Lukas 20 - Porjanjian Boharu Torjomahan Baso Dilakng Soari-ari

Boko pomimpitn urakng Yahudi monakutan kuaso Yesus ongko godi

¹ Timpu ari bukainyo, di tongahlamanan Rumah Allah, Yesus mongajar huatan momboritoan Kabar Boi' mongonaꞌi Koraja'an Allah. Watu Sio mongajar, datakam boko imam kopala', boko guru Agama Yahudi huatan boko pomimpitn bukai doi' banso Yahudi.

² Sia' botakutn ko Sio, “Apo hak Duatn molabuhan somuo nantai? Sopo inyo moonji'i hak ko Duatn?”

³ Yesus bopandir, “Aku pan honda' botakutn ko kaitn doholu.

⁴ Sopo inyo moonji'i hak ko Yohanes pakai' mombaptis? Allah kata'an bayo monsio?”

⁵ Jadi, sia' bohoupm mongonaꞌi potakutan nantai di antaro sosamo sia'. “Aman kito bopandir, ‘Allah inyo moonji'i hak nantai ko Yohanes, Yesus tajahan monogur kito obai kito co pocayo pomandiran Yohanes mongonaꞌi Sio.’

⁶ Apo aman kito bopandir, ‘Bayo monsio inyo moonji'i hak nantai ko Yohanes’ somuo urakng bukai di si'itn tajahan monikapi kito agatn batu sampai mati, obai sia' pocayo Yohanes nantai nabi inyo dionji'i hak doi' Allah.”

⁷ Jadi sia' monimbas, “Koi co tohu sopo inyo moonji'i hak nantai ko Yohanes pakai' mombaptis.”

⁸ Yesus bopandir, “Aman ubo nian, Aku pan co paca'an momadahan ko kaitn sopo inyo moonji'i hak ko Aku pakai' bulah somuonyo ni'in.”

Yesus mombandikan boko pomimpitn urakng Yahudi agatn boko potani inyo jahat

⁹ Lalu Yesus mongajar boko urakng di tongahlamanan Rumah Allah nantai agatn poumpamoan ni'in, “Ado siku' urakng inyo mombuka' lahatn pakai' bokobutn anggur. Io monyewaan kobutn nantai ko boboropo potani, lalu botula' ko nogori bukai dalapm watu inyo kotakng manah.

¹⁰ Timpu musipm mongopil buah anggur pan udah labuham, urakng umputn kobutn nantai honda' mondapat'an la'apo inyo monjadi umputnnyo doi' hasil kobutn nantai. Jadi io moutus siku' urakng hulutn ko boko potani ponyewa nantai oca' sia' moonji'i sobagi'an hasil nantai ko io. Apo timpu hulutn nantai datakng, sia' momantu io, lalu monyiuh io pulakng agatn conyiant mombaba' la'apo pan.

¹¹ Jadi, umputn kobutn nantai moutus siku' hulutn inyo bukai ko sia'. Apo sia' momantu io jam. Sia' mohayam io ongko monyiuh io pulakng apo conyiant jam mombaba' la'apo pan.

¹² Apo, umputn kobutn nantai totap moutus siku' hulutn inyo kotigo ko sia'. Sia' moluko'i io lobih borat agi', lalu mombuakan io koluar kobutn nantai.

¹³ Lalu umputn kobutn nantai bopandir dalapm hatinyo, ‘Aku gola' bopikir bogoyap caro inyo bukai. Aku paca'an moutus ana'ku siku', ana' inyo tunggal inyo kokidahku. Mungkitn sia' tajahan mohormati io.’

¹⁴ Apo, watu boko potani nantai moniant ana' urakng umputn kobutn nantai datakng, sia' bohoupm antaro sosamo sia', ‘Io nantai ahli waris urakng umputn kobutn ni'in. Huncapm, kito mombunuh io oca' warisan kobutn ni'in ulih monjadi umputn kito!’

¹⁵ Jadi, sia' mondudusnyo ko luar kobutn ongko mombunuhnyo!” Lalu Yesus botakutn ko urakng banyaꞌ inyo tongahan mondingaꞌan kisahnyo, “Tohu cado kaitn la'apo inyo tajahan dilabuhan urakng umputn kobutn anggur nantai ko sia'?

