Kisah Boko Rasul 4 - Porjanjian Boharu Torjomahan Baso Dilakng Soari-ari

Petrus ongko Yohanes Diadili Kolompok Pomimpitn Urakng Yahudi

¹ Timpu Petrus ongko Yohanes ija' bopandir ko urakng banya' nantai, sia' duo didataki boko pomimpitn urakng Yahudi. Ado kopala' ponjago Rumah Allah, boboropo imam, huatan boboropo urakng doi' kolompok Saduki.

² Boko pomimpitn nantai kotakan godi obai Petrus ongko Yohanes momboritoan mongona'i Yesus ko urakng banya'. Petrus ongko Yohanes mongajar ni'innan: obai Yesus udah hidup agi' doi' komatian, urakng inyo pocayo ko Yesus paca'an bobali' hidup doi' komatian jam. Monurut boko pomimpitn, ajaran nantai sangant salah.

³ Jadi boko pomimpitn monyiuh koduo rasul nantai ditangkap ongko dimansu'an ko dalapm ponjara. Obai ari udah malapm, sia' duo ditahatn di santai sampai kohobu'annyo.

⁴ Apo banya' urakng inyo udah mondinga' ajaran Petrus ongko Yohanes monjadi pocayo agatn Yesus. Jadi jumlah urakng pocayo monjadi kiro-kiro lima' ribu boko urakng bujakng bosar ongko boko urakng tuho lolaki.

⁵ Kohobu'annyo, boko pomimpitn Yahudi inyo kotakan pontikng bokumpul di Yerusalem. Sia' moadoan potomuan pokaro. Ado boko pomimpitn agama, boko tokoh masrakat, bosamo boko guru Poraturan Agama Yahudi.

⁶ Imam Agukng datakng ko potomuan nantai jam. Damonyo Hanas. Ado jam boko urakng pontikng doi' koturutan Hanas nantai, tomansu' Kayafas, Yohanes, huatan Aleksander.

⁷ Somuo pomimpitn nantai monyiuh oca' Petrus agatn Yohanes dibaba' ongko bodiritn di hadapan sia'. Sia' monakutan, “La'apo inyo kaitn duo labuhan? Kaitn duo pakai kuaso sopo sampai urakng lumpuh nantai nyamanam?”

⁸ Lopas nian, Roh Allah monguaso'i Petrus. Kato io, “Boko Totuho pomimpitn banso huatan agama.

⁹ Ari ni'in koi duo diadili obai bulah koboi'an ko urakng lumpuh ni'in. Koi ditanyoi mongona'i kuaso doi' sopo inyo udah monyamani io.

¹⁰ Jadi oca' kaitn somuo tohu. Somuo urakng banso kito Yahudi gola' tohu jam! Urakng ni'in bodiritn sehat di hadapan kaitn sokarakng obai io nyamanam agatn kuaso Yesus Kristus doi' Nazaret. Kaitn udah monula' Sio sampai Sio dihukupm mati di kayu salib. Apo Allah udah bulah Sio hidup agi' doi' komatian.

¹¹ Nantai samo sama'an ado totulis dalapm Buku Suci. Yesus, Kristus diumpamoan sama'an batu inyo ditula' boko tukakng bangunan. Dinga' ni'innan bunyi tulisan nantai: ‘Kaitn samo sama'an boko tukakng bangunan inyo monula' Batu. Apo Allah udah bulah Batu nantai monjadi Batu inyo kotakan pontikng.’

¹² Jadi ongkah Yesus nam inyo dapat monyolamant'an monsio doi' hukupan dosa. Obai di soluruh dunia bayo Sioam dionji'i kuaso ulih Allah pakai' monyolamant'an monsio. Co nyiant inyo bukai.”

¹³ Watu boko pomimpitn mondinga' rasul Petrus ongko rasul Yohanes bopandir agatn borani ubo nantai, sia' hiratn obai koduo rasul nantai bayo urakng biaso. Koduo rasul nantai kinyo bopondidikan. Boko pomimpitn nantai jam monyadari aman Petrus ongko Yohanes nantai murid Yesus.

¹⁴ Apo urakng inyo udah nyamanam nantai bodiritn bosamo Petrus ongko Yohanes. Obai nantai am, boko pomimpitn nantai kinyo dapat bopandir la'apo pan pakai' molawatn koduo rasul nantai.

¹⁵ Jadi sia' monyiuh oca' koduo rasul nantai dibaba' ko luar ruakan tompat potomuan nantai. Ongko, boko pomimpitn nantai bohoupm.

¹⁶ Kato sia', “La'apo inyo paca'an kito labuhan ko sia' duo nantai? Somuo urakng di Yerusalem udah tohu sia' duo inyo molabuhan mujisat luar biaso nantai. Kito co dapat monyangkal hal nantai.

¹⁷ Apo jangan sampai borito nantai mongkitn tosebar ko urakng banya'. Kito gola' moancapm sia' duo oca' sia' co bopandir sobagai utusan Urakng Nazaret nantai. Sia' pocayo Urakng Nazaret nantai am inyo moonji'i kuaso pakai' molabuhan mujisat nantai. Apo kito gola' morarakng sia' duo oca' co momboritoan ko sopo pan agatn kuaso Sio.”

