Lukas 16 - Porjanjian Boharu Torjomahan Baso Dilakng Soari-ari

Yesus mongajar boko murid-Nyo pakai' monggunoan kodampuan sia' agatn caro inyo monyonangan Allah

¹ Yesus mongajar boko murid-Nyo agatn poumpamoan ni'in, “Ado siku' urakng bendahara inyo mourus kodampuan siku' urakng dampu. Bendahara nantai dituduh urakng bukai. Sia' bopandir ko urakng dampu nantai obai bendahara nantai bolobu'i kodampuannyo.

² Jadi urakng dampu nantai moningkau bendahara nantai. Katonyo, ‘Aku udah mondinga' borito inyo jahat mongona'i pokoroja'an kolai! Kolai paca'an ku tongga'an ongko kolai gola' moonji'i laporan ahir mongonaꞌi kodampuanku inyo kolai urus.’

³ Lalu, bendahara nantai koluar bopikir dalapm hati, ‘Akai! Aku tajahan ditongga'an. La'apo pogota'an ku nononyo. Monjadi tukakng cangkul, culihku obai aku co mampu. Monjadi urakng hala mominto, cuku-macal.’

⁴ ‘Nah, aku ado akal! Aku paca'an bulah ado aja', oca' boko urakng paca'an monorima' aku dalapm rumah huatan monulukngku watu aku ditongga'an nononyo.’

⁵ Jadi io moningkau somuo urakng inyo bohutakng ko habakngnyo. Io botakutn ko salah siku' doi' sia', ‘Boropo banyaꞌ hutakng kolai di habakngku?’

⁶ Urakng nantai monimbas, ‘Soratus topaian minya' jaitun.’ Bendahara nantai bopandir, ‘Ni'in surat hutakng kolai. Cocopat dudu', pulahi isinyo. Tulis monjadi lima' puluh topaian ja'.’

⁷ Lopas nian io botakutn ko urakng inyo bukai, ‘Boropo banyaꞌ hutakng kolai?’ Urakng nantai monimbas, ‘Soribu karukng gandupm.’ Bendahara nantai bopandir, ‘Ni'in surat hutakng kolai. Tulis monjadi dolapatn ratus karukng jam.’

⁸ Lopas nian habakng nantai momuji bendahara inyo kinyo jujur nantai obai io cukup pandai, pakai' bodapat caro hidup lopas jadi ditongga'an.” Lalu Yesus monyimpulan. Kato-Nyo, “Boko urakng inyo jahat cukup pandai tohadap sosamonyo. Sia' lobih pandai daripado boko urakng inyo hidup dalapm torakng.

⁹ Dinga'anbo ni'in: Soharusnyo kaitn momakai kodampuan di dunia ni'in pakai' monulukng urakng bukai, oca' watu kodampuan nantai kinyo boguno agi', kaitn ditorima' dalapm sorugo.

¹⁰ Aman urakng ulih dipocayo agatn urusan inyo kotakng kocit, io ulih dipocayo agatn urusan inyo kotakng bosar. Apo aman urakng culih dipocayo agatn urusan inyo kotakng kocit, io pan culih dipocayo agatn urusan inyo kotakng bosar.

¹¹ Jadi, aman kaitn bolupm ulih dipocayo agatn kodampuan di dunia ni'in, pasti kaitn co paca'an ulih dipocayo agatn kodampuan inyo bondar di sorugo.

¹² Aman kaitn culih dipocayo agatn kodampuan umputn urakng bukai, pasti kaitn co dionji'i paca'an kodampuan inyo tajahan monjadi umputn kaitn.

¹³ Co mungkitn siku' hulutn molayati duo habakng. Aman io molabuhan hal nantai, io paca'an bayo mongasihi salah siku' habakng apo mombonci' io siku'nyo. Io paca'an bayo taat ko siku' habakng, apo co taat ko io siku'nyo. Ubo nian jam kaitn. Co mungkitn kaitn monjadi hulutn Allah timpu inyo samo kaitn pan monjadi hulutn kodampuan.”

Yesus monogur boko urakng Farisi

¹⁴ Nah, ado jam boboropo urakng Farisi mondingaꞌan somuo inyo Yesus pandiran nantai. Sia' kotakng gala' agatn duit. Jadi, sia' rindakan Yesus.

¹⁵ Apo Yesus bopandir ko sia', “Kaitn bousaha oca' di hadapan urakng bukai kaitn kotiat'annyo boi' huatan hala bondar. Apo Allah tohu isi hati kaitn inyo sobondarnyo jahat. Banyaꞌ hal inyo dirogo'i ulih monsio, kinyo dirogo'i ulih Allah.

