Kisah Boko Rasul 27 - Porjanjian Boharu Torjomahan Baso Dilakng Soari-ari

Paulus bolayar monuju ko kota Roma

¹ Jadi, gubernur Festus momutusan obai Paulus gola' bolayar ko kota Roma di propinsi Italia. Festus monyorahan Paulus huatan boboropo urakng bukai inyo ditahatn ko siku' urakng powira. Damonyo Yulius. Io anggota doi' pasukan husus Kaisar negara Roma.

² Timpu koi ado di polabuhan di kota Kaisarea, ado kapal inyo datakng doi' kota Adramitium. Kapal nantai paca'an bobali' ko Adramitium agi' kapikng singgahi diboboropo polabuhan di sopanjakng pantai propinsi Asia. Ongko, koi jumpat kapal nantai ongko botula'. Aristarkhus pan tuyut samoan koi. Io nantai somadikan koi inyo boasal doi' kota Tesalonika di propinsi Makedonia.

³ Kohobu'annyo, koi tuntukng di Sidon. Yulius komandatn pasukan nantai boi' hati agatn Paulus. Io moijitan Paulus turutn pakai' monjongu' boko kawalnyo di Sidon. Sia' ulih moonji'i la'apo inyo io pontikan.

⁴ Timpu koi botula' doi' Sidon, ado bonakau muput doi' arah koholuan kapal. Jadi, kapal koi monyusur pinggir lout dampikng pulau Siprus oca' tolindukng doi' bonakau nantai.

⁵ Kapal koi monyomborakng lout inyo luar. Koi bolayar di sopia' solatatn propinsi Kilikia huatan Pamfilia. Ongko, koi tuntukng di kota Mira di propinsi Likia. Di santai koi turutn doi' kapal.

⁶ Komandatn pasukan nantai monomuan kapal doi' kota Aleksandria inyo paca'an botula' ko propinsi Italia. Jadi, io mourus oca' koi somuo ulih tuyut bolayar agatn kapal nantai.

⁷ Bonakau pagutn hala muput kuat doi' koholuan kapal. Jadi, somanah boboropo ari koi bolayar kotakan landai. Agatn uyuh jorih koponsuahannyo koi tuntukng di dampikng kota Knidus. Apo bonakau kuat nantai mohalaki kapal bolayar ko arah barat agi'. Ongko, koi ko arah solatatn oca' tolindukng ulih pantai solatatn pulau Kreta, dampikng tanjukng Salmone.

⁸ Agatn uyuh jorih koi bolayar di sopanjakng pantai solatatn pulau Kreta nantai. Ponsuahannyo koi tuntukng di sobuti' tompat inyo bodamo Polabuhan Boi', dampikng kota Lasea.

Bonakau mohontapm kapal Paulus sampai toganggal ongko hancur

⁹ Udah banya' watu inyo tobuakng somanah koi bolayar nantai. Ari rayo puaso urakng Yahudi udah laluam. Cukup bobohayo molajuan pojalatan. Obai nantai, Paulus momporingant'i sia' di kapal nantai. Katonyo,

¹⁰ “Boko somadikan, aku moniant kotakan bobohayo aman kito molajuan pojalatan. Kito paca'an rugi banya', kinyo bayo kapal ongko muant'annyo, apo banya' doi' kito bisa bomatian jam.”

¹¹ Apo urakng inyo mongomudian kapal huatan urakng umputn kapal bopikir lobih boi' aman molajuan pojalatan. Yulius nantai lobih pocayo ko sia' daripado Paulus.

¹² Memang polabuhan tompat koi ado bukai tompat inyo boi' pakai' bodiapm somanahan musipm bonakau. Jadi kobanya'an doi' sia' di kapal nantai lobih sotuju pakai' molajuan polayaran. Sia' boharap ulih tuntukng ko polabuhan Feniks ongko bodiapm di su'utn somanahan musipm bonakau. Polabuhan nantai lobih jouh ko arah barat apo ija' di pulau Kreta. Polabuhan nantai mohadap ko duo arah, ko barat daya huatan ko barat lout.

