Kisah Boko Rasul 26 - Porjanjian Boharu Torjomahan Baso Dilakng Soari-ari

Paulus mombela diri di hadapan Rajo Agripa (26:1-11)

¹ Rajo Agripa bopandir ko Paulus, “Kolai ulih bopandir pakai' mombela diri kolai.” Jadi, Paulus monyodakan tunju'nyo ongko bopandir,

² “Habakng Agripa, aku udah dituduh boko urakng Yahudi. Apo pado ari ni'in aku sonang bondar obai aku ulih mombela diri di hadapan duatn.

³ Aku sonang toutamo obai Habakng udah mongotohu'i sobobondarnyo mongona'i somuo adat baso urakng Yahudi. Habakng pan mongotohu'i mongona'i boko hal inyo monimbulan songkayo pondapat di antaro urakng Yahudi. Obai nantai, aku minto oca' duatn mondinga'an aku agatn sabar.

⁴ Tangga'i aku ija' muda', aku tinggal di antaro bansoku urakng Yahudi di laman tompu'ku ni'in huatan di kota Yerusalem. Jadi, somuo sia' udah mongotohu'i caro hidupku komai.

⁵ Sia' udah manah konal agatn aku. Jadi, aman sia' honda', sia' ulih mongisahan mongona'i caro hidupku komai. Aku tomansu' kolompok urakng Farisi, ia'an kolompok urakng inyo palikng taat molabuhan somuo poraturan agama kito.

^6-7 Pado joman komai, Allah bojanji moutus siku' urakng Rajo ko angki-bayatn kito huatan koduo bolas suku doi' banso kito Israel sangant moharap'an jam janji nantai ditopati. Nanam alasan sia' sobobondarnyo monyombah Allah. Sia' monyombah siakng ongko malapm. Doi' komai, aku pocayo Allah paca'an monopat'i janji-Nyo nantai. Habakngku Agripa, aku dituduh boko urakng Yahudi obai aku pocayo Allah udah monopat'i janji-Nyo nantai. Obai kopocaya'an nantai am aku diadili.

⁸ Boko urakng inyo monuduh aku, soharusnyo kaitn pocayo obai Allah bulah urakng bobali' hidup doi' komatian.

Paulus mongisahan caro Yesus morubah kohidupannyo (26:9-23)

⁹ Komai aku pan bopikir obai aku gola' molawatn agatn koras somuo urakng inyo pocayo agatn Yesus doi' Nazaret.

¹⁰ Jadi pado watu aku bodiapm di Yerusalem, aku molawatn boko urakng inyo pocayo agatn Yesus. Aku dapat hak doi' boko imam kopala' pakai' momansu'an banya' doi' sia' ko dalapm ponjara. Aku kotakan sotuju bondar aman sia' dihukupm mati.

¹¹ Aku pan opat mondorako'i sia' inyo kotomuanku dalapm boko rumah sombayakng. Aku bousaha momoso sia' pakai' co pocayo agi' agatn Yesus. Aku kotakan godi agatn sia' sampai aku monyasah sia'. Aku monyasah sia' ko boko kota bukai jam oca' aku dapat mondorako'i sia'.

¹² Nanam alasan aku botula' ko Damsyik. Aku mondapat'an hak doi' boko imam kopala' pakai' mondorako'i boko urakng inyo pocayo agatn Yesus.

¹³ Apo, dinga' ni'in bo rajoku, pas tongah ari dalapm pojalatan ko kota Damsyik nantai, sopongirap ado cohayo doi' langit. Cohayo nantai lobih torakng doi' matoari. Cohayo nantai momanjah sokolilikngku huatan boko pokawalan inyo bojalatn bosamo agatn aku.

¹⁴ Lansukng koi somuo tokorobah ko tanah. Ongko, aku mondinga' saro urakng inyo bopandir ko aku dalapm baso Ibrani. Kato-Nyo, ‘Saulus, Saulus, botongga'cam kolai mondorako'i Aku! Kolai bayo momodihi diri kolai siku' mo, aman kolai molawatn Allah.’

¹⁵ Lopas nian, aku botakutn, ‘Sopo Duatn, Tuhatn?’ Tuhatn bopandir ko aku, ‘Aku ni'innam Yesus, inyo kolai dorako'i!

¹⁶ Ni'in bodiritn cam. Aku moniant'an diri ko kolai pakai' moutus kolai monjadi polayatn-Ku. Kolai gola' momboritoan mongona'i la'apo inyo udah kolai tiat ni'in. Kolai pan gola' momboritoan mongona'i la'apo inyo paca'an Aku tiat'an ko kolai nononyo.

¹⁷ Aku paca'an monyolamant'an kolai doi' boko urakng inyo molawatn kolai, boi' doi' urakng Yahudi honda' pan urakng inyo bukai Yahudi. Aku moutus kolai ko sia'.

