Kisah Boko Rasul 5 - Porjanjian Boharu Torjomahan Baso Dilakng Soari-ari

Ananias agatn Safira matiam obai monipu boko rasul

¹ Ado jam siku' urakng inyo bodamoan Ananias. Io bisi bini inyo bodamo Safira. Sia' duo pan monjual sobidakng tanah umputn sia' samo sama'an Barnabas.

² Apo Ananias ni'in monyimpatn sobagi'an doi' hasil ponjualan tanah nantai pakai' dirinyo sikuꞌ. Bininyo nantai tohu jam. Apo kinyo dipadahan obai nantai ongkah sobagi'an doi' hasilnyo. Ongkah sisa'nyo disorahan ko boko rasul.

³ Apo Petrus bopandir, “Ananias, kolai udah mombiaran Rajo Sitatn monguaso'i hati kolai! Kolai moncubo monipu Roh Allah. Kolai tumbukan mongona'i hasil monjual tanah kolai inyo sobondarnyo. Kolai monyimpatn sobagi'an pakai' diri kolai siku'.

⁴ Sobolupm dijual, tanah nantai memang hak umputn kolai. Lopas dijual, hasil nantai kolai totap bohak monontuan caro monggunoannyo. Jadi kolai udah bulah hajat dalapm hati kolai pakai' bulah tumbukan sama'an nantai! Kolai kinyo bayo moncubo monipu monsio, apo monipu Allah jam!”

^5-6 Watu Ananias mondinga' pomandiran Petrus nantai, io lansukng matiam. Boboropo bobia' muda' datakng ongko momutut bangkainyo agatn koitn. Sia' mombaba' bangkainyo ko luar kota ongko momasarnyo. Somuo urakng inyo mondinga' kojadian nantai monjadi kotakan gola'.

⁷ Kiro-kiro tigo japm lopas nantai, bini Ananias mansu' ko tompat boko rasul nantai. Io co tohu la'apo inyo udah tojadi agatn lakinyo.

⁸ Petrus bopandir ko Safira, “Pandirancam agatn sobondarnyo ko aku. Apo bai duit ni'in sosuai agatn rogo ponjualan tanah kaitn duo?” Safira monimbas, “Au, memang sobosar nantaiam jumlahnyo.”

⁹ Jadi, Petrus bopandir ko io, “Kaitn duo udah bosopakat pakai' monipu koi. Agatn bulah sama'an nantai kaitn duo mouji Roh Tuhatn. Ponyangkatn kaitn Roh Tuhatn kinyo tohu mongona'i porbuatan jahat kaitn. Dinga'an! Sia' inyo udah momasar bangkai laki kolai ado di muka' lawakng. Ni'inan, bangkai kolai pan paca'an sia' baba' ko luar!”

¹⁰ Watu nantai jam, Safira mati, jatu' di pohadapan kaki Petrus. Timpu boko bobia' muda' nantai mansu', sia' moniant Safira udah mati. Jadi, sia' mombaba' bangkainyo ko luar kota ongko momasarnyo di dampikng lakinyo.

¹¹ Somuo urakng inyo pocayo Yesus ongko somuo urakng bukai inyo mondinga' kojadian nantai monjadi kotakan gola'.

Boko rasul Yesus monyamani banya' urakng

¹² Boko rasul Yesus banya' bulah mujisat di antaro urakng banya'. Timpu nantai, somuo urakng inyo pocayo ko Yesus opat bokumpul di salah sobuti' polantaran Rumah Allah inyo bodamo ‘Polantaran Salomo’

¹³ Boko urakng bukai inyo bolupm pocayo agatn Yesus kinyo borani bogabukng agatn sia', apo banya' urakng mohormati sia'.

¹⁴ Jumlah urakng inyo pocayo ko Tuhatn Yesus mongkitn botambah, boi' lolaki damo pan botina'.

