Kolose 3 - Porjanjian Boharu Torjomahan Baso Dilakng Soari-ari

Caro hidup inyo bondar-bondar monyonangan Allah

¹ Kaitn dionji'i kohidupan boharu samo sama'an kaitn hidup agi' bosamo-samo agatn Kristus. Obai nantai, kaitn gola' moutamoan boko hal inyo di sorugo, di mono Kristus dudu' di tompat inyo palikng tohormat di sopia' kanan Allah.

² Kaitn gola' bopikir mongona'i boko hal di sorugo, bukainyo boko hal di dunia ni'in.

^3-4 Obai, caro hidup kaitn inyo manah nantai udah mati. Kaitn dionji'i hidup inyo boharu. Kristus ia'an puku' hidup kaitn nantai. Ni'in, hidup kaitn nantai tobumbutn bosamo Kristus di dalapm Allah. Apo, watu Kristus bobali' agi' ko dunia ni'in, urakng bukai paca'an moniant hidup kaitn bosamo Sio dalapm komulia'an.

⁵ Obai nantai, kaitn gola' momastian caro hidup kaitn inyo manah nantai bondar-bondar udah mati. Jangan dikuaso'i boko kohonda' duniawi, sama'an: bomporajoan, boko kolaku'an inyo kinyo sonunuh, hawa napsu, kohonda' jahat, kaha' agatn duit. Kohonda' pakai' duit nantai samo ja'am agatn monyombah boko duato.

⁶ Boko hal jahat nantai bulah Allah kotakng godi. Sio paca'an mohukupm boko urakng inyo kinyo monaati-Nyo.

⁷ Komai, kaitn pan molabuhan boko hal inyo jahat nantai.

⁸ Apo ni'in, kaitn gola' tongga' molabuhan somuo inyo ubo nantai. Jangan hagar godi. Jangan biaran oso godi monguaso'i kaitn. Jangan bonci' agatn urakng bukai. Jangan monjahai'-jahai'an urakng. Jangan mongatoan pomandiran inyo kinyo boi'.

⁹ Jangan bulah kotumbukan ko siku'-monyiku'. Jangan molabuhan boko hal nantai, obai kaitn udah tongga'am agatn caro hidup inyo manah nantai.

¹⁰ Kaitn udah hidup agatn caro boharu. Allah inyo bulah hidup kaitn inyo boharu nantai. Sio hala bulah sipat kaitn samo sama'an Sio. Sio molabuhan nantai oca' kaitn bondar-bondar konal agatn Sio.

¹¹ Dalapm hidup boharu ni'in, bukai-mombukai antaro urakng kinyo pontikng, contohnyo antaro urakng Yahudi agatn urakng inyo bukainyo urakng Yahudi, antaro urakng bosunant agatn urakng inyo kinyo bosunant, antaro urakng doi' banso Barbar inyo co dikonal agatn urakng doi' banso Skit inyo dorako, antaro hulutn agatn urakng bebas. Apo inyo palikng pontikng ia'an Kristus. Sio ado di dalapm boko urakng inyo pocayo.

¹² Obai nantai, hidupcam agatn caro inyo boharu. Kaitn nantai boko urakng inyo dipilih Allah, pakai' umputn Sio inyo husus huatan dikasihi-Nyo. Jadi, jadicam urakng inyo mongasihi, boi' hati, rondah hati, lomah-lombut, huatan sabar.

¹³ Aman ado urakng inyo bulah kosalahan agatn urakng bukai, kaitn gola' samo-samo sabar tohadap inyo bukai huatan samo moamputi, ongko kaitn pan gola' moamputi urakng bukai.

¹⁴ Inyo palikng pontikng doi' somuo sipat nantai ia'an samo mongasihi. Kasih nantai bulah kito monjadi satu huatan monjadi sompurna.

¹⁵ Kaitn samo sama'an sobukakng-sotubuh. Allah moningkau kaitn pakai' hidup dalapm sonang-asau agatn inyo bukai. Obai nantai, kohonda'nyo sonang-asau doi' Kristus monguaso'i hati kaitn. Bukai doi' nantai, bosukurcam ko Allah.

¹⁶ Kohonda'nyo ajaran Kristus somombondarannyo mansu' ko dalapm hati kaitn huatan monguaso'i caro hidup kaitn siku'-monyiku'. Kaitn gola' samo mongajar, samo moingant'an agatn somuo kopintar-corodi'an. Nyanyiancam mazmur, puji-pujian, nyanyian mongona'i Allah. Bonyanyicam agatn bosukur ko Allah dalapm hati kaitn.

¹⁷ Nanam, somuo inyo kaitn labuhan, somuo inyo kaitn pandiran, kaitn gola' molabuhan somuonyo nantai agatn kuaso Yesus, Tuhatn kito. Labuhancam somuonyo kapikng bosukur ko Allah Bopai kito molalu'i Yesus sobagai porontaro.

Hubukan antaro boko anggota rumah tanggo

¹⁸ Ko somuo botina' inyo udah bolaki aku bopandir: kaitn gola' tundu' ko laki kaitn, obai nantaiam inyo cucu' di dalapm Tuhatn.

¹⁹ Ko somuo lolaki inyo udah bobini aku bopandir: kasihicam bini kaitn. Jangan congkit agatn io.

²⁰ Ko boko bobia' aku bopandir: kaitn gola' monaati urakng tuho kaitn dalapm somuo hal. Obai, nantaiam inyo monyonangan hati Tuhatn.

²¹ Ko boko pombopaian aku bopandir: Jangan hala godi monogur poana'an kaitn, sampai monyakiti hati sia'. Aman kaitn hala godi, poana'an kaitn paca'an lomah somangant.

²² Ko boko hulutn aku bopandir: kaitn gola' onsi' agatn habakng inyo di dunia ni'in dalapm somuo hal. Jangan bayo watu sia' moniant kaitn obai honda' monyonangan sia'. Apo taat'icam sia' agatn hati inyo jujur obai kaitn mohormati Tuhatn.

²³ Labuhancam somuo pokoroja'an kaitn agatn soponuh hati, ubonyo kaitn bokorojo pakai' Tuhatn, bukainyo bayo monsio.

²⁴ Ingantcam! Kaitn paca'an monorima' borokat doi' Tuhatn. Sobondarnyo, kaitn molayati Kristus. Sio nantai Tuhatn kaitn.

²⁵ Sio paca'an mohukupm sotiap urakng inyo bulah kosalahan. Sio kinyo poduli urakng nantai pontikng kata'an cado.