Kisah Boko Rasul 8 - Porjanjian Boharu Torjomahan Baso Dilakng Soari-ari

^1a Saulus inyo ado di santai, io ia'an salah siku' pomimpitn agama Yahudi jam. Io pan sotuju aman boko urakng mombunuh Stefanus.

Di Yerusalem, boko urakng inyo pocayo didorako'i

^1b-3 Lopas jadi Stefanus mati, ado boboropo urakng inyo pocayo ko Allah momasar io. Sia' bulikng agatn kotakan salu'. Apo pado ari nantai jam di kota Yerusalem, boko urakng inyo pocayo Yesus mula'i didorako'i. Sia' didorako'i agatn kotakan borat. Saulus tongahan bousaha pakai' mombonasoan jomaat. Io botula' doi' rumah ko rumah, monyeret boko urakng inyo pocayo Yesus ko ponjara, boi' lolaki damo botina'. Jadi banya' bondar urakng pocayo rari doi' Yerusalem. Sia' tosebar ko boko tompat di doerah Yudea huatan Samaria. Bayo koduo bolas rasul totap tinggal di Yerusalem.

Kabar Boi' mongona'i Yesus diboritoan di Samaria

⁴ Boko urakng pocayo inyo rari doi' kota Yerusalem nantai tosebar. Sia' momboritoan Kabar Boi' ko mono ja' sia' botula'.

⁵ Di antaro sia' ado Filipus. Io botula' ko sobuah kota di doerah Samaria ongko momboritoan ko boko urakng di santai. Io momboritoan obai Yesus nantai Rajo Inyo Dijanjian Allah.

^6-7 Filipus monyamani banya' urakng lumpuh huatan banya' urakng timpakng. Io pan monundukng boko roh jahat doi' banya' urakng. Boko roh jahat nantai koluar kapikng mondorah agatn saro kotakan borakng. Pondudu' kota nantai mondinga'an somombondarannyo ajaran Filipus, obai sia' moniant banya' mujisat inyo io labuhan.

⁸ Boko urakng di kota nantai kotakan rindakng obai somuo nantai.

⁹ Di kota nantai ado siku' urakng boponohu. Damonyo Simon. Io udah manah bulah boko urakng di doerah Samaria tohiratn-hiratn agatn ponohunyo. Io pan moaku'i dirinyo sobagai urakng inyo hebat.

¹⁰ Jadi sobolupm Filipus datakng, somuo urakng Samaria pocayo agatn io, boi' urakng biaso damo urakng pontikng. Sia' bopandir, “Urakng ni'in ado kuaso bosar obai ado kuaso doi' Allah.”

¹¹ Jadi sia' pocayo agatn io, obai udah kotakan manah io bulah sia' tohiratn-hiratn agatn ponohunyo.

¹² Apo Filipus momboritoan Kabar Boi' mongona'i Koraja'an Allah. Io momboritoan mongona'i kuaso Yesus sobagai Rajo Inyo Dijanjian Allah. Watu Filipus momboritoan somuo nantai, banya' urakng pocayo agatn borito nantai, boi' lolaki damo botina'. Ongko, Filipus mombaptis sia'.

¹³ Simon nantai pan pocayo ongko dibaptis. Lopas nantai, io hala tuyut Filipus. Io hala hiratn moniant Filipus molabuhan banya' macapm mujisat.

¹⁴ Pontongahan nantai, boko rasul ija' ado di Yerusalem. Sia' mondinga' obai banya' urakng Samaria nantai udah pocayo borito doi' Allah mongona'i Yesus. Jadi sia' moutus Petrus ongko Yohanes ko su'utn.

¹⁵ Timpu sia' duo datakng, sia' bodoa oca' somuo urakng Samaria inyo pocayo monorima' Roh Allah.

¹⁶ Urakng pocayo nantai memang udah dibaptis obai pocayo agatn Yesus, Tuhatn inyo bokuaso di pucu' somuonyo. Apo Roh Allah bolupm ado pado sia'.

¹⁷ Jadi Petrus ongko Yohanes molota'an jarinyo ko pucu' sia'. Watu nantai, hoyu' sia' monorima' Roh Allah.

¹⁸ Simon nantai moniant obai Roh Allah dionji'i ko boko urakng nantai molalu'i boko rasul inyo molota'an jarinyo ko pucu' sia'. Jadi, io honda' moonji'i duit ko sia' duo,

¹⁹ katonyo, “Onji'i jam kuaso nantai ko aku. Jadi, timpu aku molota'an jariku ko urakng, urakng nantai paca'an monorima' Roh Allah.”

²⁰ Apo Petrus bopandir ko Simon, “Kironyo Allah mombonasoan kolai bosamo duit kolai nantai! Obai kolai monyangko kolai ulih mongoit Roh Allah nantai agatn duit.

²¹ Kolai co nyiant hak pakai' tuyut dalapm polayatan ni'in, obai hati kolai kinyo bondar dihadapan Allah.

