Lukas 18 - Porjanjian Boharu Torjomahan Baso Dilakng Soari-ari

Poumpamoan mongonaꞌi siku' urakng botina' balu huatan siku' urakng hakipm

¹ Yesus momakai poumpamoan ni'in pakai' mongajar boko murid-Nyo oca' hala bodoa huatan co putus asa, obai doanyo tajahan dikabulan.

² Kato-Nyo, “Ado siku' urakng hakipm. Hakipm nantai diapm di sobuah kota. Io kinyo gola' agatn Allah, io pan co tonturian agatn urakng bukai.

³ Di kota nantai jam ado siku' urakng botina' balu. Botina' balu nantai hala datakng ko hakipm nantai. Io momuhun, ‘Tulukng pulah koputusan inyo adil obai dalapm pokaro ni'in, aku ninam inyo bondar huatan lawatnku inyo salah.’

⁴ Cukup manah hakipm nantai monula' pongaduan botina' balu nantai. Apo koponsuahannyo io bopikir, ‘Aku co ku gola' agatn Allah, aku pan co tonturian agatn urakng bukai.

⁵ Apo botina' balu ni'in hala mongganggu' aku. Jadi, lobih boi' aku monorima' pongaduannyo. Aman cado, io tajahan hala datakng ongko monyusahan aku.’ ”

⁶ Lalu Tuhatn Yesus bopandir, “Biar pan hakipm nantai kinyo adil, porotian kopintar-corodi'annyo pakai' bulah koputusan inyo adil pakai' botina' balu nantai.

⁷ Jadi, pasti Allah inyo boi' bulah koputusan inyo adil pakai' urakng pilihan-Nyo inyo bodoa ko Sio siakng malapm. Pasti Sio tajahan co kalo landai monulukng sia'.

⁸ Aku bopandir ko kaitn: Allah pasti janjakng molabuhan la'apo inyo adil pakai' sia'. Apo watu Ana' Monsio datakng bobali' ko dunia ni'in, bolupm pasti apobai Io monomu'i banya' urakng inyo totap pocayo ko Io.”

Poumpamoan mongonaꞌi siku' urakng Farisi inyo buhau huatan siku' urakng ponagih pajak inyo rondah hati

⁹ Di santai ado boboropo urakng inyo buhau. Sia' yakitn obai diri sia' siku' bondar. Sia' pan ngombabahan urakng bukai. Jadi, Yesus bokisah agatn sia',

¹⁰ “Ado duo urakng inyo botula' ko Rumah Allah pakai' bodoa; siku' urakng pomimpitn agama Yahudi doi' kolompok Farisi huatan siku' urakng ponagih pajak.

¹¹ Urakng Farisi nantai lalu bodoa dalapm hati ubo ni'in, ‘Oi Allah, aku bosukur ko Duatn, obai aku co bodosa samaꞌan urakng bukai inyo mongolit, molanggar hukupm, bomporajoan damo jahat samaꞌan ponagih pajak ni'in.

¹² Aku bopuaso duo kali sominggu. Aku moonju' populuhan ko Allah doi' somuo pongulihanku.’

¹³ Apo ponagih pajak nantai bodiritn jouh doi' somuo urakng bukai. Io monundu'an kopala'nyo obai mooso kinyo cucu' monongadah ko sorugo. Io momantu-mantu dadonyo obai monyosali boko dosanyo. Io bopandir, ‘Oi, Allah. Tulukng kasihibo aku. Aku ni'inan urakng inyo bodosa!’ ”

¹⁴ Ongko Yesus bopandir, “Dinga'anbo! Timpu pulakng ko rumah, ponagih pajak nantai inyo ditorima' Allah, bukainyo urakng Farisi nantai. Obai Allah tajahan ngombabahan somuo urakng inyo moninggian diri. Apo, Allah tajahan moninggian somuo urakng inyo ngombabahan diri.”

Yesus momborokati boko bobia' kocit

¹⁵ Ado boko urakng mombaba' boko bobia' kocit datakng ko Yesus oca' Sio moncama' huatan momborokati sia'. Watu boko murid-Nyo moniant hal nantai, sia' monogur boko urakng inyo mombaba' boko bobia' nantai.

¹⁶ Apo Yesus moningkau boko bobia' nantai datakng ko Sio, ongko bopandir ko boko murid-Nyo, “Biaran jam boko bobia' nantai datakng ko Aku! Jangan morarakng sia'. Obai urakng sama'an ninam inyo monjadi anggota koluarga Koraja'an Allah.

¹⁷ Aku bopandir ko kaitn: Aman urakng kinyo monorima' Koraja'an Allah samaꞌan siku' bobia' kocit, pasti io co tajahan monjadi anggota koluarga Koraja'an Allah.”

Urakng dampu ongko kohidupan inyo kokal di sorugo

¹⁸ Siku' urakng pomimpitn urakng Yahudi botakutn ko Yesus, “Guru inyo boi', aku gola' molabuhan la'apo oca' bodapat hidup kokal di sorugo?”

¹⁹ Kato Yesus, “Mapo kolai mongatoan Aku boi'? Ongkah Allah am inyo boi'.

