Kisah Boko Rasul 3 - Porjanjian Boharu Torjomahan Baso Dilakng Soari-ari

Petrus monyamani siku' urakng inyo lumpuh

¹ Timpu japm tigo babahari, Petrus huatan Yohanes honda' tuyut sombayakng babahari. Jadi sia' duo botula' ko tongahlamanan Rumah Allah.

² Sia' duo sampai ko lawakng tembok Rumah Allah bodamo “Gerbakng Kotakng Boi'”. Watu sia' duo honda' mansu', di santai ado urakng inyo kakinyo lumpuh tangga'i io lahir. Sotiap ari io dibaba' ko pintu gerbakng nantai pakai' mominto-minto ko boko urakng inyo koluar mansu' tongahlamanan Rumah Allah.

³ Pas io moniant Petrus ongko Yohanes, io mominto-minto doi' sia' jam.

⁴ Sia' moncorona'i urakng lumpuh nantai ongko Petrus bopandir, “Tiatbo koi.”

⁵ Jadi io borotian sia', boharap sia' paca'an moonji'inyo la'apo aja'.

⁶ Apo Petrus bopandir, “Aku co nyiant duit omas ongko pira' pakai' monulukng kolai. Apo ado caro bukai aku ulih monulukng kolai: Agatn kuaso Yesus Kristus, doi' laman Nazaret, bojalatncam!”

⁷ Ongko Petrus moncanggapm longan kanan urakng lumpuh nantai. Petrus monulukng io bodiritn. Lansukng kakinyo monjadi kuat.

⁸ Io copat bodiritn ongko mula'i bojalatn konuang-konaing. Io tuyut Petrus huatan Yohanes mansu' ko tongahlamanan Rumah Allah kapikng bojalatn huatan morunjakng-runjakng kapikng momuji-muji Allah.

^9-10 Watu somuo urakng moniant io, sia' konal agatn io. Io nantai urakng inyo hala dudu' mominto-minto di Gerbakng Kotakng Boi' nantai. Hiratn bondar sia', obai tontainyo io lumpuh apo watu ni'in io uliham bojalatn kapikng momuji Allah.

Petrus bopandir ko urakng banya' mongona'i kuaso Yesus

¹¹ Urakng inyo dinyamani nantai totap tuyut Petrus ongko Yohanes obai io kotakan bosukur. Sia' ado di salah sobuti' polantaran Rumah Allah inyo bodamoan ‘Polantaran Salomo’. Jadi somuo urakng inyo topocongo huatan hiratn nantai bonggidi'an mondataki sia' di santai.

¹² Petrus moniant obai somuo sia' nantai hiratn. Ongko, io bopandir, “Boko somadikanku urakng Israel! Jangan kaitn hiratn obai kojadian ni'in. Jangan kaitn borotian koi duo. Jangan kaitn bopikir koi duo bisi koboi'an husus di hadapan Allah sampai urakng lumpuh ni'in nyamanam. Jangan kaitn bopikir koi duo bisi kuaso siku' pakai' monyamani urakng ni'in.

^13-16 Urakng inyo kaitn tiat huatan udah kaitn konal ni'in nyamanam agatn kuaso Yesus. Io nyamanam obai io huatan koi samo-samo pocayo ko kuaso Yesus. Allah udah bulah Yesus sangant tohormat. Yesus nantai Hulutn Allah, Allah inyo disombah angki-bayatn kito Abrahapm, Ishak ongko Yakub. Apo kaitn mombaba' Yesus ko gubernur Pilatus oca' Sio dihukupm mati. Pilatus nantai udah momotusan pakai' mombebasan Sio. Apo kaitn monula' Sio ongko minto oca' Pilatus mombebasan siku' urakng pombunuh pakai' kaitn daripado mombebasan Yesus. Sio nantai Inyo Suci huatan Inyo Bondar. Jadi, sobondarnyo kaitn mombunuh Sio inyo Puku' hidup. Apo Allah udah bulah Sio hidup agi' doi' komatian. Koi duo udah tohu hal nantai bondar obai koi tiat agatn mato kopala' koi siku'.

¹⁷ Boko somadikan! Kaitn huatan boko pomimpitn kaitn molabuhan kojahatan nantai ko Yesus. Apo aku sadar kaitn co tohu sopo Sio sobondarnyo.

¹⁸ Apo agatn caro nantai, Allah monopat'i pomandiran-Nyo inyo udah disampaian ko boko nabi watu joman komai. Boko nabi nantai udah monulis obai Rajo Inyo Dijanjian Allah nantai gola' ajab sonsaro sampai mati.

¹⁹ Obai nantai am, tongga'ancam kaitn bulah dosa huatan bobali' taat agatn Allah. Labuhancam nantai oca' boko dosa kaitn diamputi.

²⁰ Jadi Tuhatn paca'an moonji'i sonang-nyaman ko dalapm hati kaitn. Ongko pan, Allah paca'an moutus Yesus Kristus, inyo Allah udah tontuan doi' mulonyo pakai' kaitn.

²¹ Apo Yesus gola' bodiapm di sorugo holu'ai. Sio paca'an datakng agi', watu Allah bulah dunia monjadi boharu. Allah udah bojanji mongona'i hal nantai. Janji-Nyo ditulis boko nabi-Nyo watu joman komai.

²² Sama'an Nabi Musa inyo bopandir ko urakng Israel, bunyi ni'inan katonyo, ‘Tuhatn Allah kaitn tajahan moutus siku' urakng doi' banso kaitn. Sio monjadi Nabi inyo monyampaian pomandiran Allah ko kaitn inyo samo ubo aku jam. Kaitn gola' taat ko somuo hal inyo dipandiran ulih Nabi nantai.

²³ Aman ado urakng inyo kinyo monaati pomandiran-Nyo, urakng nantai tajahan dikoluaran doi' umant Allah ongko dibonasoan.’

²⁴ Somuo nabi bukai pan udah momboritoan mongona'i boko kojadian inyo tojadi joman ni'in, tomansu' Nabi Samuel huatan somuo nabi bukai lopas jadi Samuel.

²⁵ Boko nabi nantai monyampaian janji Allah ko angki-bayatn kito. Apo somuo janji-Nyo nantai pakai' kito jam. Allah bopandir ko Abrahapm, Bopai angki-bayatn kito. Kato-Nyo, ‘Somuo banso di dunia paca'an diborokati ulih koturutan kolai.’ Yesus koturutan Abrahapm nantai am.

²⁶ Apo Allah moutus Yesus pakai' monjadi Hulutn-Nyo ko kito banso Yahudi tolobih doholu. Allah udah bulah Sio hidup agi' doi' komatian oca' kito diborokati. Ninam caronyo Allah momborokati kito, ia'an agatn monulukng kito oca' kito masikng-masikng botongga' bulah dosa ongko monaati Sio.”