Kolose 1 - Porjanjian Boharu Torjomahan Baso Dilakng Soari-ari

Salapm doi' Paulus

^1-2 Boko somadikan umant Allah di kota Kolose inyo sotia pocayo ko Kristus. Doi' aku, Paulus. Aku ditingkau pakai' monjadi rasul Kristus Yesus obai nantai kohonda' Allah. Salapm jam doi' Timotius, somadikan kito jam. Aku bodoa oca' Allah Bopai kito monunju'an koboi'an huatan moonji'i sonang-asau ko kaitn.

Paulus bodoa pakai' jomaat di Kolose

³ Sotiap kali koi bodoa pakai' kaitn, koi bosukur ko Allah. Sio nantai Bopai doi' Yesus Kristus, Tuhatn kito inyo bokuaso.

⁴ Koi bosukur obai koi udah mondinga' obai kaitn pocayo ko Yesus, Rajo inyo disobut ‘Kristus’. Koi pan bosukur obai koi mondinga' kaitn mongasihi somuo urakng umant Allah.

⁵ Kaitn pocayo huatan mongasihi obai kaitn yakitn moharap'an somuo inyo disodiaan pakai' kaitn di sorugo. Kaitn udah mondinga' mongona'i nantai dalapm Kabar Boi' inyo bondar

⁶ inyo udah disampaian ko kaitn. Kabar Boi' nantai tongahan diboritoan di mono-mono sampai bokombakng huatan bobuah. Sama'an nantaiam jam inyo tojadi di antaro kaitn, doi' watu kaitn mondinga' Kabar Boi' nantai lalu mongoroti koboi'an Allah inyo sobondarnyo.

⁷ Kaitn mongotohu'i somuo nantai doi' Epafras, somadikan inyo koi kasihi. Sio nantai kawal boi' dalapm pokoroja'an molayati Kristus agatn sotia. Sio molayati di antaro kaitn.

⁸ Lalu, io momadahan ko koi obai ado kasih dalapm hati kaitn inyo dionji'i Roh Allah.

⁹ Obai nantai, doi' koi mondinga' mongona'i kaitn, koi hala bodoa pakai' kaitn. Koi mominto oca' Allah bulah kaitn pintar-corodi' huatan mampu mongoroti boko hal inyo rohani. Agatn caro nantai, kaitn ulih mongotohu'i kohonda'-Nyo.

¹⁰ Agatn sama'an nantai kaitn ulih hidup agatn caro inyo hala monyonangan Tuhatn. Jadi, somuo porbuatan boi' inyo kaitn labuhan paca'an ado pongulihan inyo boi'. Kaitn pan paca'an mongkitn mongotohu'i mongona'i Allah huatan mongkitn mongonal Sio.

¹¹ Koi pan bodoa oca' Allah monguat'an kaitn agatn kuaso-Nyo inyo kotakng luar biaso. Agatn ubo nian, kaitn ulih totap kuat huatan sabar mohadapi somuo macapm ajab sonsaro,

¹² inyo kaitn labuhan agatn rindakng-rigah huatan bosukur ko Allah Bopai. Sio inyo bulah kaitn cucu' mondapat'an sobagi'an doi' somuo inyo disodiaan Allah. Ia'an, somuo inyo Sio sodia'an pakai' umant-Nyo di Korajaan-Nyo inyo torakng.

¹³ Komai, kito di babah kuaso jahat. Apo Sio molopasan kito doi' nantai. Sio bulah kito monjadi anggota dalapm Koraja'an Ana'-Nyo inyo Sio kasihi.

¹⁴ Ana'-Nyo, Yesus, inyo monanggukng hukupan dosa kito pakai' mombebasan kito oca' boko dosa kito diamputi.

Yesus Kristus inyo palikng bokuaso di pucu' somuonyo

¹⁵ Yesus Kristus nantai rupo Allah. Biar pan monsio kinyo moniant Allah, apo monsio ulih mongonal Sio molalu'i Yesus Kristus. Kristus inyo palikng bokuaso di pucu' somuo inyo dipulah-Nyo.

