sobondarnyo, Aku co tajahan bopua' pomakatn Paskah ni'in agi' sampai Koraja'an Allah monguaso'i somuo hal. Watu nantai, roti doi' Paskah ni'in tajahan monjadi nyata.”

¹⁷ Lopas nantai Yesus monguti' socangkir anggur, lalu bodoa bosukur ko Allah. Lopas nian Sio bopandir, “Kuti'cam ni'in, lalu pombagi-bagiancam.

¹⁸ Poniant'an ni'in: Aku co tajahan minum anggur agi' sampai Koraja'an Allah monguaso'i somuo hal.”

¹⁹ Lopas nantai Yesus monguti' roti. Lopas jadi bodoa sukur agi', Sio momingkai'-mingkai' roti nantai agatn jari-Nyo lalu moonju'nyo ko sia'. Kato-Nyo, “Ni'innam bukakng-tubuh-Ku inyo paca'an Ku sorahan pakai' kaitn. Pulahcam ni'in torus-monorus pakai' monggonang Aku.”

²⁰ Lopas sia' jadi makatn, lalu, agatn caro inyo samo agatn roti nantai, Yesus moonju' socangkir anggur agi' ko sia' kapikng bopandir, “Socangkir anggur ni'in mowakili darah-Ku inyo tajahan ditumpahan pakai' kaitn watu Aku mati. Darah ni'in moresmian Porjanjian Boharu inyo Allah pulah agatn monsio.

²¹ Apo, tiat! Urakng inyo tajahan monyorahan Aku ko musuh Ku, io tongahan dudu' di meja ni'in sosamo agatn Aku.

²² Ana' Monsio memang tajahan mati sosuai agatn caro inyo udah ditontuan Allah. Apo Allah tajahan mohukupm urakng inyo monyorahan-Nyo!”

²³ Mondingaꞌ nantai, boko rasul-Nyo bokisahannyo sopo inyo mungkitn di antaro sia' inyo paca'an bulah samaꞌan nian.

Yesus mongajar boko rasul-Nyo gola' hala molayati agatn rondah hati

²⁴ Lalu, boko rasul-Nyo botikakng antaro siku'-monyiku'. Sia' bokisahan sopo di antaro sia' inyo kotakng pontikng.

²⁵ Obai nantai, Yesus bopandir ko sia'. Kato-Nyo, “Boko rajo banso inyo kinyo mongonal Allah disobut ‘Ponulukng Rayat’. Padohal, sia' sonang momoso rayat oca' tundu' agatn kuaso sia'.

²⁶ Apo, kaitn co ulih ubo nian! Sobali'nyo, urakng inyo palikng pontikng di antaro kaitn gola' bosipat rondah hati, bolaku samaꞌan urakng inyo kotakng kinyo pontikng. Siku' urakng pomimpitn gola' bolaku samaꞌan siku' urakng hulutn.

²⁷ Cubo pikiran sopo inyo lobih pontikng; urakng inyo dudu' makatn damo inyo molayatinyo. Pasti urakng inyo dudu' inyo lobih pontikng. Apo somanah Aku bosamo agatn kaitn, Aku pan molayati kaitn.

²⁸ Kaitn totap sotia agatn Aku dalapm somuo kosusahan inyo Aku alapi.

²⁹ Jadi, Aku paca'an moonju' kuaso ko kaitn pakai' momorintah dalapm Koraja'an Allah, samo samaꞌan Bopai-Ku moonju' kuaso ko aku pakai' monjadi Rajo inyo momorintah somuo Korajaan-Nyo.

³⁰ Jadi, dalapm Koraja'an-Ku nantai, kaitn tajahan mooso rindakng huatan tohormat obai ulih makatn-minum sotanggaian sosamo agatn Aku. Kaitn siku'-monyiku' tajahan dudu' di tahta pakai' momorintah koduo bolas suku banso Israel.”

Yesus momandiran obai Rasul Simon Petrus tajahan monyangkal Sio

³¹ Lopas nian Yesus bopandir ko Simon Petrus, “Simon, Simon! Dinga'anbo! Rajo Sitatn udah monuntut ko Allah oca' molalu'i kosusahan io ulih monyongkayoan rasul inyo sotia doi' inyo kinyo sotia, samo samaꞌan potani monyongkayoan gandupm doi' kopunyo. Allah udah moijitan Rajo Sitatn molabuhan hal nantai.