¹⁸ Kolai paca'an monulukng sia' oca' mongoroti jadi sia' co hidup dalapm kopocaya'an inyo salah, apo bobali' pocayo inyo bondar. Kolai paca'an monulukng sia' oca' mongoroti jadi sia' kinyo hidup dibabah kuaso Iblis agi', apo bobali' ongko hidup di babah kuaso Allah. Agatn ubo nian, aman sia' pocayo agatn Aku, ongko boko dosa sia' paca'an diamputi. Sia' mondapat tompat di antaro umant Allah.’ Nanam pomandiran Yesus ko Aku.

¹⁹ Obai nantai, Habakngku Agripa, aku kotakan monaati porintah inyo Yesus onju' ko aku dalapm poniant'an doi' sorugo.

²⁰ Mulonyo, aku momboritoan mongona'i Yesus ko boko urakng di Damsyik, ongko di Yerusalem, ongko di soluruh doerah propinsi Yudea. Lopas nantai, aku momboritoan mongona'i Yesus ko boko banso inyo bukainyo banso Yahudi. Aku momboritoan obai sia' gola' botongga' bulah dosa huatan hidup monyonangan hati Allah. Aku momboritoan, sia' gola' molabuhan porbuatan inyo monunju'an obai sia' memang bondar-bondar botongga' bulah dosa.

²¹ Obai aku momboritoan somuo nantai am, boko urakng Yahudi monangkap aku di tongahlamanan Rumah Allah ongko moncubo mombunuhku.

²² Apo Allah molindukiku. Sampai ni'inan aku ija' hidup inya'anpan aku ija' ulih momboritoan mongona'i Yesus ko boko urakng inyo dianggap kinyo pontikng honda' pan boko urakng pontikng. La'apo inyo aku boritoan kinyo bukai doi' la'apo inyo ditulis boko nabi huatan Musa. Pado joman komai sia' momboritoan obai

²³ Rajo Inyo Dijanjian Allah gola' ajab sonsaro sampai mati. Apo sia' pan monulis jam obai Sio paca'an monjadi urakng potamo inyo bobali' hidup doi' komatian. Agatn caro nantai Sio ulih monjadi ubo torakng inyo monjolasan kohonda' Allah ko banso Yahudi huatan ko boko banso inyo bukainyo banso Yahudi.”

Paulus moanjuran Rajo Agripa pakai' monjadi pocayo agatn Yesus (26:24-32)

²⁴ Pontongahan Paulus momandiran boko hal nantai pakai' mombela dirinyo, Festus bopandir agatn saro borakng, “Paulus, kolai udah gogilo! Kolai udah tolalu banya' bolajar sampai kolai monjadi gogilo.”

²⁵ Apo Paulus monimbas, “Gubernur Festus inyo tohormat. Aku cuku gogilo. Pomandiranku bondar huatan mansu' akal.

²⁶ Rajo Agripa pan udah tohu mongona'i boko hal ni'in. Obai nantai, aku ulih bopandir agatn torus torakng ko io. Aku yakitn obai io udah kalo mondinga' mongona'i boko hal ni'in. Pasti io tohu somuonyo obai boko hal ni'in tojadi di boko tompat inyo dikotohu'i urakng banya'.”

²⁷ Ongko Paulus botakutn ko rajo Agripa, “Apobai duatn pocayo mongona'i la'apo inyo ditulis boko nabi? Aku yakitn duatn pocayo nantai!”

²⁸ Ongko Agripa bopandir, “Jangan bopikir kolai ulih mongkongkanti'iku monjadi urakng Kristen dalapm watu socopat ni'in.”

²⁹ Kato Paulus, “Biar pan duatn pocayo dalapm watu socopat ni'in, damo manah-komanahan duatn pocayo, aku totap bodoa ko Allah oca' duatn pocayo agatn Yesus. Kinyo bayo duatn, apo somuo urakng inyo hadir inyo mondinga'an aku sari ni'in. Aku bodoa kaitn somuo monjadi samo sama'an aku. Apo aku co honda' kaitn dikobat agatn rantai bosi sama'an ni'in.”

³⁰ Lopas jadi pomandiran Paulus nantai, rajo Agripa bodiritn. Gubernur Festus, Bernike, huatan somuo urakng inyo dudu' bosamo sia' angkat bodiritn jam.

³¹ Sia' somuo koluar doi' ruakan nantai. Kali udah koluar, sia' bopandir ko siku'-monyiku', “Urakng ni'in kinyo molabuhan porbuatan jahat sampai io gola' dihukupm mati. Io pan soharusnyo kinyo dimansu'an ko dalapm ponjara.”

³² Rajo Agripa bopandir ko gubernur Festus, “Urakng ni'in sobondarnyo udah ulih dibebasan. Apo io udah minto oca' io ulih diadili Kaisar negara Roma. Jadi, nanam inyo gola' tojadi.”