Kisah Boko Rasul 28 - Porjanjian Boharu Torjomahan Baso Dilakng Soari-ari

Paulus di pulau Malta

¹ Lopas koi somuo tuntukng ko darat agatn solamant, boko urakng inyo bodiapm di pulau nantai momadahan ko koi obai pulau nantai bodamo Malta.

² Sia' monorima' koi agatn boi'. Watu nantai ari ija' hujatn huatan dingin. Jadi, sia' monokilan api pakai' koi.

³ Paulus pan mongumpulan boko ranggau pakai' suluh nantai. Watu io honda' molota'an ranggau nantai ko api, obai api nantai kotakan hangant koluaram siku' ular biso doi' kayu nantai. Ular nantai momatu' longan Paulus huatan kinyo tokolopas.

⁴ Ular nantai totap botangkil di longan Paulus. Watu boko urakng moniant nantai, sia' bopandir ko siku'-monyiku', “Pasti urakng ni'in siku' urakng pombunuh. Io udah solamant doi' bonakau. Apo duato Koadilan totap honda' mohukupm mati io.”

⁵ Ongko Paulus mongibasan ular nantai ko api. Apo io kinyo mooso podih.

⁶ Sia' monyangko nononyo longan Paulus paca'an bongka' damo Paulus paca'an mati. Cukup manah sia' monantian moniant la'apo inyo paca'an tojadi. Apo co nyiant inyo tojadi la'apo pan ko io. Ongko, sia' borubah pikiran. Sia' bopandir obai Paulus nantai duato.

⁷ Kinyo jouh doi' tompat nantai, ado tanah umputn Publius. Io nantai gubernur pulau nantai. Io monorima' koi agatn boi'. Koi monoluntukng di rumahnyo somanah tigo ari.

⁸ Watu nantai, bopainyo Publius tongahan gorikng huatan podih porut. Io monggarikng di kotidu'annyo ja'am. Jadi, Paulus mohampiki io. Paulus bodoa kapikng molota'an jarinyo ko io. Watu nantai jam urakng nantai dinyamani.

⁹ Lopas nantai, somuo urakng bukai inyo boponyakit di pulau nantai datakng ko Paulus. Somuo sia' dinyamani jam.

¹⁰ Sia' kotakan mohormati koi. Watu koi honda' molajuan pojalatan, sia' pan monyodia'an somuo kopontikan koi.

Paulus bolayar ko Roma

¹¹ Lopas tigo bulatn di pulau sia' nantai, koi botula' jumpat kapal inyo boasal doi' kota Aleksandria. Kapal nantai totap mongkalan di pulau Malta somanah musipm dingin. Bagian koholuan kapal nantai dipatar-ukir, patar-ukiran nantai molambakan duo duato Dioskuri.

¹² Koi singgah di kota Sirakusa di pulau Sicilia ongko tinggal di su'utn somanah tigo ari.

¹³ Doi' su'utn koi sampai ko kota Regium di hujukng propinsi Italia. Kohobu'annyo ado angin muput doi' arah solatatn, ia'an kohobu'annyo agi', koi tuntukng ko kota Puteoli inyo ado lobih di utara.

¹⁴ Di kota nantai, koi botomu agatn boko urakng pocayo agatn Yesus. Sia' mominto koi monoluntukng samoan agatn sia' somanah tujuh ari. Lopas nian, koi molajuan pojalatan ko Roma molalu'i jalatn darat.

¹⁵ Boko urakng pocayo doi' kota Roma udah mondinga' borito mongona'i koi. Jadi, ado doi' sia' datakng monomu'i koi di laman Balai Apius. Inyo bukainyo botomu koi di laman Balai Tigo. Timpu Paulus moniant sia' somuo, io bosukur ko Allah. Hatinyo mongkitn dikuatan.

¹⁶ Doi' duo laman nantai koi tuntukng di kota Roma. Di santai, boko pomimpitn pomorintah Romawi moonji'i ijitn oca' Paulus ulih bodiapm di rumah topisah siku'nyo. Apo gola' ado projurit inyo monjago io.

