Lukas 19 - Porjanjian Boharu Torjomahan Baso Dilakng Soari-ari

Lopas jadi botomu Yesus, Zakheus morubah caro hidupnyo

¹ Lopas nian Yesus huatan boko urakng inyo tuyut Sio momansu'i kota Yerikho ongko torus bojalatn molalu'i kota nantai.

² Ado siku' urakng kopala' ponagih pajak inyo bodiapm di santai. Damonyo Zakheus. Io kotakng dampu.

³ Timpu Yesus bojalatn molalu'i kota nantai, Zakheus bousaha honda' moniant Sio. Apo co ulihnyo obai boko urakng kotakan banya', apotolagi' obai io nantai urakngnyo panda'.

⁴ Jadi, io monggidi'an mondoholu'i urakng banya' nantai, lalu noi' ko kayu ara, oca' ulih moniant Yesus inyo co manah agi' tajahan lalu di santai.

⁵ Timpu Yesus di dampikng kayu nantai, Sio monongadah ko pucu'. Kato-Nyo, “Zakheus, turutncam doi' siatn! Obai Aku honda' noluntukng ko rumah kolai sari ni'in.”

⁶ Lansukng, Zakheus turutn lalu monorima' Yesus di rumahnyo agatn sonang hati.

⁷ Apo boko urakng inyo moniant Yesus botula' ko rumah Zakheus botuta'. Kato sia', “Uai! Sio monoluntukng di rumah urakng inyo bodosa.”

⁸ Lopas nian di rumahnyo, Zakheus bodiritn ongko bopandir ko Yesus, “Tuhatn, Aku bojanji moonju' sobagi'an doi' bando barakngku ko boko urakng jaro. Sotiap urakng inyo kalo aku kolakari, aku bojanji mombayar agi' ompat kali lipat!”

⁹ Ongko Yesus bopandir, “Sari ni'in kolai huatan somuo koluarga kolai disolamant'an obai kolai pan koturutan Abrahapm.

¹⁰ Ana' Monsio datakng pakai' monggoyapi ongko monyolamant'an urakng inyo bodosa.”

Poumpamoan mongonaꞌi boko hulutn inyo boi' huatan inyo jahat

¹¹ Pontongahan Yesus bopandir agatn Zakheus, boko urakng banyaꞌ ija' mondingaꞌan Yesus. Obai Sio udah dampikng ko kota Yerusalem, ongko boko urakng monyangko Koraja'an Allah tajahan lansukng kotiat'an di dunia ni'in, ia'an sia' salah sangko huatan bopikir obai Allah tajahan lansukng momorintah sobagai Rajo di dunia. Jadi Yesus mongajar sia' agatn poumpamoan ni'in.

¹² Kato-Nyo, “Ado siku' urakng bangsawatn. Io paca'an botula' ko nogori inyo jouh pakai' diangkat monjadi rajo. Lopas nantai io paca'an bobali', lalu momorintah di doerahnyo siku'.

¹³ Apo sobolupm botula', io moningkau sopuluh hulutnnyo mompocayoan banyaꞌ duit ko sia', sia' siku'-monyiku' dionji'i sopingka'i duit omas. Katonyo, ‘Pakaicam duit ni'in agatn soboi'-boi'nyo pakai' bousaha pakai' aku, sampai aku pulakng.’

¹⁴ Lopas jadi bangsawatn nantai botula', boko urakng di nogorinyo bonci' agatn io, monyiuh boko utusan nantai mombodapan oca' monyampaian posatn ko kopala' ponguaso di su'utn. Kato sia', ‘Koi bolai' urakng ni'in monjadi rajo koi.’

¹⁵ Apo bangsawatn nantai totap diangkat monjadi rajo nogori nantai. Kali udah pulakng, io monyiuh oca' datakng ko io boko hulutn inyo dionji'i duit nantai. Io honda' tohu boropo kountukan inyo sia' dapat siku'-monyiku' pakai' io.

¹⁶ Hulutn inyo potamo datakng, ongko molaporan, ‘Habakng, sopingka'i duit omas inyo duatn onju' ko aku, udah aku gunoan huatan mohasilan sopuluh kali lipat.’

¹⁷ Jadi, habakng nantai bopandir, ‘Boi' bondar! Kolai hulutn inyo boi'. Obai kolai suba' dipocayo agatn boko hal inyo kocit, aku moangkat kolai monjadi ponguaso disopuluh kota.’

¹⁸ Hulutn inyo koduo datakng, ongko molaporan, ‘Habakng, sopingka'i duit omas inyo duatn onju' ko aku, udah aku gunoan huatan mohasilan lima' kali lipat.’

¹⁹ Lalu, habakng nantai bopandir, ‘Aku moangkat kolai monjadi ponguaso dilima' kota.’

²⁰ Hulutn inyo kotigo datakng, lalu molaporan, ‘Habakng, ni'in sopingka'i duit omas duatn. Aku monyimpatnnyo dalapm pomputut'an koitn

²¹ obai aku gola' agatn duatn. Duatn urakng inyo kojapm. Duatn monguti' la'apo inyo sobondarnyo kinyo umputn duatn. Duatnbodapat untukng doi' pogota'an urakng bukai samo samaꞌan urakng inyo monguti' hasil lakau doi' lakau inyo kinyo io tanam.’

²² Lalu, habakng nantai bopandir, ‘Kolai hulutn inyo jahat! Aku tajahan mohukupm kolai sosuai agatn pomandiran kolai nantai. Kolai mongatoan aku urakng inyo kojapm. Aku monguti' la'apo inyo sobondarnyo kinyo umputnku. Aku bodapat untukng doi' pogota'an urakng bukai samo samaꞌan urakng inyo monguti' hasil lakau doi' lakau inyo kinyo io tanam.

