Lukas 14 - Porjanjian Boharu Torjomahan Baso Dilakng Soari-ari

Yesus monyamani siku' urakng boponyakit pas ari Sabat

¹ Timpu Ari Sabat, Yesus makatn sosamo agatn boboropo urakng guru agama Yahudi huatan boboropo urakng pomimpitn agama doi' kolompok Farisi. Sia' makatn di rumah salah siku' urakng pontikng doi' kolompok Farisi nantai. Somuo urakng Farisi ongko guru inyo ado di santai borotian Yesus agatn toliti, pakai' bogoyap kosalahan-Nyo.

² Ntobukan datakng siku' urakng inyo boponyakit ko Yesus. Io kompodihan ponyakit inyo bulah longan ongko kakinyo bongka'.

³ Lalu Yesus botakutn ko sia' boko guru agama Yahudi ongko boko urakng Farisi, “Monurut Porintah Allah inyo ditulis Musa dalapm Hukupm Torat, ulih cado monyamani siku' urakng timpu Ari Sabat?”

⁴ Mondingaꞌ Yesus botakutn nantai, sia' somuonyo langunt. Lalu Yesus molota'an jari-Nyo ko bukakng urakng inyo boponyakit nantai, monyamaninyo, lalu monyiuhnyo pulakng.

⁵ Lalu Yesus bopandir ko sia', “Aman, soumpamonyo, ana' kaitn damo sapi kaitn jatu' ko dalapm lubakng timpu Ari Sabat, pasti kaitn lansukng mongguakngnyo timpu ari nian jam.”

⁶ Sia' totap langunt obai culih monikaki-Nyo.

Boko urakng gola' hala onju'-bori' ongko culih buhau

⁷ Yesus borotian boko urakng inyo dihundakng momilih dudu' di boko tompat palikng muka'. Lalu, Sio mongisahan poumpamoan ni'in ko sia'.

⁸ Kato-Nyo, “Aman siku' urakng mohundakng kaitn ko pogai kawitn, jangan momilih dudu' di boko tompat buai muka'. Jangan samaꞌan nian obai mungkitn ado urakng bukai inyo lobih pontikng daripado kaitn inyo dihundakng jam.

⁹ Aman urakng pontikng nantai datakng, tuatn rumah tajahan minto kaitn pindah oca' tamu' inyo pontikng nantai ulih dudu' di santai. Kaitn paca'an malu obai toposo dudu' di tompat inyo kotakng bolikat.

¹⁰ Apo aman siku' urakng mohundakng kaitn ko pogai kawitn, kohonda'nyo kaitn momilih dudu' di tompat inyo palikng bolikat. Mungkitn tuatn rumah tajahan minto kaitn pindah oca' dudu' di tompat inyo kotakng muka'. Ongko, somuo tamu' inyo bukai tajahan mohormati kaitn.

¹¹ Labuhancam samaꞌan nian, obai Allah tajahan mongombabahan somuo urakng inyo moncubo moninggian diri. Apo, Allah tajahan moninggian somuo urakng inyo mongombabahan diri.”

¹² Lopas nantai Yesus bopandir ko urakng Farisi umputn rumah tompat sia' makatn, “Aman kolai moadoan pogai ongko makatn tongah ari damo makatn malapm, jangan mohundakng boko pokawalan, boko somadikan, boko koluarga bosar, damo boko totangga inyo dampu. Jangan mohundakng sia' obai sia' ulih mohundakng kolai agi'. Ongkah nantaiam monjadi balasan inyo kolai tajahan dapat.

^13-14 Apo, aman kolai moadoan pogai ongko makatn, hundakngbo boko urakng inyo culih mombalasnyo samaꞌan urakng jaro, urakng bokocina'an, urakng lumpuh, urakng buto. Aman kolai bulah ubo nantai, kolai tajahan dapat balasan inyo jouh lobih boi' timpu Allah bulah boko urakng inyo taat ko Sio hidup agi'.”

Allah mohundakng banyaꞌ urakng pakai' monjadi anggota koluarga korajaan-Nyo, apo ado boko urakng inyo monula'-Nyo

¹⁵ Mondingaꞌ pomandiran Yesus nantai, siku' urakng tamu' bopandir ko Sio, “Diborokati boko urakng inyo tajahan makatn sosamo Allah dalapm Korajaan-Nyo di sorugo.”

¹⁶ Apo Yesus mongisahan poumpamoan ni'in ko io. Kato-Nyo, “Ado urakng honda' moadoan pogai. Io bulah boko posiapan, ongko mohundakng banyaꞌ urakng.

¹⁷ Watu honda' mula'i pogai, io monyiuh hulutnnyo pakai' monyampaian posatn ni'in ko boko urakng inyo dihundakng nantai, ‘Huncapm, datakng. Somuonyo udah siap!’