Paulus di Roma

¹⁷ Lopas jadi tigo ari, Paulus mohundakng boko pomimpitn urakng Yahudi di Roma pakai' monomu'i io. Lopas jadi sia' bokumpul, io bopandir ko sia', “Boko somadikan, aku co bulah salah molawatn banso kito. Aku pan co molanggar adat baso angki-bayatn kito. Apo, di kota Yerusalem boko urakng Yahudi monangkap aku. Ongko sia' monyorahan aku ko boko urakng Romawi.

¹⁸ Boko pojabat pomorintah Romawi nantai udah boriso'iku. Sia' monomuan obai co nyiant alasan pakai' mohukupm mati aku. Jadi, sia' honda' mombebasan aku.

¹⁹ Apo boko urakng Yahudi kotakan monontakng oca' aku kinyo dibebasan. Obai nantai, aku toposo momuhun oca' pokaroku ditorusan ko Kaisar negara Roma. Apo aku co honda' monyalahan bansoku siku'.

²⁰ Nanam obainyo, aku minto pakai' botomu agatn kaitn, oca' aku ulih monjolasan alasan aku monjadi tahatan di si'itn. Aku ditangkap obai aku pocayo ko Rajo Inyo Allah janjian ko urakng Israel.”

²¹ Sia' bopandir, “Koi bolupm monorima' surat doi' propinsi Yudea mongona'i kolai. Bolupm ado boko somadikan urakng Yahudi doi' su'utn inyo datakng mombaba' borito mongona'i kolai. Bolupm ado inyo mongisahan obai kolai udah bulah kojahatan.

²² Apo koi kalo mondinga' mongona'i kopocaya'an inyo kolai jumpati nantai. Banya' urakng di mono-mono bopandir molawatn kopocaya'an nantai. Jadi, koi honda' mondinga' lansukng doi' kolai mongona'i kopocaya'an kolai nantai.”

²³ Ongko, sia' monontuan watu pakai' botomu agi' agatn Paulus. Pas ari nantai lobih banya' urakng datakng bokumpul di rumah tompat io monoluntukng. Doi' sunsukng tuntukng ko malapm Paulus monjolasan ko sia' mongona'i Koraja'an Allah. Io moingant'an sia' mongona'i boko hal inyo ditulis Musa huatan boko nabi watu joman komai. Agatn caro nantai, io bousaha moyakit'an sia' pakai' pocayo ko Yesus.

²⁴ Ado doi' antaro sia' inyo monjadi pocayo obai ajaran Paulus nantai. Apo ado jam inyo kinyo pocayo.

²⁵ Sia' co sotuju. Jadi potomuan nantai dibubaran. Apo sobolupm sia' moninggalan tompat nantai, Paulus ija' bopandir sobuti' hal agi' ko sia'. Katonyo, “Timpu joman komai nabi Yesaya monyampaian pomandiran Roh Allah ko angki-bayatn kito. Pomandiran nantai topat bondar. Allah bopandir ko Yesaya,

²⁶ Kaitn paca'an mondinga' pomandiran Allah, apo co mongoroti. Kaitn paca'an moniant pompulahan Allah apo co mongoroti.

²⁷ Obai hati banso ni'in udah co honda' mongoroti. Kolindakan sia' udah tingal. Mato sia' udah buto. Nantai tojadi oca', sia' co moniant agatn mato sia', sia' co mondinga' agatn kolindakan sia', sia' co mongoroti agatn hati sia'. Jadi sia' co paca'an moninggalan dosa sia' ongko Aku co paca'an monyamani.

²⁸ Jadi, kaitn gola' mongotohu'i ni'in: borito mongona'i kosolamant'an doi' Allah nantai paca'an disampaian ko boko banso inyo bukainyo banso Yahudi, sia' paca'an pocayo agatn borito nantai.” [

²⁹ Lopas Paulus momandiran nantai, boko urakng Yahudi nantai bubar. Sia' ija' botikakng obai sia' kotakan songkayo pondapat].

³⁰ Paulus monotap di Roma somanah duo tohutn ponuh. Io totap bodiapm di rumah inyo io sewa. Io monorima' agatn boi' somuo urakng inyo datakng ko io.

³¹ Io momboritoan mongona'i Koraja'an Allah. Io mongajar mongona'i Tuhatn Yesus, Rajo Inyo Dijanjian Allah nantai. Io momboritoan nantai agatn borani. Co nyiant inyo mohalaki io.