Kisah Boko Rasul 9 - Porjanjian Boharu Torjomahan Baso Dilakng Soari-ari

Saulus monjadi pocayo agatn Yesus

¹ Somontaro boko rasul momboritoan Kabar Boi', Saulus kotakan godi bondar. Io moancapm boko murid Tuhatn Yesus. Katonyo io paca'an mombunuh sia'. Jadi, io botula' ko Imam Agukng.

² Saulus mominto surat kuaso doi' io. Saulus paca'an moonju' surat nantai ko sotiap pomimpitn boko rumah sombayakng urakng agama Yahudi di kota Damsyik. Dalapm surat nantai totulis oca' timpu io monomuan boko pongikut ajaran Tuhatn Yesus, boi' lolaki damo botina', Saulus bohak monangkap sia'. Ongko io bohak mombaba' sia' bobali' ko Yerusalem. Di Yerusalem sia' ulih diadili.

³ Jadi Saulus botula' ko kota Damsyik nantai. Pas io udah dampikng kota nantai, sopongirap ado cohayo doi' sorugo. Cohayo nantai momanjah sokolilikngnyo.

⁴ Lansukng io jatu' ko tanah. Ado saro inyo bopandir, “Saulus, Saulus, tongga' cam mondorako'i Aku!”

⁵ Saulus botakutn, “Sopo Duatn, Tuhatn?” Saro nantai monimbas, “Aku ni'innam Yesus, inyo kolai dorako'i!

⁶ Ni'inan bodiritncam. Mansu' ko kota nantai. Di su'utn paca'an ado urakng inyo momadahan la'apo inyo gola' kolai labuhan.”

⁷ Ado boboropo urakng inyo tuyut bosamo Saulus dalapm pojalatan nantai. Sia' mondinga' saro nantai, apo co moniant Urakng inyo bopandir nantai. Sia' topocongo ja'am.

⁸ Lopas mondinga' pomandiran Yesus nantai, Saulus pan angkat, bodiritn, ongko moncolakan matonyo. Apo io co ulihnyo moniant la'apo pan. Jadi boko urakng inyo bosamo agatn io moncanggapm longannyo. Sia' moirikan io momansu'i kota Damsyik nantai.

⁹ Di su'utn somanah tigo ari, Saulus totap co ulihnyo moniant. Io pan co makatn-minum la'apo pan.

¹⁰ Di Damsyik ado urakng inyo pocayo ko Yesus. Damonyo Ananias. Io ado poniant'an. Tuhatn moningkau io, “Ananias!” Ananias monimbas, “Au, Tuhatn.”

¹¹ Tuhatn bopandir ko io, “Bososiapcam! Botula' ko rumah Yudas di Jalatn Lurus. Pandiran ko urakng di rumah nantai obai kolai monggoyapi Saulus doi' kota Tarsus. Saulus ni'inan tongahan bodoa.

¹² Io udah ado poniant'an doi' Aku jam. Dalapm poniant'an nantai, io moniant siku' urakng inyo bodamo Ananias, ia'an kolai. Io moniant kolai datakng ko io. Io moniant kolai molota'an jari ko io, oca' io ulih moniant agi'.”

¹³ Apo Ananias bopandir, “Tuhatn, aku udah mondinga' banya' kisah mongona'i Saulus nantai. Di Yerusalem, io banya' mondorako'i urakng inyo pocayo ko Duatn.

¹⁴ Ni'inan io datakng ko si'itn. Io ado surat kuaso doi' boko imam kopala' pakai' monangkap somuo urakng inyo moningkau damo Duatn.”

¹⁵ Apo Tuhatn bopandir ko io, “Botula'cam, obai Aku udah momilih io. Io paca'an monjadi hulutn-Ku. Io paca'an momboritoan mongona'i Aku ko boko urakng inyo kinyo Yahudi. Io pan paca'an momboritoan ko boko rajo sia'. Io paca'an momboritoan ko boko urakng Yahudi jam.

¹⁶ Obai io momboritoan mongona'i Aku, io paca'an moalapi banya' ajab sonsaro. Aku siku' paca'an monunju'an ko io mongona'i ajab sonsaro nantai.”

