Lukas 11 - Porjanjian Boharu Torjomahan Baso Dilakng Soari-ari

Yesus mongajar boko murid-Nyo mongonaꞌi doa

¹ Pas ari nantai, Yesus bodoa di sobuah tompat. Watu Sio jadi bodoa, boko murid-Nyo bopandir agatn Sio, “Tuhatn, padahibo koi bodoa, samo agatn Yohanes mongajar boko muridnyo bodoa.”

² Ongko Yesus bopandir, “Aman kaitn bodoa, dinga' ni'in bunyinyo, ‘Bopai, koi bodoa kironyo somuo urakng mohormati damo Duatn. Datakngcam Koraja'an Duatn.

³ Onji'i koi pomakatn tiap ari socukupnyo.

⁴ Amputicam boko dosa koi, obai koi pan moamputi sotiap urakng inyo bosalah agatn koi. Tulukngcam koi oca' koi totap monuruti Duatn watu ado inyo moncubo'i koi oca' bulah dosa.’ ”

^5-6 Lopas nian Yesus moumpamoan doa agatn poumpamoan ni'in, “Misalnyo ado siku' urakng doi' antaro kaitn ntobukan ado kawal inyo singgah di rumahnyo, obai io tongahan dalapm pojalatan. Apo io conyiant pomakatn la'apo pan pakai' dionji'i ko kawalnyo nantai. Jadi, biar pan udah tongah malapm, io gola' botula' ko rumah totangga boi'nyo, mominto oca' dipinjapi tigo pingkai' roti.

⁷ Mungkitn aja' totangga boi'nyo nantai ulih monula' obai bolai' disusahan. Obai udah malapm, lawakngnyo udah disongkalam, io udah tidu', boko poana'annyo udah tidu' jam. Io kinyo honda' huas pakai' moonji'i la'apo pan ko io.

⁸ Apo porotianbo ni'in. Mungkitn totangga boi'nyo nantai bopikir kawal akrab kinyo monjadi alasan inyo cukup kuat pakai' io honda' huas moonji'i roti nantai ko kawalnyo. Apo obai io co mooso malu mominto, pasti io paca'an huas, moonji'i ko kawalnyo la'apo inyo dipontikan.”

⁹ “Porotiancam, ubo nian jam halnyo agatn doa. Mintocam, kaitn paca'an dionji'i. Goyapcam, kaitn paca'an bodapat. Ketokcam, kaitn paca'an dibuka'an lawakng.

¹⁰ Obai sotiap urakng inyo mominto paca'an monorima'; sotiap urakng inyo bogoyap tajahan bodapat; huatan lawakng tajahan dibuka'an pakai' sotiap urakng inyo mongetok.”

¹¹ Lalu Yesus moumpamoan doa agatn contoh bukai. “Misalnyo ado siku' urakng Bopai di antaro kaitn ana'nyo minto ikatn pakai' dipua'i. Pasti bopainyo kinyo moonji'i ular biso ko io!

¹² Aman ana'nyo minto runti, pasti kinyo dionji'i kalo ko io!

¹³ Biar pan kaitn urakng bodosa, kaitn pasti udah tohu moonji'i inyo boi' ko ana' kaitn. Apotolagi' Allah Bopai di sorugo! Aman urakng mominto Roh Allah, pasti Sio paca'an moonji'i ko urakng inyo mominto nantai.”

Yesus dituduh momakai kuaso Rajo Sitatn

¹⁴ Ado urakng inyo dirasu' roh jahat. Roh jahat bulah urakng nantai bisu. Pas ari nantai, Yesus monundukng roh jahat nantai koluar. Ongko urakng nantai ulih bopandir agi'. Jadi, banyaꞌ urakng di santai tokonyant ongko topocongo.

¹⁵ Apo ado di antaro sia' inyo bopandir, “Sio monundukng roh jahat momakai kuaso Rajo Sitatn!”

