Lukas 10 - Porjanjian Boharu Torjomahan Baso Dilakng Soari-ari

Yesus moutus tujuh puluh murid-Nyo

¹ Lopas nian Tuhatn Yesus momilih tujuh puluh murid inyo bukai. Sio moutus sia' duo-duo urakng mondoholu'i Sio ko somuo kota ongko tompat inyo paca'an didataki-Nyo dalapm pojalatan ko kota Yerusalem.

² Sobolupm sia' botula', Sio bopandir, “Lakau inyo honda' dihanyi kotakan luar, apo urakng pakai' mohanyinyo kurakng bondar. Jadi, mintocam ko Tuhatn Allah inyo umputn hasil lakau oca' Sio mongiripan lobih banyaꞌ hulutn pakai' bohanyi hasil lakau-Nyo.

³ Nah, botula'cam! Aku moutus kaitn ko tongah boko urakng inyo molawatn kito, samo ubo boko ana' domba ko tongah boko bonatakng ganas.

⁴ Jangan mombaba' dompet, tas, sandal ponggonti. Dalapm pojalatan kaitn, jangan mombuakng-buakng watu agatn hala botongga' monyapo huatan bogolaga'.

⁵ Sobolupm kaitn momansu'i boko rumah, borokaticam doholu boko urakng inyo bodiapm di rumah nantai. Pandiran, ‘Kironyo Allah moonji'i sonang-asau dalapm hati, ko somuo koluarga ni'in.’

⁶ Aman urakng umputn rumah honda' monorima' sonang-asau nantai, Allah bondar-bondar tajahan bulah koluarga nantai sonang-asau. Apo, aman urakng umputn rumah co monorima'nyo, sonang-asau nantai paca'an bobali' ko kaitn.

⁷ Sopo aja' inyo monorima' kaitn dalapm rumah, bodiapm di santai ja'am sampai kaitn botula' doi' tompat nantai. Jangan bopindah-pindah doi' rumah ko rumah. Samo sama'an siku' urakng inyo bokorojo bohak monorima' upah, kaitn pan bohak monorima' tanggaian doi' boko urakng watu kaitn momboritoan mongonaꞌi Koraja'an Allah. Apo pua'i ja'am la'apo inyo sia' onju' ko kaitn.

⁸ Di kota mono aja' kaitn ditorima' agatn boi', makatn la'apo aja' inyo tongahan pakai' kaitn.

⁹ Nyamani boko urakng inyo boponyakit di kota nantai. Pandiran ko boko urakng di santai, ‘Ni'innam watunyo Allah monjadi Rajo pakai' kaitn.’

¹⁰ Apo aman kaitn kinyo ditorima' di sobuah kota, botula'cam ko boko jalatn di kota nantai oca' boko urakng ulih bondinga'an. Pandirancam,

¹¹ ‘Koi tinggalan kota kaitn ni'in, sampai dobu inyo botangkil di kaki koi, koi borosihi! Nian pakai' momporingant'i kaitn tajahan dihukupm Allah obai monula' koi! Apo kotohu'icam ni'in: Allah paca'an monjadi Rajo pakai' kaitn!’

¹² Komai Allah mombonasoan kota Sodom agatn api doi' sorugo. Apo, watu Ari Kiamant, hukupan ko boko urakng inyo monula' kaitn paca'an jouh lobih borat doi' hukupan ko boko urakng jahat di Sodom nantai.”

Yesus moancapm boko urakng di boboropo kota inyo cado pocayo agatn Sio

¹³ Lalu Yesus moancapm boboropo kota di doerah Galilea. Kato-Nyo, “Allah tajahan mohukupm kaitn di kota Khorazim ongko Betsaida. Aku udah moniant'an kuaso-Ku doi' Allah agatn banyaꞌ mujisat di tongah-tongah kaitn, apo kaitn co pocayo agatn Aku. Kaitn co botongga' bulah dosa ongko co monuruti Allah. Soandainyo, Aku molabuhan boko mujisat nantai di kota Tirus ongko Sidon, pasti boko urakng di su'utn udah manah botongga' bulah dosa. Momakai banggi-pakaian bulikng undu' ongko mongguguran habu di pucu' kopala' sia', monunju'an sia' botongga' bulah dosa nantai.