¹³ Watu nantai, angin mula'i muput agatn gamant doi' arah solatatn. Sia' monyangko obai sia' ulih bolayar torus sampai ko polabuhan Feniks nantai sosuai agatn hajat sia'. Jadi, sia' moangkat sauh ongko bolayar agi' monyusuri pantai solatatn pulau Kreta.

¹⁴ Apo kinyo manah lopas nian, ado bonakau botiup doi' arah pulau nantai. Bonakau ni'in disobut “Bonakau Timur Lout”.

¹⁵ Kali labuh bonakau nantai mohontapm kapal koi. Co sampat koi bobelok mohadap bonakau nantai. Jadi koi toposo mombiaran bonakau mombaba'i kapal koi.

¹⁶ Koi hanyunt sampai molalu'i sobuah pulau kocit. Damonyo pulau Kauda. Di santai koi bouyuh-jorih moamanan porohu kocit inyo dikobat di bolikat kapal nantai.

¹⁷ Lopasnyo jadi porohu kocit nantai didudus ko pucu' kapal, boko ana' buah kapal momasakng tali molingkar di sokolilikng kapal nantai oca' lobih kuat. Sia' gola' kapal nantai toganggal di pasir inyo dabu di tompat inyo bodamo Sirtis. Jadi, sia' monurutan layar oca' kapal lobih gamant tobaba' bonakau.

¹⁸ Apo bonakau kotakan kuat mohontapm kapal koi. Jadi, kohobu'annyo, sia' mombuakan muant'an ko lout oca' kapal lobih lompukng.

¹⁹ Pas ko tigo arinyo agatn tunju'-jari sia' siku', sia' gola' mombuakan boko alat kapal ko lout.

²⁰ Boari-ari bonakau nantai muput hala kotakan kuat. Hala ado awatn golap di langit sampai koi kinyo moniant matoari damo bintakng. Jadi koponsuahannyo koi monjadi putus asa. Koi bopikir kinyo mungkitn koi ulih solamant.

²¹ Boari-ari co nyiant inyo honda' makatn. Jadi, Paulus bodiritn di tongah-tongah koi somuo. Katonyo, “Boko somadikan, komai aku udah moonji'i nosihat oca' kito jangan bolayar doi' pulau Kreta. Apo kaitn kinyo monuruti nosihat nantai. Jadi, sokarakng kito moalapi boncana sama'an ni'in. Kito udah rugi banya'.

²² Apo sokarakng aku momporingant'i oca' kaitn jangan putus asa. Co nyiant siku' pan doi' antaro kito inyo paca'an mati. Apo bayo kapal ni'in mo inyo paca'an ropu'.

²³ Aku bopandir ubo nantai obai malapm mantai ado molekat datakng ko aku. Molekat nantai diutus Allahku, Allah inyo aku sombah, Allah inyo aku layati. Molekat doi' Allah nantai bodiritn di sopia' aku.

²⁴ Katonyo, ‘Paulus, jangan gola'. Kolai gola' ija' mohadap Kaisar negara Roma. Allah paca'an monunju'an koboi'an hati-Nyo ko kolai. Allah bojanji obai somuo urakng inyo bosamo-samo agatn kolai di kapal ni'in paca'an solamant.’

²⁵ Jadi, boko somadikan, jangan putus asa. Aku yakitn ko Allah. Somuo paca'an tojadi samo sama'an pomandiran molekat nantai ko aku.

²⁶ Apo kapal ni'in pasti paca'an toganggal di sobuah pulau.”

²⁷ Ompat bolas ari udah laluam doi' bonakau nantai tojadi. Timpu malapm nantai koi ija' hanyunt tuntukng ko tongah lout Adria. Pado tongah malapm boko ana' buah kapal mooso tongahan mohampiki tanah darat.

