Lukas 21 - Porjanjian Boharu Torjomahan Baso Dilakng Soari-ari

Posombahan siku' urakng botina' balu inyo jaro

¹ Yesus borotian boko urakng dampu monamoan duit posombahan ko dalapm tompat posombahan di tongahlamanan Rumah Allah.

² Sio moniant jam siku' urakng botina' balu inyo jaro monamoan duo pingkai' duit grenceng kotakan kocit nilainyo.

³ Lalu, Yesus bopandir ko boko murid-Nyo, “Dinga'anbo! Sobondarnyo botina' balu inyo jaro ni'in moonji'i lobih doi' sotiap urakng bukainyo,

⁴ obai sia' bayo moonju' sobagi'an kocit doi' banyaꞌnyo duit umputn sia'. Apo botina' balu ni'in moonji'i somuo duit umputnnyo doi' somuo kohidupannyo.”

Rumah Allah paca'an diruntuhan

⁵ Timpu nantai boboropo urakng bongkisahan mongonaꞌi kopoboi'an Rumah Allah. Sia' mongatoan bangunan nantai kotakng boi' obai dipulah agatn boko batu marmar inyo kotakng boi', ongko dihiasi agatn boko barakng inyo boi' diposombahan ko Allah. Apo mondingaꞌ nantai Yesus bopandir,

⁶ “Pas nononyo, somuo inyo kaitn tiat ni'in paca'an dihancuran. Conyiant sobuti' batu pan inyo kinyo paca'an diruntuhan.”

Boko murid Yesus tajahan didorako'i

⁷ Sia' botakutn ko Yesus, “Guru, sombilo kiro boko hal nantai tajahan tojadi? La'apo boko tando inyo ado sobolupmnyo?”

⁸ Yesus bopandir, “Boboi'cam! Jangan sampai kaitn dikotumbuki mongonaꞌi watu Aku bobali'. Banyaꞌ urakng paca'an datakng inyo mongaku' ubonyo io nantai Aku. Sia' paca'an bopandir, ‘Aku ni'inam Rajo Inyo Dijanjian Allah! Watu ni'in udah ahir joman!’ Jangan sampai kaitn pocayo ongko monjadi pongikut sia'.

⁹ Aman kaitn mondingaꞌ poparakan huatan pomborontakan, jangan gola' obai somuonyo nantai gola' tojadi sobolupm dunia tajahan boahir sosuai hajat Allah. Apo nantai kinyo boroti dunia paca'an boahir dalapm watu inyo dampikam.

¹⁰ Nononyo banso paca'an boparakng molawatn banso bukainyo. Nogori molawatn nogori bukainyo.

¹¹ Di mono-mono tajahan ado gompa bumi inyo bosar, lapar-barau, poranggapan rayo. Lalupan paca'an ado boko hal inyo bogola'i. Boko urakng paca'an topogola' moniant boko tando di langit inyo monunju'an dunia ni'in paca'an boahir.

¹² Apo, sobolupm somuo nantai tojadi, kaitn paca'an ditangkap ongko didorako'i obai kaitn nantai murid-Ku. Kaitn paca'an diadili di boko rumah sombayakng ongko ditamoan ko dalapm ponjara. Kaitn tajahan dibaba' ko boko rajo huatan ko boko ponguaso pakai' diadili jam.

¹³ Apo, nianam watunyo pakai' kaitn bosasi mongonaꞌi Koraja'an Allah.

¹⁴ Jadi, sobolupm nantai, kuat cam di dalapm hati oca' co kuatir mongonaꞌi pomandiran inyo paca'an kaitn pandiran pakai' mombela diri.

¹⁵ Obai Aku siku' tajahan moonji'i ko kaitn komampuan pakai' mongatoan pomandiran inyo topat, sampai boko musuh kaitn kinyo paca'an ulih monontakng ongko monikaki kaitn.

^16-17 Obai kaitn nantai murid-Ku, somuo urakng tajahan bonci'an kaitn. Lalu pan kaitn tajahan dihianati ulih boko urakng tuho, boko somadikan dalapm nyao, suku-pomili, boko pokawalan. Ado jam boboropo urakng di antaro kaitn inyo tajahan dibunuh.

^18-19 Apo aman kaitn totap botahatn, sotia agatn Aku biar pan sampai dibunuh, boko jiwa kaitn co tajahan bonaso. Kaitn tajahan hidup kokal di sorugo.”