²³ Aman kolai bopikir ubo nian, soharusnyo palikng cado kolai monyimpatn duit nantai ko urakng inyo mominjapan duit, oca' watu aku pulakng, aku mondapat duitku agatn bunganyo jam.’

²⁴ Lopas nian io bopandir ko boko urakng inyo bodiritn di santai, ‘Kuti' duit nantai doi' io. Onju' duit nantai ko hulutn inyo bisi sopuluh pingkai' duit omas.’

²⁵ Apo sia' bopandir, ‘Habakng, io udah bisi sopuluh pingkai' am.’

²⁶ Habakng nantai monimbas, ‘Dinga'anbo! Urakng inyo udah ado, tajahan dionji'i lobih banyaꞌ agi'. Apo urakng inyo conyiant, la'apo pan inyo ado di io paca'an dikuti' doi' io.

²⁷ Nah, ni'in mongonaꞌi boko musuhku nantai inyo kinyo honda' aku monjadi rajonyo. Baba'cam sia' ko si'itn. Bunuh somuonyo di hadapanku!’ ”

Yesus dihimpa'i kotakng ramai di kota Yerusalem

²⁸ Lopas jadi bokisah nantai, Yesus molajuan pojalatan-Nyo ko kota Yerusalem. Sio bojalatn palikng doholu. Inyo bukai mombodapan-Nyo.

²⁹ Timpu sia' huntu datakng di laman Betfage ongko laman Betania di sopia' bukit Jaitun, Yesus monyiuh duo urakng murid-Nyo botula' lobih doholu.

³⁰ Kato-Nyo, “Botula'cam ko laman inyo di polaju kito nu'un. Aman udah datakng, kaitn duo paca'an moniant siku' koledai muda' dikobat'an di tihakng di santai. Koledai nantai bolupm kalo ditunggaki urakng. Lopasan koledai nantai lalu baba' ko si'itan.

³¹ Aman ado inyo botakutn, ‘Ma'apo kaitn molopasan koledai nantai?’ Pandiran cam, ‘Tuhatn momontikannyo.’ ”

³² Koduo murid nantai botula'. Somuo la'apo pan tojadi topat samaꞌan inyo udah dipandiran Yesus ko sia'.

³³ Tongahan sia' molopasan koledai muda' nantai, urakng umputnnyo bopandir, “Ma'apo kaitn molopasan koledai nian?”

³⁴ Koduo murid nantai monimbasi, “Tuhatn momontikannyo.”

³⁵ Lalu, sia' mombaba'nyo ko Yesus. Sia' molota'an jubah sia' di pucu' punggukng koledai muda' nantai lalu monulukng Yesus noi' ko pucu'nyo.

³⁶ Watu Yesus dipucu' koledai muda' nantai monuju kota Yerusalem, boko urakng moincar jubah di jalatn inyo dilalu'i Yesus pakai' mohormati Sio.

³⁷ Watu Yesus huntu datakng di Yerusalem di jalatn inyo monurutn doi' bukit Jaitun, somuo boko murid-Nyo inyo banyaꞌ nantai bosura' agatn kotakng rindakng, momuji Allah obai somuo mujisat inyo udah sampat sia' tiat.

³⁸ Kato sia', “Diborokati Rajo inyo datakng agatn kuaso Tuhatn Allah! Sonang-asau di sorugo ongko topujicam Allah di tompat inyo maho tinggi.”

³⁹ Apo boboropo pomimpitn agama doi' kolompok Farisi di antaro urakng banyaꞌ nantai bopandir ko Yesus, “Guru, siuh boko murid Duatn botongga' bopandir ubo nian!”

⁴⁰ Yesus monimbasi sia' nantai, “Dinga'anbo! Aman boko murid-Ku botongga', boko batu nian tajahan bosura' momuji Allah!”

Yesus salu' moniant koadaan Yerusalem

⁴¹ Yesus mongkitn dampikng agatn kota Yerusalem. Watu Sio moniant kota nantai, Sio salu' bondar obai boko urakng di su'utn.

⁴² Kato-Nyo, “Aku kotakng boharap kaitn mongotohu'i caro inyo bulah kaitn sonang-asau. Apo watu ni'in kaitn culih mongotohu'i caro nantai.

^43-44 Kaitn co mongotohu'i watu Allah datakng pakai' monyolamant'an kaitn. Jadi, paca'an datakng watunyo di mono musuh kaitn tajahan mongopukng kota kaitn, bulah rintakan di sokolilikng kaitn. Sia' paca'an hala monyorakng kaitn doi' somuo arah. Sia' tajahan mohancuran kota kaitn, somuo batu tembok huatan batu bangunan paca'an diruntuhan. Somuo pondudu' paca'an dibunuh.”

Yesus monundukng boko podagakng doi' tongahlamanan Rumah Allah

⁴⁵ Kali udah Yesus datakng di Yerusalem, Sio mansu' ko tongahlamanan Rumah Allah ongko monundukng boko podagakng di santai.

⁴⁶ Kato-Nyo, “Kaitn monjadian Rumah Allah samaꞌan tompat pokumpulan boko urakng pongolakar! Apo ado totulis di Buku Suci obai Rumah Allah nantai rumah pakai' bodoa.”

⁴⁷ Lopas nantai, Yesus mongajar di tongahlamanan Rumah Allah sotiap ari. Tongahan nantai, boko imam kopala', boko guru Poraturan Agama Yahudi, ongko boko pomimpitn urakng Yahudi bogoyap caro pakai' mombunuh Yesus.

⁴⁸ Apo culih sia' obai urakng banyaꞌ hala ado di sokitar Sio sonang mondingaꞌan ajaran Sio.