¹⁶ Pasti io paca'an datakng ongko mombunuh sia'. Lopas nian io tajahan mompocayoan kobutn anggur nantai ko boko urakng bukai.” Mondingaꞌ nantai sia' bopandir, “Jangan sampai hal nantai tojadi!”

¹⁷ Apo Yesus moncorona'i sia', lalu bopandir, “Pikirancam roti doi' la'apo inyo totulis dalapm Buku Suci: ‘Batu inyo dibuakan boko tukakng bangunan udah monjadi batu kotakng pontikng pakai' bangunannyo.’

¹⁸ Batu nantai paca'an mohancuran sotiap urakng inyo jatu' di pucu'nyo, huatan mohancuran sotiap urakng inyo ditinggakngnyo.”

¹⁹ Timpu nantai jam, boko guru Poraturan Agama Yahudi huatan boko imam kopala' honda' monangkap Sio obai sia' udah mongoroti masud doi' poumpamoan Yesus inyo monyalahan sia'. Apo culih sia' monangkap Sio watu nantai obai sia' gola' agatn urakng banya'.

Boko pomimpitn urakng Yahudi balakng monjebak Yesus Potakutan mongonaꞌi pombayaran pajak ko pomorintahan Romawi (20:20-26)

²⁰ Jadi, boko guru agama Yahudi huatan boko imam kopala' bogoyap caro oca' sia' ulih mombaba' Yesus ko gubernur Romawi pakai' dihukupm. Lalu sia' hala borotian Yesus. Malahan sia' moncubo bulah gogadatn pakai' Sio. Sia' moutus boboropo urakng ko Yesus pakai' botakutn ubonyo tujuannyo boi', apo sobondarnyo sia' honda' oca' Yesus mongatoan sosuatu inyo salah.

²¹ Boko urakng nantai bopandir ko Yesus, “Guru, koi tohu somuo pomandiran huatan ajaran Duatn hala bondar. Duatn co momihak ko boko urakng totontu apo hala jujur agatn boko urakng, ongko mongajar sia' caro hidup sosuai agatn porintah Allah.

²² Monurut Duatn, apobai Poraturan Allah inyo ditulis Musa dalapm Hukupm Torat moijitan kito mombayar pajak ko Rajo Romawi?”

²³ Apo Yesus udah mongotohu'i masud sia' inyo licik nantai. Jadi Sio bopandir,

²⁴ “Cubo tiat'an ko Aku sopingka'i duit pira'. Gambar huatan damo sopo inyo ado di santai?” Sia' monimbas, “Gambar huatan damo Rajo Romawi.”

²⁵ “Aman ubo nian,” kato Yesus, “Bayarcam ko Rajo Romawi la'apo inyo monjadi umputnnyo. Bayar jam ko Allah la'apo inyo monjadi umputn Allah!”

²⁶ Sia' kotakng hiratn mondingaꞌ timbas Yesus nantai. Jadi sia' tohonyamp. Sia' co ulih bulah Yesus mongatoan sosuatu inyo salah di hadapan urakng banya'.

Potakutan mongonaꞌi hidup agi' doi' komatian (20:27-40)

²⁷ Di santai pan ado boboropo pomimpitn agama Yahudi doi' kolompok Saduki. Sia' kinyo pocayo urakng tajahan hidup agi' lopas jadi mati. Sia' honda' mombutian aman sia' nantai bondar, jadi sia' datakng ko Yesus, botakutn mongonaꞌi hal nantai.

²⁸ Kato sia', “Guru, Musa monulisan poraturan ni'in pakai' kito: Aman siku' urakng lolaki mati, kinyo boana', lalu somadikannyo gola' kawitn agatn botina' balu nantai oca' moonji'i koturutan pakai' somadikannyo inyo udah mati.

²⁹ Nah, soumpamonyo ado tujuh urakng bosomadikan. Somadikan inyo kojula'an kawitn agatn siku' urakng botina', apo io mati sobolupm io boana'.

³⁰ Jadi, somadikan inyo koduo kawitn agatn botina' balu nantai, lalu io mati jam sobolupm io boana'.