¹⁶ Komai urakng bolajar kohonda' Allah doi' boko buku porintah huatan poraturan Allah inyo ditulis Musa dalapm Hukupm Torat. Boko urakng pan bolajar doi' boko buku inyo ditulis boko nabi. Apo, doi' ija' Yohanes Pombaptis mo, borito boi' mongonaꞌi Koraja'an Allah diboritoan, Rajo Inyo Dijanjian Allah udah datakng. Sotiap urakng bousaha koras pakai' mansu' ko dalapm Korajaan-Nyo.

¹⁷ Apo, boko Porintah Allah totap bolaku. Biar pan langit ongko bumi mungkitn ulih hilakng, apo Hukupm Torat kinyo paca'an mungkitn ado bagian kotakng kocit pan inyo tajahan balakng.

¹⁸ Aman ado laki monyaya' bininyo ongko kawitn agatn botina' bukai, laki nantai bomporajoan agatn botina' nantai. Ubo nian jam agatn lolaki inyo kawitn agatn botina' inyo disaya' lakinyo. Lolaki nantai pan bomporajoan agatn botina' inyo disaya' nantai.”

Poumpamoan mongona'i siku' urakng dampu huatan siku' urakng jaro bodamoan Lazarus

¹⁹ Ongko, Yesus bokisah, “Ado siku' urakng dampu. Hidupnyo boonsu'an tintikng ari. Pakai'an inyo dipakainyo mahal-mahal. Io hala bopogai rindakng-ramai.

²⁰ Di lawakng pagar rumahnyo, ado urakng jaro inyo monggarikng di santai. Damonyo Lazarus. Banya' bondar kurikng-kodal di soluruh bukakng-tubuhnyo.

²¹ Sampai boko kudu' inyo bokoliaran di santai datakng monggilati boko kurikngnyo. Lazarus honda' bondar bopua' doi' boko sisa' pomakatn inyo dibuakan lopas urakng dampu nantai jadi makatn.

²² Koponsuahannyo Lazarus matiam. Boko molekat mombaba'nyo ko sorugo dudu' di sopia' Abrahapm, tompat inyo tohormat. Urakng dampu nantai pan mati jam ongko dipasar.

²³ Urakng dampu nantai mansu' ko noraka. Io kotakng ajab sonsaro. Io monongadah ko pucu', moniant Abrahapm doi' jouh. Io pan moniant Lazarus di totai Abrahapm.

²⁴ Io mondongkakng-mondorah, ‘Bopai Abrahapm! Aku kotakng ajab sonsaro di dalapm api ni'in. Kasihibo aku Bopai! Siuh Lazarus moncolupan jarinyo ko dalapm ara'i ongko datakng mondinginan lidahku agatn ara'i nantai.’

²⁵ Apo Abrahapm bopandir, ‘Ana'ku, ingant watu di dunia, kolai monorima' hidup inyo boonsu'an apo Lazarus monorima' hidup inyo ajab sonsaro. Ni'in, io sonang apo kolai ajab sonsaro.

²⁶ Apotolagi' Allah udah monotap'an sobuah jurakng di antaro kito. Jurakng inyo kotakng bosar sampai kinyo mungkitn disoboraki. Urakng doi' si'itn kinyo ulih ko su'utn. Urakng inyo di su'utn kinyo ulih ko si'itn.’

²⁷ Urakng dampu nantai bopandir, ‘Aman ubo nian, aku momuhun ko duatn, tulukng siuh Lazarus ko rumah bopaiku.

²⁸ Aku bisi lima' urakng somadikan inyo ija' hidup di dunia. Siuh Lazarus momporingant'i sia' pakai' botongga' bulah dosa huatan hidup monyonangan hati Allah oca' nononyo lopas jadi mati, sia' co mansu' ko tompat ajab sonsaro ni'in jam.’

²⁹ Apo Abrahapm bopandir ko urakng dampu nantai, ‘Boko somadikan kolai udah mondingaꞌ isi boko buku inyo ditulis Musa huatan boko nabi bukai. Sia' gola' borotian huatan monuruti somuo inyo totulis di boko buku nantai.’

³⁰ Urakng dampu nantai bopandir, ‘Nantai kinyo cukup, Bopai Abrahapm. Apo aman siku' urakng doi' su'utn hidup agi' doi' komatian, ongko botula' ko sia', pasti sia' tongga' bulah dosa huatan hidup monyonangan hati Allah.’

³¹ Apo Abrahapm bopandir, ‘Aman boko buku Musa huatan boko nabi kinyo cukup pakai' bulah sia' tongga' bulah dosa huatan hidup monyonangan hati Allah, pasti sia' pan paca'an kinyo pocayo biar pan siku' urakng hidup agi' doi' komatian.’ ”