¹⁶ Apo ado jam boko urakng bukai inyo honda' moncubo'i Yesus. Sia' minto Yesus bulah mujisatpakai' mombutian kuaso-Nyo doi' Allah, bukainyo doi' Rajo Sitatn.

¹⁷ Apo Yesus mongotohu'i pikiran sia' somuo. Kato-Nyo, “Aman sobuah koraja'an topocah dalapm boko kolompok inyo hala boparakng, pasti nogori nantai tajahan bonaso. Aman boko anggota sokoluarga hala bomusuhan, pasti koluarga nantai tajahan hancur.

¹⁸ Sama'an nian jam di dalapm koraja'an Sitatn. Ado urakng inyo bopandir Aku monundukng roh jahat agatn kuaso Rajo Sitatn. Pasti nian salah. Obai aman koraja'an Sitatn tobagi-bagi, hala bolawatan, pasti kinyo ulih botahatn jam.

¹⁹ Jadi soandainyo Aku monundukng roh jahat momakai kuaso Rajo Sitatn, agatn kuaso apobai boko pongikut kaitn monundukng roh jahat? Boko pongikut kaitn siku' paca'an mongatoan nantai salah!

²⁰ Apo, inyo bondar nantai Aku monundukng roh jahat agatn kuaso Allah. Jadi, nantai boroti Koraja'an Allah udah datakng ko kaitn.”

²¹ “Pikirancam gambaran ni'in: Ado siku' urakng inyo kuat, bosonjato longkap. Aman io monjago rumahnyo, pasti amannam somuo umputnnyo.

²² Apo io disorakng ulih siku' urakng inyo lobih kuat doi' io. Io dikalahan. Sonjato longkap, inyo diandalannyo, dikuti'. Somuo umputn inyo io jago, dipobagi-bagian.

²³ Urakng inyo co momihak Aku, sobondarnyo molawatn Aku. Urakng inyo kinyo mongumpulan boko domba bosamo agatn Aku, sobondarnyo bulah domba nantai botomboburan.”

Yesus moingant'an oca' boboi' agatn kuaso roh jahat

²⁴ “Aman roh jahat koluar doi' siku' urakng, isu'anu roh nantai bokolilikng ko boko tompat inyo grinsakng pakai' bogoyap tompat torahat. Apo io kinyo bodapat. Jadi, io bopandir, ‘Aku paca'an bobali' ko urakng inyo udah ku tinggalan!’

²⁵ Watu io sampai ko urakng nantai, io monomu'i urakng nantai samo ubo rumah inyo borosih huatan toatur.

²⁶ Lalu io botula', monomu'i tujuh roh bukai inyo lobih jahat doi' io. Lopas nantai sia' somuo datakng, mansu' ko dalapm urakng nantai, ongko bodiapm di santai. Koponsuahannyo, koadaan urakng nantai monjadi lobih ajab sonsaro doi' somulo.”

Sopo sobondarnyo inyo diborokati Allah

²⁷ Watu Yesus ija' mongajar urakng banyaꞌ nantai ado siku' botina' doi' antaro sia'. Botina' nantai bopandir ko Yesus, “Allah momborokati indai Duatn, obai io molahiran huatan mombosaran Duatn!”

²⁸ Apo Yesus bopandir, “Sobondarnyo, lobih diborokati urakng inyo mondingaꞌ pomandiran Allah huatan molabuhannyo!”

Yesus monogur urakng banyaꞌ inyo monuntut Sio pakai' molabuhan lobih banyaꞌ mujisat agi'

²⁹ Watu boko urakng mongkitn banya' datakng ko tompat Yesus mongajar, Sio bopandir, “Kotakng jahat bondar boko urakng joman ni'in. Sia' monuntut Aku oca' bulah koajaiban inyo mombutian Allah moutus Aku. Apo sobuti' mo buti inyo paca'an Ku onju' ko sia', ia'an koajaiban Nabi Yunus.

