Kisah Boko Rasul 6 - Porjanjian Boharu Torjomahan Baso Dilakng Soari-ari

Tujuh urakng dipilih pakai' molayati urakng jaro

¹ Mongkitn manah, mongkitn banya' urakng Yahudi inyo pocayo agatn Yesus. Ado urakng Yahudi inyo pocayo agatn Yesus inyo bobaso Ibrani. Ado jam inyo bobaso Yunani. Inyo bobaso Yunani tungi obai inyo bobaso Ibrani mombagi'i pomakatn sotiap ari ko boko urakng botina' balu kinyo adil. Boko urakng balu inyo bobaso Yunani hala kinyo dionji'i.

² Obai nantai, koduo bolas rasul mongumpulan somuo urakng inyo pocayo agatn Yesus, ongko bopandir, “Koi gola' torus momboritoan Kabar Boi' mongona'i Yesus. Kinyo boi' aman koi moninggalan polayatan nantai pakai' urusan mombagian pomakatn sotiap arinyo.

³ Jadi boko somadikan, pilihcam tujuh urakng doi' antaro kaitn. Kotujuh urakng nantai gola' dikonal sobagai urakng inyo pintar-corodi' agatn boi' hati. Roh Allah gola' ado pado sia' nantai jam. Koi paca'an monyorahan polayatan ni'in ko sia'. Sia' nanam inyo mombagian pomakatn sotiap arinyo.

⁴ Oca' koi siku' ulih hala bodoa ongko torus momboritoan Kabar Boi' mongona'i Yesus.”

⁵ Somuo urakng inyo hadir sotuju agatn usulan nantai. Sia' momilih Stefanus. (Io kotakan pocayo agatn Yesus. Roh Allah monguaso'i Stefanus jam). Sia' nantai jam momilih Filipus, Prokhorus, Nikanor, Timon, Parmenas, ongko Nikolaus. (Io doi' Antiokhia. Io bukainyo urakng Yahudi asli apo kalo tuyut agama Yahudi sobolupm io pocayo agatn Yesus.)

⁶ Tujuh urakng ni'in dibaba' ko boko rasul. Boko rasul bodoa kapikng molota'an jarinyo ko kotujuh urakng nantai. Nianam caro sia' disiuh pakai' molabuhan tugas nantai.

⁷ Kabar Boi' mongona'i Yesus torus diboritoan. Jumlah urakng inyo pocayo di Yerusalem mongkitn botambah banya'. Malahan banya' imam pocayo agatn Yesus jam.

Stefanus ditangkap

⁸ Nah, Stefanus, doi' kotujuh urakng inyo disiuh tontai, io dionji'i borokat agatn kuaso doi' Allah. Io ulih molabuhan boko mujisat dipohadapan boko urakng banya'.

⁹ Apo ado kolompok urakng Yahudi inyo molawatn io. Sia' doi' kolompok urakng inyo dibebasan. Anggota kolompok nantai ia'an pondudu' Yerusalem inyo datakng doi' kota Kirene, kota Aleksandria, propinsi Kilikia, ongko propinsi Asia. Sia' botikakng agatn Stefanus,

¹⁰ apo co kalo sia' monang obai Roh Allah bulah io bopandir agatn kotakan pintar-corodi'.

¹¹ Jadi, sia' mohasut boboropo urakng oca' bulah tumbukan mongona'i Stefanus. Sia' disiuh mongatoan, “Koi mondinga' Stefanus mohanyam Musa huatan Allah.”

¹² Jadi sia' bulah urakng banya' godi agatn Stefanus. Boko pomimpitn masrakat huatan boko guru Poraturan agama Yahudi jumpat godi jam. Sia' somuo monangkap Stefanus ongko mombaba' io ko kolompok pomimpitn agama Yahudi inyo kotakan pontikng.

¹³ Ongko sia' mombaba' boko sasi inyo mongatoan boko hal inyo kinyo bondar mongona'i io. Kato sia', “Io ni'in hala mohayam Rumah Allah inyo suci ni'in. Io pan hala mohayam Porintah Allah inyo ditulis Musa dalapm Hukupm Torat.

¹⁴ Obai koi udah mondinga' pomandirannyo. Io mongatoan aman Yesus doi' Nazaret tajahan mohancuran tompat ni'in. Io pan mongatoan Yesus paca'an morubah adat baso inyo disampaian Musa ko angki-bayatn kito.”

¹⁵ Somuo urakng inyo dudu' di dalapm pokaro kolompok pomimpitn urakng Yahudi nantai moncorona'i Stefanus. Sia' moniant muhonyo bocohayo sama'an muho molekat.