³¹ Hal inyo samo tojadi agatn somadikan inyo kotigo. Ubo nian jam sotorusnyo sampai ko somadikan inyo kotujuh.

³² Koponsuahannyo, botina' nantai mati jam.

³³ Jadi, ado tujuh urakng somadikan kandukng inyo kawitn agatn botina' inyo samo. Aman bondar urakng ulih hidup agi' doi' komatian, botina' nantai tajahan monjadi bini inyo mono?”

³⁴ Lalu Yesus bopandir, “Urakng inyo ija' hidup di dunia ni'in kawitn.

³⁵ Apo urakng inyo udah dipilih Allah, sia' paca'an hidup di sorugo. Sia' kinyo tajahan kawitn agi'.

³⁶ Sia' tajahan samo sama'an molekat obai co kalo paca'an mati agi'. Sia' nantai boko poana'an Allah obai sia' dipilih-Nyo pakai' hidup kokal di sorugo.

³⁷ Nah, kaitn kinyo pocayo obai urakng tajahan hidup agi' lopas jadi mati di dunia ni'in. Padohal, Musa siku' udah monyatoan hal nantai agatn jolas. Io monulis mongonaꞌi watu Tuhatn Allah bopandir ko io doi' rampuan duri inyo bonyalo. Io monulisan obai Tuhatn Allah mongatoan diri-Nyo sobagai Allah inyo disombah Abrahapm, Allah inyo disombah Ishak, Allah inyo disombah Yakub.

³⁸ Abrahapm, Ishak ongko Yakub, angki-bayatn kaitn, udah mati di dunia ni'in, apo pasti sia' hidup agi' obai Allah kinyo disombah boko urakng mati. Allah disombah boko urakng inyo hidup! Bagi Allah, somuo urakng hidup.”

³⁹ Mondinga' pomandiran Yesus nantai, boboropo guru agama Yahudi bopandir, “Guru, Duatn kona' am!”

⁴⁰ Lopas nantai, somuo boko pomimpitn urakng Yahudi kinyo borani bulah gogadatn ko Yesus agatn boko potakutan agi'.

Yesus, Rajo Inyo Dijanjian Allah, lobih bokuaso daripado bayo koturutan Rajo Daud aja'

⁴¹ Lalu Yesus bopandir ko sia' inyo mondingaꞌan-Nyo, “Pikirancam mongonaꞌi Rajo Inyo Dijanjian Allah. Boko urakng bopandir Sio nantai koturutan Rajo Daud.

⁴² Memang bondaram nantai. Apo porotian cam pomandiran ni'in inyo ditulis Daud di buku Mazmur: Tuhatn Allah bopandir ko Tuhatnku: ‘Dudu'cam di tompat inyo tohormat di sopia' kanan-Ku,

⁴³ sampai Aku mongalahan boko musuh Duatn, bulah sia' samaꞌan kotonja'an kaki Duatn, bulah sia' tundu' agatn kuaso Duatn.’

⁴⁴ Dalapm tulisan nantai, Daud moningkau Rajo Inyo Dijanjian Allah sobagai ‘Tuhatn’. Jadi, Sio pasti lobih bokuaso daripado koturutan Daud inyo biaso.”

Yesus moingant'an boko murid-Nyo jangan boporangai samaꞌan boko guru agama Yahudi

⁴⁵ Timpu boko urakng ija' mondingaꞌan, Yesus bopandir ko boko murid-Nyo. Kato-Nyo,

⁴⁶ “Boboi'cam oca' kaitn jangan sonjumpat'an porangai boko guru agama Yahudi. Sia' gala' hala bojalatn momakai jubah inyo panjakng oca' sia' kotiat'an pontikng. Sia' gala' dihormati di pasar. Sia' gala' dudu' di tompat inyo kotakng tohormat di rumah sombayakng, makatn di tompat inyo kotakng tohormat di pogai.

⁴⁷ Sia' mongolakari boko botina' balu pakai' mondapat'an boko kodampuan sia', sampai rumah sia' pan dikuti'. Sia' moucap'an doa inyo bokopanjakan, apo nantai bayo pompadah boi' ja'am. Obai somuo porangai sia' inyo jahat nantai, Allah pasti tajahan mohukupm sia' lobih borat doi' urakng bukai.”