Yesus bopandir kota Yerusalem paca'an dihancuran

²⁰ “Watu kaitn moniant tontara musuh mongopukng kota Yerusalem, kaitn tajahan tohu co manah agi' kota nantai paca'an dihancuran.

²¹ Jadi timpu nantai, boko urakng inyo ado di kota soharusnyo koluar. Boko urakng inyo udah di luar kota soharusnyo jangan mansu' ko dalapm kota. Boko urakng disomuo doerah Yudea soharusnyo morarian diri ko boko bukit.

²² Obai niannam watunyo Allah tajahan mohukupm. Somuo inyo ditulis ulih boko nabi mongonaꞌi ni'in paca'an bondar tojadi.

²³ Kosi'ai boko botina' inyo tongahan buntikan damo ija' monyusu'i boko bobia' kocit timpu nantai. Boko urakng di tanah Israel ni'in tajahan kotakng ajab sonsaro obai Allah paca'an mohukupm sia'.

²⁴ Ado inyo paca'an dibunuh agatn podakng. Ado jam inyo tajahan ditangkap ongko dibaba' ko boko nogori bukai, monjadi tahatan di su'utn. Boko banso inyo bukainyo Yahudi tajahan monguaso'i tanah kota Yerusalem sampai watunyo inyo udah ditontuan Allah.”

Boko tando inyo monunju'an Yesus paca'an bobali' ko dunia ni'in

²⁵ “Nononyo paca'an ado boko tando di matoari, bulatn, boko bintakng di langit inyo monunju'an dunia ni'in tajahan boahir. Di bumi boko urakng monjadi kotakng gola', monjadi putus asa obai loutnyo tajahan boguruh bogura', tajahan bogolumbakng bosar.

²⁶ Boko ponguaso di langit paca'an boguncakng, bulah urakng hampir mati topogola' moniant boko malopotako moninggakng dunia ni'in.

²⁷ Timpu nantai, urakng paca'an moniant Ana' Monsio paca'an datakng bobali' ko dunia ni'in, turutn doi' sorugo di pucu' awatn. Io paca'an bocohayo torakng. Io paca'an kotakan bokuaso.

²⁸ Watu kaitn moniant somuonyo ni'in mula'i tojadi, jadi yakitn huatan pocayo cam. Boharap cam soponuhnyo, obai co manah agi' kaitn paca'an disolamant'an.”

²⁹ Lalu, Yesus monjolasan agatn contoh ni'in, “Porotian tontanaman ara damo tontanaman la'apo ja'.

³⁰ Aman kaitn moniant boko tontanaman botunas, kaitn paca'an tohu co manah agi' musipm tontanaman lantakng paca'an datakng.

³¹ Ubo nian jam, aman kaitn moniant somuo boko tando di langit ongko di bumi, kaitn tajahan tohu co manah agi' Koraja'an Allah tajahan datakng.

³² Dinga'anbo! Sobondarnyo co somuo urakng doi' joman ni'in tajahan mati sobolupm somuonyo ni'in mula'i tojadi.

³³ Pocayocam pomandiran-Ku, obai biar pan langit ongko bumi paca'an boahir, pomandiran-Ku totap somanah-manahnyo.”

Gola' hala siap pakai' kodatakan Yesus

^34-35 “Jagocam diri kaitn. Jangan sampai ado boko hal di dunia ni'in inyo moncaci' pikiran kaitn, ubo mabu', porbuatan jahat inyo dilabuhan aman udah komabu'an, boko mosalah kohidupan ni'in. Aman pikiran kaitn samaꞌan nian, nononyo kaitn co siap timpu ari nantai datakng. Obai ari nantai tajahan datakng pakai' somuo urakng, conyiant inyo tohu, samo samaꞌan joyat ntobukan mongujut bonatakng.

³⁶ Jadi, kaitn gola' hala monjago diri. Bodoacam oca' kaitn totap pocayo ko Allah, watu kaitn mohadapi ajab sonsaro inyo co manah agi' tajahan tojadi. Lalu kaitn paca'an tenang watu Ana' Monsio bobali' ko dunia ni'in, moadili somuo urakng am.”

³⁷ Sotiap ari Yesus mongajar di tongahlamanan Rumah Allah. Sotiap malapm, Sio tidu' di bukit Jaitun di luar kota Yerusalem.

³⁸ Holapm sunsukngnyo, somuo urakng banyaꞌ datakng ko tongahlamanan Rumah Allah, honda' mondingaꞌan pongajaran-Nyo.