¹⁵ Boko rasul Yesus banya' bulah mujisat. Obai nantai am, banya' urakng mombaba' boko urakng boponyakit ko boko jalatn ongko sia' nantai diulit'an di tikar damo tompat tidu'. Sia' boharap pas Petrus lalu di siatn, palikng cado kombayakngnyo kona' sia', oca' sia' nyamanam.

¹⁶ Banya' urakng doi' boko kota di sokitar Yerusalem pan mombaba' boko urakng boponyakit agatn urakng inyo mondorita' obai korasu'an roh jahat. Somuo sia' dinyamanan.

Boko pomimpitn Yahudi bousaha monongga'an pokoroja'an boko rasul apo gagal

¹⁷ Timpu nantai, ado Imam Agukng agatn boko pongikutnyo. Sia' boasal doi' pomimpitn agama Yahudi doi' kolompok Saduki. Sia' monjadi tungi obai banya' urakng pocayo Kabar Boi' mongona'i Yesus inyo disampaian boko rasul.

¹⁸ Jadi sia' monyiuh oca' boko rasul nantai ditangkap ongko dimansu'an ko dalapm ponjara umum.

¹⁹ Apo pas malapm ari, ado molekat datakng mombuka' boko lawakng ponjara nantai ongko moirikan sia' ko luar. Kato molekat nantai,

²⁰ “Hingkascam ko tongahlamanan Rumah Allah. Pandiran cam ko boko urakng di su'utn. Padahan ko sia' ubo apo caro sia' ulih mondapat'an hidup inyo somanah-manahnyo di sorugo.”

²¹ Jadi sunsukng pukau, boko rasul mansu' ko tongahlamanan Rumah Allah ongko mula'i mongajar urakng banya', sama'an inyo disiuh molekat tontai. Pontongahan nantai Imam Agukng agatn pokawalannyo mongumpulan boko pomimpitn banso Yahudi inyo kotakan pontikng. Sia' honda' moadoan pokaro. Lopas bokumpul, sia' monyiuh oca' boko rasul nantai dibaba' doi' ponjara.

²² Apo watu boko pojabat nantai datakng ko ponjara, boko rasul kinyo ado di su'utn. Jadi, sia' bobali' momadahan hal nantai. Kato sia',

²³ “Koi moniant boko lawakng ponjara nantai totap tokunci agatn rapat. Boko ponjago ponjara bodiritn di tompatnyo masikng-masikng di pohadapan sotiap lawakng sama'an biaso. Apo pas koi mombuka' sotiap lawakng, boko rasul nantai co nyiant di dalapm.”

²⁴ Watu kopala' ponjago Rumah Allah agatn boko imam kopala' mondinga' nantai, sia' topocongo, botakutan la'apo inyo paca'an tojadi agatn kojadian nantai.

²⁵ Lopas nantai ado urakng inyo mansu'. Katonyo, “Pombopaian! Ado boko urakng nantai inyo kaitn mansu'an ko dalapm ponjara somaman. Sia' tongahan bodiritn di tongahlamanan Rumah Allah mongajar urakng banya'.”

²⁶ Jadi, kopala' pongawal Rumah Allah bosamo agatn boko potugasnyo botula' ko su'utn. Sia' honda' mombaba' agi' boko rasul nantai. Apo sia' gola' agatn urakng banya' inyo tongahan mondinga' ajaran boko rasul nantai. Gola'nyo urakng banya' nantai godi ongko monikapm sia' agatn batu. Obai nantai, pongawal Rumah Allah bosamo boko potugasnyo mombaba' boko rasul nantai kinyo agatn kokorasan.

²⁷ Sia' mombaba' boko rasul nantai mansu' pakai' mohadap boko pomimpitn nantai. Ongko Imam Agukng monuduh boko rasul nantai. Katonyo,

²⁸ “Koi udah morarakng kaitn agatn koras oca' kinyo dilabuhan agi' mongajar ajaran Urakng Nazaret nantai. Apo kaitn kinyo monuruti porintah nantai. Obai nantai, somuo urakng di Yerusalem udah mondinga' ajaran kaitn. Kaitn pan honda' monyalahan koi obai komatian Urakng Nazaret nantai.”