¹⁸ Apo sia' somuo monula', kapikng momadahan bomacapm alasan pakai' culih datakng ko pogai nantai. Ado inyo bopandir, ‘Maap. Aku hoyu' momboli lakau jadi aku gola' botula' boriso'inyo.’

¹⁹ Ado inyo bukai bopandir, ‘Maap. Aku hoyu' momboli lima' pasakng sapi inyo gola' diporotian komampuannyo bokorojo.’

²⁰ Ado inyo bukai agi' bopandir, ‘Aku hoyu' jadi kawitn, jadi aku culih datakng.’

²¹ Lopas nian, hulutn nantai bobali' pulakng, molaporan somuonyo nantai ko habakngnyo. Habakngnyo godi obai somuo urakng inyo dihundakng bodalih culih datakng. Lalu, io monyiuh hulutnnyo pakai' hagar botula' ko boko jalatn ongko boko sako jalatn di kota pakai' mohundakng boko urakng jaro, urakng bokocina'an, urakng lumpuh, urakng buto. Lalu, sia' somuo datakng ko pogai nantai ongko makatn.

²² Lopas nian, hulutn nantai bopandir ko habakngnyo, ‘Habakng, aku udah molabuhan porintah duatn nantai, apo ija' ado tompat logo pakai' banyaꞌ tamu' agi'.’

²³ Lalu, habakng nantai monyiuh hulutnnyo, ‘Botula'cam ko boko jalatn bosar ongko ko boko sako jalatn di luar kota. Hundakngcam boko urakng doi' su'utn ko pogai ongko makatn jam. Kongkanti'icam sia' pakai' datakng, oca' rumahku bisi.

²⁴ Dinga'anbo ni'in: Pasti conyiant siku' pan doi' boko urakng inyo potamo kali ku hundakng nantai paca'an mooso'i la'apo pan inyo udah ku sodia'an pakai' sia'.’ ”

Urakng gola' bosodia moninggalan somuonyo aman honda' monjadi murid Yesus

²⁵ Watu Yesus ija' molajuan pojalatan-Nyo ko kota Yerusalem, banya' urakng tuyut Sio. Sio mongilikng ongko bopandir ko sia',

²⁶ “Sotiap urakng inyo honda' tuyut Aku culih monjadi murid-Ku aman io lobih mongasihi urakng bukai daripado Aku, ia'an mongasihi indai, Bopai, bini, ana', somadikan apotolagi' dirinyo siku'.

²⁷ Urakng inyo honda' tuyut Aku gola' siap mohadapi ajab sonsaro, apotolagi' sampai mati. Nian samo samaꞌan urakng inyo paca'an dihukupm mati, io gola' momikul kayu salibnyo siku'. Aman io kinyo siap mohadapi ajab sonsaro, io culih monjadi murid-Ku.

²⁸ Lalu, aman honda' monjadi murid-Ku, pikiran doholu somuo inyo gola' ditinggalan. Samo sama'an urakng inyo honda' moninjakan sobuah monara. Io gola' tohu duitnyo cukup cadoai pakai' monjadi'i monara nantai. Pasti io paca'an dudu' mohitukng ungkusnyo agatn toliti doholu.

²⁹ Aman cado, urakng nantai paca'an mula'i bulah pondasinyo, apo co mampu monjadi'inyo obai duitnyo kinyo cukup. Lalu sotiap urakng inyo moniant hal nantai paca'an boulu'an io.

³⁰ Sia' paca'an bopandir samaꞌan ni'in, ‘Tiat urakng nantai! Io mula'i moninjakan apo co mampu monjadi'inyo.’

³¹ Agatn contoh bukai. Soandainyo, siku' urakng rajo inyo bisi sopuluh ribu tontara paca'an boparakng agatn rajo bukai inyo bisi duo puluh ribu tontara. Pasti lobih doholu rajo nantai paca'an dudu' momportimbakan oca' io tohu ulih cado molawatn musuhnyo nantai.

³² Aman io mongotohu'i sobolupmnyo sia' culih molawatn musuhnyo nantai, io paca'an mongiripm boko utusannyo pakai' bohoupm oca' bodamai. Rajo molabuhan nantai sobolupm tontara musuhnyo tolalu dampikng.

³³ Ubo nian jam agatn boko urakng inyo honda' monjadi murid-Ku. Io gola' bopikir soboi'-boi'nyo holu ai obai aman io honda' monjadi murid-Ku, io gola' moninggalan somuo umputnnyo.”

Poumpamoan mongona'i garapm inyo kinyo boguno agi'

³⁴ “Garapm memang boguno. Apo aman garapm monjadi taba'i, co mungkitn dipulah mancitn agi'.

³⁵ Garapm nantai kinyo boguno agi' pakai' bulah lakau subur. Kinyo boguno jam pakai' bulah pupuk. Kinyo boguno samo sokali. Jadi, garapm nantai dibuakan ja'. Aman honda' mongoroti masud doi' pomandiran-Ku, gola' momportimbakan boboi' somuo inyo hoyu' kaitn dinga'.”