¹⁷ Jadi, Ananias botula' ko rumah Yudas nantai. Sopondatakngnyo di rumah Yudas, io mansu' ongko monomu'i Saulus. Io molota'an jarinyo ko Saulus kapikng bopandir, “Saulus, Somadikanku, Tuhatn Yesus moutus aku ko kolai. Sio niannam inyo kolai tiat dalapm pojalatan kolai ko si'itn. Sio moutus aku oca' kolai ulih moniant agi' huatan oca' kolai diponuhi Roh Allah.”

¹⁸ Timpu nian jam, ado sosuatu inyo jatu' doi' mato Saulus, ruponyo sama'an sisi' ikatn. Lansukng io ulih moniant agi'. Lopas nantai, io bodiritn, ongko dibaptis.

^19a Lopas nian, Saulus makatn ongko monjadi kuat agi'.

Saulus momboritoan Kabar Boi' di Damsyik

^19b Di kota Damsyik nantai, Saulus bodiapm boboropo ari bosamo boko urakng inyo pocayo agatn Yesus.

²⁰ Lopas jadi io ulih moniant agi' huatan monjadi kuat agi', io lansukng botula' ko boko rumah sombayakng urakng agama Yahudi. Io momboritoan obai Yesus nantai Ana' Allah.

²¹ Somuo urakng inyo mondinga' io monjadi kotakan hiratn. Kato sia', “Tontainyo io nianam inyo hala mondorako'i boko urakng inyo pocayo agatn Yesus di Yerusalem! Ubonyo io datakng ko si'itn honda' monangkap boko urakng inyo pocayo agatn Yesus jam huatan honda' mombaba' sia' ko Yerusalem oca' ulih diadili boko imam kopala'.”

²² Apo mongkitn manah Saulus mongkitn moyakit'an urakng banya'. Io mombutian agatn kotakan jolas obai Yesus nantai Rajo Inyo Dijanjian Allah. Allah bulah pomandiran Saulus kotakan bopongaruh. Ado boko urakng Yahudi di Damsyik inyo kinyo pocayo borito Saulus mongona'i Yesus. Apo sia' co ulih mongalahan Saulus.

²³ Lopas watunyo udah cukup manah, boko urakng Yahudi inyo kinyo pocayo borito Saulus nantai bohajat pakai' mombunuh Saulus.

²⁴ Apo hajat sia' nantai dikotohu'i Saulus. Siakng malapm sia' monjago boko pintu gerbakng kota nantai. Hajat sia', aman Saulus ado di santai, paca'an dibunuh.

²⁵ Jadi boko urakng inyo pocayo agatn Yesus di kota nantai honda' monulukng Saulus oca' io ulih koluar doi' kota nantai. Obai nantai am timpu malapm, sia' mombaba' io huatan monurutan io doi' pucu' tembok nantai inyo mongoliliki kota nantai. Io diturutan di dalapm sobuti' koranjakng bosar doi' pucu' tembok kota nantai.

Saulus bokumpul agatn boko urakng inyo pocayo di Yerusalem

²⁶ Jadi, Saulus bobali' ko Yerusalem. Watu io datakng di Yerusalem, io moncubo ngopal agatn boko urakng inyo pocayo Yesus di su'utn. Apo sia' somuo ija' gola' agatn io. Sia' kinyo pocayo obai io udah bondar-bondar monjadi pocayo Yesus.

²⁷ Apo Barnabas monulukng Saulus. Barnabas mongonalan io ko boko rasul. Barnabas mongisahan sama'an apo Saulus udah moniant Tuhatn Yesus dalapm pojalatan ko Damsyik. Barnabas pan momadahan ko sia' obai Tuhatn Yesus udah bopandir ko Saulus. Io pan monjolasan obai Saulus udah momboritoan mongona'i Yesus agatn borani di Damsyik.

²⁸ Jadi, Saulus pan ngopal agatn sia' di Yerusalem. Di su'utn pan, Saulus hala momboritoan mongona'i Tuhatn Yesus agatn borani.

²⁹ Saulus opat jam botikakng agatn boko urakng agama Yahudi inyo bobaso Yunani. Apo sia' kinyo pocayo ko Yesus. Sia' bogoyap caro pakai' mombunuhnyo.