²⁹ Apo Petrus ongko boko rasul inyo bukai monimbas, “Koi gola' monaati Allah daripado kaitn.

³⁰ Kaitn udah monula' Yesus huatan mohukupm mati Sio di kayu salib sama'an urakng jahat. Apo Allah inyo disombah angki-bayatn kito udah bulah Sio hidup agi' doi' komatian.

³¹ Yesus udah noi' ko sorugo ongko dudu' di tompat inyo kotakan tohormat di sopia' kanan Allah. Allah moonji'i kuaso ko Yesus pakai' momimpitn ongko monyolamant'an urakng. Allah molabuhan nantai oca' kito urakng Israel mondapat kosompatan pakai' diamputi, ia'an aman kito botongga' bulah dosa ongko monuruti Allah.

³² Koi ni'in moniant somuonyo nantai agatn mato kopala' siku'. Allah udah moonji'i Roh-Nyo ko koi somuo inyo monaati Sio. Jadi Roh Allah jam mombutian somuonyo nantai bondar.”

³³ Timpu boko pomimpitn Yahudi mondinga' nantai, oso ditujah hati sia' sampai honda' mombunuh boko rasul nantai.

³⁴ Apo ado siku' urakng doi' antaro kolompok pomimpitn nantai. Damonyo Gamaliel. Io nantai guru Poraturan agama Yahudi doi' kolompok urakng Farisi. Somuo urakng mohormati Io. Io bodiritn ongko monyiuh oca' boko rasul nantai dibaba' ko luar pakai' somontaro. Lopas nantai, io bopandir ko boko pomimpitn di su'utn.

³⁵ Katonyo, “Boko urakng sobansoku Israel! Cubo bopikir boboi' holu'ai kolaku'an kaitn ko boko rasul nantai.

³⁶ Obai komai ado urakng inyo bodamo Teudas. Io mongaku' dirinyo siku' sobagai pomimpitn. Ompat ratus urakng monjadi pongikutnyo. Apo io dibunuh, ongko somuo pongikutnyo topisah-pisah. Jadi, pogota'annyo co nyiant pasalnyo.

³⁷ Solaitn nantai, ado siku' urakng agi' pado watu pomorintah Romawi bulah sensus. Io doi' doerah Galilea. Damonyo Yudas. Io momimpitn boko urakng Yahudi pakai' molawatn pomorintah Romawi. Apo io jam dibunuh, ongko somuo pongikutnyo topisah.

³⁸ Obai nantaiam, mosalahnyo ni'in agatn boko rasul nantai, aku padahi jangan mohukupm sia' agatn koras. Biaran aja'am. Aman hajat damo pokoroja'an sia' boasal doi' monsio pasti paca'an kinyo bohasil sama'an Teudas agatn Yudas nantai.

³⁹ Apo amannyo bondar pokoroja'an sia' nantai boasal doi' Allah, co ulih kito monongga'an sia'. Malahan monjadi nyata obai kito inyo molawatn Allah.” Boko pomimpitn sotuju agatn pomandiran Gamaliel nantai.

⁴⁰ Sia' monyiuh oca' boko rasul nantai dibaba' bobali' mansu' ongko dipodularan. Lopas nantai, sia' morarakng boko rasul nantai pakai' moajaran ajaran inyo Yesus sampaian ko sia'. Ongko boko rasul nantai dilopasan.

⁴¹ Boko rasul nantai botula' doi' santai tomaho rindakng, obai Allah moanggap sia' cucu' moalapi ajab sonsaro samo sama'an Yesus. Nanam caro Allah morogo'i sia'.

⁴² Sia' co botongga' moajaran Kabar Boi' obai Yesus nanam Rajo Inyo Dijanjian Allah. Sia' momboritoan nantai sotiap ari di tongahlamanan Rumah Allah ongko di boko rumah urakng.