²² Jadi gola' kolai tongga'an cam bopikir jahat sama'an nantai. Bodoacam ko Tuhatn oca' kohonda' hati kolai inyo jahat nantai ulih diamputi-Nyo.

²³ Obainyo aku moniant kolai sangant tungian. Kolai tojoyat dalapm dosa.”

²⁴ Timbas Simon, “Tulukng kaitn duo bodoacam ko Tuhatn. Bodoa oca' somuo inyo udah kaitn katoan nantai kinyo tojadi ko aku.”

²⁵ Lopas nantai, koduo rasul nantai monyampaian borito doi' Tuhatn. Sia' momboritoan mongona'i pongalapan sia' siku' bosamo Yesus. Ongko, sia' bobali' ko Yerusalem. Dalapm pojalatan pulakng, sia' momboritoan Kabar Boi' mongona'i Yesus di banya' laman bukai di doerah Samaria nantai.

Filipus monjolasan Kabar Boi' ko siku' urakng doi' koraja'an Etiopia

²⁶ Pado suatu ari, Tuhatn monyiuh molekat monomu'i Filipus. Molekat nantai bopandir, “Bososiapcam! Botula' ko arah solatatn, ko jalatn inyo turutn doi' Yerusalem ko Gaza.” (Jalatn nantai molalu'i doerah inyo langunt.)

²⁷ Jadi Filipus bososiap ongko botula'. Di jalatn nantai, io moniant siku' urakng Etiopia. Urakng Etiopia nantai ia'an siku' urakng pojabat tinggi. Io kopala' bendahara inyo bokorojo pakai' ratu Etiopia. Tontai pojabat nantai botula' sombayakng ko Yerusalem,

²⁸ apo timpu nantai tongahan dalapm pojalatan pulakng. Io pulakng noi' koreta inyo didudus boko kuda. Dalapm pojalatan, pojabat nantai mombaco doi' buku Nabi Yesaya.

²⁹ Pas Filipus moniant urakng Etiopia nantai, Roh Allah bopandir ko io, “Hampiki koreta nian.”

³⁰ Ongko Filipus bonggidi'an mohampiki koreta nantai ongko mondinga' pojabat nantai tongahan mombaco doi' buku Nabi Yesaya. Jadi Filipus botakutn, “Apobai Habakng mongoroti masud baca'an nantai?”

³¹ Kato pojabat nantai, “Co mungkitn aku ulih mongoroti aman co nyiant urakng inyo monjolasannyo ko aku.” Jadi pojabat nantai mominto Filipus noi' ko koretanyo ongko dudu' bosamo agatn io.

³² Bagian Buku Suci inyo dibaco pojabat nantai dinga' ni'innan: “Sio dibaba' pakai' dibunuh samo ubo siku' domba dibaba' pakai' disombolih. Apo Sio nantai co mongatoan la'apo pan samo ubo siku' domba kinyo bosaro timpu urakng mongguntikng bulunyo.

³³ Sio dihanyam. Sio dipoulahan agatn kinyo adil. Co nyiant urakng inyo ulih mongisahan mongona'i koturutan-Nyo, obai Sio dibunuh.”

³⁴ Pojabat nantai bopandir ko Filipus, “Tulukng padahan ko aku: Nabi nantai monulis mongona'i sopo? Apobai mongona'i dirinyo damo mongona'i urakng bukai?”

³⁵ Jadi, Filipus monjolasan pomandiran nabi nantai sobondarnyo mongona'i Yesus. Ongko, Filipus momboritoan soluruh Kabar Boi' ko io.

³⁶ Dalapm pojalatan, sia' molalu'i tompat inyo ado ara'i. Pojabat nantai bopandir, “Tiat, di si'itn ado ara'i. Tulukng duatn mombaptis aku.” [

³⁷ Filipus bopandir, “Aman Habakng somombondarnyo pocayo ko Yesus, Habakng ulih dibaptis.” Kato pojabat nantai, “Aku pocayo Yesus nantai Rajo Inyo Dijanjian Allah. Yesus nantai Ana' Allah.”]

³⁸ Ongko pojabat nantai monyiuh hulutnnyo pakai' monongga'an koretanyo. Filipus ongko pojabat nantai turutn ko ara'i, ongko Filipus mombaptis io.

³⁹ Lopas jadi sia' monjouh doi' ara'i nantai, sopongirap Roh Allah mombaba'i Filipus doi' tompat nantai. Pojabat nantai kinyo moniant Filipus agi'. Ongko pojabat nantai molajuan pojalatannyo pulakng agatn hati inyo rindakng.

⁴⁰ Apo Roh Allah mombaba' Filipus doi' tompat nantai ko kota inyo bodamo Asdod. Tangga'i santai io bojalatn ko kota Kaisarea. Io momboritoan Kabar Boi' di somuo kota di sopanjakng pojalatannyo.