Kolose 2 - Porjanjian Boharu Torjomahan Baso Dilakng Soari-ari1 Aku honda' oca' kaitn mongotohu'i obai aku bousaha koras pakai' kaitn, huatan pakai' sia' inyo di kota Laodikia, huatan pakai' urakng bukai inyo bolupm kalo botomu aku. 2 Aku bousaha oca' hati kaitn somuo dikuatan huatan kaitn bosatu dalapm kasih. Agatn ubo nian, kaitn mondapat'an somuo borokat huatan monjadi yakitn obai sobondarannyo mongoroti mongona'i Yesus. Kaitn pan paca'an mongotohu'i hajat Allah inyo komai kinyo dikotohu'i monsio. Ia'an, kaitn somuo ulih mongonal Kristus. 3 Bayo Sio mo inyo ulih moonji'i kopintar-corodi'an huatan pongotohuan inyo borogo nantai. 4 Aku momandiran boko hal nantai oca' urakng bukai co ulih mongontumbuki kaitn agatn pomandiran inyo manis. 5 Biar pan aku co nyiant bosamo agatn kaitn, apo hatiku ado di antaro kaitn. Aku sonang mondinga' obai kaitn hidup agatn toatur huatan kuat pocayo ko Kristus. Paulus moingant'an sia' mongona'i ajaran inyo salah ( 2:6-23 ) 6 Kaitn udah pocayo obai Kristus Yesus nantai Tuhatn kito. Obai nantai, totap ja' hidup bosatu agatn Sio. 7 Kohonda'nyo kaitn totap pocayo ko Sio huatan botumbuh dalapm Sio. Kohonda'nyo kaitn botambah kuat pocayo ko somuo ajaran inyo bondar inyo udah disampaian ko kaitn. Kohonda'nyo hati kaitn hala bosukur. 8 Boboi'cam jangan ado urakng inyo mongontumbuki kaitn agatn ajaran inyo kinyo boguno, ajaran inyo salah. Boko ajaran nantai doi' pondapat monsio, doi' boko roh inyo bokuaso di dunia ni'in, kinyo doi' Kristus. 9 Obai, Allah ado soponuhnyo di dalapm diri Kristus. 10 Ni'in, obai kaitn hidup bosatu agatn Kristus, ongko kaitn udah dionji'i somuo inyo kaitn pontikan socaro rohani. Kristusnam inyo bokuaso di pucu' somuo kuaso di dunia huatan di pucu' somuo roh inyo ado kuaso. 11 Obai kaitn bosatu agatn Sio, ongko kaitn udah disunant. Aku kinyo bomasud sunant inyo dilabuhan monsio, apo sunant inyo dilabuhan Kristus. Ia'an, Sio bulah oca' kohonda' bodosa kinyo monguaso'i kaitn agi'. 12 Obai watu kaitn dibaptis dalapm damo Yesus, kohidupan kaitn inyo manah nantai udah mati, ubonyo kaitn dipasar bosamo-samo agatn Kristus. Apo kaitn pocayo obai kuaso Allah udah bulah Kristus bobali' hidup doi' komatian. Obai nantai, kaitn pan dionji'i kohidupan inyo boharu. 13 Komai kaitn udah mati socaro rohani obai kaitn bodosa huatan kinyo di sunant socaro jasmani. Apo Allah udah moonji'i kaitn kohidupan boharu bosamo-samo agatn Kristus. Allah udah moamputi somuo dosa kito. 14 Gambarannyo sama'an ni'in: Somuo dosa kito tocatat dalapm surat hutakng inyo molawatn huatan moancapm kito. Apo Allah mohancuran surat nantai watu Yesus dipaku di kayu salib. 15 Watu nantai, Sio mongalahan somuo kuaso di dunia huatan somuo roh inyo ado kuaso. Agatn caro nantai, Sio bulah sia' monjadi malu di muka' umum. 16 Obai somuo nantai, jangan borotian urakng inyo monyalahan kaitn mongona'i boko poraturan agama, sama'an: poraturan mongona'i pomakatn, minuman, boko ari rayo, poraya'an bulatn boharu, Ari Sabat. 17 Somuo poraturan nantai bayo bayakan doi' la'apo inyo paca'an datakng. Apo konyata'an doi' somuo poraturan nantai ia'an Kristus! 18 Ado urakng inyo pompadah rondah hati huatan monyombah boko molekat. Jangan biaran urakng sama'an nantai bulah kaitn pocayo ajaran inyo salah, sampai kaitn co dapat borokat doi' Allah. Urakng sama'an nantai buhau agatn mongatoan io ado boko poniant'an doi' Allah. Apo sobondarnyo pikirannyo duniawi inyo bulah io buhau. 19 Io tongga' pocayo ajaran inyo bondar mongona'i Kristus. Kristus inyo momimpitn somuo urakng pocayo samo sama'an kopala' bokuaso ko bukakng-tubuhnyo. Kopontikan bukakng-tubuh nantai diponuhi huatan bukakng-tubuh nantai totap sobuti' obai ado hubukan agatn inyo bukainyo. Kopala' nantai moatur somuonyo oca' bukakng-tubuh-Nyo botumbuh sama'an inyo dikohonda'i Allah. 20 Kaitn udah dibebasan doi' kuaso boko roh dunia ni'in. Kaitn moanggap kohidupan inyo manah nantai udah mati, ubonyo kaitn mati bosamo-samo agatn Kristus. Jadi, jangan kaitn hidup sama'an urakng inyo dikuaso'i ulih boko poraturan di dunia ni'in! 21 Ado inyo mongajaran, “Jangan canggapm ni'in”, “Jangan bopua' nantai”, “Jangan cama' ni'in”? 22 Somuo poraturan sama'an nantai mongona'i boko hal inyo somontaro mo di dunia ni'in, boko hal nantai kinyo boguno agi'. Somuo poraturan sama'an nantai bayo boko porintah huatan boko ajaran monsio mo. 23 Memang boko poraturan nantai kotiat'annyo bopongaruh boi' obai boko urakng inyo moikuti gola' momoso diri pakai' monaatinyo. Sia' pompadah rondah hati. Sia' monyisa bukakng-tubuh sia' siku'. Apo somuo poraturan sama'an nantai kinyo boguno huatan ongkah bulah urakng honda' momuasan kohonda' dunia ni'in. |
LAI 2021
Indonesian Bible Society