³² Apo Aku udah bodoa pakai' kolai, Simon, oca' kolai totap pocayo ko Aku. Watu kolai bobali' sotia agatn Aku, kolai gola' monguat'an iman boko somadikan kolai, ia'an boko murid-Ku.”

³³ Petrus monimbas, “Tuhatn, aku udah siap tamo ponjara sosamo agatn Duatn! Biar pan sampai aku mati sosamo agatn Duatn, aku udah siap!”

³⁴ Apo Yesus bopandir, “Dinga'anbo, Petrus! Watu malapm ni'in jam kolai tajahan monyangkal Aku sampai tigo kali sobolupm manu' bokuku'.”

Boko rasul Yesus gola' siap mohadapi tantakan

³⁵ Ongko Yesus bopandir ko somuo rasul-Nyo, “Ingant'icam watu Aku moutus kaitn komai pakai' momboritoan mongonaꞌi Koraja'an Allah. Kaitn culih mombaba' dompet, bokal, sandal ponggonti. Timpu nantai, ado cado kokurakan kaitn?” Sia' monimbas, “Conyiant!”

³⁶ “Apo ni'in udah bukainyo,” kato-Nyo. “Urakng inyo bisi dompet, bisi bokal, gola' mombaba'nyo. Urakng inyo kinyo bisi podakng, gola' monjual jubah pakai' mombolinyo.

³⁷ Obai la'apo inyo udah ditulis dalapm Buku Suci mongonaꞌi Aku gola' tojadi: ‘Io paca'an dianggap samo agatn ponjahat.’ Hal nantai tongahannyo labuham ni'in!”

³⁸ Sia' bopandir, “Tuhatn, di si'itn ado duo bilah podakng.” Yesus bopandir, “Jadiam!”

Yesus bodoa di bukit Jaitun

³⁹ Lopas acara makatn Paskah, Yesus botula' koluar kota samaꞌan biasonyo ko bukit Jaitun. Boko murid-Nyo tuyut jam.

⁴⁰ Timpu sia' datakng ko tompat nantai, Yesus bopandir ko sia', “Bodoacam oca' kaitn co jatu' ko dalapm poncoba'an”.

⁴¹ Lopas nian Sio botula' kojouh sodikit doi' sia', kiro-kiro soponikapan batu. Sio tundu' monyungkapan lalu bodoa.

⁴² Kato-Nyo, “Bopai, aman ulih, bebasan Aku doi' ajab sonsaro inyo gola' Kualapi ni'in. Apo jangan monurut kohonda'-Ku, kohonda' Duatn ja'am Bopai.”

⁴³ Siku' molekat datakng ko Sio, monguat'an-Nyo.

⁴⁴ Yesus maho salu'. Jadi, Sio mongkitn somombondarnyo bodoa. Rada'-Nyo ubo darah tatap ko tanah.

⁴⁵ Lopas jadi bodoa, Yesus bodiritn ongko bobali' agi' ko boko murid-Nyo. Sio monomu'i sia' tongahan tidu' obai kotakng salu' molola'an sia'.

⁴⁶ Sio monggagaian ongko bopandir ko sia', “Kaitn jangan tidu'! Bodoacam oca' kaitn co jatu' ko dalapm poncoba'an.”

Yesus Ditangkap

⁴⁷ Tongahan Yesus ija' bopandir, sorombokan urakng datakng. Sia' dipimpitn Yudas, salah siku' urakng doi' koduo bolas murid Yesus. Yudas mohampiki Yesus pakai' monyalapi Sio kapikng monciupm.

⁴⁸ Apo Yesus bopandir, “Yudas, kolai honda' monyorahan Ana' Monsio agatn ciupan?”

⁴⁹ Timpu boko murid-Nyo udah tohu la'apo inyo paca'an tojadi, sia' botakutn ko Yesus, “Tuhatn, ulihmo koi monyorakng sia' pakai' podakng?”

⁵⁰ Sobolupm Yesus monimbas, salah siku' murid-Nyo moncabut podakng, lansukng monyorakng siku' urakng hulutn Imam Agukng. Io momopat kolindakan kanan hulutn nantai sampai putus.

⁵¹ Apo Yesus bopandir, “tongga'an!” Lalu Sio moncama' kolindakan urakng nantai, ongko nyamanam.