¹⁴ Pas Ari Kiamant nononyo, hukupan ko kaitn di Khorazim ongko Betsaida tajahan jouh lobih borat doi' hukupan ko boko urakng di Tirus ongko Sidon nantai.

¹⁵ Huatan kaitn di kota Kapernaum samo jam. Jangan bopikir kaitn paca'an dihormati. Jangan bopikir kaitn paca'an mansu' sorugo! Kaitn paca'an dibuakan ko noraka, tompat urakng jahat dihukupm somanah-manahnyo!”

¹⁶ Lalu Yesus bopandir agi' ko sia' tujuh puluh murid inyo diutus tontai, “Urakng inyo mondingaꞌan kaitn, samo sama'an mondingaꞌan Aku siku'. Urakng inyo monula' kaitn, samo sama'an monula' Aku siku'. Urakng inyo monula' Aku, samo sama'an monula' Allah inyo moutus Aku.”

Kotujuh puluh murid udah bobali'am

¹⁷ Kotujuh puluh murid nantai botula'. Lopas sia' molabuhan somuo inyo disiuh Yesus, sia' bobali'am agatn hati rindakng. Kato sia' ko Yesus, “Tuhatn, boko roh jahat pan taat watu koi monundukngnyo agatn kuaso Duatn.”

¹⁸ Lalu kato Yesus ko sia', “Aku udah moniant Rajo Sitatn jatu' doi' langit sama'an kilat.

¹⁹ Dinga'anbo! Aku udah moonji'i kuaso ko kaitn pakai' mongalahan kuaso jahat, kuaso musuh kito, ia'an pan co nyiant inyo ulih mombonasoan kaitn.

²⁰ Apo lobih boi' jangan sangant rindakng obai boko roh jahat monaati kaitn. Ado alasan inyo lobih pontikng pakai' rindakng nantai obai damo kaitn udah totulis di sorugo.”

Yesus rindakng huatan moucap'an sukur ko Allah Bopai

²¹ Timpu nantai jam, Roh Allah bulah Yesus rindakng. Kato Yesus, “Bopai, Duatn Ponguaso langit ongko bumi. Ado urakng inyo pintar-corodi' ongko bopondidikan. Apo Aku bosukur obai Duatn kinyo monyatoan kobondaran ni'in ko sia'. Duatn monyatoan kobondaran ni'in ko urakng inyo kinyo pontikng ubo bobia' kocit. Oi, Bopai, caro nantai monyonangan hati Duatn!”

²² Lalu Yesus bopandir ko boko urakng banyaꞌ, “Bopai-Ku udah moonji'i somuo kuaso ongko pongotohuan ko Aku. Conyiant siku' pan inyo bondar-bondar mongonal Ana', solaitn Bopai. Conyiant jam inyo bondar-bondar mongonal Bopai solaitn Ana', huatan boko urakng inyo Ana' nantai pilih pakai' mongonalan Bopai.”

²³ Jadi nantai, Yesus mongilikng ko boko murid-Nyo. Kato-Nyo husus ko sia' aja', “Kaitn diborokati Allah obai sampat moniant la'apo inyo kaitn tiat watu ni'in.

²⁴ Pontiat'ancam ni'in: Banyaꞌ boko nabi ongko boko rajo doi' joman komai honda' moniant somuo inyo kaitn tiat. Sia' honda' mondingaꞌ somuo inyo kaitn dinga'. Apo kinyo bodapat kosompatan nantai obai komai bolupm watunyo.”

Yesus mongajar kito gola' mongasihi agatn porbuatan

²⁵ Lopas nian siku' urakng guru Agama Yahudi maju pakai' moncubo Yesus. Io botakutn, “Guru, aku gola' molabuhan la'apo oca' ulih monorima' hidup kokal?”

²⁶ Timbas Yesus, “La'apo inyo totulis dalapm Buku Poraturan Allah inyo ditulis Musa? La'apo inyo kolai baco di siatn?”