¹⁶ Obai, somuo hal dipulah dalapm Sio, Ia'an somuo hal di sorugo huatan di bumi, somuo hal inyo kotiat'an agatn kinyo kotiat'an, tomansu' somuo kuaso, koraja'an, pomorintah. Somuo hal dipulah molalu'i Sio huatan pakai' Sio.

¹⁷ Sio udah ado sobolupm somuo hal dipulah. Somuo hal totap ado di tompatnyo obai Sio.

¹⁸ Sio nantai kopala' bukakng-tubuh-Nyo, ia'an somuo urakng inyo pocayo ko Sio. Sio nantai puku' kohidupan boharu inyo dionji'i ko sia' nantai. Sio monjadi urakng potamo inyo bobali' hidup doi' komatian. Ongko, Sio siku' monjadi inyo palikng pontikng doi' somuo hal.

¹⁹ Obai, somuo sipat huatan kuaso Allah ado di dalapm diri Kristus. Allah siku'mo inyo mongohonda'i nantai.

²⁰ Allah pan bulah somuo hal ulih bokomboi'an agi' agatn Sio. Ia'an, somuo hal di bumi huatan di sorugo. Allah molabuhan nantai agatn darah Kristus inyo mati di kayu salib.

²¹ Memang komai kaitn hidup jouh doi' Allah. Kaitn nantai musuhAllah dalapm hati huatan pikiran kaitn. Obai, porbuatan kaitn jahat jam.

²² Apo agatn komatian Kristus Allah udah bulah kaitn bokoboi'an agi' agatn Sio. Sio molabuhan nantai oca' nono, timpu kaitn mohadapi Sio pakai' dihakipi, kaitn co ulih disalahan. Sio paca'an moanggap kaitn borosih, co bodosa.

²³ Nantai paca'an tojadi aman kaitn totap pocayo ko Yesus agatn kuat. Jangan sampai kaitn tongga' pocayo. Kaitn gola' sotia huatan yakitn moharap'an obai Allah momonuhi somuo inyo Sio janjian dalapm Kabar Boi'. Memang kaitn udah mondinga' Kabar Boi' nantai. Kabar Boi' nantai udah diboritoan ko boko urakng di mono-mono. Aku ni'in, Paulus, udah monjadi polayatn inyo momboritoan Kabar Boi' nantai.

Paulus rela mohadapi ajab sonsaro pakai' momboritoan Kabar Boi'

²⁴ Ni'in, aku rindakng-rigah obai aku ulih ajab sonsaro pakai' monulukng kaitn. Aku mooso'i ajab sonsaro Kristus inyo ija' gola' dioso'i. Aku ajab sonsaro dibukakng-tubuhku pakai' monulukng bukakng-tubuh Kristus, ia'an somuo urakng inyo pocayo ko Sio.

²⁵ Allah mompocayoan aku agatn tugas molayati boko urakng inyo pocayo. Sio monyiuh aku pakai' monyampaian ko kaitn socaro longkap boko Pomandiran doi' Sio,

²⁶ hajat Sio inyo kinyo dikotohu'i monsio. Komai turutn-tomurutn, co nyiant monsio mongotohu'i roncana-Nyo nantai. Apo ni'in, Sio momadahan nantai ko boko urakng inyo pocayo.

²⁷ Allah honda' momadahan ko sia' obai roncana-Nyo kotakan boi' pakai' boko banso inyo bukainyo banso Yahudi. Ni'innam roncana-Nyo: Kristus ulih hidup di dalapm diri kaitn urakng inyo bukainyo urakng Yahudi. Rotinyo, kaitn ulih yakitn moharap'an obai kaitn paca'an monorima' kohormatan doi' Allah.

²⁸ Kristus nantaiam inyo koi boritoan watu koi momakai somuo kopintar-corodi'an pakai' monosihat'i huatan mongajar sotiap urakng. Tujuannyo oca' koi ulih mombaba' sotiap urakng ko Allah dalapm koadaan suci obai bosatu agatn Kristus.

²⁹ Pakai' nantaiam aku bousaha koras. Aku bousaha agatn sokuat dayo doi' Kristus inyo bokorojo dalapm diriku agatn ponuh kuaso.