³⁰ Samo halnyo Nabi Yunus ia'an koajaiban pakai' boko urakng Niniwe. Sama'an nian jam, Ana' monsio paca'an monjadi sobuah koajaiban pakai' boko urakng joman ni'in.

³¹ Timpu joman komai ado ratu doi' nogori Syeba inyo ado di buai solatatn nogori Israel. Io bojalatn jouh bondar samaꞌan doi' hujukng bumi oca' ulih mondingaꞌan pomandiran inyo pintar-corodi' doi' Rajo Salomo di Israel. Apo ni'in di si'itn ado inyo lobih pontikng daripado Rajo Salomo komai, apo ado boko urakng joman ni'in kinyo pocayo nantai. Jadi, watu Ari Kiamant nononyo, Ratu Syeba tajahan bobali' hidup agi' agatn sia' inyo kinyo pocayo nantai ongko monuduh sia'.

³² Sama'an nian jam, pado joman komai, Nabi Yunus momboritoan posatn Allah. Watu boko urakng Niniwe mondinga'annyo, sia' botongga' bulah dosa ongko monuruti Allah. Apo watu ni'in di si'itn ado inyo lobih pontikng doi' Nabi Yunus, apo ado boko urakng joman ni'in kinyo pocayo nantai. Jadi, pas Ari Kiamant nononyo, boko urakng Niniwe tajahan bobali' hidup agi' agatn sia' inyo kinyo pocayo nantai ongko monuduh sia'.”

Poumpamoan mongonaꞌi pompolitoan

³³ Yesus molajuan pongajaran-Nyo. Kato-Nyo, “Aman ado urakng inyo monokil pompolitoan, io kinyo moombakannyo damo monungkau'inyo agatn roga'. Sobali'nyo io molota'an pompolitoan nantai di tompat tobuka' oca' somuo urakng inyo mansu' ko dalapm rumah ulih moniant torakngnyo.

³⁴ Mato sama'an pompolitoan pakai' bukakng-tubuh. Aman mato urakng boi', boroti soluruh bukakng-tubuhnyo torakng. Apo aman mato urakng inyo kinyo boi', boroti soluruh bukakng-tubuhnyo golap.

³⁵ Jadi, boboi'cam! Jangan sampai kaitn bopikir ado torakng didiri kaitn, sobondarnyo kinyo torakng apo golap.

³⁶ Aman soluruh bukakng-tubuh urakng torakng, huatan conyiant sobagi'an pan inyo golap, jadi soluruh bukakng-tubuh urakng nantai torakng bondar, samaꞌan dipanjah cohayo pompolitoan.”

Yesus monogur boko pomimpitn agama doi' kolompok Farisi huatan boko guru Agama Yahudi

³⁷ Lopas Yesus jadi bopandir, ado siku' urakng Farisi mohundakng Sio makatn di rumahnyo. Yesus pan botula' ko rumahnyo, ongko dudu' makatn di siatan.

³⁸ Urakng Farisi nantai hiratn moniant Yesus makatn apo kinyo bobasu' jari holu.

³⁹ Yesus pan bopandir ko urakng Farisi nantai, “Kaitn boko urakng Farisi biasonyo momborosihi pirikng-mangku' tobi' luarnyo ja'am obai kaitn bopikir nantai paca'an monyonangan hati Allah. Apo di dalapm hati kaitn siku' ija' bisi agatn kotama'an huatan kojahatan.

⁴⁰ Kaitn budu! Allah inyo bulah tobi' luar, pasti bulah bagian dalapmnyo jam.

⁴¹ Jadi daripado bayo momborosihi tobi' luar pirikng-mangku' nian, onji'icam pomakatn inyo ado di dalapmnyo ko boko urakng jaro. Hoyu' kaitn bondar-bondar monyonangan hati Allah.