¹⁸ Jadi sia' monyiuh oca' Petrus agatn Yohanes dibaba' mansu' agi'. Sia' morarakng koduo rasul nantai pakai' mongajar mongona'i Yesus damo bopandir sobagai utusan Urakng nantai ko sopo pan.

¹⁹ Apo Petrus ongko Yohanes monimbas, “Kaitn ja' inyo bopikir mono inyo bondar: Taat agatn Allah kata'an taat agatn kaitn!

²⁰ Koi duo co paca'an langunt. Koi gola' momboritoan la'apo inyo udah koi tiat huatan dinga' doi' Yesus.”

^21-22 Urakng banya' momuji Allah moniant mujisat nantai obai urakng nantai lumpuh doi' lahir apo udah boumur lobih doi' ompat puluh tohutn hoyu' dinyamani. Jadi, boko pomimpitn urakng Yahudi nantai co ulih monomuan caro pakai' mohukupm koduo rasul nantai agatn co bulah urakng banya' godi. Koponsuahannyo boko pomimpitn urakng Yahudi nantai mombebasan koduo rasul nantai, apo totap morarakng sia' agatn ancapan ni'in: oca' sia' jangan agi' momboritoan ko urakng bukai ajaran inyo jadi diajaran Yesus.

Kolompok urakng pocayo bodoa

²³ Lopas jadi dibebasan, Petrus ongko Yohanes bobali' ko kolompok urakng pocayo. Ongko sia' duo mongisahan somuo inyo dipandiran boko imam kopala' huatan boko pomimpitn Yahudi inyo bukai.

²⁴ Watu boko urakng pocayo mondinga' nantai, sia' somuo bosatu dalapm doa ko Allah. Kato sia', “Au Tuhatn inyo Maho Kuaso, Duatn nam inyo monjadian langit, bumi, lout, huatan somuo isinyo.

²⁵ Pado joman komai, angki-bayatn koi, Rajo Daud molayati Duatn. Duatn mongiripm Roh Duatn ko io, ongko io monulis pomandiran Duatn. Ni'innan bunyinyo: ‘Pocumo ja' boko banso bukai Yahudi moncubo molawatn Allah agatn boko ponggodi hati. Pocumo ja' boko urakng Yahudi bohoupm molawatn Sio.

²⁶ Boko rajo di dunia bososiap boparakng. Ongko boko pomimpitn bukai bogabukng agatn sia' pakai' molawatn Tuhatn Allah huatan Rajo Inyo Dijanjian-Nyo.’

²⁷ Oh, Tuhatn! Tulisan Rajo Daud nantai udah monjadi nyata. Di kota Yerusalem ni'in Gubernur Herodes, Gubernur Pontius Pilatus, boko urakng bukai Yahudi bosamo agatn boko urakng Yahudi udah bogabukng molawatn Yesus. Sio nantai Hulutn Duatn inyo kinyo bodosa, ia'an Rajo Inyo Duatn janjian.

²⁸ Apo Duatn Maho Kuaso inyo moatur somuonyo doi' joman komai. Somuonyo nantai udah tojadi obai sosuai agatn kohonda' Duatn.

²⁹ Jadi ni'inan, Au Tuhatn, porotiancam ancapan sia' ko koi. Tulukngcam koi boko hulutn Duatn. Pulahcam koi borani pakai' momboritoan pomandiran Duatn, ia'an Borito Boi' mongona'i Yesus.

³⁰ Pakaicam koi pan, Tuhatn, pakai' monyamani boko urakng sakit. Pakaicam koi pakai' bulah mujisat agatn kuaso Yesus, Hulutn Duatn inyo kinyo bodosa.”

³¹ Lopas jadi bodoa, tompat sia' bokumpul nantai boguyakng. Roh Allah monguaso'i sia' somuo, jadi sia' mongkitn borani momboritoan pomandiran Allah.

Urakng pocayo salikng bobagi kodampuan di antaro sia'

^32-33 Agatn kuaso inyo luar biaso, boko rasul hala momboritoan mongona'i Tuhatn Yesus udah hidup agi' doi' komatian. Allah kotakan monunju'an kasih-Nyo ko somuo urakng inyo pocayo nantai. Sia' hala sohati sopikiran. Co nyiant doi' sia' inyo moanggap kodampuannyo nantai umputn io siku'. Somuo inyo umputn sia' digunoan pakai' kopontikan bosamo.

³⁴ Jadi, co nyiant siku' pan inyo kokurakan obai banya' doi' sia' inyo monjual lakaunyo damo rumahnyo. Hasilnyo dibaba'

³⁵ ongko disorahan ko koduo bolas rasul. Duit nantai sia' pombagian ko urakng inyo momontikannyo.

³⁶ Sama'an nantai jam inyo dilabuhan Yusuf. Io urakng Yahudi inyo boasal doi' koturutan suku Lewi apo io lahir di Pulau Siprus. Boko rasul moningkau Yusuf nantai Barnabas, obai dalapm Baso Yahudi Barnabas nantai rotinyo ‘urakng inyo hala monulukng urakng bukai.’

³⁷ Barnabas monjual lakau umputnnyo. Io mombaba' duit hasil ponjualan lakaunyo ongko monyorahan ko boko rasul oca' ulih dipobagian ko urakng inyo ado kopontikan.