²⁷ Urakng nantai monimbas, “Kasihicam sobondar-bondarnyo Tuhatn Allah kolai agatn soponuh hati kolai, soponuh jiwa kolai, somuo kokuatan kolai huatan somuo pikiran kolai, ongko ‘Kasihicam sosamo kolai ubo kolai mongasihi diri kolai siku'.’ ”

²⁸ “Timbas kolai nantai bondar,” kato Yesus. “Labuhancam nantai, kolaipan tajahan bodapat hidup kokal.”

²⁹ Apo guru Agama Yahudi nantai honda' oca' urakng bopikir io nantai urakng inyo boi' ongko hala bondar. Jadi, io botakutn, “Sopo sosamo aku nantai?”

³⁰ Yesus monimbas agatn polajaran doi' sobuah poumpamoan, “Ado siku' urakng lolaki turutn doi' kota Yerusalem ko kota Yerikho. Di tongah jalatn io disorakng porampok, dirampas boko bando barakng umputnnyo sampai ko banggi-pakaian jam. Io dipantu' sampai honda' matiam, ongko ditinggalan tomolantakng di jalatn agatn boluko-luko.

³¹ Watu nantai siku' urakng imam banso Yahudi bojalatn jam molalu'i jalatn nantai. Watu ditiatnyo urakng nantai, io nyisi ko soborakng jalatn, ongko bojalatn torus.

³² Ubo nian jam agatn siku' urakng doi' suku Lewi inyo bojalatn di santai; watu ditiatnyo urakng nantai, io pan minggir ko soborakng jalatn, lalu molajuan pojalatan.

³³ Apo lopas nantai ado siku' urakng Samaria inyo tongahan bopojalatan, molalu'i jalatn nantai jam. Watu ditiatnyo urakng nantai, io kotakng kasih.

³⁴ Ongko dihampikinyo urakng nantai ongko momborosihi boko lukonyo agatn anggur ongko dipaliti agatn minya', lopas nian mongobat boko lukonyo nantai. Lopas nantai, io unjakan urakng nantai ko pucu' koledainyo siku', lalu mombaba'nyo ko sobuah ponginapan ongko morawatnyo di siatn.

³⁵ Kohobu'annyo io monguti' duo pingkai' duit pira'. Io moonju'nyo ko umputn ponginapan nantai huatan bopandir, ‘Rawatkucam io ni'in, huatan aman ado boko ungkus bukai, paca'an kubayar nono pas ku bobali'.’”

³⁶ Lopas nian Yesus monjadi'i poumpamoan nantai ongko botakutan ni'in, “Monurut pondapat kolai, doi' kotigo urakng nantai mono inyo udah botindak sobagai sosamo doi' urakng inyo dirampok nantai?”

³⁷ Timbas Guru Agama Yahudi nantai, “Urakng inyo udah monulukng urakng nantai.” “Nah,” kato Yesus, “Dalapm kohidupan kolai pan pulah ubo nantai jam!”

Yesus usi'an ko Maria agatn Marta

³⁸ Lopas nian Yesus ongko boko murid-Nyo monorusan pojalatan ko kota Yerusalem. Sia' datakng di sobuah laman. Di santai ado siku' urakng botina' bodamoan Marta. Io monorima' Yesus ko dalapm rumahnyo.

³⁹ Marta ado somadikan botina'nyo bodamo Maria. Maria hala dudu' dampikng Yesus mondingaꞌan boko ajaran-Nyo.

⁴⁰ Apo Marta kotakng repot obai tolalu banyaꞌ inyo io korojoan pakai' molayati boko tamu' nantai. Ongko, io mohampiki Yesus, kapikng botuta', “Tuhatn, somadikanku nian mombiaran aku bokorojo molayati siku'ku mo. Ubonyo Duatn co tonturian. Siuhbo io nian monulukng aku!”

⁴¹ Apo Tuhatn Yesus monimbasnyo, “Marta, Marta, kolai kuatir ongko monyusahan diri agatn banyaꞌ hal.

⁴² Apo bayo sobuti' mo inyo bondar-bondar pontikng. Somadikan kolai udah momilih hal inyo toboi' nantai, mondingaꞌan boko ajaran-Ku. Hal nantai kinyo paca'an dikuti' doi' io.”