²⁸ Jadi, sia' monjatu'an batu botali ko dalapm ara'i pakai' moukur kodalapan ara'i lout. Dalapmnyo kiro-kiro ompat puluh meter. Lopas kapal maju sodikit lobih jouh, sia' monurutan talinyo agi'. Ruponyo dalapmnyo bayo kiro-kiro tigo puluh meter.

²⁹ Sia' monjadi gola' aman kapal toganggal ko batu ndampar. Jadi, sia' monurutan ompat sauh doi' bolikat kapal oca' kapal maju gogamant huatan boharap mudahan ari copat siakng.

³⁰ Apo boko ana' buah kapal nantai honda' monyolamant'an diri. Sia' pompadah mula'i monurutan boboropo sauh doi' koholuan kapal koi. Apo sobondarnyo sia' monurutan porohu kocit oca' ulih morarian diri.

³¹ Moniant nantai, Paulus bopandir ko Yulius huatan boko projuritnyo, “Aman boko ana' buah kapal nantai kinyo totap di kapal ni'in, kaitn co mungkitn solamant.”

³² Jadi, boko projurit nantai monota'i boko tali inyo dipakai pakai' monurutan porohu kocit nantai. Sia' mombiaran porohu kocit nantai jatu' ko lout ongko hanyunt tobaba' golumbakng.

³³ Holapm sunsukngnyo, Paulus monyosahan koi somuo oca' makatn. Katonyo, “Udah ompat bolas ari kaitn co makatn la'apo pan. Kaitn tantian ja'am, gola' apo inyo paca'an tojadi.

³⁴ Jadi, aku monyosahan kaitn siku'-monyiku' pakai' makatn ninam. Kaitn gola' makatn oca' mondapat kokuatan pakai' monyolamant'an diri. Kaitn somuo paca'an solamant mo.”

³⁵ Lopas jadi io bopandir nantai, io monguti' roti ongko botorima' kasih ko Allah di hadapan somuo urakng. Io momingkai'-mingkai' roti nantai, ongko mula'i momua'inyo.

³⁶ Hati somuo urakng monjadi kuat agi'. Ongko, sia' mula'i makatn.

³⁷ (Koi inyo ado di dalapm kapal nantai bojumlah duo ratus tujuh puluh onam urakng).

³⁸ Koi somuo makatn sampai konyang. Lopas nian boko ana' buah kapal nantai mombuakan muant'an gandupm ko lout oca' kapal nantai lobih lompukng.

³⁹ Pas matoari udah moncara', sia' ulih moniant tanah darat. Sia' kinyo tohu tompat nantai. Apo sia' moniant ado tolu' agatn pantai pasir. Jadi, sia' honda' mongkalan kapal di pantai nantai.

⁴⁰ Jadi sia' molopasan boko tali sauh nantai. Sia' mombiaran boko sauh nantai jatu' ko dalapm lout ja'am. Pontongahan, sia' molopasan boko tali inyo dipasakng ko alat komudi tontai oca' sia' ulih moarahan kapal agi'. Sia' pan monoi'an layar jam oca' angin muput kapal nantai. Ongko sia' moncubo monuju ko pantai.

⁴¹ Apo ado ara'i inyo kinyo gaho dalapm. Bagian koholuan kapal nantai morudu rado pasir ongko toganggal. Kapal nantai kinyo ulih bogora' agi'. Sodakan bagian bolikat kapal nantai mula'i hancur obai dihontapm golumbakng.

⁴² Timpu nantai, boko projurit gola' aman somuo tahatan paca'an bononang ko darat ongko morarian diri. Jadi, sia' bohajat pakai' mombunuh somuo tahatan nantai.

⁴³ Apo Yulius honda' monyolamant'an Paulus. Jadi io morarakng sia'. Io momorintahan somuo urakng inyo ulih bononang lobih doholu torojutn ko lout ongko bononang ko darat.

⁴⁴ Boko urakng inyo kinyo tohu bononang disiuh pakai' bokolayut ko boko papatn huatan boko kopocahan bukai doi' kapal nantai. Agatn caro sama'an nantai, somuo urakng tuntukng ko pantai agatn solamant.