³⁰ Apo hajat sia' nantai dikotohu'i boko urakng inyo pocayo Yesus. Jadi, sia' moonju'an Saulus ko polabuhan di kota Kaisarea. Doi' santai sia' monula'an io ko kota Tarsus, tompat asalnyo.

³¹ Lopas nantai somanah boboropo watu, boko urakng inyo pocayo Yesus di soluruh doerah Yudea, doerah Galilea, huatan doerah Samaria ulih hidup agatn sonang-asau. Co nyiant inyo mondorako'i sia'. Roh Allah monulukng huatan monguat'an sia'. Obai nantai, mongkitn manah mongkitn banya' urakng inyo pocayo agatn Yesus. Sia' somuo hidup agatn ponuh oso hormat ko Tuhatn inyo bokuaso.

Di kota Lida, Petrus monyamani Eneas

³² Timpu nantai, Petrus bojalatn kolilikng doerah nantai. Suatu watu, io botula' usi'an ko boko urakng inyo pocayo Yesus di kota Lida.

³³ Di su'utn, io botomu siku' urakng inyo lumpuh. Damonyo Eneas. Eneas nantai udah lumpuh somanah dolapatn tohutn.

³⁴ Petrus bopandir ko io, “Eneas, Yesus Kristus monyamani kolai. Bodiritncam! Gilikngcam kotidu'an kolai.” Timpu nantai jam Eneas bodiritn.

³⁵ Somuo pondudu' di kota Lida huatan somuo pondudu' doerah Saron moniant obai Eneas udah nyamanam. Lopas nantai, sia' botongga' bulah dosa huatan pocayo ko Tuhatn Yesus.

Di kota Yope, Petrus bulah Dorkas hidup doi' komatian

³⁶ Kinyo jouh doi' santai di kota Yope ado siku' urakng botina'. Damonyo Tabita. (Dalapm baso Yunani damo nantai disobut Dorkas.) Dorkas nantai urakng inyo pocayo agatn Yesus. Io hala bulah koboi'an agatn urakng bukai. Io pan opat monulukng urakng jaro.

³⁷ Timpu Petrus ado di kota Lida, Dorkas sakit kuat lilinkng-lalu matiam. Bangkainyo dimandi'i ongko diulit'an di sobuah ruakan pucu'.

³⁸ Di kota Yope nantai, ado jam boko urakng inyo pocayo agatn Yesus. Sia' mondinga' obai Petrus ado di kota Lida. Jadi, obai kota Lida kinyo jouh doi' kota Yope, sia' moutus duo urakng ko su'utn. Sia' duo momuhun ko Petrus minto potulukan. Kato sia', “Tulukng copat botula' bosamo agatn koi ko Yope.”

³⁹ Jadi, Petrus lansukng tuyut sia'. Sampai di su'utn, Petrus dionju'an ko ruakan pucu' nantai. Somuo botina' balu bodiritn mongoliliki Petrus di santai. Kapikng monangis sia' moniant'an ko io boko baju huatan pakai'an bukai inyo dipulah Dorkas. Timpu Dorkas ija' hidup, io bulah somuo pakai'an nantai pakai' monulukng sia'.

⁴⁰ Lopas nian, Petrus monyiuh somuo urakng koluar doi' ruakan nantai. Io molota'an kopututnyo ko lantai di sopia' bangkai nantai ongko bodoa. Ongko, io mongilikng bangkai nantai. Katonyo, “Tabita, huascam.” Lansukng Tabita moncolakan matonyo. Io moniant Petrus, ongko huas huatan dudu' tontakng.

⁴¹ Petrus mouluran longannyo, monulukng Tabita bodiritn. Lopas nian, Petrus moningkau somuo botina' balu huatan boko urakng bukai inyo pocayo Yesus. Io moniant'an ko sia' obai Tabita udah bobali' hidup doi' komatian.

⁴² Borito mongona'i mujisat nantai toborito ko soluruh kota Yope. Jadi, banya' urakng monjadi pocayo ko Tuhatn Yesus.

⁴³ Lopas nantai, Petrus monotap cukup manah di Yope. Io mongoluntukng bosamo siku' urakng pongusaha kulit bonatakng. Damonyo Simon.