Lukas 15 - Porjanjian Boharu Torjomahan Baso Dilakng Soari-ari

Yesus momakai boboropo poumpamoan pakai' monggambaran kasih Allah ko boko urakng inyo botongga' bulah dosa huatan hidup monyonangan Allah

¹ Ado boko ponagih pajak huatan boko urakng bukai inyo dianggap kinyo boi' ulih masrakat. Biasonyo, sia' datakng mondingaꞌ Yesus mongajar.

² Di santai jam ado boko pomimpitn agama doi' kolompok Farisi ongko boko guru poraturan agama Yahudi. Sia' botuta', kato sia', “Ih, Urakng ni'in bokawal agatn boko urakng inyo kinyo boi'. Malahan io makatn samoan sia'!”

³ Ongko, Yesus mongajar sia' agatn poumpamoan ni'in.

Poumpamoan Yesus mongonaꞌi domba inyo hilakng

⁴ “Soumpamonyo ado siku' urakng inyo bisi soratus iku' domba. Aman io kohilakan siku' domba obai domba nantai sosat, pasti io paca'an moninggalan sombilatn puluh sombilatn iku' domba inyo bukainyo di padakng rumput pakai' botula' monggoyapi inyo sosat nantai sampai io monomuannyo.

⁵ Watu io monomuannyo, io kotakng rindakng, mounjakan domba nantai di pucu' bohunyo, mombaba'nyo pulakng.

⁶ Io moningkau somuo kawal ongko totangganyo, lalu bopandir, ‘Huncapm kito rindakng-ramai. Dombaku inyo hilakng udah kotomuannam!’

⁷ Nah, porotiancam ni'in: samo ubo nantai jam, Allah huatan boko molekat di sorugo kotakng rindakng aman siku' urakng tongga' bulah dosa lalu hidup monyonangan Allah, daripado sombilatn puluh sombilatn urakng inyo kinyo tohu tongga' bulah dosa.”

Poumpamoan Yesus mongonaꞌi duit inyo hilakng

⁸ Yesus molajuan mongajar agatn poumpamoan ni'in. “Soumpamonyo ado botina' inyo bisi sopuluh pingkai' duit pira'. Aman io kohilakan sopingka'i, pasti io paca'an monokil pompolitoan lalu monyapu somuo rumahnyo pakai' monggoyapi duit nantai sampai io monomuannyo.

⁹ Watu io monomuannyo, io kotakng rindakng, moningkau somuo kawal ongko totangganyo, ongko bopandir, ‘Huncapm kito rindakng-ramai. Duitku inyo hilakng udah kotomuan agi'!’

¹⁰ Nah, porotiancam ni'in: samo sama'an nantai jam, Allah huatan boko molekat di sorugo kotakng rindakng aman siku' urakng botongga' bulah dosa lalu hidup monyonangan Allah.”

Poumpamoan Yesus mongonaꞌi ana' inyo momporoyauan doi' rumah bopainyo

¹¹ Yesus molajuan mongajar agatn poumpamoan ni'in. “Siku' urakng Bopai bisi duo ana' lolaki.

¹² Inyo kobunsuan bopandir ko io, ‘Bopai, onju' ko aku cam ninam pombagianku doi' kodampuan kito.’ Lalu bopainyo mombagi kodampuannyo nantai ko sia' duo ana'nyo.

¹³ Boboropo ari lopas nantai ana' kobunsuan nantai monjual boko pombagiannyo nantai ongko botula' ko nogori inyo jouh. Di su'utn io momborosan duitnyo agatn hidup bopoya-poya.

¹⁴ Pas duitnyo nyiantam, di nogori nantai tongahan musipm lapar-barau. Jadi, io udah culih momboli la'apo pan pakai' kopontikan hidupnyo.

¹⁵ Lalu io hingkas bokorojo ko siku' urakng pondudu' di santai. Urakng nantai monyiuhnyo ko lakau mongombolo babinyo.

¹⁶ Io kotakng kolaparan sampai honda' bopua' pomakatn boko babi nantai. Biar pan io kotakng kolaparan, conyiant siku' pan inyo moonji'inyo pomakatn.

¹⁷ Koponsuahannyo io sadar kolaku'annyo kotakng salah nantai. Io bopandir, ‘Boko urakng inyo bokorojo ko bopaiku botuyu' pomakatnnyo, apo aku di si'itn honda' mati longkapam!

¹⁸ Aku paca'an pulakng huatan botula' ko bopaiku, huatan bopandir ko sio: Bopai, aku udah bodosa tohadap Allah huatan tohadap Bopai.

¹⁹ Kinyo cucu' agi' aku disobut ana' duatn Bopai. Anggapcam aku siku' urakng inyo bokorojo ko duatn Bopai.’

²⁰ Lalu botula'am io pulakng ko bopainyo. Watu io ija' jouh doi' rumah, bopainyo udah moniant io. Agatn kotakng salu' bopainyo bonggidi'an monomu'inyo, ongko mongolu'i huatan monciupmnyo.

²¹ ‘Bopai,’ kato ana' nantai, ‘Aku udah bodosa tohadap Allah huatan tohadap duatn Bopai. Kinyo cucu' agi' aku disobut ana' duatn Bopai.’

²² Apo bopainyo moningkau boko hulutnnyo huatan bopandir, ‘Hohagarcam! Kuti' pakai'an inyo kotakng boi', huatan kona'an ko io. Kona'ancam cincipm ko jarinyo, huatan sopatu ko kakinyo.

²³ Lopas nian kuti' ana' sapi inyo gomu' huatan sombolihcam. Kito paca'an makatn huatan pogai.

²⁴ Obai ubonyo ana'ku ni'in udah mati, apo ni'in hidup agi'. Io udah hilakng, apo ni'in ditomuan agi'.’ Lalu labuh am sia' pogai.

²⁵ Timpu nantai, ana' inyo kojula'an tongahan di lakau. Pas io pulakng, sampai di hampikng rumah, io mondingaꞌ saro gondakng-gambalan ongko tarian.

²⁶ Io moningkau salah siku' urakng doi' boko hulutnnyo, ongko botakutn, ‘Ado la'apo di rumah ni'in?’

²⁷ Hulutn nantai monimbas, ‘Adikng Habakng udah pulakam! Bopai Habakng udah monyiuh monyombolih ana' sapi inyo gomu', obai io udah mondapat'an agi' ana'nyo dalapm koadaan solamant!’

²⁸ Ana' inyo kojula'an nantai tomaho godi bondar sampai io bolai' mansu' ko rumah. Ongko bopainyo koluar pakai' mongkongkanti'i oca' io mansu'.

²⁹ Apo io bopandir, ‘Botohutn-tohutn manahnyo aku bokorojo humpas-pulas pakai' duatn Bopai. Aku hala monaati porintah duatn Bopai. Apo duatn Bopai bolupm kalo moonji'i siku' kambikng pan pakai' aku rindakng-ramai agatn pokawalanku!

³⁰ Ana' duatn nantai udah mohabisan kodampuan duatn Bopai agatn botina' lahukng, apo kali io pulakng, Bopai monyombolih ana' sapi inyo gomu' pakai' io!’

³¹ ‘Ana'ku,’ timbas bopainyo, ‘Kolai hala ado di si'itn agatn aku. Somuo inyo umputnku nantai umputn kolai jam.

³² Apo kito gola' bulah pogai huatan rindakng-ramai, obai adikng kolai nantai ubonyo udah mati, apo ni'in hidup agi' Io udah hilakng, apo ni'in udah kotomuannam.’ ”