⁴² Allah tajahan mohukupm kaitn boko urakng Farisi obai porbuatan kaitn samaꞌan ni'in. Kaitn moonju' ko Allah populuhan doi' hasil somuo tontanaman sampai inyo tokocit pan ubo boko rorompahan. Apo kaitn kinyo adil agatn urakng bukai. Kaitn kinyo bondar-bondar mongasihi Allah. Poonju' populuhan nantai boi'. Apo jangan sampai tongkolupatn koadilan agatn kasih Allah jam!

⁴³ Allah paca'an mohukupm kaitn boko urakng Farisi obai porbuatan kaitn samaꞌan ni'in. Di dalapm rumah sombayakng kaitn gala' dudu' di muka', tompat inyo tohormat. Di pasar pan kaitn honda' hala dipuji dihadapan urakng banyaꞌ.”

⁴⁴ “Allah paca'an mohukupm kaitn boko urakng Farisi. Kaitn ulih disamoan agatn pasaran inyo co momakai tando. Jadi boko urakng kinyo tohu ado pasaran di santai. Lalu agatn kinyo songajo, boko urakng bojalatn di pucu'nyo ongko monjadi kinyo borosih socaro rohani. Sama'an nian jam kaitn mompongaruhi boko urakng pakai' monjadi jahat jam.”

⁴⁵ Lopas nantai siku' guru agama Yahudi bopandir ko Yesus, “Guru, obai pomandiran nantai, koi boko guru agama dihanyam jam.”

⁴⁶ Yesus monimbas, “Allah tajahan mohukupm kaitn jam boko guru agama Yahudi, obai kaitn mombebat'i boko urakng agatn boko poraturan agama inyo uyuh dilabuhan. Apotolagi', kaitn siku' bolai' monulukng sia' sodikit pan oca' poraturan nantai ulih dilabuhan!”

⁴⁷ “Allah tajahan mohukupm kaitn boko guru agama Yahudi. Kaitn moninjakan tugu poringant'an komatian boko nabi. Padohal angki-bayatn kaitn siku' mombunuh boko nabi nantai!

⁴⁸ Jadi boroti kaitn sotuju agatn porbuatan angki-bayatn kaitn. Angki-bayatn kaitn mombunuh boko nabi nantai, ongko kaitn moninjakan tugu poringant'an porbuatan nantai.

⁴⁹ Nantaiam obainyo, Allah inyo kotakan pintar-corodi' bopandir obai Sio tajahan mongiripm boko nabi huatan boko rasul ko kaitn urakng Israel, apo kaitn tajahan mombunuh sobagi'annyo huatan kaitn paca'an mondorako'i sobagi'annyo agi'.

⁵⁰ Jadi boko urakng joman ni'in paca'an dihukupm Allah kotakng borat. Sia' paca'an monanggukng hukupan obai mombunuh somuo nabi Allah doi' mulo dunia dipulah,

⁵¹ mula'i doi' mombunuh Habel sampai mombunuh Nabi Zakharia inyo tojadi di antaro mesbah; tompat monyorahan posombahan huatan Rumah Allah. Porotian, boko urakng joman ni'in pasti tajahan dihukupm obai somuonyo nantai.”

⁵² “Allah tajahan mohukupm kaitn boko guru agama Yahudi, obai ponyongkal pakai' mombuka' lawakng pongotohuan mongonaꞌi Allah kaitn kuti', apo kaitn siku' kinyo honda' mansu' ko dalapm pakai' bogoyap pongotohuan nantai. Sobali'nyo kaitn hala mohalaki boko urakng inyo bousaha mansu'.”

^53-54 Lopas Yesus udah momandiran somuonyo nantai, Sio botula' doi' rumah urakng Farisi nantai. Doi' nantai, boko urakng Farisi ongko boko guru agama Yahudi molawatn Sio agatn koras, sia' kotakan godi bondar. Sia' hala botakutn ko Yesus pakai' moncubo'i Sio. Sia' mongohonda'i Sio momandiran sosuatu inyo salah, oca' sia' ulih monggunoannyo pakai' alasan monuduh Sio.