²⁰ Nah, mongona'i kolai botakutn nantai, pasti kolai udah mongotohu'i Porintah Allah. Sobagai contoh: ‘Jangan bomporajoan, jangan mombunuh, jangan mongolit, jangan bulah tuduhan kinyo bondar, hormaticam indai-bopai kolai.’ ”

²¹ Pomimpitn nantai bopandir, “Aku udah monaati somuo Porintah Allah nantai doi' aku ija' muda'.”

²² Mondingaꞌ nantai, Yesus bopandir ko io, “Ongkah ado sobuti' agi' inyo kurakng bolupm kolai labuhan. Pulakngcam, jual somuo umputn kolai. Ongko pombagi-bagian duitnyo ko boko urakng jaro. Aman dipulah samaꞌan nian, kolai tajahan bodapat kodampuan di sorugo. Lopas jadi kolai molabuhan somuo nantai, datakng jam agi' ko Aku, pakai' jadi murid-Ku.”

²³ Mondingaꞌ pomandiran Yesus, io kotakng kocewa, obai io kotakng dampu. Io kinyo honda' monjual boko bando barakngnyo.

²⁴ Yesus moncorona'i pomimpitn inyo dampu nantai, lalu bopandir, “Uyuh bondar pakai' urakng dampu monjadi anggota koluarga Koraja'an Allah!

²⁵ Lobih mudah siku' unta mansu' molalu'i lubakng jayupm daripado urakng dampu pakai' monjadi anggota koluarga koraja'an Allah.”

²⁶ Boko urakng inyo mondingaꞌan hal nantai botakutn, “Wah, aman ubo nian, sopo inyo ulih disolamant'an?”

²⁷ Yesus monimbas, “Allah ulih molabuhan porbuatan inyo co mungkitn dilabuhan ulih monsio.”

²⁸ Ongko Petrus bopandir, “Tiat am! Koi udah moninggalan somuo umputn koi oca' monjadi boko murid Duatn.”

²⁹ Kato Yesus, “Pocayocam! Boko urakng inyo udah moninggalan rumahnyo, bininyo, boko somadikannyo, urakng tuhonyo, damo poana'annyo oca' sia' ulih molayati Allah huatan Korajaan-Nyo,

³⁰ sia' tajahan mondapat'an agi' doi' Allah jouh lobih banyaꞌ di dunia joman ni'in. Sia' pan paca'an mondapat'an hidup kokal di sorugo pado joman inyo tajahan datakng.”

Kopontigo kalinyo, Yesus momadahan boko ajab sonsaro inyo tajahan dialapi-Nyo

³¹ Yesus moningkau koduo bolas rasul oca' bokumpul di tompat husus agatn Sio. Ongko bopandir, “Dinga'anbo! Kito molajuan pojalatan kito agi' monuju kota Yerusalem. Di su'utn, tajahan tojadi sosuai agatn la'apo inyo holu udah ditulis boko nabi mongonaꞌi Ana' Monsio.

³² Io paca'an disorahan ko boko urakng inyo bukainyo urakng Yahudi. Boko urakng nantai paca'an boulu'an, mohayam, moigahi-Nyo.

³³ Sia' paca'an momantu huatan mombunuh-Nyo. Apo tigo ari lopas nian, Io tajahan hidup agi'.”

³⁴ Apo koduo bolas rasul-Nyo samo sokali kinyo mongoroti somuo inyo dipandiran Yesus nantai. Sia' co tohu la'apo inyo dimasud-Nyo. Roti inyo sobondarnyo doi' boko pomandiran inyo dipandiran-Nyo, co sia' mongoroti.

Yesus monyamani siku' urakng inyo buto di dampikng kota Yerikho

³⁵ Dalapm pojalatan ko kota Yerusalem, Yesus ongko boko urakng inyo tuyut Sio honda' tuntukam di kota Yerikho. Di santai, ado siku' urakng inyo buto di sisi jalatn tongahan dudu' mominto-minto.

³⁶ Timpu urakng buto nantai mondingaꞌ urakng banyaꞌ lalu, io botakutn, “Ado la'apo?”

³⁷ Sia' bopandir, “Yesus, Urakng Nazaret, tongahan lalu di si'itn.”

³⁸ Ongko io mondongkakng-mondorah, “Yesus, koturutan Daud! Tulukngku bo!”

³⁹ Boko urakng inyo tongahan bojalatn di muka' mondoholu'i Yesus monogur urakng inyo buto nantai, monyiuhnyo oca' io langunt. Apo io mondongkakng-mondorah lobih borakng agi', “Rajo koturutan Daud! Tulukngku bo!”

⁴⁰ Yesus botongga' ongko monyiuh oca' urakng buto nantai dibaba' ko Sio. Pas io udah di dampikng-Nyo, Yesus botakutn ko io,

⁴¹ “La'apo inyo ulih Ku tulukng?” “Tuhatn,” timbas io, “Aku honda' suba' moniant!”

⁴² Yesus bopandir, “Aman ubo nian, moniant cam! Kolai nyamanam obai kolai pocayo agatn Aku.”

⁴³ Timpu nian jam urakng buto nantai ulihnyo moniant, io lalu tuyut Yesus kapikng momuji Allah. Watu urakng banyaꞌ nantai moniant io udah nyamanam, sia' somuo momuji Allah jam.