⁵² Lopas nian Yesus bopandir ko boko imam kopala' huatan boko powira pongawal Rumah Allah, ongko boko pomimpitn Yahudi inyo datakng ko santai pakai' monangkap Sio. Kato Sio, “Aku ni'in bukainyo ponjahat, jadi kaitn padohan mombaba' podakng ongko boko pompangkukng pakai' monangkap Aku.

⁵³ Sotiap ari Aku hala ada'an agatn kaitn di tongahlamanan Rumah Allah, apo timpu nantai kaitn co monangkap Aku. Apo ninam watunyo kaitn labuh, watu Rajo Sitatn bulah pokoroja'annyo inyo jahat.”

Rasul Petrus monyangkal agatn mongatoan io co konal agatn Yesus

⁵⁴ Sia' monangkap Yesus ongko mombaba'-Nyo ko rumah Imam Agukng. Petrus mombodapan doi' jouh.

⁵⁵ Apo kali udah sampai di rumah nantai, Petrus dudu' di antaro sia' inyo tongahan mongoliliki api inyo udah bonyalo di tongahlamanan rumah nantai.

⁵⁶ Obai Petrus dudu' dampikng api inyo bonyalo nantai, ado siku' urakng hulutn botina' mongilikng muhonyo. Botina' nantai moncorona'i ongko bopandir, “Urakng ni'in pan tontai tuyut sosamo agatn Urakng inyo ditangkap nantai!”

⁵⁷ Apo Petrus monyangkal. Kato io, “Bukai! Aku co konal agatn Sio!”

⁵⁸ Co manah lopas nantai, ado urakng bukai moniant Petrus ongko bopandir ko io, “Kolai ni'in pan salah siku' doi' boko murid-Nyo!” Apo Petrus bopandir, “Cado! Aku bukai murid-Nyo!”

⁵⁹ Kiro-kiro sojapm lopas nantai, siku' urakng bukai agi' bopandir agatn togas, “Kona'am urakng ni'in tuyut bonsamo agatn Urakng inyo ditangkap nantai, obai io urakng doi' doerah Galilea jam!”

⁶⁰ Apo Petrus bopandir agi', “Bukai! Pomandiran kolai nantai kinyo bondar!” Timpu Petrus bopandir nantai, watu nian jam manu' bokuku'.

⁶¹ Lalu Tuhatn Yesus mongilikng ko arah Petrus. Watu nian jam Petrus ingant pomandiran-Nyo tontai: ‘Watu ni'in jam kolai tajahan monyangkal Aku sampai tigo kali sobolupm manu' bokuku'.’

⁶² Ongko Petrus koluar doi' tongahlamanan rumah nantai, huatan monangis obai kotakng monyosal.

Yesus dipoulu'an huatan dipantu'

⁶³ Boko urakng inyo tongahan monahan Yesus, mohayam Sio, momantu Sio.

⁶⁴ Sia' monutup mato Sio ongko bopandir ko Sio, “Aman Duatn bondar-bondar nabi, butiancam! Pandiranbo, sopo inyo momantu Duatn?”

⁶⁵ Sia' hala boulu'an Sio agatn boko pomandiran.

Koputusan Pakai' Mohukupm Yesus Mati Yesus diadili kolompok pomimpitn urakng Yahudi

⁶⁶ Pas sunsukng, ado potomuan kolompok pomimpitn agama Yahudi inyo kotakng pontikng. Boko imam kopala' huatan boko guru agama Yahudi ado di santai. Lalu Yesus dibaba' ko hadapan sia'.

⁶⁷ Sia' botakutn ko Sio, “Padahan ko koi, Duatn ninam kironyo Rajo Inyo Dijanjian Allah, rajo inyo kito sobut ‘Mesias’?” Yesus monimbas, “Aman Aku momadahan ko kaitn, kaitn pan co tajahan pocayo.

⁶⁸ Ongko aman Aku botakutn ko kaitn, kaitn pan co paca'an monimbasi.

⁶⁹ Co manah agi', Ana' Monsio, tajahan dudu' di tompat inyo tohormat sopia' kanan Allah Inyo Kotakng Bokuaso.”

⁷⁰ Sia' somuo monimbas, “Aman ubo nian, Duatn ni'in ana' Allah?” Timbas Yesus, “Ubo pandir kaitn nam.”

⁷¹ Jadi sia' bopandir, “Padohan bogoyap sasi agi' pakai' mongotohu'i kosalahan-Nyo! Kito udah mondingaꞌ doi' pandir-Nyo siku'.”